Ani Nyɔŋmɔ yɛ Gbɛi?
Hetoi ni mɛi fɔɔ hamɔ:
▪ “Egbɛi ji Nuŋtsɔ.”
▪ “Ebɛ lɛ diɛŋtsɛ egbɛi.”
Mɛni Yesu wie?
▪ “No hewɔ lɛ nyɛsɔlea nɛkɛ: Wɔtsɛ ni yɔɔ ŋwɛi, ogbɛi lɛ he atse.” (Mateo 6:9) Yesu heɔ eyeɔ akɛ Nyɔŋmɔ yɛ gbɛi.
▪ “Mijie ogbɛi lɛ kpo mitsɔɔ amɛ, ni masaa majie lɛ kpo matsɔɔ, koni suɔmɔ ni okɛ sumɔ mi lɛ ahi amɛmli, ni mi hu mahi amɛmli.” (Yohane 17:26) Yesu ha ale Nyɔŋmɔ gbɛi lɛ.
▪ “Nyɛnaŋ mi dɔŋŋ kɛyashi beyinɔ ni aaaba mli akɛ nyɛaakɛɛ akɛ: ‘Ajɔɔ mɔ ni baa yɛ Nuŋtsɔ [“Yehowa,” NW] lɛ gbɛi anɔ lɛ!’” (Luka 13:35; Lala 118:26) Yesu kɛ Nyɔŋmɔ gbɛi lɛ tsɛ lɛ.
NYƆŊMƆ diɛŋtsɛ tsɔɔ wɔ egbɛi. Aŋma akɛ, ekɛɛ akɛ: “Mi ji Yehowa, migbɛi ji no.”a (Yesaia 42:8) Yɛ Ga mli lɛ, atsɛɔ gbɛi ni Nyɔŋmɔ diɛŋtsɛ kɛwo ehe yɛ Hebri wiemɔ mli lɛ akɛ Yehowa. Ekolɛ onaa baakpɛ ohe akɛ Hebri gbɛi ni Nyɔŋmɔ pɛ akɛtsɛɔ lɛ pue shii akpei abɔ yɛ blema Biblia ni akɛ niji ŋmala lɛ amli. Yɛ anɔkwale mli lɛ, ejeɔ kpo babaoo fe gbɛi krokomɛi fɛɛ ni atsĩ tã yɛ Biblia lɛ mli.
Ekolɛ kɛ abi mɛi komɛi akɛ, “Mɛni ji Nyɔŋmɔ gbɛi lɛ?” amɛbaakɛɛ akɛ, “Nuŋtsɔ.” Shi yɛ anɔkwale mli lɛ, hetoo ni tamɔ nɛkɛ lɛ tamɔ nɔ ni abi mɔ ko akɛ “Namɔ ye kunim yɛ oshikifɔ̃ɔ lɛ mli?” ni ekɛɛ akɛ, “mɔ ni damɔ shi ni afɔ̃ oshiki lɛ aha lɛ.” Hetoi enyɔ lɛ fɛɛ bɛ faŋŋ, ejaakɛ “Nuŋtsɔ” kɛ “Mɔ ni damɔ shi ni afɔ̃ oshiki lɛ aha lɛ” jeee mɛi agbɛi.
Mɛni hewɔ Nyɔŋmɔ ha wɔle egbɛi lɛ? Efee nakai koni eha wɔnyɛ wɔle lɛ jogbaŋŋ. Ákɛ nɔkwɛmɔnɔ lɛ, abaanyɛ atsɛ mɔ ko kɛ sablai tamɔ Owula, Nitsumɔtsɛ, Ataa, loo Nii, yɛ shihilɛi srɔtoi amli. Sablai nɛɛ haa anaa nɔ ko yɛ mɔ lɛ he. Shi mɔ lɛ gbɛi diɛŋtsɛ haa wɔkaiɔ mɔ lɛ he nɔ fɛɛ nɔ. Nakai nɔŋŋ hu sablai tamɔ Nuŋtsɔ, Ofe, Tsɛ, kɛ Bɔlɔ lɛ gbalaa wɔjwɛŋmɔ kɛyaa Nyɔŋmɔ nifeemɔi srɔtoi lɛ anɔ. Shi egbɛi diɛŋtsɛ ni ji Yehowa lɛ pɛ haa wɔkaiɔ ehe nɔ fɛɛ nɔ. Ani obaanyɛ okɛɛ akɛ ole Nyɔŋmɔ, yɛ be mli ni oleee egbɛi?
Ehe miihia ni ole gbɛi nɛɛ ni okɛtsu nii hu. Mɛni hewɔ? Ejaakɛ Biblia lɛ kɛɔ wɔ akɛ: “Mɔ fɛɛ mɔ ní aaatsɛ́ Yehowa gbɛi anɔ lɛ, aaahere eyiwala.”—Yoel 3:5; Romabii 10:13.—w09 02/01-E.
[Shishigbɛ niŋmaa]
a Kɛ́ ootao ole nɔ ni Nyɔŋmɔ gbɛi lɛ tsɔɔ lɛ mligbalamɔ fitsofitso, kɛ agbɛnɛ hu, nɔ hewɔ ni epueee yɛ Biblia shishitsɔɔmɔi komɛi amli lɛ, obaanyɛ okwɛ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ baafa 195-197 lɛ mli.
[Wiemɔ ni akɔ ni akɛmiitsu nii ni yɔɔ baafa 6]
Abaanyɛ atsɛ mɔ ko kɛ sablai tamɔ Owula, Nitsumɔtsɛ, Ataa, loo Nii, yɛ shihilɛi srɔtoi amli. Shi mɔ lɛ gbɛi diɛŋtsɛ haa wɔkaiɔ mɔ lɛ he nɔ fɛɛ nɔ