Shikpɔŋkuku Krɛdɛɛ Ni Akɛwoko Mɔ Ko Dɛŋ Lɛ Mli Nitsumɔ—Te Ahere Nɔ Aha Tɛŋŋ?
1 Waa diɛŋtsɛ! Ni mɛi ni ehere tsɛmɔ lɛ nɔ lɛ efee ekome kɛmiikɛɛ akɛ “eji shikpɔŋ ni jɔɔmɔi yɔɔ nɔ babaoo.”
2 Taakɛ obaakai lɛ, July 1985 Wɔ Maŋtsɛyeli Sɔɔmɔ lɛ ŋma ninefɔɔ krɛdɛɛ ko koni wɔkɛ wɔhe awo shikpɔŋkuku ni akɛwoko mɔ ko dɛŋ lɛ mli nitsumɔ mli yɛ Ghana kooyigbɛ. Yɛ no sɛɛ lɛ, yɛ 1986 sɔɔmɔ afi lɛ mli lɛ, gbɔmɛi fe 100 kɛ amɛhe ha. Yɛ 1987 sɔɔmɔ afi lɛ mli lɛ, yibɔ ni kɛ amɛhe ha lɛ tee hiɛ kɛyashɛ 150, ni yɛ 1988 mli lɛ, 151 sa amɛnaa amɛkwɛ ŋɔɔmɔ lɛ. Lɛlɛŋ, eji miishɛɛ sane akɛ aaana akɛ Nyɔŋmɔ ‘webii lɛ kɛ amɛhe miiha yɛ amɛsuɔmɔ naa,’ ni pɛsɛmkunya bɛ mli, koni sanekpakpa lɛ ashɛ wɔshikpɔŋkuku lɛ mli hei ni yɔɔ shɔŋŋ lɛ hu nɔ.—Lala 110:3.
AMƐ AMANIƐBƆƆ
3 Nyɛhaa wɔboa gbɛgbalɔi nɛɛ awiemɔi kɛ amɛ amaniɛbɔi lɛ ekomɛi atoi. Nyɛmimɛi ejwɛ komɛi ni tsu nii yɛ shikpɔŋkuku ko mli yɛ Wa niiaŋ lɛ bɔ amaniɛ akɛ amɛna nitsumɔ lɛ he miishɛɛ waa akɛ: “Kɛ Yehowa baasumɔ lɛ wɔ fɛɛ wɔbaasumɔ ni wɔyatsu nii yɛ Wa shikome ekoŋŋ.” Yɛ bei babaoo mli lɛ, amaniɛbɔi lɛ wieɔ “mɛi ni yɔɔ shikpɔŋkuku lɛ mli lɛ agbɔfeemɔ, mlihilɛ kɛ naanyobɔɔ su ni amɛjieɔ lɛ kpo lɛ he.” Kuu kome ko kɛɛ akɛ: “Ehaa nitsumɔ lɛ feɔ nɔ ni yɔɔ miishɛɛ ni ehaa mɔ hejɔɔmɔ yɛ mumɔŋ.” Ani obaasumɔ ni ohe ajɔ bo yɛ mumɔŋ?
4 Obalaŋta ko ni ji gbɛgbalɔ ni yɔɔ Jirapa lɛ bɔ amaniɛ akɛ eyɛ mli akɛ ‘Katolek ehe shi’ yɛ shikpɔŋkuku lɛ mli moŋ, shi miishɛɛ ni amɛyɔɔ lɛ da waa. Nuu ko ni ji Katoleknyo ko kɛɛ lɛ akɛ: “Minaa nitsumɔ ni nyɛtsuɔ lɛ he miishɛɛ waa. . . . Mijieɔ nyɛyi waa ejaakɛ wɔ obalaŋtai lɛ, kɛ wɔ osɔfoi lɛ tete po, nyɛŋ atsu nɛkɛ afɔleshaa nitsumɔ nɛɛ.” Amaniɛbɔɔ lɛ tsɔɔ akɛ maŋ nɛɛ mli maŋtsɛ lɛ miishwe ni nyɛmimɛi lɛ aba ni amɛbahi maŋ lɛ mli kwraa. Akɛni lɛ diɛŋtsɛ lɛ eyɔɔ anɔkwale jamɔ he miishɛɛ hewɔ lɛ eeshwe ni eha shikpɔŋ ni akɛma Maŋtsɛyeli Asa.
ANI OBAAHERE TSƐMƆ LƐ NƆ?
5 Wolo ni ji Organized to Accomplish Our Ministry lɛ kɛɔ yɛ baafa 112, kuku 2 akɛ: “Eeenyɛ ebalɛ akɛ ekolɛ obale anɔkwale lɛ yɛ asafo ko ni afɔɔ eshikpɔŋkuku lɛ mli nitsumɔ waa ni ayeɔ odase fɛfɛo yɛ mli hu lɛ mli. . . . Yɛ shihilɛi ni tamɔ nɛkɛ mli lɛ, ekolɛ obaanu he akɛ esa akɛ olɛɛ osɔɔmɔ hegbɛi lɛ amli kɛtsɔ he kroko ni oooya lɛ nɔ . . . he ni hiamɔ lɛ fa babaoo yɛ shikpɔŋkuku lɛ mli.” Wɔmiifɔ bo nine ni osusu enɛ he waa diɛŋtsɛ. Mɛni hewɔ?
6 Yɛ shikpɔji ni akɛwoko mɔ ko dɛŋ ni yɔɔ kooyigbɛ lɛ asɛɛ lɛ, asafoi pii yɛ maji sɔrɔtoi anɔ yɛ Ghana fɛɛ ni onukpai kɛ asafoŋ sɔɔlɔi ahe miihia amɛ. Ekomɛi yɛ asafoŋ sɔɔlɔi enyɔ loo etɛ ni amɛbɛ onukpa ko kwraa. Yɛ asafoi lɛ ekomɛi amli lɛ, sɔɔlɔi lɛ ateŋ mɔ ko mɔ ko nyɛɛɛ akane Blɔfo. Asafoi nɛɛ ekomɛi nyɛɛɛ afee daa otsi asafoŋ kpeei enumɔ lɛ fɛɛ, ni nɔ ni jɛɔ mli baa ji mumɔŋ niyenii ni faaa kɛhaaa tooi lɛ.
7 Kuku ni atsɛ yisɛɛ kɛjɛ Our Ministry wolo lɛ mli lɛ yaa nɔ akɛ: “Kɛ oji nyɛminuu ni amrɔ nɛɛ oosɔmɔ akɛ onukpa aloo asafoŋ sɔɔlɔ yɛ asafo lɛ mli lɛ, ekolɛ asafo ko yɛ ni ekolɛ ebɛŋkɛ nyɛ aloo eyɛ he kroko ni amɛhiɛ baasɔ yelikɛbuamɔ ni okɛaaha amɛ yɛ asafoŋ sɔi ahe nitsumɔ mli lɛ waa.” Taakɛ wɔkadi yɛ yiteŋgbɛ lɛ, asafoi babaoo yɛ Ghana ni nakai yelikɛbuamɔ he miihia amɛ. Ani obaanyɛ ofee tsakemɔi yɛ oshihilɛ mli ni ohere tsɛmɔ lɛ nɔ? Bɔ fɛɛ bɔ ni oshihilɛ ji amrɔ nɛɛ lɛ, wɔmiiwo ŋaa akɛ osaa osusu saneyitso ni ji “Ani Oyɛ ni Obaanyɛ Oye Obua yɛ he ni Ohe Hiaa yɛ Lɛ?” ni je kpo yɛ May 1985 Wɔ Maŋtsɛyeli Sɔɔmɔ lɛ baafa 5 lɛ he ekoŋŋ.
8 Eba akɛ wɔ fɛɛ wɔɔjie suɔmɔ ni haa akɛ he shaa afɔle lɛ kpo ni wɔkɛkase wɔhiɛnyiɛlɔ Yesu Kristo. Mɔbɔnalɛ ni eyɔɔ kɛha gbɔmɛi lɛ tsirɛ lɛ, “akɛni etɔ amɛ ni amɛfee yuuyaa tamɔ tooi ni bɛ kwɛlɔ lɛ.” (Mat. 9:35-38) Ebaaŋɔɔ wɔnaa waa akɛ wɔɔnu ohe, kɛtsɔ osafo lɛ mli sɔɔmɔ ajinafoi lɛ anɔ, akɛ ofee klalo akɛ ooofa kɛya he ni hiamɔ lɛ fa babaoo yɛ lɛ. Okɛ ohe awo shikpɔŋkuku krɛdɛɛ ni akɛwoko mɔ ko dɛŋ ni yɔɔ kooyigbɛ lɛ mli nitsumɔ lɛ mli, aloo faa kɛya asafo ni onukpai kɛ asafoŋ sɔɔlɔi ayelikɛbuamɔ he hiaa amɛ lɛ mli ni oyaye obua amɛ. Na nɔmimaa akɛ kɛ ohere tsɛmɔ lɛ nɔ lɛ ojɔɔmɔi kɛ omiishɛɛ lɛ baafa babaoo.