Sanebimɔ He
● Dani aaakpɛlɛ mɔ ko nɔ kɛha baptisimɔ lɛ, nɛgbɛ esa akɛ shiɛlɔ ni abaptisiko lɛ Iɛ kɛ ehe awo shiɛmɔ nitsumɔ lɛ mli kɛyashɛ?
Mɔ ko ni he basaa akɛ shiɛlɔ ni abaptisiko lɛ lɛ ejie bɔ ni eshweɔ waa akɛ eeetsɔ Yehowa Odasefoi lɛ ateŋ mɔ kome lɛ kpo momo yɛ gbɛi sɔrɔtoi pii anɔ. (Lala 110:3) Ŋmalɛi lɛ akasemɔ kɛ mɔdɛŋbɔɔ eha tsakemɔ eba eniiahesusumɔ mli, ejeŋba mli, kɛ eshihilɛ hu mli. Akɛni enɛ jɛ etsuiŋ henumɔ kɛ bɔ ni eshweɔ akɛ eeesa Yehowa hiɛ ni efee E-suɔmɔnaa nii lɛ hewɔ lɛ, gbɔmɔ ni tamɔ nɛkɛ ni kɛ ekaa kaseɔ Biblia lɛ kɛ ehe bɔɔ Yehowa webii ahe daa yɛ asafoŋ kpeei ashishi, kɛ kpokpai bibii kɛ kpokpai wuji anɔ kpeei hu ashishi. (Heb. 10:24, 25) Kɛfata Kristofoi akpeei nɛɛ ni ebaa daa lɛ he hu lɛ, eka shi faŋŋ akɛ ena tsuiŋ kanyamɔ hu bɔni afee ni ejaje ehemɔkɛyeli lɛ yɛ faŋŋ mli kɛtsɔ sanebimɔi ahetoohamɔ yɛ kpeei ashishi lɛ nɔ, ni ekolɛ eŋma egbɛi yɛ Teokrase Sɔɔmɔ Skul lɛ hu mli.—Lala 40:9, 10; om bf. 73.
Shii abɔ ni Biblia kaselɔ lɛ kpɛlɛɔ anɔkwale lɛ nɔ ni etsɔɔ akɛ ehiɛ sɔɔ bɔ ni Maŋtsɛyeli shɛɛ sane lɛ he hiaa lɛ yɛ anɔkwayeli mli lɛ, ebanaa hegbɛ akɛ ekɛ ehe awo shia-kɛ-shia sɔɔmɔ nitsumɔ lɛ mli. Enɛ ji Yehowa Odasefoi anitsumɔ lɛ mli klɛŋklɛŋ nɔ. (Mat. 24:14; 28:19, 20; om bf.111) Yɛ enɛ gbɛfaŋ lɛ, gbɛnaa nii ni hiɛdɔɔ yɔɔ mli bakaa shiɛlɔ ni kɛ lɛ feɔ nikasemɔ lɛ kɛ onukpai lɛ anɔ akɛ amɛkwɛ ni amɛkpɛlɛ nɔ kɛ nɔmimaa akɛ nikaselɔ lɛ shihilɛ gbɛi fɛɛ kɛ Kristofoi ashishitoo mlai lɛ kpaa gbee. Esa akɛ efee mɔ ko ni shweɔ diɛŋtsɛ akɛ eeetsɔ Yehowa Odasefoi lɛ ateŋ mɔ kome, koni ehiɛ asɔ hegbɛ ni enaa akɛ ekɛ ehe aaawo Maŋtsɛyeli-shiɛmɔ kɛ kaselɔfeemɔ nitsumɔ lɛ mli lɛ hu.—Gal. 6:6; wGA89 6/15 bf. 17; om bf. 98-9, 174.
Ehe ehiaaa ni be kakadaŋŋ ashwie mli kɛjɛ be mli ni Biblia kaselɔ lɛ he basaa akɛ ekɛ wɔ ana sɔɔmɔ nitsumɔ lɛ mli gbɛfaŋnɔ kɛyashi be mli ni eeenyɛ ekɛ ehe aha kɛha baptisimɔ lɛ. Kɛbashi nɛkɛ be nɛɛ mli lɛ, eshihilɛ gbɛi kɛ Kristofoi eshishitoo mlai lɛ kpaa gbee kwraa, shi ebɛ sɔɔmɔ nitsumɔ lɛ mli niiashikpamɔ. No hewɔ lɛ esa akɛ aŋmɛ lɛ gbɛ be fioo ko koni efee lɛ faŋŋ akɛ etswa efai shi shiŋŋ akɛ ekɛ ekaa baana shiɛmɔ nitsumɔ lɛ mli gbɛfaŋnɔ daa nɛɛ.—Lala 40:9; Rom. 10:9, 10, 14, 15.
Beni be baashɛ akɛ mɔ lɛ efee klalo kɛha baptisimɔ lɛ, eka shi faŋŋ akɛ no mli lɛ ekɛ mɛi krokomɛi miija sanekpakpa lɛ, ni eyeɔ ŋmɛlɛtswai ni fa fe ekome loo enyɔ pɛ yɛ shiɛmɔ nitsumɔ lɛ mli yɛ daa nyɔŋ nɔ. (wGA84 12/1p. 8par. 2) Eji anɔkwale akɛ, esa akɛ akwɛ mɔ fɛɛ mɔ ni biɔ ni abaptisi lɛ lɛ shihilɛ mli aŋkroaŋkro, ni aha nibii ni kɔɔ eshihilɛ he tamɔ bɔ ni atsɔse lɛ aha kɛ eniiashikpamɔ, afii abɔ ni eye, gbɔjɔmɔi ni eyɔɔ kɛ nibii krokomɛi lɛ ahi jwɛŋmɔ mli. Onukpai lɛ baasumɔ ni amɛha gbɛtsɔɔmɔ ni akɛha amɛ yɛ Our Ministry wolo lɛ baafa 175 lɛ akudɔ amɛ: ‘Wɔnaa mɛi ni amɛtsuii etsɔ kɛba Yehowa he kɛ mɛi ni enu Biblia mli shishijee anɔkwalei ashishi jogbaŋŋ lɛ ahe miishɛɛ. Kɛ nyɛjɛ suɔmɔ mli nyɛye nyɛbua amɛ lɛ, ebaawo mɛi ni abaptisiɔ amɛ lɛ ekaa ni ebaaye ebua amɛ hu ni amɛbote Kristofoi asɔɔmɔ nitsumɔ lɛ mli, akɛ mɛi ni esaa amɛhe kɛmɔ shi koni amɛgbe nakai nitsumɔ ni he hiaa lɛ naa kwraa.’—Mat. 16:24, Yoh. 4:34; 1 Pet 2:21.