Jiemɔ Yah Yi Kɛtsɔ Woji Tɛtrɛbii ni Oooha Ashɛ Iɛ Nɔ
1 Mɛɛ miishɛɛ enɛ ji akɛ onine aaashɛ Awake! hee ko nɔ. Nɛkɛ wolo kpakpa nɛɛ yeɔ ebuaa wɔ koni wɔle nibii ni yaa nɔ yɛ jɛ leŋ lɛ amrɔ nɛɛ taakɛ ekɔɔ Biblia gbalɛ mibaa he lɛ. No hewɔ lɛ, ebaaha wɔhiɛ asɔ hegbɛ ni wɔna ni wɔkɛaajie Yehowa yi lɛ waa.—Amos 3:7; Heb. 13:15.
2 Kɛbashi he ni wɔshɛ yɛ 1989 mli nɛɛ. Awake! lɛ ejie saji ni awieɔ he nɛɛ akpo tamɔ ‘Namɛi Baahi Shikpɔŋ lɛ Nɔ?’ ‘Mɛni Baa Jeŋba Loo Shihilɛ Kpakpa Nɔ?’ kɛ ‘Awuiyeli—Mɛni Obaanyɛ Ofee? Saji ni tamɔ nɛkɛ haa hiɛsɔɔ ni wɔyɔɔ kɛhaa Buu-Mɔɔ ni etee nɔyeli Nyɔŋmɔ Maŋtsɛyeli lɛ sɛɛ akɛ adesai anaagbai lɛ anaa tsabaa diɛŋtsɛ fe afii oha lɛ yaa hiɛ babaoo. Nɛkɛ woji tɛtrɛbii enyɔ nɛɛ ehɛle ekanelɔi lɛ ashi koni amɛna bɔ ni ŋmɛnɛŋmɛnɛ beaŋ nibii ni yaa nɔ lɛ kadiɔ nɛkɛ gbɛjianɔtoo momo nɛɛ “naagbee gbii” lɛ. (2 Tim.3:1-5) No hewɔ lɛ, afi nɛɛ April kɛ May na bɔ ni Buu-Mɔɔ ni aje gbɛ akala nɛɛ kɛ ekaa kpa Babilon Kpeteŋkpele yiwalɛ lɛ he mama etsɔɔ lɛ.
Nɔ Ni Ashɛɔ Lɛ Kɛ Mumɔŋ Niyeniibaa
3 Wɔbaana hegbɛ yɛ November mli ni wɔha mɛi ashɛ Awake! loo Buu-Mɔɔ loo enyɔ lɛ fɛɛ. Nɛkɛ gbɛ nɔ Wɔɔtsɔ ni anɔkwale lɛ aya nɔ aho kɛya mɛi ni enɛ he hɔmɔ yeɔ amɛ lɛ ashiai amli. Kɛ amɛkɛ jwɛŋmɔ kpakpa kpɛlɛ woji tɛtrɛbii nɛɛ amli saji lɛ anɔ lɛ, eeeha amɛbaje wala gbɛ lɛ nɔ. Akɛ mɔ ni kaneɔ Buu-Mɔɔ kɛ Awake! lɛ daa lɛ, obaanyɛ ni ona miishɛɛ yɛ woji tɛtrɛbii lɛ ni oooha mɛi ashɛ lɛ he yɛ be mli ni okɛ ekomekomei po haa lɛ.
4 Kaatsɔ hiɛ okojo mɔ ko akɛ mɔ lɛ baanyɛ ashɛ loo enyɛŋ eshɛ, shi moŋ, ha gbɔmɔ lɛ ahere miishɛɛ ni okɛfɔɔ lɛ nine yɛ anɔkwayeli mli lɛ nɔ. Aye ebua nyɛmiyoo ko ni ena jwɛŋmɔ kpakpa kɛtsɔ wiemɔi nɛɛ ahe susumɔ nɔ: “Onyɛŋ otsɔ wolo ko sɛɛ aloo ehehaa nɔ nɔ ni okɛkojo wolo lɛ.” Ekase bɔ ni eeefee ni etamɔ Yehowa, mɔ ni kwɛɛɛ hiɛaŋ lɛ. (Bɔfoi 10:34) No hewɔ lɛ, kaatsɔ hiɛ okojo o-Biblia kaselɔi lɛ yɛ woji tɛtrɛbii lɛ ashɛɛ mli. Shishitoo mla ni yɔɔ Jajelɔ 11:6 lɛ kɔɔ sane nɛɛ he. Tsakemɔ ko bɛ gbɛ ni atsɔɔ nɔ akɛ woji tɛtrɛbii ni ashɛ momo lɛ haa koni atsu he nii lɛ mli.
5 Mɛi pii enu ni shiatsɛmɛi lɛ miikɛɛ akɛ amɛbɛ shika ni amɛkɛaashɛ yɛ no be lɛ mli. Aloo amɛbaakɛɛ akɛ amɛnyɛŋ amɛshɛ yɛ yiŋtoo kome loo ekroko hewɔ. Kɛ eba lɛ nakai ni gbɔmɔ lɛ miisumɔ lɛ, no lɛ nyɛŋmalaa woji ni akɛshɛɔ lɛ nɔ koni yɛ sɛɛ mli lɛ obahe shika lɛ. Bɔɔ mɔdɛŋ ni oya yɛ be ni nyɛto lɛ mli pɛpɛɛpɛ. Enɛ maa bɔ ni ehe hiaa akɛ aaaŋmala nɔ fɛɛ nɔ ashwie shi pɛpɛɛpɛ yɛ shia-kɛ-shia kadimɔ woji lɛ anɔ lɛ nɔ mi.
Trukaa Odaseyeli
6 Wɔle akɛ aama trukaa odaseyeli nɔ mi waa yɛ nɛkɛ gbii nɛɛ amli. Eji gbɛ ni hi fe fɛɛ ni wɔtsɔɔ nɔ wɔyeɔ odase yɛ shihilɛ ni wɔyɔɔ mli bianɛ lɛ shishi. Yɛ woji tɛtrɛbii ni ashiɛɔ lɛ ahe lɛ, jeee gbɔi ni aaaye amɛ odase trukaa he wɔwieɔ yɛ biɛ lɛ, shi moŋ wɔnanemɛi ni wɔkɛ amɛ gbaa sane lɛ, ekolɛ mɛi ni wɔkɛ amɛ gbaa nibii ni yaa nɔ yɛ je lɛŋ lɛ ahe saji lɛ. Hegbɛi ni tamɔ nɛkɛ kɛ amɛhe baaha koni asusu Biblia lɛ he koni ana hegbɛ akɛ eshɛɛ lɛ aha. Mɛni hewɔ ebaahi akɛ oooba amɛgbeyeishemɔ yɛ shɛ ni amɛaashɛ eko lɛ he lɛ shi lɛ? Ni mɛi ni okɛ amɛ tsuɔ heloo gbɛfaŋ nitsumɔ lɛ hu? Yɛ woji tɛtrɛbii ashɛɛ he tafaa nyɔŋ ko nɔ lɛ, nyɛminuu ko kpɛ eyiŋ akɛ ebaaye enanemɛi nitsulɔi lɛ odase yɛ nilee mli, Kɛjɛ shishijee mli lɛ, ekpɛ eyiŋ akɛ ekɛfee oti ni ma ehiɛ akɛ ena woji tɛtrɛbii ni ashɛɔ lɛ nyɔŋma yɛ nakai nyɔŋ lɛ nɔ. Shi kɛlɛ, enaa kpɛ ehe beni enine shɛ oti nɛɛ nɔ yɛ gbii enyɔ pɛ mli lɛ. Belɛ kwɛ miishɛɛ ni ena beni enyɛ ebu akɔntaa akɛ ena woji tɛtrɛbii heei ni ashɛ lɛ 68 sɔŋŋ kɛha nakai nyɔŋ lɛ!
7 Yɛ November mli lɛ wɔkɛ woji tɛtrɛbii ni esa akɛ ashɛ lɛ baatsɔɔ yɛ be mli ni wɔfeɔ shia Biblia nikasemɔi, ni wɔfeɔ sɛɛsaramɔi, kɛ be mli ni wɔyeɔ odase trukaa. Kɛ anyɛɛɛ ashɛ lɛ, wɔbaanyɛ wɔkɛɛ nɔ ko ni tamɔ nɛkɛ: “Miyɛ Buu-Mɔɔ lɛ kɛ Awake! lɛ ekomekomei komɛi ni miheɔ miyeɔ akɛ obaanya amɛ kanemɔ he waa. Mikɛbaaba ni mikɛbaha bo yɛ be kroko mli.” Kaatsɔɔ be lɛ, shi yɛ be kroko ni oooya lɛ, okɛ ehee ni onine eshɛ nɔ lɛ aha lɛ.
8 Lalatsɛ lɛ woɔ wɔ hewalɛ akɛ: “Nyɛjiea Yah yi, nyɛ gbɔmɛi.” (Lala 147:1) Kwɛ bɔ ni esa jogbaŋŋ kɛba wɔ akɛ wɔɔjie Yehowa yi yɛ November mli kɛtsɔ Buu-Mɔɔ lɛ kɛ Awake! lɛ ni wɔkɛaaha ni ashɛ lɛ nɔ.