Ye Obua Mɛi Ni Hiɛ Tsui Krɔŋŋ Lɛ Ni Amɛjo Foi Kɛjɛ Babilon Kpeteŋkpele Lɛ Mli
1 Kɔkɔbɔɔ ni mli wa ni aŋma yɛ Kpojiemɔ 18:4 lɛ he miihia waa agbɛnɛ yɛ be ni wɔyɔɔ mli nɛɛ hewɔ. Ajie yiŋkɔshikɔshifeemɔi fɛɛ ni yɔɔ mɔ ni Babilon kpeteŋkpele lɛ ji lɛ he kwraa agbɛnɛ. Akpa ehe mama yɛ faŋŋ mli akɛ lɛ ji jeŋ apasa jamɔ maŋtsɛyeli ni Satan kɛtsuɔ nii koni ekɛwuu eshi Nyɔŋmɔ “yoo” lɛ seshi lɛ.
2 Kɛ mɔ ko kã he eyɛ emli lolo lɛ, ehaa enaa ehe eshai lɛ amli gbɛfaŋnɔ. Shi kɛlɛ, ebiɔ babaoo fe ni mɔ ko aaatsi ehe kɛaajɛ apasa jamɔ he kɛkɛ. Mɔ ko mɔ ko nyɛŋ ahi shi ni nɔ ko kɔɔɔ ehe eko yɛ anɔkwale jamɔ he ni kɛlɛ ekpa gbɛ akɛ ebaana Yehowa jɔɔmɔi. Esa akɛ mɛi ni joɔ foi kɛjɛɔ Babilon mli lɛ akase Nyɔŋmɔ Wiemɔ lɛ, ni amɛfata he ni akɛjaje sanekpakpa lɛ, ni amɛtsɔmɔ Nyɔŋmɔ sɔɔlɔi ni amɛjɔɔ amɛhe nɔ ni abaptisi amɛ.
3 Ani mɛi fɛɛ ni ba Kaimɔ lɛ shishi yɛ March 22 lɛ nuɔ bɔ ni ehe hiaa akɛ amɛaashi Babilon ni amɛbatsɔmɔ Yehowa sɔɔlɔi ni ejɔɔ amɛhe nɔ kwraa lɛ shishi? Esa akɛ wɔye wɔbua amɛteŋ mɛi ni ekpɛko amɛyiŋ lɛ ni amɛhala akɛ amɛbaadamɔ Yehowa masɛi. (Yak. 1:8; 4:8) Okɛ mɔdɛŋbɔɔ krɛdɛɛ atsu nii ni okɛ April kɛ May Buu-Mɔɔ ni wieɔ saji ahe yɛ faŋŋ mli lɛ awo amɛdɛŋ. Ye obua amɛ ni amɛna akɛ akɛni be ni eshwɛ lɛ faaa kwraa dɔŋŋ hewɔ lɛ, ehe miihia waa kɛha amɛ akɛ amɛaatsɔɔ amɛshidaamɔ amrɔ nɛɛ.—Mat. 12:30.
YE OBUA MƐI HEEI LƐ
4 Akɛni Kaimɔ lɛ yɛ wɔjwɛŋmɔi amli lolo hewɔ lɛ, May ji be ni hi jogbaŋŋ ni wɔkɛaaye wɔbua mɛi heei lɛ ni amɛyoo akɛ amɛhe ni amɛkɛaawo sɔɔmɔ nitsumɔ lɛ mli lɛ ji gbɛ ni hi fe fɛɛ ni amɛaatsɔ nɔ amɛjie bulɛ ni nɔ kwɔ kpo amɛtsɔɔ Yesu afɔleshaa lɛ. Hɛɛ, eji gbɛ ni he hiaa ni wɔɔtsɔ nɔ wɔjie bɔ ni wɔhiɛ sɔɔ nɔ ni Yehowa kɛ e-Bi, Yesu efee kɛha wɔ lɛ kpo!
5 Ani ofeɔ shia Biblia mli nikasemɔi kɛ jwɛŋmɔ akɛ okɛmiisaa onikaselɔi lɛ kɛha shiɛmɔ nitsumɔ lɛ? Yelikɛbuamɔ kɛ ekaawoo ni akɛhaa yɛ be fɛɛ mli lɛ he miihia amɛ bɔni afee ni amɛna hiɛsɔɔ amɛha nɛkɛ Kristofoi agbɛnaa nii nɛɛ. Tsɔɔmɔ bɔ ni shiɛmɔ nitsumɔ lɛ he hiaa ha lɛ mli oha onikaselɔi lɛ, ni ofee bɔ ni afeɔ lɛ lɛ he nɔkwɛmɔ nɔ otsɔɔ amɛ. Wolo bibioo ni ji Yehowa Odasefoi Mifee Nyɔŋmɔ Suɔmɔnaa Nii lɛ he baaba sɛɛnamɔ aha bo yɛ enɛ feemɔ mli.
TAOMƆNII LƐ HE NI AASHƐ
6 Kɛ Biblia mli nikaselɔ ko tsɔɔ hiɛyaa babaoo ni etsɔɔ hu akɛ eeshwe ni eye ebua ni Mateo 24:14 aba mli lɛ, ehe baaba sɛɛnamɔ akɛ aaati nibii ni atsɔɔ mli yɛ Our Ministry wolo lɛ baafai 98 kɛ 99 lɛ mli. Esa akɛ enyɛ ni ehe asa akɛ mɔ ni “jaa anɔkwale wiemɔ lɛ mli pɛpɛɛpɛ.” (2 Tim. 2:15) Kaafɔ lɛ nine akɛ efata ohe kɛya shiɛmɔ klɛŋklɛŋ kwraa kɛyashi onukpai lɛ baakpɛlɛ nɔ akɛ ebaanyɛ ekɛ ehe awo mli. Kɛji onaa akɛ etamɔ mɔ ko ni shɛɔ Ŋmalɛ naa kɛ asafo lɛ taomɔ nii ahe lɛ, ha ni onukpai asɛinɔtalɔ lɛ ale he ni etee ehiɛ kɛyashɛ. Kɛ onukpai lɛ kɛ o-Biblia mli nikaselɔi lɛ ekome kpe yɛ May mli ni amɛkpɛlɛ nɔ akɛ ebaanyɛ ekɛ ehe awo shiɛmɔ nitsumɔ lɛ mli lɛ, tsɔɔmɔ lɛ bɔ ni ebaafee ni ekɛ Buu-Mɔɔ lɛ shɛɛ aha, ni oje shishi otsɔse lɛ yɛ shia-kɛ-shia nitsumɔ lɛ mli.—Kwɛmɔ The Watchtower ni je kpo November 15, 1988 lɛ baafai 16-17, kukuji 7-10.
7 Babilon kpeteŋkpele lɛ miiya ehiɛkpatamɔ kwraa mli! Dani no aaaba lɛ, ehe miihia ni wɔye wɔbua mɛi ni hiɛ tsui krɔŋŋ lɛ ni amɛje ekudɔmɔ shishi ni amɛba Yehowa gbɛjianɔtoo lɛ mli. Aye abua mɛi akpekpei abɔ ni amɛfee nakai momo. Kɛ eji Yehowa suɔmɔnaa nii lɛ, abaanyɛ aye abua mɛi babaoo lolo ni amɛjo foi kɛjɛ Babilon teŋ yɛ be mli ni ejɔɔ wɔmɔdɛŋbɔɔ ni ekaa yɔɔ mli ni wɔkɛtaoɔ mɛi ni yɔɔ tsui krɔŋŋ yɛ wɔshikpɔŋkuku lɛ mli ni wɔkɛye wɔbua amɛ lɛ nɔ lɛ.—Yer. 50:8.