Anɔkwa Toiŋjɔlɛ ní Aaaná yɛ Shikpɔŋ ni Haomɔ Yɔɔ Nɔ Mli

Amaniɛ ko ni abɔ yɛ afi 1969 mli lɛ kɛɛ akɛ: “Nɔ ni jamɔ kui ateŋ awuiyeli kɛbaa lɛ he gbeyeishemɔ lɛ eje shishi.”[1] Nɛkɛ be nɛɛ mli Haomɔi,[2] ni ji béi ni yaa nɔ bianɛ yɛ Northern Ireland lɛ mli bɔi waa.[3]

JAMƆ kui ateŋ awuiyeli kɛ gbɔmɔ gbee bafee daa gbi shihilɛ mli nifeemɔ yɛ be mli ni Protestantbii kɛ Katolikbii ni gbeɔ gbɔmɛi, “hii ni hiɛ yɔɔ la ni yɔɔ fãi srɔtoi enyɔ lɛ fɛɛ”[4] yɛ maŋkwramɔŋ kɛ jamɔ kui amli lɛ woɔ tawuu ni akɛpeleɔ nɔyeli he yɛ Ireland lɛ mli hewalɛ lɛ. The Irish Times lɛ bɔ amaniɛ akɛ, kɛjɛ nakai beaŋ kɛbaa nɛɛ, “agbe gbɔmɛi ni fa fe 3,600, ni mɛi akpei abɔ hu etsɔmɔ akpakei yɛ nɔ ni miihe ashɛ afii 30 basabasafeemɔ be nɛɛ mli.”[5]

Shi eji anɔkwale akɛ, enɛ jeee béi hee. Ehao Ireland afii ohai babaoo. Agbe gbɔmɛi babaoo yɛ Northern Ireland yɛ nyɛsɛɛ afii fioo nɛɛ amli fe bei fɛɛ ní eho, shi dɔlɛ kɛ basabasafeemɔ ni ekɛba lɛ efite gbɔmɛi ni yɔɔ Ireland fɛɛ lɛ ashihilɛ.

Yɛ nakai shihilɛ lɛ mli lɛ, Yehowa Odasefoi kɛ nɔ ni fe afii oha etsɔɔ naagbai ni ehao shikpɔŋ ni haomɔ yɔɔ nɔ nɛɛ mli lɛ naa tsabaa diɛŋtsɛ. Nakai tsabaa lɛ ji Nyɔŋmɔ Maŋtsɛyeli ní akɛwo Yesu Kristo dɛŋ lɛ. (Mateo 6:​9, 10) Dani Basabasafeemɔ lɛ aaaje shishi yɛ afi 1969 mli lɛ, no mli lɛ Yehowa Odasefoi 876 yɔɔ Ireland.[6] Shi amrɔ nɛɛ ayɛ mɛi ni fa fe 4,500 yɛ asafoi ni fa fe 100 mli.[7] Naa niiashikpamɔi fioo ni jɛ mɛi komɛi ni kɛ amɛhe wooo maŋkwramɔŋ kɛ asraafoi anitsumɔi amli lɛ adɛŋ.

“Kɛ Mida lɛ, Mafata IRA He!”

Michaela[8] da ni ebatsɔ Katoliknyo yɛ Republic of Ireland. Atsɔɔ lɛ Ireland yinɔsane kɛ béi ní etee nɔ aahu yɛ ekɛ Britain teŋ afii ohai babaoo lɛ yɛ skul. Beni eji gbekɛ lɛ, ená hetsɛ̃ ni mli wa eha Ŋleshibii lɛ ni enaa amɛ akɛ “mɛi ni haoɔ Irelandbii.” Beni eye afii nyɔŋma lɛ, ekɛɛ enaa akɛ, “Kɛ mida lɛ, mafata IRA lɛ he!” (Irish Republican Army) Ekɛɛ akɛ: “Egba mitoiŋ, ni minyɛɔ mikaiɔ lolo kɛbashi ŋmɛnɛ.” Sɛɛ mli lɛ, ená ele akɛ, enii fata Britain asraafoi lɛ ahe yɛ Jeŋ Ta I lɛ mli. Be ko lɛ, ehe bahia ni enaa adamɔ enii hiɛ bɔni afee ni IRA lɛ mli bii lɛ akatswa lɛ tu.

Shi fɛɛ sɛɛ lɛ, beni Michael da fioo lɛ, esumɔ ni efee nɔ ko ni ekɛye ebua enanemɛi Katolikbii ni yɔɔ Northern Ireland lɛ. Ekɛɛ akɛ: “Nakai be lɛ mli lɛ, kɛha mi lɛ, efee tamɔ nɔ ni mɛi pɛ ni feɔ nɔ ko koni amɛkɛye amɛbua Katolikbii ni yɔɔ Northern Ireland lɛ ji IRA lɛ.” Akɛni nɔ ni ebuɔ akɛ eji jalɛ gbɛ lɛ kanya lɛ hewɔ lɛ, ebatsɔ IRA kuu lɛ mlinyo ni ená tsɔsemɔ yɛ tawuu nibii ahe nitsumɔ mli. Protestant asraafoi[9] lɛ tswia enanemɛi etɛ tu ni amɛgbe amɛ yɛ Northern Ireland.

Naagbee mli lɛ, Michael yiŋ bɔi lɛ kɔshikɔshifeemɔ yɛ asraafoi atawuu lɛ he, ákɛ nɔkwɛmɔnɔ lɛ, béi ní mli wa ní tee nɔ yɛ asraafoi akui srɔtoi lɛ ateŋ lɛ mli lɛ hao lɛ. Beni eyɔɔ gboklɛfoi atsuŋ yɛ efɔŋ ni efee ni kɔɔ IRA nifeemɔ he lɛ mli lɛ, esɔle eha Nyɔŋmɔ ní eye ebua lɛ ní ena gbɛ diɛŋtsɛ ni kɛ mɔ yaa naanɔ toiŋjɔlɛ kɛ jalɛ sane mli. Be ko sɛɛ lɛ, Yehowa Odasefoi ba eshia. Shi kɛlɛ, tsutsu gbɔmɛi ahe jwɛŋmɔ fɔŋ ni ehiɛ lɛ bafee gbɛtsii nii. Ŋleshibii ji Odasefoi lɛ. Nyɛ̃ɛ ni mli wa waa ni eyɔɔ kɛha amɛ lɛ ha ebawa kɛha lɛ akɛ eeebo amɛ toi. Ekɛɛ akɛ: “Jeee be fɛɛ be mihereɔ amɛ hiɛmɛɛ, shi amɛkã he amɛba miŋɔɔ ni amɛkɛ mi gba sane, ni mibɔi yɔsemɔ akɛ Nyɔŋmɔ Maŋtsɛyeli lɛ kɛ maŋkwramɔŋ kɛ shihilɛ mli nibii gbohii fɛɛ ni mibɔɔ mɔdɛŋ ni majie yɛ jɛmɛ lɛ baaba naagbee.”​—Lala 37:​10, 11; 72:​12-​14.

Shihilɛ ni mli wa fe fɛɛ lɛ ba gbi ko gbɛkɛ beni Michael kɛ IRA asraafonyo nukpa lɛ kpe ni ekɛɛ lɛ akɛ: “Wɔyɛ nitsumɔ ko kɛha bo ni obaatsu.” Michael kɛɛ akɛ: “Minu he akɛ esa akɛ makpɛ miyiŋ yɛ jɛmɛ amrɔ nɔŋŋ, no hewɔ lɛ, mimu waa ni mikɛɛ lɛ akɛ, ‘Amrɔ nɛɛ, Yehowa Odasefoi ateŋ mɔ kome ji mi,’ eyɛ mli akɛ nakai be lɛ mli lɛ abaptisiko mi moŋ. Shi mile kɛkɛ akɛ miisumɔ ni mafee Yehowa tsulɔ.” Asraafonyo nukpa lɛ ha hetoo akɛ: “Esa akɛ akɛ bo akpɛtɛ gbogbo he ni atswa bo tu.” Yɛ hegbeyeiwoo lɛ fɛɛ sɛɛ lɛ, Michael shi IRA lɛ. Etsɔ Yehowa wiemɔi ní eha ená ejwɛŋmɔ kɛ etsui nɔ hewalɛ lɛ nɔ ená ekãa ni ekɛfee enɛ. “Yɛ be ni sa mli lɛ, miŋa kɛ mibii lɛ ateŋ mɛi komɛi hu jɔɔ amɛwala nɔ amɛha Yehowa. Amrɔ nɛɛ, wɔyɛ tsuiŋ toiŋjɔlɛ diɛŋtsɛ. Ni wɔbaada Yehowa shi be fɛɛ be akɛ eŋmɛ wɔ gbɛ ni wɔkase anɔkwale lɛ ni wɔná toiŋjɔlɛ shɛɛ sane lɛ gbɛɛ-kɛ-shwamɔ lɛ mli gbɛfaŋnɔ yɛ shikpɔŋ ni haomɔ yɔɔ nɔ lɛ mli.”​—Lala 34:14; 119:165.

He ní Akɛwooo Maŋ Saji Amli lɛ Ji Hebuu Nɔ̃ Diɛŋtsɛ

Patrick kɛɛ akɛ: “Mida yɛ akrowa ko ni yɔɔ County Derry yɛ Northern Ireland lɛ mli.[10] Beni miji gbekɛ lɛ, mileee nɔ ko nɔ ko fe Haomɔi lɛ kɛkɛ. Eka shi faŋŋ akɛ nakai shihilɛ lɛ ná bɔ ni mikwɛɔ nii kɛ bɔ ni misusuɔ nii ahe mihaa lɛ nɔ hewalɛ waa diɛŋtsɛ.” Maŋhedɔɔ kɛ Britainbii ahe jwɛŋmɔ fɔŋ ni mli wa lɛ ha Patrick bafee keketee yɛ enii ahesusumɔ mli. Ena sɔlemɔyalɔi ni yɔɔ maŋkwramɔŋ basabasafeemɔ afãi enyɔ lɛ ni amɛmiiku Kristofoi ashishijee shishitoo mlai kɛ adesai ajeŋba kpakpa he shishitoo mlai hu amli. Enɛ hewɔ lɛ, etsi ehe kɛjɛ jamɔ he, ni naagbee lɛ, ebatsɔ mɔ ni heee eyeee akɛ Nyɔŋmɔ yɛ kɛ mɔ ni kpɛlɛɔ Marx tsɔɔmɔi anɔ yɛ eshihilɛ fɛɛ mli.​—Okɛto Mateo 15:​7-9; 23:​27, 28 he.

Patrick kɛɛ akɛ: “Saji ni mikaiɔ kɛjɛ migbekɛbiiashi waa ji hɔmɔ ni mɛi ni fiɔ kwasafo nɔyeli sɛɛ ni awo amɛ tsuŋ lɛ kɛwa amɛhe yi yɛ Kooyigbɛ lɛ. Ená minɔ hewalɛ waa diɛŋtsɛ. Mikaiɔ akɛ mishĩ Ireland aflaŋaa ni miŋmala nibii ni mikɛte shi miwo Britain lɛ yɛ he fɛɛ he ni manyɛ. Beni miye afii 15 lɛ, mitsu nii yɛ mɛi ni kɛ hɔmɔ wa amɛhe yi ni amɛgboi lɛ ateŋ ekome yarafeemɔ shishi.” Taakɛ mɛi babaoo ni kɛ amɛhe wo basabasafeemɔ kɛ yeyeeyefeemɔ ni tee nɔ yɛ nakai be lɛ mli lɛ ji lɛ, Patrick kɛ ehe wo atuatsemɔ kɛ shifoo ni ebu lɛ akɛ eji nifeemɔ ni amɛkɛmiitao jalɛ shihilɛ kɛ egbɔyeli lɛ mli. Ekɛ maŋhedɔlɔi ni sane wa[12] ni Britain nɔyeli lɛ kɛ amɛteŋ babaoo wo gboklɛfoi atsuŋ lɛ ateŋ mɛi babaoo fee nanemɛi.

Patrick kɛɛ akɛ: “Agbɛnɛ shika he naagbai ahewɔ lɛ, miyahi England be fioo. Beni miyɔɔ jɛmɛ lɛ, Britain polisifoi lɛ mɔ minanemɛi lɛ ateŋ mɔ kome ni miiya ní eyatswa okplɛm.” Eyɛ mli akɛ Patrick yɛ henumɔ lolo kɛha maŋhedɔɔ nifeelɔi lɛ moŋ, shi esu bɔi tsakemɔ. Ebɔi yɔsemɔ akɛ jwɛŋmɔ fɔŋ ni ená yɛ Ŋleshibii fɛɛ ahe lɛ bɛ nɔdaamɔ nɔ ko. Ekɛɛ akɛ: “Mibɔi yɔsemɔ hu akɛ asraafoi anitsumɔ lɛ nyɛŋ ekɛ naagbai anaa tsabaa aba kɔkɔɔkɔ ni enyɛŋ ejie jalɛ sane ni ayeee ni haoɔ mi lɛ kɛya. Juu kɛ fɔ̃ kɛ tɔmɔi babaoo yɛ mɛi ni kudɔɔ asraafoi agbɛjianɔtoo lɛ ateŋ tsɔ.”​—Jajelɔ 4:1; Yeremia 10:23.

Naagbee mli lɛ, Patrick ku esɛɛ etee Northern Ireland. “Beni miku misɛɛ miba lɛ, minaanyo ko kɛ mi tsɔɔ Yehowa Odasefoi lɛ.” Biblia lɛ ní Odasefoi lɛ kɛ Patrick kaseɔ lɛ ha ená adesai ateŋ béi kɛ basabasafeemɔ lɛ naa tsabaa diɛŋtsɛ. Beni Biblia mli shishitoo mlai lɛ náa ejwɛŋmɔ kɛ etsui nɔ hewalɛ lɛ, etee ehiɛ oyayaayai yɛ mumɔŋ. (Efesobii 4:​20-​24) Ekɛɛ akɛ: “Amrɔ nɛɛ, yɛ nɔ najiaŋ ni makpaŋ yɛ teemɔŋ akɛ mafã hegbɛi ni yeɔ nɔ lɛ ahe lɛ, mishiɛɔ toiŋjɔlɛ shɛɛ sane ni yɔɔ Biblia lɛ mli lɛ moŋ, yɛ hei ni mɛi ni yeɔ nɔyeli lɛ anɔkwa lɛ po yɔɔ ni kulɛ miyaŋ jɛmɛ lɛ[13]. Yɛ anɔkwale mli lɛ, beni jamɔ kui ateŋ gbɔmɔgbee lɛ yaa nɔ yɛ Belfast lɛ, no mli lɛ, mɛi pɛ ni nyɛɔ amɛnyiɛɔ yɛ hei ni mɛi ni yɔɔ Ŋleshi nɔyeli lɛ fã lɛ yɔɔ kɛ hei ni mɛi ni wieɔ shiɔ Ŋleshi nɔyeli lɛ yɔɔ lɛ ni amɛtaaa asraafoi akar mli pɛ ji Yehowa Odasefoi.” Taakɛ Odasefoi krokomɛi ni yɔɔ Northern Ireland yɛ nɛkɛ be nɛɛ mli lɛ ji lɛ, ena akɛ ehe ni ekɛwooo maŋkwramɔ saji amli taakɛ klɛŋklɛŋ Kristofoi lɛ ji lɛ ji hebuu nɔ diɛŋtsɛ. (Yohane 17:16; 18:36) Emu esane lɛ naa akɛ: “Eji heyeli diɛŋtsɛ akɛ aaana akɛ Yehowa baatsɔ Yesu Kristo nɔ ekɛ anɔkwa jalɛsaneyeli kɛ heyeli kɛmiijɛ nɔnyɛɛ mli abaha adesai aweku lɛ fɛɛ.”​—Yesaia 32:​1, 16-​18.

“Mitui lɛ Pɛ Ji Mihebuu Nɔ”

William kɛɛ akɛ: “Mida yɛ he ni ahiɛ maŋkwramɔ kɛ jamɔ he susumɔi srɔtoi yɛ.[14] Bɔ ni Protestantbii ená mɛi ahe jwɛŋmɔ fɔŋ lɛ ehe shi waa yɛ mimli, ni miná hetsɛ̃ ni mli wa miha Katolikbii anɔ fɛɛ nɔ. Kɛ eeehi lɛ, miyaaa Katoliknyo ko shwapo mli, ni mitee Republic of Ireland shikome pɛ. Mikɛ mihe yawo Protestant kui kɛ nitsumɔi srɔtoi amli, tamɔ Orange Order​—ni ji gbɛjianɔtoo ko ni kɛ ehe eha kɛha Protestant jamɔ kɛ eshihilɛ gbɛ lɛ yibaamɔ lɛ.” Beni William ye afii 22 lɛ, eyafata Ulster Defense Regiment, ni ji Britain asraafoi ní ahe kɛjɛ maŋ nɛɛ mli lɛ he. Emli bii lɛ ateŋ mɛi babaoo ji Protestantbii. Eesumɔ ni egbe gbɔmɛi koni ekɛfã egboshinii lɛ he. “Miyɛ tui babaoo ni mishashaooo shi akɛ mikɛaatsu nii kɛji ehe miihia. Mikɛ ekome woɔ misune shishi gbɛkɛ kɛ́ miyawɔ.”

Shi shihilɛ ko ni ekaaa ba. “Mibɔi yɔsemɔ akɛ Yehowa Odasefoi yɛ nɔ ko krɛdɛɛ ko, beni mikɛ amɛteŋ mɔ kome tsuɔ tsũ momo ko he nii lɛ. Naanyo nitsulɔ nɛɛ ná hewalɛ kpele ko yɛ minɔ. Beni wɔfeɔ ekome kɛmaa tsũ lɛ, minyɛ mibi lɛ Naagbai, jamɔ, kɛ Nyɔŋmɔ he saji babaoo ni gbaa minaa lɛ. Esaji ahetooi ni mli kã shi faŋŋ, ni shishinumɔ yɔɔ mli lɛ ye ebua mi ni mina bɔ ni Yehowa Odasefoi lɛ ji diɛŋtsɛ​—gbɔmɛi akuu ni efee ekome, ni amɛbɛ basabasa ni amɛkɛ amɛhe wooo maŋkwramɔ saji amli, ni suɔmɔ kɛha Nyɔŋmɔ kɛ naanyo gbɔmɔ ekadi amɛ.”​—Yohane 13:​34, 35.

Yɛ nyɔji ejwɛ pɛ ni William kɛbɔi Biblia lɛ kasemɔ lɛ mli lɛ, etsi ehe kɛjɛ jamɔ kɛ maŋkwramɔŋ gbɛjianɔtoi fɛɛ ni ekɛbɔɔ lɛ he. Ekaiɔ akɛ: “Shishijee mli lɛ, efeemɔ wa waa ha mi, ejaakɛ ehe bahia ni maŋmɛɛ blema nibii babaoo ni misumɔɔ waa lɛ he mashwie shi.” Shi kɛlɛ, ekaa ni da fe fɛɛ lɛ nako aba. “Yɛ shihilɛ ni yɔɔ Northern Ireland lɛ hewɔ lɛ, minu he akɛ mitui lɛ pɛ ji mihebuu nɔ. Miji mɔ ko ni IRA asraafoi lɛ ‘taoɔ waa.’ No hewɔ lɛ, ewa waa kɛha mi akɛ maŋmɛɛ tui nɛɛ ahe.” Shi fiofio lɛ, Biblia mli ŋaawoo tamɔ nɔ ni anaa yɛ Yesaia 2:​2-4 lɛ tsake bɔ ni esusuɔ nii ahe ehaa. Naagbee lɛ ena akɛ, Yehowa ji ehebuu nɔ diɛŋtsɛ, taakɛ Yehowa ji kɛha klɛŋklɛŋ afii oha lɛ mli Kristofoi lɛ. Agbɛnɛ, William ŋmɛɛ etui lɛ ahe.

William kɛɛ akɛ: “Nibii ni miyɔɔ he miishɛɛ diɛŋtsɛ lɛ ateŋ ekome ji akɛ, amrɔ nɛɛ mikɛ mɛi ni tsutsu lɛ mabu amɛ akɛ henyɛlɔi diɛŋtsɛ ni sa gbele lɛ miibɔ naanyo gbagbalii ni hiɔ shi daa. Agbɛnɛ hu, eji miishɛɛ jɛɛhe diɛŋtsɛ kɛha mi akɛ minyɛɔ mikɛ Biblia mli hiɛnɔkamɔ shɛɛ sane lɛ yaa ‘hei’ ni be ko lɛ, ‘minyɛɛɛ maya’ lɛ. Kɛ misusu nɔ ni anɔkwale lɛ efee eha mi kɛ miweku lɛ he lɛ, ehaa mikɛ shidaa haa Yehowa kɛ egbɛjianɔtoo lɛ daa.”

“Minuuu Nibii lɛ Eko Kwraa Shishi”

Robert[15] kɛ Teresa[16] jɛ shihilɛi ni yɔɔ srɔtoi kwraa mli. Robert kɛɛ akɛ: “Mijɛ Protestant weku diɛŋtsɛ mli. Miwekumɛi lɛ ekomɛi kɛ amɛhe ewo asraafoi anitsumɔi amli. Mi diɛŋtsɛ lɛ, beni miná afii 19 pɛ kɛkɛ ni mikɛ mihe wo Ulster Defense Regiment kuu ní fata Britain asraafoi lɛ ahe lɛ mli. Mikɛ nakai be lɛ mli fã yabuɔ yɛ hei ni Teresa yɔɔ lɛ. Gbi ko gbɛkɛ lɛ, atsake minitsumɔ lɛ ni mikpa buu ni mibuɔ daa lɛ ni miyatsu nitsumɔ kroko. Nakai gbɛkɛ lɛ, akɛ okplɛm fite Land-Rover tsɔne ni kulɛ mata mli lɛ. Agbe asraafoi enyɔ, ni apila mɛi enyɔ.”

Robert bɔi yiŋtoo ni yɔɔ shihilɛ sɛɛ lɛ he susumɔ. “Miheɔ Nyɔŋmɔ nɔ miyeɔ be fɛɛ be, shi beni mikwɛ nibii ni yaa nɔ yɛ Northern Ireland lɛ, minuuu nibii lɛ eko kwraa shishi. Mibɔi sɔlemɔ diɛŋtsɛ kɛha Nyɔŋmɔ. Mibi Nyɔŋmɔ kɛ́ eyɛ shihilɛ mli lɛɛlɛŋ, ni kɛji nakai lɛ, ní etsɔɔ mi bɔ ni esa akɛ mahi shi maha. Mikaiɔ akɛ mikɛɛ Nyɔŋmɔ akɛ esa akɛ anɔkwa jamɔ kome ahi he ko!” Gbii fioo komɛi asɛɛ lɛ, Yehowa Odasefoi ateŋ mɔ kome ba Robert ŋɔɔ ni eshi woji komɛi eha lɛ. Beni Robert yabu nakai gbɛkɛ lɛ ni eku esɛɛ eba shia lɛ, eje shishi ekane wolo lɛ ni egbe naa leebi ŋmɛji enumɔ mli. Ekɛɛ akɛ: “Mina anɔkwale lɛ oya nɔŋŋ, ni minyɛ mina akɛ nɔ fɛɛ nɔ jɛ Biblia lɛ mli tɛ̃ɛ.” (2 Timoteo 3:​16) Ebɔi Biblia lɛ kasemɔ ni yɛ be kukuoo mli lɛ, ejɔɔ ewala nɔ eha Nyɔŋmɔ.

“Odasefoi lɛ Kɛ Wɔ Kaseɔ Biblia lɛ Be Fɛɛ Be”

Katoliknyo ji Teresa, ni esumɔɔ maŋhedɔɔ waa diɛŋtsɛ. Teresa kɛɛ akɛ: “Mikɛ mihe yawo Sinn Féin (Wɔ Pɛ) kuu lɛ mli beni miji oblayoo fioo.b[17] Enɛ ha mikɛ mihe yawo asraafoi anitsumɔ lɛ sɛɛfimɔ mli. Miye mibua ni akɛtao shika kɛha asraafoi lɛ atawuu lɛ. Mitee nɔ miha IRA bii lɛ le nɔ ni yaa nɔ yɛ he ni miyɔɔ lɛ. Mikɛ mihe wo polisifoi kɛ asraafoi ni buɔ lɛ ahiɛ atuatsemɔi kɛ amɛ tɛ tswiamɔi amli.”

Beni Yehowa Odasefoi kɛ Teresa wekumɛi lɛ ateŋ mɛi komɛi bɔi Biblia lɛ kasemɔ lɛ, lɛ hu ebanya he. Hewalɛ ni yɔɔ Nyɔŋmɔ Wiemɔ lɛ mli lɛ ná enɔ hewalɛ waa diɛŋtsɛ. Ekɛɛ akɛ: “Odasefoi lɛ kɛ wɔ kaseɔ Bibllia lɛ be fɛɛ be kɛhaa sanebimɔi ahetoo. Shiwoo ni yɔɔ Daniel 2:​44 lɛ gbele mihiŋmɛi diɛŋtsɛ. Mina akɛ Nyɔŋmɔ Maŋtsɛyeli lɛ ji gbɛ pɛ ní abaatsɔ nɔ ajie nibii fɔji fɛɛ ni miwuɔ mishiɔ lɛ.” Ebaná nyɛ̃ɛ kɛha yiwalɛ nibii ni asraafoi lɛ ekomɛi feɔ lɛ. Ákɛ nɔkwɛmɔnɔ lɛ, Teresa nyɛɛɛ anu nɔ hewɔ ni mɔ ko ni yɔɔ musuŋtsɔlɛ kɛ jeŋba kpakpa lɛ baanya yɛ adafitswaa ni kɔɔ yiwalɔi anifeemɔ ni eha agbe asraafoi kɛ mɛi krokomɛi loo ato amɛ kpa ni awerɛho kɛ mlifu efee wekumɛi shwɛm lɛ shishi. Lɛ hu ekpɛlɛ Biblia mli anɔkwale lɛ nɔ ni eŋmɛ gbɛ ni Nyɔŋmɔ shishitoo mlai lɛ saa esusumɔi. Ejɔɔ ewala nɔ eha Nyɔŋmɔ ni etsɛɛɛ ni abaptisi lɛ.​—Abɛi 2:​1-5, 10-​14.

Teresa kɛ Robert kpe beni amɛyi enyɔ lɛ fɛɛ amɛtee kpee yɛ Yehowa Odasefoi asafoi lɛ ateŋ ekome mli yɛ Northern Ireland lɛ. Ewie akɛ: “Beni mikɛ Robert kpe klɛŋklɛŋ kwraa lɛ, ewa ha mi akɛ mahe maye akɛ mikɛ mɔ ko ni kulɛ mabu lɛ akɛ Britain maŋkwramɔ gbɛjianɔtoo lɛ fã lɛ miiwie blɛoo yɛ toiŋjɔlɛ mli nɛkɛ. Eka shi faŋŋ akɛ Nyɔŋmɔ Wiemɔ lɛ eye ebua mi ni mijie hetsɛ̃ ní ehe shi waa kɛ mɛi ahe jwɛŋmɔ fɔŋ ni miyɔɔ lɛ.” Ekɛ Robert fɛɛ na akɛ yɛ nɔ najiaŋ ni kulɛ amɛaaha hetsɛ̃ kɛ mɛi ahe jwɛŋmɔ fɔŋ ni jɛ amɛblema saji kɛ kusumii ahewɔ lɛ agbála amɛteŋ lɛ, amɛna akɛ nibii babaoo yɛ ni amɛkpãa gbee yɛ mli. Enɛɛmɛi ateŋ nɔ ni he hiaa fe fɛɛ ji suɔmɔ kɛha Yehowa Nyɔŋmɔ. Amɛbote gbalashihilɛ mli. Amrɔ nɛɛ, amɛfee ekome kɛmiitsu nii ni amɛkɛ Nyɔŋmɔ anɔkwa toiŋjɔlɛ shɛɛ sane lɛ miiha gbɔmɛi ni yɔɔ shihilɛi kɛ hemɔkɛyelii srɔtoi fɛɛ mli yɛ shikpɔŋ ni haomɔ yɔɔ mli lɛ nɔ.

Mɛi krokomɛi ni yɔɔ Ireland lɛ ená niiashikpamɔi ni tamɔ nakai nɔŋŋ. Kɛtsɔ Nyɔŋmɔ Wiemɔ ni ajɛ mumɔŋ aŋma lɛ toiboo kɛ etsɔɔmɔi lɛ anɔkpɛlɛmɔ nɔ lɛ, amɛjo gbɔmɛi ‘ajeŋ nilee kɛ yaka shishiumɔi’ lɛ anaa foi. (Kolosebii 2:8) Amrɔ nɛɛ, amɛkɛ amɛhe efɔ̃ Nyɔŋmɔ shiwoi ni aŋmala yɛ Biblia lɛ mli lɛ anɔ kwraa kɛmɔ shi. Amɛyɛ he miishɛɛ akɛ amɛaagba amɛ wɔsɛɛ toiŋjɔlɛ he hiɛnɔkamɔ​—nɔ ni mligbalamɔ kɛ awuiyeli nifeemɔi srɔtoi lɛ eko kwraa bɛ mli​—lɛ he sane lɛ amɛtsɔɔ mɔ fɛɛ mɔ ni baabo toi lɛ.​—Yesaia 11:​6-9.

[Shishigbɛ niŋmai]

[Mfonirii ni yɔɔ baafa 10]

Awo asraafoi atawuu lɛ hiɛ nyam yɛ gbogboi ahe nitɛŋmɔi amli yɛ Northern Ireland fɛɛ