Mɔdɛŋ Ni Adesai Bɔɔ Koni Amɛsa Nyɔŋmɔ Hiɛ

“NYƆŊMƆ mli hemɔkɛyeli ni anáa lɛ etee nɔ etsu gbɛfaŋnɔ ko he nii yɛ adesai ashihilɛ mli, ni bei pii lɛ, hemɔkɛyeli nɛɛ kɔɔ jeŋ muu lɛ fɛɛ kudɔmɔ kɛ ebɔɔ lɛ he. Enɛ ji anɔkwale yɛ maji po ni jeɔ gbɛ amɛkuɔ amɛhiɛ amɛshwieɔ Nyɔŋmɔjamɔ nɔ lɛ ahe.” Nɛkɛ ji bɔ ni John Bowker wie yɛ ewolo ni ji God—A Brief History lɛ mli. Yɛ gbɛ ko nɔ lɛ, mɔdɛŋ ni adesai bɔɔ koni amɛtao Nyɔŋmɔ sɛɛgbɛ ni amɛná ehiɛ duromɔ lɛ ebafee amɛshihilɛ lɛ fã. Mɛi babaoo ni jɛ je lɛŋ fɛɛ miishwe yɛ anɔkwale mli koni amɛsa Nyɔŋmɔ hiɛ. Yɛ anɔkwale mli lɛ, mɔdɛŋ ni amɛbɔɔ koni amɛfee enɛ lɛ yɛ srɔto yɛ bɔ ni amɛhemɔkɛyelii yɔɔ lɛ naa.

Mɛi komɛi heɔ amɛyeɔ akɛ, nɔ pɛ ni he hiaa koni akɛná Nyɔŋmɔ hiɛ duromɔ ji ni ahiɛ jeŋba kpakpa mli. Mɛi krokomɛi hu nuɔ he akɛ amɛnáa Nyɔŋmɔ hiɛ duromɔ kɛtsɔ yelikɛbuamɔ nibii ni amɛkɛhaa ohiafoi lɛ nɔ. Kɛfata he lɛ, kɛha gbɔmɛi akpekpei abɔ lɛ, jamɔŋ nifeemɔi kɛ kusumii ji nibii ni he hiaa.

Yɛ gbɛ kroko nɔ lɛ, aŋkroaŋkroi komɛi yɛ ni heɔ yeɔ akɛ amɛnyɛŋ amɛbɛŋkɛ Nyɔŋmɔ—akɛ ekɛ amɛteŋ jɛkɛ tsɔ loo ebɛ deka kwraa yɛ nibii krokomɛi ahe bɔ ni ekɛaabo gbɔmɛi foji atoi. Abɔ amaniɛ akɛ, jeŋ nilelɔ Epicurus ni jɛ blema Hela lɛ he eye akɛ, ‘nyɔŋmɔi lɛ yɛ shɔŋŋ tsɔ fe bɔ ni amɛaanyɛ amɛná adesai anɔ hewalɛ yɛ gbɛ ko nɔ.’ Kɛlɛ, mɛi babaoo ni hiɛ susumɔi ni tamɔ nɛkɛ lɛ ji Nyɔŋmɔ jálɔi. Ekolɛ, mɛi komɛi po baashã afɔlei ní amɛtsu kusum nifeemɔi ahe nii kɛ gbɛkpamɔi akɛ amɛkɛmiikpata amɛblematsɛmɛi ni egboi lɛ.

Te osusuɔ tɛŋŋ? Ani Nyɔŋmɔ naa mɔdɛŋ ni wɔbɔɔ koni wɔná ehiɛ duromɔ lɛ lɛɛlɛŋ? Ani wɔbaanyɛ wɔta Nyɔŋmɔ tsuiŋ ni wɔsa ehiɛ?

[He ni Mfoniri ni yɔɔ baafa 2 lɛ Jɛ]

COVER: Courtesy of ROE/Anglo-Australian Observatory, photograph by David Malin