Ani Nyɔŋmɔ Ji Mɔ ko ni Yɔɔ Lɛɛlɛŋ?
Hetoi ni mɛi fɔɔ hamɔ:
◼ “Eyɛ he fɛɛ he, eyɛ nɔ fɛɛ nɔ mli. Etamɔ kɔɔyɔɔ.”
◼ “Eji hewalɛ kpele ko, ni ejeee mɔ ko pɔtɛɛ.”
Mɛni Yesu wie?
◼ “Shihilɛhei pii yɛ mitsɛ we lɛ.” (Yohane 14:2) Yesu wie Nyɔŋmɔ he yɛ mfonirifeemɔ mli akɛ eyɛ shĩa loo shihilɛhe.
◼ “Tsɛ lɛ ŋɔɔ mijɛ miba je lɛ mli, asaŋ miije je lɛŋ maya tsɛ lɛ ŋɔɔ.” (Yohane 16:28) Yesu he eye akɛ Nyɔŋmɔ ji Mɔ ko ni yɔɔ lɛɛlɛŋ, ni yɔɔ he ko pɔtɛɛ.
YESU ewieee kɔkɔɔkɔ akɛ Nyɔŋmɔ ji hewalɛ ko, ni ejeee mɔ ko pɔtɛɛ. Nɔ ni tamɔɔɔ nakai lɛ, ekɛ Nyɔŋmɔ gba sane ni ekɛ lɛ wie yɛ sɔlemɔ mli. Bei pii lɛ, etsɛɔ Yehowa akɛ e-Tsɛ ni yɔɔ ŋwɛi, ni enɛ ji sabla ko ni tsɔɔ akɛ wekukpãa gbagbalii kã ekɛ Nyɔŋmɔ teŋ.—Yohane 8:19, 38, 54.
Eji anɔkwale akɛ “Nyɔŋmɔ lɛ, mɔ ko enako lɛ pɛŋ” ni akɛ, “Nyɔŋmɔ lɛ Mumɔŋ.” (Yohane 1:18; 4:24) Shi no etsɔɔɔ akɛ, ebɛ gbɔmɔtso ko. Biblia lɛ kɛɔ wɔ akɛ: “Kɛ́ susuma gbɔmɔtso yɛ lɛ, mumɔ gbɔmɔtso hu yɛ.” (1 Korintobii 15:44) No hewɔ lɛ, ani Yehowa yɛ mumɔ gbɔmɔtso?
Hɛɛ. Beni atee Yesu shi lɛ, “ŋwɛi diɛŋtsɛ eyabote, koni agbɛnɛ eyapue yɛ Nyɔŋmɔ hiɛ eha wɔ.” (Hebribii 9:24) Enɛ tsɔɔ wɔ nibii enyɔ ni he hiaa yɛ Nyɔŋmɔ he. Klɛŋklɛŋ lɛ, eyɛ shihilɛhe. Nɔ ji enyɔ lɛ, eji Mɔ ko ni yɔɔ diɛŋtsɛ, shi ejeee hewalɛ kpele ko ni yɔɔ he fɛɛ he.
Belɛ, te feɔ tɛŋŋ ni Nyɔŋmɔ nyɛɔ enáa nibii ni yɔɔ he fɛɛ he lɛ anɔ hewalɛ? Nyɔŋmɔ baanyɛ atsu emumɔ krɔŋkrɔŋ lɛ, loo ehewalɛ ni miitsu nii lɛ kɛya he fɛɛ he yɛ jeŋ muu lɛŋ fɛɛ. Taakɛ tsɛ ko kɛ ehewalɛ tsuɔ nii kɛshɛjeɔ ebii amii, ni eyeɔ ebuaa amɛ lɛ, Nyɔŋmɔ hu kɛ emumɔ krɔŋkrɔŋ lɛ tsuɔ ni kɛtsuɔ eyiŋtoo he nii.—Lala 104:30; 139:7.
Akɛni Nyɔŋmɔ ji Mɔ ko ni yɔɔ diɛŋtsɛ hewɔ lɛ, eyɛ sui, ni tsɔɔ akɛ, eyɛ nibii ni esumɔɔ kɛ nibii ni esumɔɔɔ—eyɛ henumɔi po. Biblia lɛ kɛɔ wɔ akɛ, esumɔɔ ewebii, enyaa enitsumɔi lɛ ahe, enyɛ̃ɔ wɔŋjamɔ, ni kɛ́ mɛi fee efɔŋ lɛ edɔɔ lɛ. (1 Mose 6:6; 5 Mose 16:22; 1 Maŋtsɛmɛi 10:9; Lala 104:31) Atsɛ lɛ yɛ 1 Timoteo 1:11 lɛ akɛ, “Nyɔŋmɔ ni ajɔɔ” loo miishɛɛ Nyɔŋmɔ. Ebɛ naakpɛɛ mɔ akɛ, Yesu kɛɛ akɛ wɔbaanyɛ wɔkase bɔ ni wɔɔfee wɔsumɔ Nyɔŋmɔ ni tamɔ nɛkɛ kɛ wɔtsui fɛɛ!—Marko 12:30.a—w09 02/01-E.
[Shishigbɛ niŋmaa]
a Kɛ́ ootao enɛ he saji babaoo lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ yitso 1 lɛ mli.
[Wiemɔ ni akɔ ni akɛmiitsu nii ni yɔɔ baafa 5]
Taakɛ tsɛ ko kɛ ehewalɛ tsuɔ nii lɛ, Nyɔŋmɔ kɛ emumɔ krɔŋkrɔŋ lɛ tsuɔ nii kɛtsuɔ eyiŋtoo he nii