Ani Yesu kɛ Shihilɛ yɛ Ŋwɛi Wo Efɔŋfeelɔ lɛ Shi?

Abiɔ sane nɛɛ ejaakɛ Yesu kɛ wɔsɛɛ be shihilɛ yɛ Paradeiso wo efɔŋfeelɔ ni asɛŋ lɛ yɛ emasɛi lɛ shi. Yesu kɛɛ akɛ: “Lɛɛlɛŋ, miikɛɛ bo ŋmɛnɛ akɛ okɛ mi baahi Paradeiso.” (Luka 23:43, NW.) Kadimɔ akɛ Yesu etsɔɔɔ he ni nakai Paradeiso lɛ baahi. Ani no tsɔɔ akɛ no mli lɛ, Yesu miitsɔɔ akɛ efɔŋfeelɔi lɛ baafata ehe yɛ ŋwɛi?

Klɛŋklɛŋ lɛ, ha wɔsusu nii ahe wɔkwɛ kɛji efɔŋfeelɔ lɛ shɛɔ taomɔnii kɛha ŋwɛi shihilɛ lɛ he lo. Esa akɛ abaptisi mɛi ni yɔɔ ŋwɛi hiɛnɔkamɔ lɛ yɛ nu mli, ni akɛ mumɔ krɔŋkrɔŋ lɛ hu abaptisi amɛ, koni amɛbatsɔmɔ Yesu kaselɔi kɛ Nyɔŋmɔ bii. (Yohane 3:3, 5) Taomɔnii kroko hu ji akɛ, esa akɛ amɛhi shi yɛ Nyɔŋmɔ mlai ni kɔɔ jeŋba he lɛ naa koni amɛjie sui tamɔ anɔkwayeli, mlitsɔlɛ kɛ ekrokomɛi ni tamɔ nakai lɛ akpo. (1 Korintobii 6:9-11) Agbɛnɛ hu, esa akɛ amɛkpɛtɛ Nyɔŋmɔ kɛ Kristo he gbagbalii kɛyashi amɛbaagbe amɛsɔɔmɔ yɛ shikpɔŋ nɛɛ nɔ lɛ naa. (Luka 22:28-30; 2 Timoteo 2:12) Ja amɛshɛ nakai taomɔnii lɛ ahe dani amɛbaasa kɛha gbohiiashitee, ni amɛbaasa kɛha sɔ̃ ni tsĩi hu ni mɛɔ amɛ yɛ ŋwɛi lɛ, no ji, amɛkɛ Kristo baasɔmɔ akɛ osɔfoi kɛ maŋtsɛmɛi kɛye adesai anɔ afii akpe.—Kpojiemɔ 20:6.

Nɔ ni tamɔɔɔ nakai lɛ, efɔŋfeelɔ ni asɛŋ lɛ yɛ Yesu masɛi lɛ ba ejeŋ akɛ ojotswalɔ, ni egbo akɛ ojotswalɔ. (Luka 23:32, 39-41) Eji anɔkwale akɛ ejie bulɛ kpo beni ekɛɛ Yesu akɛ: “Kaimɔ mi, beni oooba yɛ omaŋtsɛyeli lɛ mli lɛ!” (Luka 23:42) Kɛlɛ, no mli lɛ abaptisiko lɛ, ebatsɔko Yesu kaselɔ ni akɛ mumɔ efɔ lɛ mu, asaŋ ehiko shi akɛ mɔ ni baa ejeŋ jogbaŋŋ ni yeɔ anɔkwa. Ani kɛ́ okwɛ lɛ, nilee yɛ mli akɛ Yesu kɛ maŋtsɛyeli yɛ ŋwɛi baawo nuu nɛɛ shi koni eyafata Yesu anɔkwa sɛɛnyiɛlɔi ni amɛtee nɔ amɛye Nyɔŋmɔ anɔkwa amɛwala beaŋ fɛɛ lɛ ahe?—Romabii 2:6, 7.

Akɛ nɔkwɛmɔnɔ lɛ: Kɛ́ mɔ ko ju oshika ni sɛɛ mli lɛ ekpa bo fai akɛ okɛ etɔmɔ lɛ ake lɛ lɛ, ekolɛ obaakpɛ mli akɛ oŋmɛɛ sane lɛ he. Shi ani obaaná hekɛnɔfɔ̃ɔ yɛ emli koni otuu onitsumɔ loo oweku lɛ nɔkwɛmɔ owo edɛŋ? Okɛ nakai hegbɛi lɛ baaha mɛi pɛ ni oyɔɔ hekɛnɔfɔ̃ɔ diɛŋtsɛ yɛ amɛmli lɛ. Nakai nɔŋŋ esa akɛ mɛi ni ahaa amɛ ŋwɛi hiɛnɔkamɔ lɛ hu aha aná hekɛnɔfɔ̃ɔ diɛŋtsɛ yɛ amɛmli akɛ amɛbaafi Nyɔŋmɔ jalɛ taomɔnii lɛ asɛɛ beni amɛbaaye adesai anɔ lɛ. (Kpojiemɔ 2:10) Tsɛ, efɔŋfeelɔ lɛ jɛ etsuiŋ eshwa ehe beni eheɔ egbo lɛ moŋ nɛ, kɛlɛ eshɛɛɛ nakai taomɔnii lɛ ahe.

Shi, ani Yesu ekɛɛɛ efɔŋfeelɔ lɛ akɛ ekɛ lɛ baaya ŋwɛi nakai gbi lɛ nɔŋŋ? No nyɛŋ aba lɛ nakai, ejaakɛ Yesu diɛŋtsɛ po boteee ŋwɛi niiaŋ nakai gbi lɛ nɔŋŋ. Moŋ lɛ, ehi “shikpɔŋ lɛ tsui mli,” ni ji gbonyobu mli gbii etɛ sɔŋŋ. (Mateo 12:40; Marko 10:34) Eshitee lɛ sɛɛ po lɛ, ehi shikpɔŋ lɛ nɔ gbii 40 sɔŋŋ dani ekwɔ kɛtee ŋwɛi. (Bɔfoi lɛ Asaji 1:3, 9) No hewɔ lɛ, enyɛŋ eba lɛ akɛ efɔŋfeelɔ lɛ kɛ Yesu hi ŋwɛi nakai gbi lɛ.

Belɛ, mɛɛ Paradeiso awo efɔŋfeelɔ lɛ shi akɛ ebaahi lɛ mɔ? Kɛ́ atee lɛ shi lɛ, ebaahi shikpɔŋ nɔ Paradeiso ni Yesu baaye nɔ lɛ nɔ. (Bɔfoi lɛ Asaji 24:15; Kpojiemɔ 21:3, 4) Kɛ́ ootao ole Paradeiso lɛ kɛ Nyɔŋmɔ taomɔnii lɛ ahe saji krokomɛi lɛ, okɛ Yehowa Odasefoi lɛ ateŋ mɔ ko agba sane.