Namɔ Yɔɔ Nyɔŋmɔ Hiɛ Duromɔ?

WƆ FƐƐ wɔsumɔɔ ni nanemɛi ni wɔkɛbɔɔ lɛ asumɔ wɔ sane. Yɛ Kristofonyo gbɛfaŋ lɛ, nɔ ni etaoɔ fe fɛɛ ji ni ena Nyɔŋmɔ hiɛ duromɔ. Awie yɛ Yehowa Nyɔŋmɔ he yɛ Lala 84:12 akɛ: “Yehowa duroɔ mɔ ni ewoɔ mɔ hiɛ nyam; mɛi ni nyiɛɔ emuuyeli mli lɛ, ekamaaa amɛ nɔ kpakpa ko nɔ kpakpa ko.” Beni afɔ Yesu lɛ, miishɛɛ wiemɔi ni ŋwɛibofɔi lɛ wie lɛ kɛ shiwoo ko ha akɛ “toiŋjɔlɛ aba shikpɔŋ nɔ aha gbɔmɛi ni eduroɔ lɛ!”​—Luka 2:​14, Moffatt.

Shi namɛi naa Nyɔŋmɔ hiɛ duromɔ? Ani tɛi ni Nyɔŋmɔ efolɔ eshwie shi lɛ tamɔ adesai anɔ? Shishinumɔ yɛ he akɛ, amɛjeee nakai, taakɛ nɔ ni wɔsusu he yɛ sane ni tsɔ hiɛ lɛ mli lɛ tsɔɔ lɛ. Yɛ anɔkwale mli lɛ, akɛni awoɔ Kristofoi ŋaa akɛ “nyɛfea Nyɔŋmɔ kaselɔi” hewɔ lɛ, ebaahi akɛ wɔteŋ mɔ fɛɛ mɔ aaabi ehe akɛ, Ani mibuɔ gbɔmɛi ni yɔɔ Nyɔŋmɔ hiɛ duromɔ lɛ, aloo ani misumɔɔ ni manyiɛ je lɛ nɔdaamɔ nii asɛɛ yɛ bɔ ni mikojoɔ mɛi mihaa lɛ hewɔ? (Efesobii 5:⁠1) Kɛji wɔɔna Yehowa hiɛ duromɔ kɛ enɔkpɛlɛmɔ lɛ, no lɛ esa akɛ wɔkwɛ ni wɔsusu nibii ahe tamɔ bɔ ni enaa lɛ ehaa.

Nyɔŋmɔ Tɛi ni Efolɔ Eshwie Shi ni nɔ Kwɔlɔ Lɛ

Bɔfo Petro wie akɛ, “Nyɔŋmɔ jeee mɛi ahiɛaŋkwɛlɔ, shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” Kɛfata he lɛ, bɔfo Paulo hu ye he odase akɛ Nyɔŋmɔ kɛ “lá kome . . . fee gbɔmɛi adesai fɛɛ.” (Bɔfoi lɛ Asaji 10:​34, 35; 17:26) No hewɔ lɛ, nilee yɛ mli akɛ aaamu sane naa akɛ adesai fɛɛ yeɔ egbɔ yɛ Nyɔŋmɔ hiɛ, ni adebɔɔ mli kadimɔ nii ni anaa yɛ amɛhe lɛ kɔɔɔ he eko. Kɛji nakai ji sane lɛ, no lɛ ehe baŋ sɛɛnamɔ haŋ Kristofonyo ko akɛ eeebu mɔ ko akɛ enɔ kwɔ waa akɛni nakai mɔ lɛ jɛ kpokpaa pɔtɛɛ ko nɔ aloo ehewolo nɔ su yɛ sɔrɔto aloo ejɛ weku pɔtɛɛ ko mli lɛ hewɔ. Shi moŋ, ebaafee jogbaŋŋ akɛ eeenyiɛ e-Nɔkwɛmɔ Nɔ, Yesu Kristo sɛɛ, mɔ ni ehenyɛlɔi lɛ po kpɛlɛ nɔ yɛ egbɛfaŋ akɛ ekwɛɛɛ mɛi ahiɛaŋ lɛ.​—Mateo 22:⁠16.

Bei komɛi lɛ akɛ wiemɔ “hiɛaŋhiɛaŋ nɔ” lɛ tsuɔ nii ni akɛtsɔɔ nɔ ko ni mli kwɔɔɔ aloo nɔ ni he ehiaaa. Nakai pɛpɛɛpɛ hewolo nɔ su ji; eyɛ hiɛaŋhiɛaŋ kɛkɛ. Mɔ ko hewolo nɔ su ejieee bɔ ni esubaŋ aloo emligbɛ sui ji ha lɛ kpo kɔkɔɔkɔ. Kɛji ebalɛ akɛ wɔmiihala mɛi ni wɔkɛbaabɔ, wɔkɛ amɛ baaye nii, aloo wɔbaata amɛdɛŋ lɛ, eka shi faŋŋ akɛ esaaa akɛ wɔkwɛɔ hewolo nɔ su titri. Kaimɔ akɛ, obalayoo hewɔ ni aŋma lalafoo wiemɔi ni ŋɔɔ ni jieɔ suɔmɔ kpo fe eko fɛɛ eko ni aŋma pɛŋ lɛ wie lɛ diɛŋtsɛ ehe akɛ: “Miidĩ moŋ, shi mihe yɛ fɛo . . . Nyɛkakwɛa dĩ ni midĩɔ, kɛ hulu ni eshã mi lɛ.” (Salomo Lalai 1:​5, 6) Weku loo hewolo nɔ su jeee nɔ kpakpa ni abaanyɛ adamɔ nɔ abu mɔ ko akɛ enɔ kwɔ. Nɔ ni he hiaa fe fɛɛ ji kɛ mɔ lɛ sheɔ Nyɔŋmɔ gbeyei ni etsuɔ jalɛ nii hu.

Te Nyɔŋmɔ nuɔ heloonaa nii babaoo ni mɔ yɔɔ lɛ he ehaa tɛŋŋ? Yɛ mɛi ni Nyɔŋmɔ sumɔɔ ni enaa amɛhe miishɛɛ lɛ fɛɛ ateŋ lɛ, e-Bi, Yesu Kristo ji mɔ ni baa klɛŋklɛŋ. Ni kɛlɛ, beni eyɔɔ shikpɔŋ nɔ lɛ, Yesu “bɛ he ni ekɛ eyitso tsɔleɔ.” (Mateo 8:20) Ebɛ shikpɔŋ ko ni ji enɔ, loo shiai, ŋmɔji, tsei ni woɔ yibii, loo kooloi. Shi kɛlɛ, Yehowa wo ehiɛ nyam ni ewo enɔ ni eha lɛ gbɛhe ni nɔ kwɔ fe mɔ fɛɛ mɔ yɛ jeŋ muu fɛɛ, ja lɛ Nyɔŋmɔ diɛŋtsɛ pɛ.​—Filipibii 2:⁠9.

Yesu Kristo hiɛ ba nyam yɛ Nyɔŋmɔ hiɛ ejaakɛ niiatsɛ ji lɛ, jeee yɛ heloonaa nibii agbɛfaŋ, shi moŋ yɛ nitsumɔi kpakpai amli. (Okɛto 1 Timoteo 6:​17, 18 he.) Ewo esɛɛnyiɛlɔi lɛ ŋaa akɛ: “Nyɛkabɔa jwetri nyɛhaa nyɛhe yɛ shikpɔŋ lɛ nɔ, he ni omlɛ̃gɛ̃ kɛ ŋkanale fiteɔ nii, ni julɔi gbaa bajuɔ yɛ lɛ. Shi nyɛbɔa jwetri nyɛhaa nyɛhe yɛ ŋwɛi, he ni omlɛ̃gɛ̃ kɛ ŋkanale fiteee nii, ni julɔi gbaaa amɛyajuuu yɛ lɛ.” (Mateo 6:​19, 20) Enɛ hewɔ lɛ, yɛ nɔ najiaŋ ni mɛi ni ji niiatsɛmɛi yɛ je lɛŋ nibii agbɛfaŋ lɛ pɛ ahiɛ aaaba nyam lɛ, Kristofoi damɔŋ je lɛŋ nibii ni mɛi yɔɔ lɛ nɔ amɛkɛ mligbalamɔ baŋ mɛi ateŋ. Amɛbaatao mɛi ni ji niiatsɛmɛi yɛ Nyɔŋmɔ gbɛfaŋ lɛ asɛɛ gbɛ moŋ, ekɔɔɔ he eko kɛ amɛji heloo gbɛfaŋ niiatsɛmɛi aloo ohiafoi. Ohiɛ akakpa nɔ kɔkɔɔkɔ akɛ “je nɛŋ ohiafoi ni ji niiatsɛmɛi yɛ hemɔkɛyeli gbɛfaŋ lɛ Nyɔŋmɔ ehala, koni amɛtsɔmɔ Maŋtsɛyeli . . . lɛ yelɔi.” (Yakobo 2:⁠5) Kɛji otee nɔ osusu nii ahe tamɔ bɔ ni Nyɔŋmɔ naa lɛ ehaa lɛ, no lɛ oyajeŋ shihilɛ ni afɔɔ namɔ, ni ji bu ni abuɔ mɛi ni yɔɔ heloonaa nii babaoo lɛ akɛ amɛ nɔ kwɔlɔ lɛ mli kɔkɔɔkɔ.

Yɛ woloŋlee gbɛfaŋ lɛ, Biblia lɛ tsɔɔ faŋŋ akɛ Nyɔŋmɔ woɔ wɔ hewalɛ ni wɔtao sɛɛyoomɔ kɛ nilee sɛɛ gbɛ, ni agbɛnɛ hu, Yesu Kristo ji tsɔɔlɔ kpele fe fɛɛ ni ehi shikpɔŋ nɔ pɛŋ. (Abɛi 4:7; Mateo 7:​29; Yohane 7:46) Shi jeee je lɛŋ nilee loo woloŋlee haa mɔ ko naa Nyɔŋmɔ hiɛ duromɔ. Nɔ ni tamɔɔɔ nakai lɛ, Paulo kɛɔ wɔ akɛ “jeee heloo gbɛfaŋ nilelɔi pii, . . . shi moŋ je nɛŋ kwashiaianii lɛ Nyɔŋmɔ hala, koni ekɛwo nilelɔi lɛ ahiɛgbele.”​—1 Korintobii 1:​26, 27.

Nyɔŋmɔ duroɔ mɛi ni le woloŋ jogbaŋŋ lɛ, jeee kɛ jeŋ nilee mli nikasemɔi ni atsɔɔ yɛ skul wuji amli lɛ, shi moŋ kɛ “wiemɔ krɔŋŋ” ni ji anɔkwale ni yɔɔ e-Wiemɔ, ni ji Biblia lɛ mli lɛ. (Zefania 3:​9, New World Translation) Yɛ anɔkwale mli lɛ, Yehowa diɛŋtsɛ miitsɔɔ ewebii anii ŋmɛnɛ, kɛtsɔ tsɔsemɔ gbɛjianɔtoo ko ni mli elɛɛ kɛtee shikpɔŋ lɛ nɔ he fɛɛ he lɛ nɔ. Taakɛ gbalɔ Yesaia gba efɔ shi lɛ, gbɔmɛi ni jɛ jeŋmaji fɛɛ mli miihere nɔ, ni amɛmiikɛɛ akɛ: “Nyɛhaa ni wɔyakwɔa Yehowa gɔŋ lɛ, kɛyaa Yakob Nyɔŋmɔ lɛ we lɛ, koni etsɔɔ wɔ egbɛ̀i lɛ, ni wɔnyiɛ etempɔŋi lɛ anɔ.” No hewɔ lɛ, yɛ nɔ najiaŋ ni amɛaawo je lɛŋ woloŋlee hiɛ nyam moŋ lɛ, Kristofoi baatao mɛi ni kɛ amɛwiemɔi kɛ amɛnifeemɔi maa nɔ mi akɛ “Yehowa kaselɔi” ji amɛ lɛlɛŋ lɛ asɛɛ gbɛ. Kɛtsɔ nakai feemɔ nɔ lɛ, amɛbaana ‘toiŋjɔlɛ babaoo’ ni Nyɔŋmɔ kɛhaa lɛ mli ŋɔɔmɔ​—Yesaia 2:3; 54:⁠13.

Wɔbaanyɛ Wɔna Nyɔŋmɔ Hiɛ Duromɔ

Hɛɛ, esoro nibii ni Nyɔŋmɔ damɔɔ nɔ ehaa mɛi krokomɛi ahiɛ baa nyam yɛ ehiɛ lɛ yɛ adesai anɔ he. Shi kɛlɛ, esa akɛ wɔbɔ mɔdɛŋ ni wɔha egbɛ̀i akudɔ wɔ kɛji wɔmiitao ni wɔhiɛ aba nyam yɛ ehiɛ. No tsɔɔ akɛ esa akɛ wɔnyɛ wɔna mɛi krokomɛi tamɔ bɔ ni Nyɔŋmɔ naa amɛ, shi jeee yɛ tɛi ni adesai efolɔ eshwie shi, ni hiɛjoomɔ kɛ mɛi ahe jwɛŋmɔ fɔŋ namɔ kudɔɔ lɛ anaa. Mɛɛ gbɛ nɔ wɔɔtsɔ wɔfee enɛ?

Yehowa Nyɔŋmɔ kwɛɔ mɔ tsui mli ni eduroɔ mɛi ni jieɔ sui tamɔ suɔmɔ, ejurɔfeemɔ, mlihilɛ, kɛ tsuishitoo kpo lɛ. Esa akɛ wɔ hu wɔfee nakai. (1 Samuel 16:7; Galatabii 5:​22, 23) Esa akɛ wɔkwɛ mɔ lɛ mligbɛ su ni eyɔɔ lɛ bɔ ni wɔɔnyɛ akɛ gbɔmɛi adesai, shi jeee ehewolo nɔ su aloo weku mli ni mɔ lɛ jɛ. Ni wɔɔtao mɛi ni yɔɔ heloonaa nii babaoo lɛ asɛɛ gbɛ moŋ lɛ, wɔɔfee jogbaŋŋ akɛ wɔɔha bɔ ni Nyɔŋmɔ buɔ ninamɔ ehaa lɛ ahi wɔjwɛŋmɔ mli ni wɔbɔ mɔdɛŋ ‘wɔtsɔmɔ niiatsɛmɛi yɛ ejurɔfeemɔi agbɛfaŋ, ni wɔsumɔ nihamɔ, ni wɔnine akpɔ.’ (1 Timoteo 6:18) Kɛji wɔhiɛ baaba nyam yɛ Nyɔŋmɔ hiɛ lɛ, no lɛ esa akɛ wɔya nɔ wɔtao Nyɔŋmɔ kɛ e-Bi, Yesu Kristo he anɔkwa nilee sɛɛ gbɛ, ni wɔtsɔmɔ mɛi ni atsɔse amɛ jogbaŋŋ yɛ wiemɔ krɔŋŋ ni ji anɔkwale lɛ mli. (Yohane 17:​3, 17) Kɛji wɔfee nakai lɛ, wɔ hu wɔɔfata mɛi ni hiɛ baa nyam yɛ Nyɔŋmɔ hiɛ lɛ ahe.