SANEBIMƆI NI BIBLIA LƐ EHÃ HETOO
Ani jamɔi fɛɛ woɔ Nyɔŋmɔ hiɛ nyam?
Kɛ́ obo shihilɛ ni yaa nɔ yɛ je lɛŋ fɛɛ lɛ he adafitswaa toi lɛ, obaana akɛ bei komɛi lɛ, mɛi kɛ jamɔ tsuɔ nii kɛfeɔ nibii fɔji. Jeee jamɔi fɛɛ jɛ anɔkwa Nyɔŋmɔ lɛ ŋɔɔ. (Mateo 7:15) Yɛ anɔkwale mli lɛ, alaka adesai babaoo.—Kanemɔ 1 Yohane 5:19.
Kɛ̃lɛ, Nyɔŋmɔ naa mɛi ni sumɔɔ nɔ kpakpa kɛ anɔkwale yɛ amɛtsui mli lɛ. (Yohane 4:23) Nyɔŋmɔ miifɔ̃ mɛi ni tamɔ nakai lɛ nine ni amɛkase anɔkwale lɛ kɛjɛ e-Wiemɔ ni ji Biblia lɛ mli.—Kanemɔ 1 Timoteo 2:3-5.
Te ooofee tɛŋŋ oyɔse anɔkwa jamɔ lɛ?
Yehowa Nyɔŋmɔ miifee mɛi ni jɛ jamɔi srɔtoi babaoo amli lɛ ekome kɛtsɔ anɔkwale lɛ ni etsɔɔ amɛ, kɛ tsɔɔmɔ ni etsɔɔ amɛ ni amɛsumɔ mɛi lɛ nɔ. (Mika 4:2, 3) No hewɔ lɛ, obaanyɛ oyɔse mɛi ni yɔɔ anɔkwa jamɔ mli lɛ, kɛtsɔ bɔ ni amɛkɛ mɛi krokomɛi yeɔ hãa lɛ nɔ.—Kanemɔ Yohane 13:35.
Yehowa Nyɔŋmɔ kɛ anɔkwa jamɔ miitsu nii kɛmiifee gbɔmɛi srɔtoi fɛɛ ekome.—Lala 133:1
Anɔkwa jalɔi ahemɔkɛyeli kɛ bɔ ni amɛhiɔ shi amɛhãa lɛ damɔ Biblia lɛ nɔ. (2 Timoteo 3:16) Amɛwoɔ Nyɔŋmɔ gbɛ́i lɛ hu hiɛ nyam. (Lala 83:19) Ni amɛhãa maŋ fɛɛ leɔ akɛ Nyɔŋmɔ Maŋtsɛyeli lɛ ji adesai ahiɛnɔkamɔ kome pɛ. (Daniel 2:44) Amɛfeɔ amɛkutsoŋbii lɛ ejurɔ kɛtsɔ ‘amɛla ni amɛhãa etsoɔ’ lɛ nɔ, ni amɛkɛ nakai feemɔ kaseɔ Yesu. (Mateo 5:16) No hewɔ lɛ, abaanyɛ ayɔse anɔkwa Kristofoi kɛtsɔ amɛkutsoŋbii lɛ aŋɔɔ ni amɛyaa yɛ amɛshĩai amli koni amɛkɛ amɛ agba Nyɔŋmɔ Maŋtsɛyeli lɛ he sane kpakpa lɛ nɔ.—Kanemɔ Mateo 24:14; Bɔfoi lɛ Asaji 5:42; 20:20.