Sanekpakpa Lɛ Kɛhamɔ—Kɛ Wolo Hee Ni Akɛhaa Lɛ
1 Biblia kaselɔi anɔkwafoi kɛ afii ohai abɔ eshwe aahu akɛ amɛaanu Kpojiemɔ wolo lɛ shishi. Kɛjɛ 1917, kɛjɛ be mli ni ajie The Finished Mystery wolo lɛ kpo kɛbaa nɛɛ, Asafo lɛ eŋmala woji babaoo koni eye ebua mɛi ni sheɔ Nyɔŋmɔ gbeyei lɛ ni amɛnu nɛkɛ Biblia mli wolo nɛɛ shishi. Revelation—Its Grand Climax at Hand! wolo lɛ kɛ niianaatsɔɔmɔ ni mli tse ni eshishinumɔ yɔɔ faŋŋ ni yɔɔ ebe naa hu eha yɛ Biblia mli wolo ni ajɛ mumɔŋ aŋma ni ji Kpojiemɔ lɛ he.
2 Yehowa webii lɛ ji mɛi titri ni yɔɔ Kpojiemɔ wolo lɛ kɛ emli ninaai ni tsɔɔ “nii ni sa akɛ aba mli oya” ni haa mɔ naa kpɛɔ ehe lɛ he miishɛɛ. (Kpoj. 1:1) Enɛ hewɔ ni wɔkɛ miishɛɛ kpele kɛ hiɛsɔɔ here Revelation Climax wolo hee lɛ nɔ yɛ “Ŋwɛi Jalɛsaneyeli” Kpokpaa Wulu nɔ kpee lɛ shishi lɛ. Ani okaneɔ bo diɛŋtsɛ onɔ lɛ? Yɛ April nyɔŋ lɛ mli lɛ. wɔbaana hegbɛ ni wɔkɛ wolo hee nɛɛ atsɔɔ mɔ fɛɛ mɔ ni wɔkɛkpeɔ.
Emli Nibii Ni Hiɛ Esɔ
3 Hiɛ esɔ Revelation—Its Grand Climax at Hand! wolo lɛ waa ejaakɛ etsɔɔ Kpojiemɔ wolo muu lɛ kuku fɛɛ kuku mli jogbaŋŋ. Enɛ baafee wolo ni nɔ bɛ kɛha aŋkroaŋkro nikasemɔ kɛ mɛi krokomɛi anitsɔɔmɔ hu.
4 Ŋwanejee ko bɛ he akɛ wolo lɛ mfonirii ni jeɔ kpo faŋŋ lɛ emɔ ojwɛŋmɔ waa. Amɛji yelikɛbuamɔ nibii kpelei ni yeɔ buaa ni mɔ anyɛ afee nibii ni Yohane wieɔ he lɛ ahe mfoniri yɛ ejwɛŋmɔ mli. Okɛ mfonirii nɛɛ atsu nii kɛmɔ shi yɛ be mli ni okɛ wolo lɛ haa yɛ shiɛmɔ mli lɛ. Eyɛ mli akɛ wɔmiitao ni wɔkɛ Maŋtsɛyeli jɔɔmɔi lɛ atsu nii yɛ be mli ni wɔkɛ sanekpakpa lɛ haa lɛ moŋ, shi ehe miihia ni wɔye wɔbua mɛi ni yɔɔ wiemɔ lɛ he miishɛɛ lɛ ni amɛna bɔ ni shɛɛ sane ni jɛ Yesu Kristo ŋɔɔ ni yɔɔ Kpojiemɔ wolo lɛ mli lɛ he hiaa ha. Taakɛ wielɔ lɛ wo wɔ hewalɛ yɛ kpokpaa wulu nɔ kpee lɛ shishi lɛ: “Nyɛkɛ wolo hee nɛɛ atsua nii . . . ni nyɛkɛtswaa adafi nyɛtsɔɔa je lɛ fɛɛ akɛ Babilon Kpeteŋkpele lɛ egbee shi, ni ákɛ nɔ ni ka jeŋmaji lɛ ahiɛ ji Harmagedon, ni akɛ ebaashɛ enaagbee kwraa yɛ Yehowa anunyam Maŋtsɛyeli ni Kristo kɛ eyemforo lɛ yeɔ nɔ lɛ mli.”
Mɛni Obaakɛɛ?
5 Yɛ be mli ni otsɔɔ mɔ ni oji sɛɛ lɛ, obaanyɛ okɛɛ akɛ: “Mɛi babaoo na ni kulɛ amɛnu Kpojiemɔ wolo lɛ shishi. Nɔ ni he hiaa titri ji ‘kojomɔ ŋmɛlɛtswaa’ ni atsi ta yɛ Kpojiemɔ 14:7 lɛ. [Kanemɔ.] Ekolɛ onaa baakpɛ ohe waa kɛji ona ole mɔ ni akɛ fɔbuu kojomɔ ni jɛ Nyɔŋmɔ ŋɔɔ nɛɛ shi lɛ lɛ. [Kanemɔ Kpojiemɔ 18:2a, 4.] Ani onu wiemɔ ni ji ‘Babilon kpeteŋkpele’ lɛ da? [Ŋmɛɛ lɛ gbɛ ni eha hetoo. ] Mɛni ji nɔ ni etsɔɔ, ni mɛni hewɔ ehe hiaa ni wɔje emli lɛ? [Jiemɔ Revelation Climax wolo lɛ.] Nɔ ni haa wolo nɛɛ feɔ nɔ ni he yɔɔ miishɛɛ kɛ nɔ ni yeɔ buaa mɔ lɛ ji akɛ ekɛ sanenaatsɔɔmɔ ni gbalaa nii amli haa yɛ Biblia mli wolo ni ji Kpojiemɔ lɛ kuku fɛɛ kuku he. Adafitswaa ni akɛha yɛ yitsei 33-38 lɛ haa ayooɔ Babilon Kpeteŋkpele lɛ jogbaŋŋ ni ewieɔ ehiɛkpatamɔ ni ebɛŋkɛ lɛ he. [Maa niianaatsɔɔmɔ pɔtɛɛ ko loo wolo lɛ mli mfonirii lɛ eko nɔ mi.] Nɛkɛ adafitswaa nɛɛ he baaba sɛɛnamɔ kɛha bo ni ebaaye ebua bo kɛ osuɔlɔi hu ni nyɛkɔ shidaamɔ ni baaha nyɛna Nyɔŋmɔ hiɛ duromɔ, koni nyɛjo nɔ ni baaba Babilon Kpeteŋkpele lɛ nɔ lɛ naa foi. Miiwo bo hewalɛ ni ohe Revelation—Its Grand Climax at Hand! wolo nɛɛ ekome kɛha 700 pɛ.”
6 Bɔni afee ni amɛha amɛwiemɔ lɛ afee kuku lɛ, mɛi komɛi baasumɔ ni amɛkane Kpojiemɔ 18:4 kɛkɛ lɛ amɛgbele mfoniri ni yɔɔ baafa 241 lɛ, ni amɛbaatsɔɔ akɛ wolo lɛ tsɔɔ nɔ ni Babilon kpeteŋkpele lɛ damɔ shi kɛha, nɔ ni kooloo lɛ damɔ shi kɛha. kɛ nɔ hewɔ ni ehe hiaa ni wɔbo kɔkɔbɔɔ ni Nyɔŋmɔ kɛhaa yɛ amɛhe lɛ toi jogbaŋŋ lɛ mli. Shiɛlɔi heei loo mɛi ni bɛ niiashikpamɔ tsɔ lɛ baanyɛ atsɔɔ mfoniri ni yɔɔ baafa 302 lɛ mli, ni amɛbaanyɛ amɛkɛ Kpojiemɔ 21:4 atsu nii taakɛ aŋma yɛ baafa 303 lɛ.
7 Obaanyɛ otsake ohiɛkpamɔ wiemɔ lɛ kɛ otii ni okɛtsuɔ nii lɛ amli yɛ bɔ ni shihilɛ lɛ baaji lɛ naa kɛ agbɛnɛ kɛtsɔ ŋmalɛi ni atsɛ kɛ saji ni yɔɔ saneyitso ni ji “Babylon the Great” (Babilon Kpeteŋkpele Lɛ) shishi yɛ Reasoning wolo lɛ baafai 49, 52, kɛ 53 lɛ kɛ nitsumɔ nɔ.
8 Wɔsumɔɔ Yehowa ni wɔsumɔɔ wɔnaanyo hu. Enɛ tsirɛɔ wɔ koni wɔjaje Nyɔŋmɔ kojomɔ shɛɛ sane lɛ wɔtsɔɔ. Yɛ be mli ni esa akɛ wɔkpa Babilon Kpeteŋkpele lɛ he mama lolo lɛ, esa akɛ wɔha mɛi ni hiɛ tsui krɔŋŋ lɛ hegbɛ ni ‘amɛje kpo kɛjɛ emli’ ni amɛkɔ shidaamɔ ni yɔɔ shiŋŋ kɛha anɔkwale lɛ. Yɛ enɛ hewɔ lɛ wɔkɛ ekomefeemɔ holeɔ wɔgbeei nɔ, ni wɔkɛɔ mɛi ni “wala nu” lɛ he kumai yeɔ amɛ lɛ akɛ “Ba!”—Kpoj. 22:17.