Amɛmiitsu Nitsumɔ ni Haa Amɛtsui Nyɔɔ Amɛmli Waa​—Ani Obaasumɔ ni Otsu Eko?

NO MLI lɛ Nyɛminuu Marc ni jɛ Canada lɛ tsuɔ nii yɛ he ko ni afeɔ tsɔji ni yɔɔ hwanyaŋŋ ni akɛfaa gbɛ kɛyaa ŋwɛiniiaŋ shɔŋŋ. Ekɛ ebe fɛɛ tsuuu nitsumɔ nɛɛ ejaakɛ eji daa gbɛgbalɔ. Shi be ko lɛ, nitsumɔ lɛ mli nɔkwɛlɔi lɛ ateŋ mɔ kome kɛɛ lɛ akɛ ebaasumɔ ni ekɛ ebe fɛɛ atsu nitsumɔ lɛ, ni abaawo lɛ nyɔmɔ pii hu. Te Marc fee enii yɛ hegbɛ nɛɛ he eha tɛŋŋ?

Nyɛmiyoo ko ni yɔɔ Philippines ni atsɛɔ lɛ Amy lɛ bɔi sɔɔmɔ akɛ daa gbɛgbalɔ beni eeehe egbe skul naa lɛ. Beni egbe skul lɛ naa lɛ, ená be fɛɛ nitsumɔ ko kɛ ehe nyɔmɔwoo pii shi ehaŋ ená deka. Mɛɛ yiŋ Amy kpɛ yɛ hegbɛ nɛɛ he?

Yiŋ ni Marc kpɛ lɛ yɛ srɔto yɛ Amy nɔ̃ lɛ he, ni nɔ ni jɛ amɛyiŋkpɛi lɛ amli ba lɛ ma nɔ mi akɛ nilee yɛ ŋaawoo ni akɛha Kristofoi ni hi blema Korinto lɛ mli. Bɔfo Paulo ŋma akɛ: “Mɛi ni . . . tsuɔ je nɛɛ he nii lɛ afee tamɔ mɛi ni tsuuu he nii [kɛmɔɔɔ shi].”—1 Kor. 7:29-31.

Kaatsu Je lɛ He Nii Kɛmɔ Shi

Dani wɔɔwie nɔ ni Marc kɛ Amy fee lɛ he lɛ, nyɛhaa wɔsusua shishinumɔ ni yɔɔ wiemɔ ni ji “je lɛ,” (loo koʹsmos yɛ Hela wiemɔ mli) ni Paulo kɛtsu nii yɛ wolo ni eŋma kɛyaha Korintobii lɛ mli lɛ sɛɛ lɛ he kuku. Wiemɔ ni ji koʹsmos ni je kpo yɛ 1 Korintobii 7:29-31 lɛ damɔ shi kɛha jeŋ ni wɔyɔɔ mli lɛ—adesai fɛɛ—ni nibii ni wɔfeɔ daa yɛ wɔshihilɛ mli tamɔ wɔɔhe taomɔ, niyeli kɛ atadewoo fata he.a Ebiɔ ni wɔteŋ mɛi babaoo atsu nii dani wɔnine baashɛ nibii ni he hiaa wɔ daa gbi nɛɛ anɔ. Yɛ anɔkwale mli lɛ, esa akɛ wɔtsu je nɛɛ he nii dani wɔbaanyɛ wɔtsu Ŋmalɛ naa sɔ̃ ni kã wɔ nɔ akɛ wɔkwɛ wɔhe kɛ wɔwekui lɛ he nii. (1 Tim. 5:8) Shi wɔle hu akɛ ‘je lɛ miiho eya.’ (1 Yoh. 2:17) No hewɔ lɛ, wɔtsuɔ je nɛɛ he nii kɛyashiɔ he ni sa, shi ‘wɔtsuuu he nii kɛmɔɔɔ shi.’—1 Kor. 7:31.

Biblia lɛ mli ŋaawoo akɛ wɔkatsu je nɛɛ he nii kɛmɔ shi lɛ eha nyɛmimɛi hii kɛ yei babaoo epɛi amɛshihilɛ mli, ni amɛkɛ bei pii tsuuu nii dɔŋŋ, ni amɛha amɛshihilɛ efee mlɛo. Beni amɛfee nakai lɛ, amɛna akɛ amɛtsui enyɔ amɛmli waa fe tsutsu lɛ, ejaakɛ amɛnáa bei pii amɛhaa amɛwekui lɛ ni amɛtsuɔ babaoo yɛ Yehowa sɔɔmɔ nitsumɔ lɛ mli. Kɛfata he lɛ, akɛni amɛha amɛshihilɛ efee mlɛo hewɔ lɛ ehaa amɛkɛ amɛhe fɔɔ Yehowa nɔ babaoo fe je lɛ. Ani bo hu obaanyɛ oha oshihilɛ afee mlɛo koni onyɛ okɛ bei babaoo atsu Nyɔŋmɔ Maŋtsɛyeli lɛ he sɔɔmɔ nitsumɔ lɛ?—Mat. 6:19-24, 33.

“Wɔnuɔ He akɛ Wɔbɛŋkɛ Yehowa Kpaakpa Fe Tsutsu Lɛ”

Marc ni awie ehe kɛtsɔ hiɛ lɛ kɛ Biblia mli ŋaawoo akɛ wɔkatsu je nɛɛ he nii kɛmɔ shi lɛ tsu nii. Ekpoo nitsumɔ kɛ ehe nyɔmɔwoo pii lɛ. Gbii fioo komɛi asɛɛ lɛ, Marc nɔkwɛlɔ lɛ kɛɛ lɛ akɛ abaaha enyɔmɔwoo lɛ afa fe nɔ ni amɛkɛɛ amɛbaawo lɛ lɛ po koni ekɛkɔne eyiŋ ni ekpɛlɛ nitsumɔ lɛ nɔ. Marc kɛɛ akɛ: “Eji kaa, shi mikpoo nitsumɔ lɛ ekoŋŋ.” Etsɔɔ nɔ hewɔ ni efee nakai lɛ mli akɛ: “Mi kɛ miŋa Paula etswa wɔfai shi akɛ wɔbaasɔmɔ Yehowa kɛmɔ shi bɔ ni wɔɔnyɛ. No hewɔ lɛ, wɔkpɛ wɔyiŋ akɛ wɔbaaha wɔshihilɛ afee mlɛo. Wɔsɔle kɛbi Yehowa ni eha wɔ nilee ni baaha wɔshɛ oti nɛɛ he, ni wɔto be pɔtɛɛ ko ni wɔbaabɔi oti nɛɛ he nitsumɔ.”

Paula kɛɛ akɛ: “Mitsuɔ ni gbii etɛ yɛ otsi mli yɛ helatsamɔhe ko akɛ woloŋmalɔ, ni minyɔmɔwoo lɛ fa bɔ ni sa. Misɔmɔɔ hu akɛ daa gbɛgbalɔ. Shi mi kɛ Marc fɛɛ miisumɔ ni wɔyasɔmɔ Yehowa yɛ he ni Maŋtsɛyeli jajelɔi ahe miihia waa yɛ. Shi beni mikɛ wolo ni miŋma ni tsɔɔ akɛ miikpa nitsumɔ lɛ yaha minitsumɔ lɛ mli nɔkwɛlɔ lɛ, ekɛɛ mi akɛ hegbɛ ko naa egbele kɛha gbɛhe ni nɔ kwɔ fe migbɛhe lɛ, ni mishɛɔ taomɔ nii lɛ ahe. Abaawo mi nyɔmɔ fe woloŋmalɔi fɛɛ ni tsuɔ nii yɛ nakai helatsamɔhe lɛ, shi mitsakeee miyiŋkpɛɛ akɛ miikpa nitsumɔ lɛ. Beni miha nɔkwɛlɔ lɛ le nɔ hewɔ ni mikpoo gbɛhe nɛɛ, ejie miyi yɛ mihemɔkɛyeli lɛ hewɔ.”

No sɛɛ etsɛɛɛ lɛ, aha Marc kɛ Paula yasɔmɔ akɛ gbɛgbalɔi krɛdɛɛi yɛ asafo ko ni mli bii faaa ni yɔɔ he ko ni etse ehe banee yɛ Canada lɛ mli. Te nibii yawulashi eha amɛ tɛŋŋ? Marc kɛɛ akɛ: “Mifee yeyeeye beni mishi nitsumɔ ni awoɔ mi nyɔmɔ babaoo ní mikɛ nɔ ni aaashɛ miwala be fã etsu lɛ, shi Yehowa jɔɔ wɔsɔɔmɔ nitsumɔ lɛ nɔ. Yelikɛbuamɔ ni wɔkɛhaa mɛi koni amɛbasɔmɔ Nyɔŋmɔ lɛ haa wɔnáa miishɛɛ waa. Be fɛɛ sɔɔmɔ nitsumɔ lɛ eha wɔgbalashihilɛ lɛ ehi fe tsutsu lɛ. Wɔgbaa nibii ni he hiaa diɛŋtsɛ lɛ ahe sane—nibii ni kɔɔ sɔɔmɔ ni wɔsɔmɔ Yehowa lɛ he. Wɔnuɔ he akɛ wɔbɛŋkɛ Yehowa kpaakpa fe tsutsu lɛ.” (Bɔf. 20:35) Paula kɛfata he akɛ: “Kɛ́ oshi onitsumɔ kɛ shía ni osumɔɔ waa lɛ, esa akɛ okɛ ohe fɛɛ afɔ Yehowa nɔ. Wɔfee nakai ni Yehowa jɔɔ wɔ. Wɔnyɛmimɛi hii kɛ yei ni yɔɔ asafo hee ni wɔtee mli lɛ ha wɔnu he akɛ amɛsumɔɔ wɔ ni wɔhe hiaa amɛ. Amrɔ nɛɛ mikɛ hewalɛ ni be ko lɛ mikɛtsuɔ nii lɛ miiye kɛmiibua mɛi koni amɛbale Nyɔŋmɔ. Eŋɔɔ minaa waa akɛ miisɔmɔ akɛ gbɛgbalɔ krɛdɛɛ.”

‘Eyɛ Nii, shi Ebɛ Miishɛɛ’

Yiŋ ni Amy ni awie ehe kɛtsɔ hiɛ lɛ kpɛ lɛ yɛ srɔto kwraa. Ekpɛlɛ nitsumɔ ni akɛ be fɛɛ tsuɔ ni awoɔ mɔ nyɔmɔ babaoo lɛ nɔ. Amy kɛɛ akɛ: “Mitee nɔ mikɛ mihe wo sɔɔmɔ nitsumɔ lɛ mli waa yɛ klɛŋklɛŋ afi ni mikɛtsu nitsumɔ nɛɛ mli, shi mibayɔse akɛ fiofio lɛ hiɛ ni maya yɛ nitsumɔ lɛ mli lɛ bakã mitsui nɔ waa fe sɔɔmɔ ni misɔmɔɔ Yehowa lɛ. Miná hegbɛ pii ni mikɛaaya mihiɛ ni mibɔ mɔdɛŋ waa koni maná gbɛhe ni nɔ kwɔ yɛ nitsumɔ lɛ mli. Beni minitsumɔ lɛ mli sɔ̃i lɛ faa lɛ, belɛ be ni miyeɔ yɛ shiɛmɔ nitsumɔ lɛ mli lɛ nɔ miigbɔ. Yɛ naagbee lɛ mikpa shiɛmɔyaa kwraa.”

Beni Amy kai nakai be lɛ, ekɛɛ akɛ: “Miyɛ nii waa. No mli lɛ mifaa gbɛ waa, ni gbɛhe ni miyɔɔ yɛ minitsumɔ lɛ mli lɛ hewɔ lɛ abuɔ mi waa. Shi fɛɛ sɛɛ lɛ, mibɛ miishɛɛ. Tsɛ miyɛ shika moŋ, shi miná naagbai babaoo. Misusu nɔ̃ hewɔ ní nibii etɔtɔ lɛ he. Kɛkɛ ni mibayɔse akɛ akɛni miitiu hegbɛ ni je lɛŋ he nitsumɔ haa anáa lɛ sɛɛ hewɔ lɛ, shwɛ sharao ni ‘midu gbɛ kɛjɛ hemɔkɛyeli lɛ mli.’ No hewɔ lɛ, ‘miná piŋmɔi babaoo’ taakɛ Nyɔŋmɔ Wiemɔ lɛ kɛɛ lɛ pɛpɛɛpɛ.”—1 Tim. 6:10.

Mɛni Amy fee? Ekɛɛ akɛ: “Mikɛɛ asafoŋ onukpai lɛ ni amɛye amɛbua mi koni maná mikɛ Yehowa teŋ wekukpãa ekoŋŋ, ni mibɔi kpeeiyaa. Beni aala lala ko yɛ kpee shishi lɛ mijwa yaafo. Mikai afii enumɔ ni mikɛ mihe wo nikpamɔ nitsumɔ lɛ mli akɛ daa gbɛgbalɔ lɛ, no mli lɛ mibɛ nii tsɔɔ moŋ shi miyɛ miishɛɛ. Mile akɛ esa akɛ makpa mibe fitemɔ kɛ shika pii taomɔ ní mikɛ Maŋtsɛyeli lɛ he sɔɔmɔ lɛ aye klɛŋklɛŋ gbɛhe. Miha akɛ mi wo gbɛhe ni baashi yɛ nitsumɔ lɛ mli, ni tsɔɔ akɛ minyɔmɔwoo lɛ nɔ baagbɔ oha mlijaa 50, ni mibɔi shiɛmɔyaa ekoŋŋ.” Amy kɛ miishɛɛ wie akɛ: “Miná miishɛɛ beni mikɛ afii fioo sɔmɔ akɛ daa gbɛgbalɔ lɛ. Amrɔ nɛɛ mitsui enyɔ mimli waa fe beni mikɛ mibe pii tsu je nɛɛ he nii lɛ.”

Ani obaanyɛ otsake oshihilɛ ni oha efee mlɛo? Kɛ́ okɛ be ni obaaná kɛ́ ofee tsakemɔi nɛɛ tsu nii yɛ Maŋtsɛyeli lɛ he sɔɔmɔ nitsumɔ lɛ mli lɛ, bo hu otsui baanyɔ omli waa.—Abɛi 10:22.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 19]

Ani obaanyɛ otsake oshihilɛ ni oha efee mlɛo?

[Akrabatsa/Mfoniri ni yɔɔ baafa 19]

“Amrɔ Nɛɛ Po lɛ Miná He Miishɛɛ Waa!”

Asafoŋ onukpa ko ni yɔɔ United States ni atsɛɔ lɛ David lɛ ná shwelɛ akɛ efata eŋa kɛ ebii lɛ ahe ni amɛsɔmɔ akɛ be fɛɛ sɔɔlɔi. Enyɛ eto gbɛjianɔ ni aŋmɛ lɛ gbɛ yɛ he ni etsuɔ nii yɛ lɛ koni ekɛ bei fioo ko pɛ atsu nii, ni ekɛ ehe wo daa gbɛgbamɔ nitsumɔ lɛ mli. Ani tsakemɔ ni efee nɛɛ ha etsui nyɔ emli? Nyɔji komɛi asɛɛ lɛ David ŋma kɛyaha enaanyo ko akɛ: “Nɔ ko bɛ ni haa mɔ tsui nyɔɔ emli fe eweku ni ekɛ amɛ aaafee ekome kɛsɔmɔ Yehowa yɛ gbɛ ni mɔɔ shi nɔ. No mli lɛ misusu akɛ ebaahe mi be dani mihe baamɔ shi yɛ gbɛgbamɔ nitsumɔ lɛ mli, shi amrɔ nɛɛ po lɛ miná he miishɛɛ waa! Ewoɔ mɔ hewalɛ waa.”

[Mfoniri ni yɔɔ baafa 18]

Marc kɛ Paula ni amɛmiishiɛ