Kɛ́ Okɛɛ “Amen” Lɛ, Yehowa Hiɛ Sɔɔ

KƐ́ WƆJÁ Yehowa lɛ, enáa miishɛɛ. ‘Ekaa etoi ni eboɔ etsuji toi jogbaŋŋ,’ ni nibii ni wɔfeɔ kɛjieɔ eyi lɛ eko eko bɛ ni ehiɛ esɔɔɔ, kɛ́ eji nɔ ko bibioo po. (Mal. 3:16) Akɛ nɔkwɛmɔnɔ lɛ, susumɔ wiemɔ ni ji, “amen” lɛ he okwɛ. Wɔkɛ wiemɔ kuku nɛɛ fɔɔ nitsumɔ waa. Shi kɛ́ wɔkɛɛ “Amen” lɛ, ani Yehowa hiɛ sɔɔ? Hɛɛ, ehiɛ sɔɔ! Mɛni hewɔ wɔkɛɔ nakai? Dani wɔbaahã sanebimɔ nɛɛ hetoo lɛ, hã wɔsusu nɔ ni wiemɔ nɛɛ tsɔɔ kɛ bɔ ni akɛtsu nii ahã yɛ Biblia lɛ mli lɛ he wɔkwɛ.

“MAŊBII LƐ FƐƐ AKƐƐ AKƐ, ‘AMEN!’”

Wiemɔ “amen” lɛ shishi ji, “aba mli nakai,” loo “lɛɛlɛŋ.” Aná wiemɔ nɛɛ kɛjɛ Hebri wiemɔ ko ni shishi ji “yeɔ anɔkwa,” loo “amuɔ afɔ̃ɔ nɔ” lɛ mli. Yɛ blema lɛ, kɛ́ aaye mɔ ko sane lɛ, bei komɛi lɛ, ahãa ekãa kitã. Kɛ́ ekã kitã lɛ egbe naa lɛ, esa akɛ ekɛɛ “amen” kɛtsɔɔ akɛ nɔ fɛɛ nɔ ni ewie lɛ ji anɔkwale, ni akɛ nɔ fɛɛ nɔ ni baajɛ nɔ ni awie lɛ mli kɛba lɛ he sɔ̃ baatere lɛ. (4 Mo. 5:22) Kɛ́ kitã ni mɔ lɛ kã lɛ kɔɔ shi ko ni ewo lɛ he lɛ, no lɛ “amen” ni ebaakɛɛ yɛ mɛi fɛɛ ahiɛ lɛ baawo lɛ hewalɛ waa ni eye ewiemɔ nɔ.—Neh. 5:13.

Be ni Israelbii lɛ yashɛ Shiwoo Shikpɔŋ lɛ nɔ lɛ, amɛkɛ wiemɔ “amen” lɛ tsu nii yɛ gbɛ ko ni sa kadimɔ waa nɔ, tamɔ bɔ ni abɔ he amaniɛ yɛ 5 Mose 27 lɛ. Amɛbua amɛhe naa yɛ Ebal Gɔŋ lɛ kɛ Gerizim Gɔŋ lɛ teŋ, kɛkɛ ni akane Mla lɛ atsɔɔ amɛ. Be ni amɛbo Mla lɛ mli saji lɛ toi lɛ, amɛfee nɔ ko kɛtsɔɔ akɛ amɛkpɛlɛɔ nɔ ni awie yɛ mli lɛ nɔ. Mɛni amɛfee? Be ni akaneɔ nɔ ni baaba amɛnɔ kɛ́ amɛyeee Mla lɛ nɔ lɛ, amɛhere eko fɛɛ eko nɔ akɛ, “Amen!” (5 Mo. 27:15-26) Feemɔ nɔ ni tee nɔ lɛ he mfoniri okwɛ: Naa hii, yei, kɛ gbekɛbii akpei abɔ ni amɛ fɛɛ amɛkɛ gbee ni wa miibo “Amen!” (Yos. 8:30-35) Israelbii nɛɛ ahiɛ kpaaa nɔ ni tee nɔ nakai gbi lɛ nɔ kɔkɔɔkɔ, ni amɛye amɛwiemɔ nɔ. Biblia lɛ kɛɔ yɛ amɛhe akɛ: “Israelbii lɛ tee nɔ amɛsɔmɔ Yehowa gbii abɔ fɛɛ ni Yoshua yɔɔ wala mli, kɛ gbii abɔ fɛɛ ni onukpai ni hi shi yɛ Yoshua gbele sɛɛ ní le nibii fɛɛ ni Yehowa efee ehã Israel lɛ yɔɔ wala mli lɛ.”—Yos. 24:31.

Yesu hu kɛ “amen” tsu nii kɛtsɔɔ akɛ nibii ni ewie lɛ ji anɔkwale, shi esoro gbɛ ni ekɛtsu nii lɛ yɛ gbɛi ni wɔwie he kɛtsɔ hiɛ lɛ ahe. Yɛ nɔ najiaŋ ni ebaakɛɛ “amen” be ni ewie sane ko egbe naa lɛ, ekɛɛ “amen” lɛ dani ewie (yɛ Ga mli lɛ, akɛ wiemɔ ni ji “lɛɛlɛŋ” lɛ tsu nii). Bei komɛi po lɛ, etĩɔ wiemɔ “amen” loo “lɛɛlɛŋ” lɛ mli shii enyɔ. (Mat. 5:18; Yoh. 1:51) Enɛ ma nɔ mi ehã mɛi ni boɔ lɛ toi lɛ akɛ, saji ni ewie lɛ ji anɔkwale shiishi. Yesu wie kɛ nɔmimaa ejaakɛ lɛ ji mɔ ni Nyɔŋmɔ kɛ hegbɛ ehã lɛ akɛ ehã Nyɔŋmɔ shiwoi lɛ fɛɛ aba mli.—2 Kor. 1:20; Kpo. 3:14.

“MAŊBII LƐ FƐƐ KƐƐ AKƐ, ‘AMEN!’ NI AMƐJIE YEHOWA YI”

Agbɛnɛ hu, Israelbii lɛ kɛɛ “amen” be ni amɛjieɔ Yehowa yi loo amɛsɔleɔ amɛhãa lɛ. (Neh. 8:6; Lala 41:13) Yɛ sɔlemɔi agbɛfaŋ lɛ, amɛwie nakai kɛtsɔɔ akɛ amɛkpɛlɛɔ nibii ni awie yɛ sɔlemɔ lɛ mli lɛ anɔ. “Amen” ni amɛkɛɛ lɛ hã amɛ hegbɛ ni amɛkɛ amɛhe awo nɔ ni yaa nɔ lɛ mli, ni enɛ fata nibii ni hã henaabuamɔi ni tamɔ nakai lɛ fee miishɛɛ lɛ ahe. Akɛ nɔkwɛmɔnɔ lɛ, susumɔ nɔ ni tee nɔ be ni Maŋtsɛ David kɛ Yehowa Adeka lɛ ba Yerusalem lɛ he okwɛ. Israelbii lɛ ná miishɛɛ waa. Nakai gbi lɛ, David jɛ etsuiŋ elá kɛjie Yehowa yi. Aŋma lala nɛɛ, ni ji sɔlemɔ hu lɛ, mli wiemɔi yɛ 1 Kronika 16:8-36. Sɔlemɔ nɛɛ mli wiemɔi lɛ ta maŋbii lɛ atsuiŋ aahu akɛ, “maŋbii lɛ fɛɛ kɛɛ akɛ, ‘Amen!’ ni amɛjie Yehowa yi.” Ekome ni amɛfee kɛjá Yehowa nakai gbi lɛ hã amɛná miishɛɛ waa.

Blema Kristofoi lɛ hu kɛ wiemɔ ni ji “amen” lɛ tsu nii, shi amɛkɛɛɛ lɛ kɛkɛ. Mɛɛ bei amli nɛkɛ amɛkɛtsu nii? Bei komɛi lɛ, kɛ́ amɛmiijie Yehowa yi lɛ, amɛkɛɔ “Amen.” Amɛteŋ mɛi ni ŋmala Biblia lɛ eko lɛ ateŋ mɛi pii kɛtsu nii yɛ woji ni amɛŋmala lɛ amli. (Rom. 1:25; 16:27; 1 Pet. 4:11) Agbɛnɛ hu, kɛ́ amɛyakpe lɛ, amɛfɔɔ “amen” kɛɛmɔ be ni asɔle agbe naa. (1 Kor. 14:16) Yɛ Kpojiemɔ wolo lɛ mli lɛ, awie akɛ mumɔŋ bɔɔ nii ni yɔɔ ŋwɛi lɛ po jie Yehowa yi amɛkɛɛ: “Amen! Nyɛjiea Yah yi!”—Kpo. 19:1, 4.

“AMEN” NI OKƐƆ LƐ JEEE NƆ KO FOLO KO KƐKƐ

Saji nɛɛ ni wɔsusu he lɛ hãa wɔnaa nɔ hewɔ ni esa jogbaŋŋ akɛ wɔbaakɛɛ “amen” yɛ sɔlemɔi anaagbee lɛ. Kɛ́ wɔkɛɛ “amen” yɛ wɔ diɛŋtsɛ wɔsɔlemɔi anaagbee lɛ, etsɔɔ akɛ nɔ ni wɔwie lɛ jɛ wɔtsuiŋ lɛɛlɛŋ. Kɛ́ wɔtee he ko, ni mɔ ko sɔle ni wɔhere nɔ “amen” yɛ wɔtsuiŋ loo eje wɔnaa lɛ, etsɔɔ akɛ wɔfiɔ nɔ ni mɔ lɛ ewie lɛ sɛɛ. Enɛ hãa wɔnaa akɛ, “amen” ni wɔkɛɔ lɛ jeee nɔ ko folo ko kɛkɛ. Naa nibii krokomɛi hu ni tsɔɔ nakai.

Ehãa anaa akɛ wɔjwɛŋmɔ yɛ jamɔ ni wɔjáa Yehowa lɛ nɔ jogbaŋŋ. Bɔ ni wɔfeɔ wɔnii wɔhãa kɛ́ mɔ ko miisɔle, kɛ “amen” ni wɔkɛɔ yɛ sɔlemɔ lɛ naagbee lɛ fɛɛ fata jamɔ ni wɔjáa Yehowa lɛ he. Dani “amen” ni wɔbaakɛɛ lɛ baafee “amen” kpakpa lɛ, esa akɛ wɔkɛ wɔjwɛŋmɔ ama sɔlemɔ lɛ nɔ ni wɔbo toi jogbaŋŋ.

Ehãa wɔ kɛ wɔnyɛmimɛi lɛ feɔ ekome. Kɛ́ mɔ ko damɔ asafo lɛ najiaŋ eesɔle lɛ, wɔ kɛ wɔnyɛmimɛi Kristofoi lɛ fɛɛ feɔ ekome kɛboɔ nakai sɔlemɔ kome lɛ toi. (Bɔf. 1:14; 12:5) Kɛ́ sɔlemɔ lɛ ta wɔtsuiŋ, ni wɔ kɛ amɛ fɛɛ here nɔ akɛ “Amen” lɛ, no hu feɔ wɔ ekome. Kɛ́ wɔkɛɛ “amen” lɛ yɛ wɔtsui mli jio, wɔwie ni eje kpo jio, ekome ni wɔfee kɛtsɔɔ akɛ wɔfiɔ nɔ ni abi yɛ sɔlemɔ lɛ mli lɛ sɛɛ lɛ hu baanyɛ atsirɛ Yehowa ni ehã sɔlemɔ lɛ hetoo.

Nyɛmi yoo ko miibo asafoŋ kpee toi kɛtsɔ tɛlifoŋ nɔ, ni ema eyi shi eebo sɔlemɔ lɛ toi — Wɔtsɔɔ “Amen” ni wɔkɛɔ lɛ nɔ wɔ kɛ wɔnyɛmimɛi lɛ feɔ ekome kɛjieɔ Yehowa yi

Ehãa wɔ hegbɛ ni wɔjie Yehowa yi. Yehowa naa nɔ fɛɛ nɔ ni wɔfeɔ kɛjáa lɛ lɛ, kɛ́ eji nɔ ko bibioo po. (Luka 21:2, 3) Ele wɔsusumɔi, ni enaa wɔtsuiŋ. No hewɔ lɛ, kɛ́ ekolɛ wɔboɔ asafoŋ kpeei lɛ toi yɛ foŋ nɔ akɛni wɔnyɛɛɛ wɔya Maŋtsɛyeli Asa lɛ nɔ lɛ hewɔ po lɛ, Yehowa nuɔ “amen” ni wɔkɛɔ lɛ, ni ehiɛ sɔɔ. Ehãa enaa akɛ wɔ kɛ mɛi ni ekpe yɛ Asa lɛ nɔ lɛ efee ekome kɛmiijie eyi.

Ekolɛ wɔbuuu “amen” ni wɔkɛɔ lɛ nɔ ko, shi ehe miihia waa. Niiamlitaomɔ wolo ko wie akɛ, Nyɔŋmɔ tsuji tsɔɔ wiemɔ kome nɛɛ nɔ amɛhãa anaa akɛ “amɛyɛ nɔmimaa yɛ nɔ ni amɛwieɔ lɛ he, amɛfiɔ nɔ ko ni awie lɛ sɛɛ waa, ni amɛheɔ amɛyeɔ kɛ amɛtsui fɛɛ akɛ nɔ ni awie lɛ baaba mli.” Eba akɛ “amen” fɛɛ “amen” ni wɔbaakɛɛ lɛ baasa Yehowa hiɛ.—Lala 19:14.

ANI BE FƐƐ BE ESA AKƐ OKƐƐ “AMEN ”?

“Amen” ni wɔkɛɔ yɛ sɔlemɔi anaagbee lɛ jeee nɔ ko folo ko kɛkɛ. Ani enɛ tsɔɔ akɛ kɛ́ mɔ ko miisɔle ni etɔ̃ lɛ, wɔkakɛɛ “amen”? Dabi, etsɔɔɔ nakai doo. Yehowa le akɛ wɔ fɛɛ wɔtɔ̃ɔ yɛ wiemɔ mli, ni ekɛ tɔmɔi nɛɛ keɔ wɔ. No hewɔ lɛ, yɛ nɔ najiaŋ ni wɔkɛ wɔjwɛŋmɔ baama wiemɔ fɛɛ wiemɔ ni ejaaa ni mɔ ni sɔleɔ lɛ kɛbaatsu nii lɛ nɔ lɛ, esa akɛ wɔkɛ wɔjwɛŋmɔ ama oti ni mɔ lɛ taoɔ ewie he lɛ moŋ nɔ. Kɛ́ wɔfee nakai lɛ, ekolɛ wɔnaŋ naagba ko yɛ “amen” ni wɔbaakɛɛ lɛ he.

Shi kɛ́ mɔ ni sɔleɔ lɛ jeee Yehowa tsulɔ hu? Ani esa akɛ wɔkɛɛ “amen” yɛ sɔlemɔ lɛ naagbee, kɛ́ yɛ wɔtsui mli jio, eje wɔnaa jio? Dabi. Bei komɛi lɛ, wɔyajeɔ shihilɛi ni tamɔ nakai amli. Tamɔ ekolɛ wɔyɛ nitsumɔhe lɛ loo he kroko ni tamɔ nakai, ni atsɛ mɔ ko akɛ esɔle. Aloo wɔyɛ shĩa ni wekuyitso lɛ kɛɛ ebaasɔle ehã weku lɛ, shi ejeee Yehowa Odasefonyo. Kɛ́ eba lɛ nakai lɛ, mɛni esa akɛ wɔfee?

Kɛ́ wɔyaje shihilɛ ni tamɔ nakai mli lɛ, wɔbaanyɛ wɔfee diŋŋ, shi esaaa akɛ wɔfeɔ nɔ ko ni etsɔɔɔ bulɛ. Wɔkɛŋ “amen,” ni wɔmɔmɔŋ mɛi ni yɔɔ wɔmasɛi lɛ aniji amli hu, ejaakɛ kɛ́ wɔfee nakai lɛ ebaatsɔɔ akɛ wɔ kɛ amɛ efee ekome kɛmiisɔle. Kɛ́ wɔmiisumɔ lɛ, wɔ diɛŋtsɛ wɔbaanyɛ wɔsɔle yɛ wɔyitsoŋ, shi wɔkɛŋ “amen” lɛ ni eje kpo, ejaakɛ kɛ́ wɔfee nakai lɛ, mɛi ni nuɔ lɛ baasusu akɛ amɛsɔlemɔ lɛ he “amen” wɔkɛɔ lɛ. Kɛ́ akɛɛ ate shi adamɔ shi ni asɔle lɛ, wɔbaanyɛ wɔya nɔ wɔta shi, loo wɔbaanyɛ wɔte shi wɔdamɔ shi; fɛɛ damɔ wɔnɔ. Kristofonyo fɛɛ Kristofonyo baakpɛ eyiŋ yɛ nɔ ni ebaafee kɛ́ eyaje shihilɛ ko ni tamɔ nɛkɛ mli lɛ he. Shi ni wɔbaadamɔ, loo wɔyi shi ni wɔbaama lɛ pɛ kɛkɛ etsɔɔɔ akɛ wɔkɛ wɔhe miiwo jamɔ nifeemɔ ko mli. No hewɔ lɛ, yiŋ fɛɛ yiŋ ni mɔ ko baakpɛ yɛ sane nɛɛ he lɛ, esaaa akɛ mɔ ko wieɔ eshiɔ lɛ.

Saji nɛɛ ni wɔsusu he lɛ hãa wɔnaa nɔ hewɔ ni “amen” kɛɛmɔ jeee nɔ ko folo ko kɛkɛ yɛ Yehowa hiɛ lɛ.