Asafoŋ Onukpai​—Ani Nyɛbaawo “Susuma ni Etɔ Lɛ lɛ” Hewalɛ?

Nyɛmi yoo oshijafo ko ni atsɛɔ lɛ Angelaa ni ená afii 30 ni tsuɔ nii akɛ mɔ ni kwɛɔ mɛi ni edara yɛ afii amli lɛ tsui efã fioo. Asafoŋ onukpai lɛ miiba amɛbasara lɛ. Ekolɛ eeshwie eyiŋ akɛ, ‘Mɛni kwraa onukpai lɛ baakɛɛ mi? Mile akɛ mifolɔ asafoŋ kpeei amli fioo, shi daa beni makpa nitsumɔ maba shĩa lɛ, etɔ mi bliboo.’ Kɛfata he lɛ, Angela mami bɛ hewalɛ, ni no hu miihao lɛ waa.

Eji ofata asafoŋ onukpai ni yaasara Angela lɛ ahe kulɛ, mɛni obaafee kɛwo “susuma ní etɔ lɛ” nɛɛ hewalɛ? (Yer. 31:25) Shi klɛŋklɛŋ lɛ, te esa akɛ osaa ohe oha tɛŋŋ koni saramɔ nɛɛ awo mɔ ni nyɛyaasara lɛ hewalɛ lɛ?

SUSUMƆ SHIHILƐ MLI NI ONYƐMI LƐ YƆƆ LƐ HE

Bei komɛi lɛ, wɔnitsumɔ loo teokrase sɔ̃i ni wɔtsuɔ he nii lɛ haa etɔɔ wɔ. Akɛ nɔkwɛmɔnɔ lɛ, gbalɔ Daniel ‘fee vii’ beni ajie ninaa ko kpo atsɔɔ lɛ ni enuuu shishi lɛ. (Dan. 8:27) Beni bɔfo Gabriel jie ehe kpo etsɔɔ lɛ lɛ, eye ebua lɛ waa. Nyɔŋmɔ tsu lɛ ni ebagbala nibii amli etsɔɔ Daniel, ni eha ele akɛ Yehowa enu esɔlemɔi lɛ, ni ekɛɛ lɛ hu akɛ, ekã he eji nuu ni ‘asumɔɔ esane naakpa.’ (Dan. 9:21-23) Sɛɛ mli lɛ, ŋwɛi bɔfo kroko kɛ wiemɔi ni sa wo Daniel hewalɛ.​—Dan. 10:19.

Dani obaayasara nyɛmi ko ni etɔ lɛ loo enijiaŋ eje wui lɛ, obaanyɛ ofee nɔ ko ni tamɔ nakai nɔŋŋ. Hemɔ be kɛsusu eshihilɛ lɛ he dani oya. Mɛɛ naagbai ekɛkpeɔ? Mɛɛ awui ekolɛ naagbai nɛɛ yeɔ lɛ? Mɛi sui kpakpai ejieɔ lɛ kpo? Nyɛmi nuu ko ni atsɛɔ lɛ Richard ni kɛ afii 20 esɔmɔ akɛ asafoŋ onukpa lɛ wie akɛ: “Misusuɔ esui kpakpai lɛ ahe.” Ekɛfata he akɛ: “Kɛ́ misusu shihilɛ mli ni eyɔɔ lɛ he dani mitee lɛ, ehaa minaa gbɛ ni matsɔ nɔ mawo lɛ hewalɛ yɛ naagbai tuuntu ni ekɛkpeɔ lɛ ahe.” Kɛ́ mɔ kroko baafata ohe kɛyasara mɔ lɛ, ebaahi jogbaŋŋ akɛ nyɛaafee ekome kɛsusu shihilɛ mli ni mɔ lɛ yɔɔ lɛ he dani nyɛya?

KAAHA ONYƐMI LƐ TSUI FÃ

Efeɔ mɛi pii hiɛgbele akɛ amɛaawie nibii ni gbaa amɛnaa lɛ ahe amɛtsɔɔ onukpa ko. Hewɔ lɛ, te ooofee tɛŋŋ oye obua lɛ ni egba bo etsuiŋ sane ni esheee gbeyei lɛ? Kɛ́ ofee ohiɛ ŋmɔlɔŋmɔlɔ, ni okɛ hewalɛwoo wiemɔi je shishi lɛ, eyeɔ ebuaa waa. Bei pii lɛ, nyɛmi nuu ko ni atsɛɔ lɛ Michael ni kɛ afii 40 esɔmɔ akɛ asafoŋ onukpa lɛ jeɔ esaramɔ lɛ shishi kɛ wiemɔi ni nyiɛ sɛɛ nɛɛ: “Ole nɔ ko, hegbɛi ni nɔ bɛ ni asafoŋ onukpai yɔɔ lɛ eko ji, ni amɛyasara nyɛmimɛi lɛ yɛ amɛshĩai ni amɛle amɛ jogbaŋŋ. No hewɔ lɛ, mikɛ miishɛɛ ekpa ŋmɛnɛ gbi nɛɛ gbɛ aahu.”

Obaanyɛ okɛ mɔ lɛ asɔle kɛje shishi. Beni bɔfo Paulo sɔleɔ ehaa enyɛmimɛi lɛ, etsĩ amɛhemɔkɛyeli, amɛsuɔmɔ, kɛ amɛtsuishiŋmɛɛ lɛ tã. (1 Tes. 1:2, 3) Kɛ́ owie onyɛmi lɛ sui kpakpai lɛ ahe yɛ okɛ lɛ sɔlemɔ lɛ mli lɛ, ebaasaa nyɛ fɛɛ nyɛtsui, ni no baaha nyɛnyɛ nyɛgba sane jogbaŋŋ. Wiemɔi ni okɛbaatsu nii yɛ sɔlemɔ lɛ mli lɛ baanyɛ ashɛje nyɛmi lɛ mii hu. Asafoŋ onukpa ko ni yɔɔ niiashikpamɔ waa ni atsɛɔ lɛ Ray lɛ kɛɛ akɛ: “Bei komɛi lɛ, wɔ fɛɛ wɔhiɛ kpaa nibii kpakpai ni wɔtsuɔ lɛ anɔ.” Ni ekɛfata he akɛ: “No hewɔ lɛ, kɛ́ mɔ ko kai wɔ yɛ he lɛ, ewoɔ wɔ hewalɛ waa.”

OKƐ MUMƆŊ DUROMƆ KEE NII AHA

Taakɛ Paulo fee lɛ, bo hu obaanyɛ okɛ “mumɔŋ duromɔ kee nii” ko aha mɔ lɛ kɛtsɔ Ŋmalɛ mli wiemɔ ko ni okɛ lɛ aaasusu he lɛ nɔ, kɛ́ okɛ lɛ susu kuku kome ko po he. (Rom. 1:11) Akɛ nɔkwɛmɔnɔ lɛ, ekolɛ nyɛmi nuu ko ni ehao lɛ baanu he akɛ ehe bɛ sɛɛnamɔ ko, taakɛ lalatsɛ lɛ ni kɛ ehe to “wolotɔ yɛ lasu mli” lɛ he lɛ nu he lɛ. (Lala 119:83, 176) Beni ogbala nakai ŋmalɛ lɛ mli sɛɛ lɛ, obaanyɛ okɛɛ lɛ akɛ, oheɔ oyeɔ akɛ lɛ hu ‘ehiɛ kpako’ Nyɔŋmɔ kitai lɛ anɔ.

Mɛɛ gbɛ nɔ obaanyɛ okɛ abɛbua ni kɔɔ yoo ni jwiɛtɛi kuku kome laaje lɛ he lɛ aye abua nyɛmi yoo ko ni ekpa shiɛmɔ yaa nɔ ni fe nyɔji ekpaa loo ekãa ni ekɛtsuɔ sɔɔmɔ nitsumɔ lɛ naa eba shi lɛ? (Luka 15:8-10) Ekolɛ jwiɛtɛi ni laaje lɛ fata jwiɛtɛi kukuji ni akɛfee kuɛnii ko ni yɔɔ fɛo lɛ ahe. Ekolɛ kɛ́ okɛ lɛ susu nakai abɛbua lɛ he lɛ, ebaaye ebua lɛ ni ena akɛ ehe hiaa waa yɛ asafo lɛ mli. No sɛɛ lɛ, obaanyɛ oye obua lɛ ni ena akɛ efata Yehowa tooi bibii ni esumɔɔ amɛsane waa lɛ ahe.

Bei pii lɛ, wɔnyɛmimɛi lɛ nyaa he akɛ amɛaawie ŋmalɛ ko ni amɛkane lɛ he. No hewɔ lɛ, okome pɛ okawie! Kɛ́ okane ŋmalɛ ko ni kɔɔ amɛshihilɛ lɛ he lɛ, obaanyɛ ohala wiemɔ ko loo sane muu ko kɛjɛ ŋmalɛ lɛ mli ni obi amɛjwɛŋmɔ yɛ he. Akɛ nɔkwɛmɔnɔ lɛ, beni asafoŋ onukpa ko ekane 2 Korintobii 4:16 lɛ sɛɛ lɛ, ebaanyɛ ebi akɛ, “Ani bo diɛŋtsɛ oyɔse gbɛi komɛi anɔ ni Yehowa eha otsɔ gbɔmɔ hee?” Sanebimɔ ni tamɔ nɛkɛ lɛ baanyɛ atee sanegbaa ni baawo nyɛ fɛɛ hewalɛ babaoo lɛ shi.​—Rom. 1:12.

Obaanyɛ owo onyɛmi lɛ hewalɛ kɛtsɔ mɔ ko ni awie ehe yɛ Biblia lɛ mli ni yaje shihilɛ ni tamɔ nakai nɔŋŋ mli lɛ he sane ni ooogba lɛ lɛ nɔ. Ekolɛ mɔ ko ni ehao lɛ baanu he taakɛ Hana loo Epafrodito nu he lɛ, ejaakɛ amɛteŋ mɔ fɛɛ mɔ hao, shi Nyɔŋmɔ tee nɔ ebu amɛ akɛ amɛjara wa. (1 Sam. 1:9-11, 20; Fil. 2:25-30) Biblia mli nɔkwɛmɔnii krokomɛi babaoo yɛ ni nyɛbaanyɛ nyɛsusu he.

YAA NƆ OTSƆƆ AKƐ OSUSUƆ EHE

Yɛ saramɔ lɛ sɛɛ lɛ, yaa nɔ otsɔɔ akɛ osusuɔ onyɛmi lɛ he. (Bɔf. 15:36) Akɛ nɔkwɛmɔnɔ lɛ, kɛ́ obaamu saramɔ lɛ naa lɛ, obaanyɛ okɛ lɛ ato gbɛjianɔ ni okɛ lɛ aya shiɛmɔ be kroko. Kɛ́ Bernard, ni ji asafoŋ onukpa ko ni yɔɔ niiashikpamɔ waa lɛ yasara nyɛmi ko, ni ekɛ lɛ kpe be kroko lɛ, bei komɛi lɛ etsɔɔ gbɛ ko nɔ ebiɔ lɛ ŋaa ni ewo lɛ lɛ he sane akɛ, “Te tɛŋŋ, ani eeye eebua bo?” Kɛ́ otsɔ gbɛi ni tamɔ nɛkɛ nɔ otsɔɔ akɛ osusuɔ onyɛmi lɛ he lɛ, ebaaye ebua bo ni ona kɛji nɔ kroko yɛ ni esa akɛ ofee kɛye obua lɛ.

Amrɔ nɛɛ ji be ni esa akɛ oha nyɛmimɛi lɛ ana akɛ osusuɔ amɛhe, onuɔ amɛ shishi, ni osumɔɔ amɛ waa. (1 Tes. 5:11) No hewɔ lɛ, dani obaayasara nyɛmi ko lɛ, hemɔ be kɛsusu shihilɛ mli ni eyɔɔ lɛ he. Sɔlemɔ yɛ saramɔ lɛ he. Taomɔ ŋmalɛi ni sa ni okɛbaatsu nii. No dani obaaná wiemɔi ni sa ni okɛbaawo “susuma ní etɔ lɛ” lɛ hewalɛ!