Okɛ Woo Aha Yesu Kristo—Wɔ Hemɔkɛyeli Shishitoo Nɔ Lɛ
1 Ni wɔɔnu nɔ ni Yesu Kristo tsuɔ yɛ Yehowa yiŋtoi ahe nitsumɔ mli lɛ shishi lɛ he hiaa. Yesu kɛ ewala ha akɛ kpɔmɔ nɔ kɛha adesai toibolɔi. (Mat. 20:28) Eji jeee Yehowa gbɛjianɔtoo kɛtsɔ Yesu Kristo nɔ ni suɔmɔ yɔɔ mli lɛ kulɛ, wɔbaaya nɔ wɔhi shi yɛ gbele shihilɛ mli ni wɔbɛ hiɛnɔkamɔ ko kɛha wɔsɛɛ.
2 Yɛ Kaimɔ be lɛ mli titri wɔjwɛŋɔ Yesu shihilɛ, etsɔɔmɔi, kɛ efɔleshaa lɛ he. (Luka 22:19) Kɛ wɔha wɔhiɛ sɔ akɛ “Nyɔŋmɔ [jie] lɛ diɛŋtsɛ esuɔmɔ ni ekɛsumɔɔ wɔ lɛ shi etsɔɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ” lɛ, ekanyaa wɔ koni wɔkɛ woo aha Nyɔŋmɔ kɛ Kristo kɛtsɔ miishɛɛ mli ni wɔkɛ wɔhe aaawo sanekpakpa lɛ ni wɔkɛaaha mɛi krokomɛi lɛ nɔ. Te wɔɔfee tɛŋŋ wɔfee enɛ hu?—Rom. 5:8, 10.
Hiɛsɔɔ Ni Ajieɔ Lɛ Kpo
3 Wɔyɔseɔ akɛ Yehowa gbɛjianɔtoo loo esafo ni anaa lɛ tsuɔ nii yɛ Yesu yitsoyeli shishi. Tsulɔ anɔkwafo kuu lɛ kɛ mumɔŋ niyenii ni he hiaa wɔ lɛ lɛɔ wɔ yɛ shikpɔŋ nɛɛ nɔ. Kɛjɛ be mli ni eji obalanyo fioo lɛ mli kɛyaa beebe ni Yesu jie hiɛsɔɔ ni mli kwɔ kpo yɛ e-Tsɛ lɛ Wiemɔ lɛ he, ni wɔsumɔɔ ni wɔnyiɛ enɔkwɛmɔ nɔ lɛ sɛɛ kɛtsɔ mumɔŋ niyenii ni akɛhaa wɔ lɛ kasemɔ kɛ enɔ jwɛŋmɔ nɔ kɛ yiŋtoo akɛ wɔkɛbaatsɔɔ mɛi krokomɛi yɛ gbɛ ni mɔɔ shi nɔ. (Mat. 24:45, 46: Luka 2:46-50) Hiɛsɔɔ ni wɔyɔɔ kɛha gbɛjianɔtoo lɛ kɛ mumɔŋ nibii ni ekɛhaa wɔ lɛ jeɔ kpo kɛtsɔɔ egbɛtsɔɔmɔ sɛɛnyiɛmɔ kɛ onukpai lɛ ni wɔkɛ amɛ feɔ ekome lɛ nɔ.
4 Wɔbaanyɛ wɔkɛ woo hu aha Kristo ni wɔwula wɔsɔɔmɔ nitsumɔ lɛ kɛtsɔ nɔ ni wɔkaseɔ kɛjɛɔ Nyɔŋmɔ Wiemɔ lɛ mli lɛ kɛ nitsumɔ nɔ. Yesu ji osɔfonukpa ni tɔmɔ ko bɛ ehe, “etse ehe kɛjɛ eshafeelɔi ahe.” (Heb. 7:26) Ejeee mɔ ni eye fɔ akɛni ekɛɔ nɔ kome ni efeɔ nɔ kroko hewɔ. Akɛ nanemɛi tsuji lɛ, ehe miihia ni wɔhi shi yɛ nakai taomɔ nii ni nɔ kwɔ lɛ nɔŋŋ naa. No hewɔ lɛ kɛ wɔgba mɛi krokomɛi jalɛ nibii agbɛjianɔtoo hee ni Yehowa ewo shi yɛ he lɛ he sane lɛ, belɛ wɔsumɔɔ hu ni wɔhi shi bianɛ yɛ gbɛ ni aaaha akɛ nakai jeŋ hee lɛ ayoo wɔ lɛ nɔ.—Mat. 7:21; 1 Kor. 1:18; 1 Yoh. 2:17.
Shiɛmɔ Yɛ Kristo Yitsoyeli Shishi
5 Wɔbaana hegbɛ ni ekaaa ni wɔkɛwo Yesu Kristo hiɛ nyam yɛ April mli, kɛtsɔ Kaimɔ lɛ shishi ni wɔɔya kɛ agbɛnɛ ekaa ni wɔkɛ wɔhe aaawo sɔɔmɔ nitsumɔ lɛ mli lɛ nɔ. Wolo ni wɔkɛtsuɔ nii yɛ nyɔŋ lɛ nɔ ji Revelation Climax wolo lɛ. Wɔbaanyɛ wɔgbala yitso 16, he ni awieɔ Kpojiemɔ yitso 6 he yɛ lɛ. Obaanyɛ ogbele kɛya baafai 90 kɛ 91 ni otsɔɔ bɔ ni Nuŋtsɔ Yesu Kristo haa mɔ ni ta okpɔŋɔ yɛŋ lɛ nɔ kɛ agbojee lɛ baa mli ehaa, ni akɛ etee nɔ “koni eye kunim ni egbe ekunimyeli lɛ naa.” Kɛkɛ lɛ obaanyɛ okɛ Saneyitso Kɛha Sanegbaa lɛ atsa nɔ ni otsɔɔ bɔ ni etsɛŋ ni nɛkɛ jalɛ ta ni Maŋtsɛ Yesu Kristo baawuu nɛɛ kɛ jeŋ muu fɛɛ toiŋjɔlɛ baaba lɛ mli. Nɔkwɛmɔ nɔ kroko ni obaanyɛ okɛtsu nii ji nɔ ni yɔɔ baafa 93 ni kɔɔ “okpɔŋɔ tsuru” lɛ kɛ enɔtalɔ lɛ he lɛ. Etsɛŋ ni Maŋtsɛ Yesu Kristo baaha nɛkɛ okpɔŋɔnɔtamɔ ni yɔɔ gbeyei nɛɛ kɛ enɔtalɔ ni la he kumai yeɔ lɛ lɛ aba naagbee koni ekɛ jeŋ muu fɛɛ toiŋjɔlɛ aba.
6 Gbɔmɛi asafo babaoo ko ni nako atsɔmɔ Odasefoi lolo jieɔ bulɛ kpo amɛtsɔɔ Yesu ni amɛbaa Kaimɔ lɛ shishi. Ani abaanyɛ aye abua mɛnɛɛmɛi koni amɛya amɛhiɛ yɛ mumɔŋ babaoo kɛtsɔ teemɔŋ Biblia nikasemɔ ni akɛ amɛ aaafee nɔ? Ebaahi akɛ aaaha mɔ ko aya amɛŋɔɔ ni akɛ yelikɛbuamɔ ni he hiaa lɛ aha amɛ. Kɛ akɛ suɔmɔ ye bua amɛ lɛ, mɛi komɛi baaya amɛhiɛ kɛyashɛ he ni amɛkɛ amɛhe aaawo sɔɔmɔ nitsumɔ lɛ mli dani Nuŋtsɔ lɛ Gbɛkɛnaashi Niyenii ni baanyiɛ sɛɛ aba lɛ aba.
7 Kwɛ bɔ ni wɔdaa shi yɛ afɔleshaa ni suɔmɔ yɔɔ mli ni wɔ Kpɔlɔ Yesu kɛha lɛ hewɔ! Ekɛ hiɛnɔkamɔ ni ma shi shiŋŋ eha wɔ. Eshihilɛ gbɛ kɛ esɔɔmɔ nitsumɔ ni ka shi lɛ tsuɔ nii akɛ nɔkwɛmɔ nɔ ni yeɔ emuu kɛhaa wɔ koni wɔnyiɛ esɛɛ.