Mɛni Hewɔ Esa akɛ Okase Nyɔŋmɔ Maŋtsɛyeli lɛ He Nii?

Mɛi akpekpei abɔ yɛ je nɛŋ ni kɛ amɛhiɛ fɔ̃ɔ Nyɔŋmɔ Maŋtsɛyeli lɛ nɔ. Amɛnyiɛɔ nɔkwɛmɔnɔ ni Yesu fee efɔ̃ shi lɛ sɛɛ. Etsɔɔ ekaselɔi lɛ ni amɛsɔle akɛ: “Omaŋtsɛyeli lɛ aba. Afee nɔ ni osumɔɔ yɛ shikpɔŋ lɛ nɔ.”​—Mateo 6:10.

Naakpɛɛ sane ji akɛ, be ni mɛi babaoo miikase Nyɔŋmɔ Maŋtsɛyeli lɛ he nii lɛ, jamɔi pii hu ebuuu lɛ nɔ ko. Enɛ hewɔ lɛ, yinɔsaneŋmalɔ H.  G. Wells tsɔɔ bɔ ni esa kadimɔ waa akɛ, Yesu “wie nɔ ni . . . etsɛ lɛ Ŋwɛi Maŋtsɛyeli lɛ he sane lɛ he waa yɛ enitsɔɔmɔ lɛ mli,” ni kɛ̃lɛ, Wells kɛfata he akɛ, ‘ŋmɛnɛ lɛ, Kristofoi sɔlemɔi babaoo ebuuu tsɔɔmɔ nɛɛ kwraa amɛhãaa nɔ ko.’

Yehowa Odasefoi efeee amɛnii tamɔ sɔlemɔi nɛɛ, moŋ lɛ amɛwieɔ Nyɔŋmɔ Maŋtsɛyeli lɛ he sane waa. Susumɔ enɛ he okwɛ: Akala wɔwolo titri ni okaneɔ nɛɛ yɛ wiemɔi 220 amli. Akalaa eko fɛɛ eko ni baa lɛ aaashɛ akpekpei 46, ni enɛ hãa wolo nɛɛ bafeɔ wolo tɛtrɛɛ ni ajaraa fe fɛɛ yɛ je nɛŋ. Ni mɛɛ sane titri he ewieɔ? Kadimɔ esaneyitso muu lɛ fɛɛ: Buu-Mɔɔ Eetswa Yehowa Maŋtsɛyeli He Adafi.a

Mɛni hewɔ Yehowa Odasefoi bɔɔ mɔdɛŋ waa koni amɛtswa Nyɔŋmɔ Maŋtsɛyeli lɛ he adafi loo amɛhã mɛi ale lɛ? Sane kome ji akɛ, wɔheɔ wɔyeɔ akɛ Nyɔŋmɔ Maŋtsɛyeli lɛ ji sane titri ni yɔɔ Biblia lɛ ni ji wolo ni he hiaa fe fɛɛ yɛ je lɛ mli lɛ mli. Kɛfata he lɛ, wɔyɛ nɔmimaa akɛ Nyɔŋmɔ Maŋtsɛyeli lɛ pɛ baanyɛ atsu naagbai ni adesai kɛkpeɔ ŋmɛnɛ lɛ ahe nii diɛŋtsɛ.

Yehowa Odasefoi miibɔ mɔdɛŋ ni amɛkase Yesu kɛtsɔ mɛi ajwɛŋmɔ ni amɛgbalaa kɛyaa Nyɔŋmɔ Maŋtsɛyeli lɛ nɔ lɛ nɔ. Be ni Yesu yɔɔ shikpɔŋ lɛ nɔ lɛ, ekɛ Nyɔŋmɔ Maŋtsɛyeli lɛ fee nɔ titri ni he hiaa lɛ fe fɛɛ yɛ eshihilɛ kɛ eshiɛmɔ nitsumɔ lɛ mli. (Luka 4:43) Mɛni hewɔ Maŋtsɛyeli lɛ he hiaa Yesu waa nakai? Ni mɛni hewɔ esa akɛ ehe ahia bo? Wɔmiifɔ̃ bo nine ni okane hetoo ni Biblia lɛ kɛhãa lɛ taakɛ atsɔɔ yɛ saji ni nyiɛ sɛɛ nɛɛ amli lɛ.