Ŋulamiiaŋkwɛmɔ Kɛ Klamɔ​—Ani Amɛhãa Wɔleɔ Nɔ Ni Baaba Wɔsɛɛ?

ŊULAMIIAŊKWƐMƆ

Ŋulamiiaŋkwɛlɔi kɛɔ akɛ, ŋulamii lɛ, nyɔɔŋtsere lɛ, kɛ shibɔlemɔ ŋulamii lɛ náa mɛi ni yɔɔ shikpɔŋ lɛ nɔ lɛ anɔ hewalɛ waa. Amɛkɛɛ kɛ́ afɔ mɔ ko lɛ, bɔ ni ŋwɛiniiaŋ nibii nɛɛ ashikamɔ yɔɔ lɛ ji nɔ ni baatsɔɔ bɔ ni mɔ lɛ subaŋ kɛ ewɔsɛɛ baaji ahã.

Jeee ŋmɛnɛ aje ŋulamiiaŋkwɛmɔ shishi; aje shishi yɛ blema Babilon tɔ̃ɔ, shi kɛbashi ŋmɛnɛ lɛ, eyɛ lolo ni ehe shi waa. Afee niiamlitaomɔ ko yɛ United States yɛ afi 2012, ni mɛi ni abibii amɛ saji lɛ amlijai etɛ mli ekome kɛɛ ŋulamiiaŋkwɛmɔ “kɛ jeŋ shikpamɔ yɛ tsakpaa ko,” ni amɛmlijai nyɔŋma mli ekome hu kɛɛ “edamɔ jeŋ shikpamɔ nɔ diɛŋtsɛ.” Ani nakai eji? Dabi. Hã wɔkwɛ nɔ hewɔ.

• Hewalɛ ko jɛɛɛ shibɔlemɔ ŋulamii lɛ kɛ ŋulamii amli ni baanyɛ aná adesai anɔ hewalɛ tamɔ bɔ ni ŋulamiiaŋkwɛlɔi kɛɔ lɛ.

• Bei pii lɛ, amɛwieɔ nibii ni amɛkɛɛ ebaaba lɛ ahe bɔ ni ebaanyɛ ekɔ mɔ fɛɛ mɔ he.

• Akɔntaa ni ŋulamiiaŋkwɛlɔi buɔ ŋmɛnɛ lɛ damɔ susumɔ ni ahiɛ yɛ blema akɛ shibɔlemɔ ŋulamii lɛ bɔleɔ shikpɔŋ lɛ nɔ. Shi yɛ anɔkwale mli lɛ, shibɔlemɔ ŋulamii lɛ bɔleɔ hulu lɛ.

• Nibii ni ŋulamiiaŋkwɛlɔi srɔtoi wie yɛ gbɔmɔ kome too he lɛ kɛ amɛhe eyakpãaa gbee.

• Ŋulamiiaŋkwɛlɔi ejara gbɔmɛi amli amɛwo kui, loo zodiak okadii 12 amli, yɛ gbi ni akɛfɔ amɛ lɛ naa. Akɛni shikpɔŋ lɛ shikamɔ etsake shii abɔ yɛ afii ohai abɔ ni eho lɛ amli hewɔ lɛ, deetii ni akɛhã zodiak okadii lɛ kɛ be ni hulu lɛ kɛtsɔɔ ŋulamikui ni akɛ amɛgbɛ́i wo okadii lɛ ateŋ lɛ enyiɛɛɛ dɔŋŋ.

Mɛi kɛɛ abaanyɛ adamɔ zodiak okadii lɛ anɔ atsɔɔ nɔ hewɔ ni mɔ ko feɔ enii yɛ gbɛ ko nɔ. Shi yɛ anɔkwale mli lɛ, mɛi ni afɔ amɛ yɛ deeti kome nɔ efeee amɛnii yɛ gbɛ kome nɔ; deeti ni akɛfɔ mɔ ko lɛ kɛ bɔ ni mɔ lɛ baa ejeŋ ehãa lɛ bɛ tsakpãa ko kwraa. Yɛ nɔ najiaŋ ni ŋulamiiaŋkwɛlɔi kɛ mɛi baaye yɛ bɔ ni mɛi lɛ ji lɛ naa lɛ, amɛdamɔɔ amɛ diɛŋtsɛ amɛsusumɔi anɔ amɛkojoɔ mɛi lɛ, ni amɛtsɔɔ bɔ ni mɛi lɛ anifeemɔi kɛ amɛsubaŋ baaji. Ani enɛ jeee hiɛiaŋkwɛmɔ?

KLAMƆ

Mɛi bɔi klamɔfoi aŋɔɔ yaa kɛjɛ blema tɔ̃ɔ. Klamɔfoi komɛi kwɛ kooloi kɛ gbɔmɛi amusuŋnii loo bɔ ni wuɔ nuu ko kɔlɔɔ niyenii ehãa lɛ nɔ amɛtsɔɔ nɔ ni baaba. Mɛi komɛi hu damɔ samai ni yɔɔ tii baa loo kɔfi ni awiɛ nɔ amɛtsɔɔ nɔ ni baaba. Ŋmɛnɛ lɛ, amɛkɛ tarot kaadii, nɔ ko kokloo tamɔ bɔɔlu, ludu tɛ, kɛ nibii krokomɛi tsuɔ nii kɛtsɔɔ nɔ ni baaba mɛi anɔ wɔsɛɛ. Ani abaanyɛ atsɔ klamɔ nɔ atsɔɔ nɔ ni baaba wɔsɛɛ lɛɛlɛŋ? Dabi, anyɛŋ. Hã wɔsusu he wɔkwɛ.

Ani klamɔfoi kɛ amɛhe kpãa gbee? Bei pii lɛ, kɛ́ amɛtsɔ gbɛi srɔtoi anɔ amɛkla yɛ nɔ kome too lɛ nɔŋŋ he lɛ, amɛkɛ amɛhe kpãaa gbee. Ni kɛ́ amɛtsɔ gbɛ kome too nɔ amɛkla po lɛ, esoro nɔ ni amɛteŋ mɔ fɛɛ mɔ wieɔ. Akɛ nɔkwɛmɔnɔ lɛ, kɛ́ mɔ ko yabi klamɔfoi enyɔ sane kome too yɛ wɔsɛɛ he, ni amɛ fɛɛ amɛtsɔ kaadi henɔ kome too nɔ amɛhã lɛ hetoo lɛ, kulɛ esa akɛ hetoo lɛ afee ekome. Shi bei pii lɛ, jeee nakai ebaa lɛ.

Ŋmɛnɛ lɛ, mɛi pii ayiŋ etɛ̃ɛɛ amɛ yɛ klamɔfoi anifeemɔi ahe. Mɛi ni wieɔ shiɔ amɛ lɛ kɛɛ kaadii lɛ kɛ nibii ni tamɔ bɔɔlu ni amɛkɛtsuɔ nii lɛ ji nibii komɛi kɛkɛ, ni akɛ, jeee nibii nɛɛ anɔ klamɔfoi lɛ damɔɔ amɛtsɔɔ nɔ ni baaba wɔsɛɛ lɛ, shi moŋ bɔ ni mɛi lɛ feɔ amɛ nii amɛhãa lɛ. Akɛ nɔkwɛmɔnɔ lɛ, klamɔfonyo ni he esa lɛ biɔ mɔ ni eba eŋɔɔ lɛ saji komɛi, ni no sɛɛ lɛ, ekwɛɔ mɔ lɛ nifeemɔ, ni eboɔ mɔ lɛ toi jogbaŋŋ hu, akɛ aleenɔ ebaana nɔ ni yaa nɔ yɛ mɔ lɛ shihilɛ mli lo. Kɛ́ ena nɔ ko nakai lɛ, ewieɔ lɛ tamɔ nɔ ni klamɔ nɔ etsɔ ele, tsɛbelɛ mɔ lɛ nifeemɔ ko loo wiemɔ ko ni ewie ni ehiɛ bɛ ehe nɔ lɛ ji nɔ ni hã ele. Klamɔfoi komɛi ehã mɛi ehe amɛ amɛye, ni amɛhe shika pii yɛ amɛdɛŋ.

NƆ NI BIBLIA LƐ KƐƆ

Kɛ́ wɔheɔ ŋulamiiaŋkwɛmɔ kɛ klamɔ wɔyeɔ lɛ, belɛ wɔheɔ wɔyeɔ akɛ atsɔ hiɛ atsɔɔ nɔ ni baaba wɔnɔ wɔsɛɛ. Shi ani nakai sane lɛ ji? Biblia lɛ hãa wɔleɔ akɛ, wɔbaanyɛ wɔhala nɔ ni wɔbaasumɔ ni wɔhe wɔye loo nɔ ni wɔbaasumɔ ni wɔfee yɛ shihilɛ mli, ni nibii ni wɔhalaa lɛ baatsɔɔ bɔ ni wɔwɔsɛɛ baaji.​—Yoshua 24:15.

Nyɔŋmɔ tsuji tsiɔ amɛhe kɛjeɔ ŋulamiiaŋkwɛmɔ kɛ klamɔ he yɛ yiŋtoo kroko hewɔ. No ji akɛ, Nyɔŋmɔ nyɛɔ nifeemɔi nɛɛ. Biblia lɛ kɛɔ akɛ: “Akana mɔ ko yɛ nyɛteŋ . . . ni klaa, aloo mɔ ni feɔ majik, aloo mɔ ni biɔ nii, aloo mɔ ni yeɔ ŋkunyaa, aloo mɔ ni tsuɔ mɛi tsofã, aloo mɔ ni yaa mumɔi atsɛlɔ loo klamɔfonyo ŋɔɔ, aloo mɔ ni biɔ gbohii anii. Ejaakɛ Yehowa miihi mɔ fɛɛ mɔ ni feɔ nɛkɛ nibii nɛɛ.”a​—5 Mose 18:10-12.