ANI OLE?

Mɛɛ gbɛ nɔ klɛŋklɛŋ afi 100 lɛŋ Yudafoi lɛ tsɔ amɛsaa gbohii kɛha fũu?

No mli lɛ, kɛ́ Yudafonyo ko gbo lɛ, afũɔ lɛ oya nɔŋŋ, bei pii lɛ yɛ nakai gbi lɛ nɔ nɔŋŋ. Yiŋtoi enyɔ komɛi ahewɔ amɛfee nakai. Klɛŋklɛŋ lɛ, akɛni jeŋ dɔɔ waa yɛ Middle East niiaŋ hewɔ lɛ, gbonyo fiteɔ mra. Nɔ ni ji enyɔ lɛ, yɛ susumɔ ni ahiɛ yɛ no beaŋ lɛ naa lɛ, kɛ́ ashi gbonyo ko afɔ̃ shi gbii komɛi ni afũko lɛ, eji hiɛshishwiemɔ kɛha gbonyo lɛ kɛ eweku fɛɛ.

Kɛ́ hooo kwraa lɛ, aŋmala gbohii ejwɛ ni afũ amɛ gbi nɔ nɔŋŋ ni amɛgboi lɛ ahe saji yɛ Sanekpakpai lɛ kɛ Bɔfoi lɛ Asaji lɛ amli. (Mateo 27:57-60; Bɔfoi lɛ Asaji 5:5-10; 7:60–8:2) Afii ohai komɛi ni tsɔ hiɛ lɛ, beni Yakob kɛ eweku lɛ nyiɛ gbɛfãa nɔ lɛ, eŋa Rahel ni esumɔɔ lɛ waa lɛ gbo. Kulɛ Yakob baanyɛ ekɛ gbonyo lɛ aku sɛɛ kɛba amɛweku lɛ fũuhe lɛ, shi ‘efu lɛ yɛ Betlehem gbɛ lɛ masɛi.’—1 Mose 35:19, 20, 27-29.

Biblia mli amaniɛbɔi ni kɔɔ gbohii afũu he lɛ haa wɔnaa akɛ Yudafoi toɔ amɛtsui shi kɛsaa gbohii lɛ jogbaŋŋ kɛha fũu. Wekumɛi kɛ nanemɛi juɔ gbonyo lɛ he, amɛwoɔ lɛ tsofa, ni amɛkɛ mama balaa lɛ. (Yohane 19:39, 40; Bɔfoi lɛ Asaji 9:36-41) Akutsoŋbii kɛ mɛi krokomɛi nyɛɔ amɛbaa amɛbafoɔ gbonyo lɛ, ni amɛshɛjeɔ weku lɛ hu mii.—Marko 5:38, 39.

Ani afũ Yesu taakɛ Yudafoi lɛ fũɔ mɛi lɛ?

Yudafoi awekui babaoo fũɔ amɛgbohii lɛ yɛ tɛkploi kɛ tɛi ni anyɛɔ akpɛɔ mli ni yɔɔ Israel hei babaoo lɛ amli. Amɛkɛ nakai feemɔ nyiɛɔ sa ni amɛblematsɛmɛi lɛ gba lɛ asɛɛ. Afũ Abraham, Sara, Isak, Yakob, kɛ mɛi krokomɛi yɛ tɛkploi ni yɔɔ Makpela ni bɛŋkɛ Hebron lɛ amli.—1 Mose 23:19; 25:8, 9; 49:29-31; 50:13.

Afũ Yesu yɛ gbonyobu ni akpɛ yɛ tɛsaa mli lɛ mli. (Marko 15:46) Bei pii lɛ, nakai gbonyobu lɛ naabu elɛɛɛ. Akpɛɔ bui yɛ tɛsai nɛɛ amli koni kɛ́ wekunyo ko gbo lɛ, ato lɛ yɛ mli. Beni gbonyo lɛ ekpɔtɔ sɛɛ lɛ, abuaa ewui lɛ anaa awoɔ adeka ko (ossuary) ni akɛ tɛ efee lɛ mli, taakɛ afee yɛ Yesu beaŋ lɛ. Nakai feemɔ haa weku lɛ náa he ko amɛkɛ wekumɛi ni baagbo sɛɛ mli lɛ toɔ.

Mose Mla lɛ eŋmɛɛɛ Yudafoi lɛ gbɛ akɛ amɛfũ mɔ yɛ hejɔɔmɔ gbi lɛ nɔ. Akɛni beni Yesu gbo lɛ, no mli lɛ eshwɛ aaafee ŋmɛlɛtswai etɛ ni Hejɔɔmɔ Gbi lɛ baaje shishi hewɔ lɛ, Yosef ni jɛ Arimatia lɛ kɛ mɛi krokomɛi ni fata ehe lɛ egbeee Yesu gbonyo lɛ saamɔ naa kɛkɛ ni amɛyafũ lɛ. (Luka 23:50-56) No hewɔ jɛ ni Yesu nanemɛi lɛ ekomɛi tee egbonyobu lɛ he beni Hejɔɔmɔ Gbi lɛ eho lɛ, bɔni afee ni amɛyagbe esaamɔ lɛ naa.—Marko 16:1; Luka 24:1.