SANEYITSO LƐ MLITSƆƆMƆ | NYƆŊMƆ MAŊTSƐYELI LƐ—MƐNI HEWƆ ESA AKƐ EHE AHIA BO?

Nyɔŋmɔ Maŋtsɛyeli Lɛ—Mɛɛ Gbɛ nɔ Ebaaye Ebua Bo?

Ekã shi faŋŋ akɛ saji ni okane kɛtsɔ hiɛ lɛ ehã ona akɛ Nyɔŋmɔ Maŋtsɛyeli lɛ he hiaa Yehowa Odasefoi waa diɛŋtsɛ. Ni ekolɛ oná jɔɔmɔi ni Nyɔŋmɔ Maŋtsɛyeli lɛ kɛbaaba wɔsɛɛ lɛ ni asusu he lɛ ekomɛi ahe miishɛɛ, ni ootao ole amɛhe nii babaoo. Yɛ nakai beaŋ nɔŋŋ lɛ, obaabi ohe akɛ ani nibii ni awieɔ nɛɛ baaba mli anɔkwale.

Ehi akɛ obaakwɛ jogbaŋŋ, moŋ fe ni obaahe nɔ fɛɛ nɔ ni obaanu lɛ oye. (Abɛi 14:15) Yɛ gbɛ ko nɔ lɛ obaanyɛ okɛ nilee atsu nii tamɔ blema Beroiabii lɛ fee lɛ.a Be ni ashiɛ Maŋtsɛyeli lɛ he sane kpakpa lɛ atsɔɔ Beroiabii lɛ klɛŋklɛŋ kwraa lɛ, amɛkpɛlɛ nɔ ni amɛnu lɛ nɔ, shi jeee akɛ amɛmiisumɔ ni nɔ ni akɛɛ amɛ lɛ afee anɔkwale kɛkɛ. No najiaŋ lɛ, amɛpɛi Ŋmalɛ lɛ mli jogbaŋŋ ‘kɛkwɛ akɛ nibii nɛɛ yɛ mli nakai lo.’ (Bɔfoi lɛ Asaji 17:11) Kɛ́ wɔɔwie he yɛ gbɛ kroko nɔ lɛ, Beroiabii lɛ kɛ nɔ ni amɛnu lɛ to nɔ ni Ŋmalɛ lɛ kɛɔ lɛ he. Sɛɛ mli lɛ, amɛbahe amɛye akɛ sane kpakpa lɛ damɔ Nyɔŋmɔ Wiemɔ lɛ nɔ shiishi.

Yehowa Odasefoi kɛ miishɛɛ miifɔ̃ bo nine koni ofee nakai nɔŋŋ. Wɔmiisumɔ ni oŋɔ hegbɛ lɛ ni okɛ Yehowa Odasefoi akase Biblia lɛ ni aheee nɔ ko, koni okɛ nɔ ni amɛheɔ amɛyeɔ yɛ Nyɔŋmɔ Maŋtsɛyeli lɛ he lɛ ato nɔ ni Biblia lɛ tsɔɔ lɛ he okwɛ.

Kɛ́ ohã akɛbo kase Biblia lɛ, jeee Nyɔŋmɔ Maŋtsɛyeli lɛ he nii pɛ obaale, shi ebaaye ebua bo hu ni oná shihilɛ mli sanebimɔi ni he hiaa waa lɛ ahetoi.

Nɛgbɛ wɔjɛ?
Mɛni hewɔ wɔyɔɔ shihilɛ mli?
Mɛni hewɔ Nyɔŋmɔ ŋmɛɔ piŋmɔ gbɛ?
Mɛni baa kɛ́ wɔgboi?
Ani abaakpata shikpɔŋ lɛ hiɛ?
Mɛni hãa anáa weku shihilɛ ni miishɛɛ yɔɔ mli?

Nɔ ni fe fɛɛ lɛ, kɛ́ okase Biblia lɛ, ebaaye ebua bo ni ‘otsi obɛŋkɛ Nyɔŋmɔ.’ (Yakobo 4:8) Kɛ́ otsi obɛŋkɛ Nyɔŋmɔ kpaakpa lɛ, ebaawa bo ni ona bɔ ni Nyɔŋmɔ Maŋtsɛyeli lɛ baanyɛ aye abua bo ahã—jeee amrɔ nɛɛ pɛ kɛkɛ shi kɛmiiya naanɔ. Yesu diɛŋtsɛ kɛɛ e-Tsɛ lɛ yɛ sɔlemɔ mli akɛ: ‘Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.’—Yohane 17:3.

Yehowa Odasefoi baanyɛ amɛkɛ wolo nɛɛ atsu nii ni amɛkɛ bo akase Biblia lɛ.

Kɛ́ ootao akɛbo akase Biblia lɛ ni aheee nɔ ko lɛ, bi Yehowa Odasefoi lɛ ateŋ mɔ fɛɛ mɔ loo ŋmalamɔ fɔm ni yɔɔ www.jw.org lɛ nɔ nii. (Kwɛmɔ BI KONI AKƐ BO AKASE BIBLIA LƐ ni yɔɔ shishijee baafa lɛ nɔ lɛ)

a Beroia ji maŋtiase ko yɛ blema Makedonia.

Nɔ Hewɔ ni Esumɔɔ Nyɔŋmɔ Maŋtsɛyeli Lɛ

Nyɛsɛɛ nɛɛ, akɛɛ gbekɛ yoo ko ni eye afii nyɔŋma ni atsɛɔ lɛ Folake lɛ ni edamɔ eskul lɛ najiaŋ eŋma sane ko ni yitso ji “Nɔ ni Misumɔɔ Fe Fɛɛ yɛ Je Nɛɛ Mli” lɛ he sane. Folake hala akɛ ebaaŋma nɔ hewɔ ni esumɔɔ akɛ ehã mɛi ale Nyɔŋmɔ Maŋtsɛyeli lɛ he sane lɛ he sane.

Folake tsɔɔ mli akɛ: “Nyɔŋmɔ Maŋtsɛyeli lɛ ji nɔyeli ko ni yɔɔ diɛŋtsɛ. Shi anaaa, no hewɔ lɛ onyɛŋ ona—kɛ́ obu hiŋmɛi glase po onaŋ!”

Folake tee nɔ eŋmala jɔɔmɔi ni Maŋtsɛyeli lɛ kɛbaaba lɛ, titri lɛ nɔ ni kã etsui nɔ ni ekpaa gbɛ waa lɛ ahe saji. Be ni eŋmalaa naagbai ni Maŋtsɛyeli lɛ baatsu he nii lɛ ahe sane lɛ, ewie akɛ, “Kɛ́ mina mɛi ni bɛ wɔɔhe ni amɛwɔɔ gbɛjegbɛi lɛ ahe lɛ” loo “mina bɔ ni hɔmɔ gbeɔ gbekɛbii yɛ je lɛ mli he fɛɛ he lɛ, ehãa miwerɛ hoɔ mihe waa.” Ekɛfata he akɛ, “Kɛ́ mikane Yesaia 65:21 lɛ, ehãa mináa miishɛɛ ekoŋŋ.” Be ni nakai kuku lɛ wieɔ adesai ni baahi Nyɔŋmɔ Maŋtsɛyeli nɔyeli lɛ shishi lɛ he lɛ, ewo shi akɛ: “Amɛaamamɔ tsũi, ni amɛaahi mli, ni amɛaafee weintromi, ni amɛaaye mli yibii!”

Folake wie akɛ eekwɛ be ni Nyɔŋmɔ baatsɔ e-Maŋtsɛyeli lɛ nɔ ejie helai fɛɛ kɛjɛ shihilɛ mli lɛ hu gbɛ. Yɛ sane ni eŋma lɛ mli lɛ etsɛ Kpojiemɔ 21:4 lɛ yisɛɛ, jɛmɛ kɛɔ akɛ Nyɔŋmɔ “aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” Be ni emuɔ esane lɛ naa lɛ, eŋma ekoŋŋ akɛ, nɔ ni esumɔɔ fe fɛɛ yɛ je nɛɛ mli ji, ni ewie Yehowa kɛ e-Maŋtsɛyeli lɛ he sane. No hewɔ lɛ, ekã shi faŋŋ akɛ, gbekɛ yoo fioo nɛɛ sumɔɔ Nyɔŋmɔ Maŋtsɛyeli lɛ waa diɛŋtsɛ!