Miishɛɛ ni Ooona yɛ Teemɔŋ Nikasemɔ Mli
1 Ani onaa miishɛɛ yɛ teemɔŋ nikasemɔ mli? Mɛi pii nuɔ he nakai. Shi ehe bahia ni amɛna nakai su lɛ koni amɛnyɛ amɛna he miishɛɛ kɛmɔ shi. Wɔkɛ teemɔŋ nikasemɔ miitsɔɔ Biblia lɛ loo woji krokomɛi ni damɔ Biblia lɛ nɔ ni okome oookase ni jeee okɛ kuu lɛ loo weku lɛ.
2 Yehowa diɛŋtsɛ woɔ wɔ hewalɛ ni wɔna be wɔha teemɔŋ nikasemɔ. Ŋaa ni ewo Yoshua lɛ kɔɔ wɔ hu wɔhe ŋmɛnɛ: “Kaaha nɛkɛ mla wolo nɛɛ mli wiemɔi lɛ miikpa yɛ odaaŋ, shi jwɛŋmɔ he nyɔɔŋ kɛ shwane, koni ojwɛŋ nɔ ni ofee tamɔ bɔ ni aŋma yɛ mli lɛ pɛpɛɛpɛ.”—Yosh. 1:8.
Te Ooofee Tɛŋŋ Ona Miishɛɛ
3 Klɛŋklɛŋ nifeemɔ lɛ ji kɛtsɔ kanyamɔ kpakpa nɔ, ni ole yiŋtoo titri hewɔ ni esa akɛ okase nii lɛ. Kɛji akɛ mɔ ko kɛɛ bo akɛ otsa bu voo kɛya shikpɔŋ, ni kɛlɛ onaŋ nɔ ko ni sɛɛnamɔ yɔɔ he lɛ, ani obaanya shikpɔŋ tsaa nɛɛ he? Shi kɛji akɛ ama nɔ mi aha bo akɛ jwetri ko hɔ shikpɔŋ lɛ hu? Belɛ ona nɔ ko ni baakanya bo diɛŋtsɛ koni otsa shi ni obaana enɛ feemɔ he miishɛɛ. Teemɔŋ nikasemɔ gbalaa wɔ kɛbɛŋkɛɔ Yehowa he kpaakpa ni eji nɔ ko ni atsɔɔ nɔ anaa naanɔ wala. (Yohane 17:3: Yer. 9:24) Ani enɛ kɛ kanyamɔ ni sa haaa wɔ?
4 Te esa akɛ wɔhiɛ adɔ teemɔŋ nikasemɔ he wɔha tɛŋŋ? Abɛi 2:3-5 haa hetoo yɛ faŋŋ mli. Sɛɛnamɔ hu yɛ he akɛ wɔɔtsɔ hiɛ wɔto be pɔtɛɛ komɛi ahe gbɛjianɔ kɛha nɔ nikasemɔ ni wɔsumɔɔ ni wɔkɛ wɔhe awo mli lɛ. Akɛ nɔkwɛmɔ nɔ lɛ, kɛ ona ole be ni akɛbaakase Buu-Mɔɔ lɛ yɛ nyɛkuu lɛ mli lɛ, obaanyɛ oto be oma shi oha bo diɛŋtsɛ oteemɔŋ nikasemɔ ni okase enɛ.
5 Mɛi komɛi eye awerɛho akɛ: “Eji minaa bei fioo ko mikɛkaseɔ nii kulɛ. Etamɔ nɔ ni minaaa bei maha enɛ ejaakɛ nibii babaoo yɛ ni mifeɔ daa gbi.” Yɛ Yesu wiemɔi ni yɔɔ Mateo 4:4 lɛ hewɔ lɛ, be ni ooojie kɛha shihilɛ mli nitsumɔi krokomɛi amli ni otuu enɛ oha nibii ni he hiaa titri—ni ji oteemɔŋ nikasemɔ lɛ hu? Bei enyiɛ ofiteɔ okɛkwɛɔ televishin, okɛkaneɔ je lɛŋ woji kɛ woji krokomɛi aloo ni oogba sane kɛkɛ hu? Hiɛtserɛjiemɔ ni sa he hiaa, shi ani nɛkɛ miishɛɛnamɔ nɛɛ he hiaa akɛ kɛ ehe miihia lɛ anyɛŋ atuu nɛkɛ be nɛɛ aha Yehowa he nikasemɔ?
6 Ehe miihia hu, ni wɔŋmɛ pɛpɛɛpɛ koni wɔsusu shihilɛ mli nibii ni he hiaa fe fɛɛ he taakɛ Jajelɔ 3:1 tsɔɔ lɛ. Wɔkɛ New World Translation Biblia lɛ miitsu nii yɛ sɔɔmɔ mli yɛ nɛkɛ nyɔŋ nɛɛ nɔ. Ani okpɛlɛɛɛ nɔ akɛ nyɔŋ nɛɛ ji be ni sa jogbaŋŋ ni wɔkɛaaje wɔ daa otsi Biblia kɔnemɔ loo wɔ diɛŋtsɛ loo weku nikasemɔ ni wɔkpa efeemɔ lɛ shishi? Blema Beroiabii lɛ “jie amɛyitsoŋ amɛmɔ wiemɔ lɛ mli, ni daa amɛkpaa Ŋmalɛi lɛ amli amɛkwɛɔ akɛ nibii nɛɛ yɛ mli nakai lo.” (Bɔfoi 17:11) Beroiabii lɛ yɛ nii ni esa akɛ amɛtsu, wekui ni esa akɛ amɛkwɛ kɛ nibii krokomɛi, shi amɛtoɔ be daa gbi amɛkɛkaseɔ Nyɔŋmɔ Wiemɔ lɛ. Aawo bo hewalɛ ni bo hu ofee nakai nɔŋŋ ni Yehowa ni ooole lɛ diɛŋtsɛ kɛ mumɔŋ ni oooda yɛ lɛ he miishɛɛ fɛɛ baatsɔ onɔ.