‘Amɛshe Anɔkwa Nyɔŋmɔ Lɛ Gbeyei’

BENI Israelbii lɛ yɔɔ nyɔŋyeli mli yɛ Mizraim lɛ, aha Shifra kɛ Pua ni ji yei ni fɔ́ɔ mɛi lɛ yaje nɔnyɛɛ shishi. Bɔni afee ni Farao akudɔ maŋsɛɛ bii lɛ ayi ni faa waa lɛ hewɔ lɛ, efã nɛkɛ yei nɛɛ akɛ: “Kɛ Nyɛtee Hebriyei lɛ afɔmɔ ni nyɛna . . . akɛ binuŋ lɛ, nyɛgbea lɛ.”​—2 Mose 1:​15, 16.

Shifra kɛ Pua ‘she anɔkwa Nyɔŋmɔ lɛ gbeyei,’ no hewɔ lɛ, amɛfee ekãa ni “amɛfeee bɔ ni Mizraim maŋtsɛ lɛ kɛɛ amɛ lɛ.” Shi moŋ amɛhere gbekɛbii hii ni afɔ́ lɛ ayiwala, eyɛ mli akɛ kulɛ yiŋkpɛɛ ni mli wa nɛɛ baanyɛ ekɛ amɛ awo oshara mli moŋ. Yehowa ‘fee yei ni fɔ́ɔ mɛi lɛ ejurɔ,’ ni ewo amɛyiwalaheremɔ nifeemɔ lɛ he nyɔmɔ.​—2 Mose 1:​17-⁠21.

Sane nɛɛ maa bɔ ni Yehowa hiɛ sɔɔ mɛi ni sɔmɔɔ lɛ lɛ nɔ mi. Kulɛ ebaanyɛ esusu akɛ Shifra kɛ Pua jie ekãafeemɔ kpo yɛ nɔ ni amɛfee lɛ he moŋ, shi nitsumɔ ni akɛfeɔ adesa ejurɔ kɛkɛ ni. Kɛfata he lɛ, yoo ni jwɛŋmɔŋ kã shi egbeŋ abifabii! Yɛ fɛɛ sɛɛ lɛ, ŋwanejee ko bɛ he akɛ Yehowa susu anɔkwale ni eji akɛ adesai komɛi feɔ nibii fɔji diɛŋtsɛ yɛ gbɔmɔ gbeyeishemɔ hewɔ lɛ he. Ele akɛ, jeee mlihilɛ su ni adesai yɔɔ lɛ pɛ ji nɔ ni tsirɛ nɛkɛ yei ni fɔ́ɔ mɛi nɛɛ, shi moŋ Nyɔŋmɔ gbeyeishemɔ kɛ jamɔ mli hetuu-kɛhamɔ hu fata he.

Kwɛ bɔ ni wɔbaanyɛ wɔda shi akɛ wɔɔsɔmɔ Nyɔŋmɔ ni yɔseɔ nibii ni wɔfeɔ yɛ anɔkwayeli mli lɛ! Yɛ anɔkwale mli lɛ, ekolɛ wɔteŋ mɔ ko mɔ ko kɛ anɔkwayeli he kaa ni Shifra kɛ Pua kɛkpe lɛ eko ekpeko pɛŋ. Kɛlɛ, kɛ wɔdamɔ shi shiŋŋ kɛha jalɛnifeemɔ​—kɛ́ yɛ skul jio, wɔnitsumɔhe jio, aloo yɛ shihilɛ lɛ eko fɛɛ eko mli lɛ​—Yehowa ekuŋ ehiɛ eshwieŋ wɔ anɔkwa suɔmɔ lɛ nɔ. Yɛ no najiaŋ lɛ, “eji mɛi ni taoɔ esɛɛgbɛ lɛ anyɔmɔwolɔ.” (Hebribii 11:⁠6) Hɛɛ, “Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ, ni nyɛkɛsɔmɔ mɛi krɔŋkrɔŋi lɛ, ni nyɛsaa nyɛsɔmɔɔ amɛ lolo lɛ.”​—Hebribii 6:⁠10.