Sanebimɔhe
◼ Dani abaakpɛlɛ shiɛlɔ ko ni abaptisiko lɛ lɛ nɔ kɛha baptisimɔ lɛ, mɛni esa akɛ akwɛ yɛ esafoŋ kpeeibaa kɛ eshiɛmɔyaa he?
Baptisimɔ ji yiŋkpɛɛ ni he hiaa fe fɛɛ ni mɔ ko baafee. No hewɔ lɛ, dani abaakpɛlɛ mɔ ko nɔ kɛha baptisimɔ lɛ, esa akɛ enu nɔ ni Nyɔŋmɔ taoɔ yɛ edɛŋ lɛ shishi bɔ ni sa. Kɛfata he lɛ, esa akɛ ana yɛ enifeemɔ mli akɛ etswa efai shi akɛ ebaahi shi yɛ Nyɔŋmɔ taomɔnii anaa.
Afã Kristofoi akɛ amɛkakwa amɛhe naabuamɔ, no hewɔ lɛ, esa akɛ ana akɛ shiɛlɔ ni abaptisiko lɛ lɛ kɛ hiɛdɔɔ yaa asafoŋ kpeei. (Heb. 10:24, 25) Bei pii lɛ, esa akɛ mɔ lɛ kɛ ehe awo saji ahetoohamɔ mli. Eyɛ mli akɛ ejeee taomɔnii moŋ, shi ekolɛ mɔ lɛ kɛ ehe baawo Teokrase Sɔɔmɔ Skul lɛ mli.
Kɛfata he lɛ, akɛni afã Kristofoi ni amɛshiɛ sanekpakpa lɛ ni amɛfee kaselɔi hewɔ lɛ, esa akɛ shiɛlɔ ni abaptisiko lɛ lɛ kɛ ehe awo shiɛmɔ nitsumɔ lɛ mli daa dani abaptisi lɛ. (Mat. 24:14; 28:19, 20) Nyɔji enyiɛ esa akɛ ekɛshiɛ dani abaptisi lɛ? Nilee yɛ mli akɛ aaaha ekɛ be saŋŋ atsɔɔ akɛ etswa efai shi akɛ ekɛ ekãa baashiɛ nyɔɔŋ fɛɛ nyɔɔŋ. (Lala 78:37) Kɛlɛ, ehe ehiaaa ni aha be babaoo aho kɛjɛ be ni ebɔi shiɛmɔyaa lɛ dani ana akɛ esa kɛha baptisimɔ, ebaanyɛ efee nyɔji fioo komɛi. Ŋmɛlɛtswai enyiɛ esa akɛ eha daa nyɔɔŋ? Awoko enɛ he mla. Esa akɛ onukpai lɛ asusu shiɛlɔ fɛɛ shiɛlɔ shihilɛ he ni amɛkɛ hiɛshikamɔ atsu nii.—Luka 21:1-4.
Asafoŋ onukpai (loo asafoŋ sɔɔlɔi ni yɔɔ asafoi ni onukpai lɛ ayi faaa kwraa yɛ mli) ni kɛ mɛi ni kɛ amɛhe eha kɛha baptisimɔ lɛ baata shi lɛ akai akɛ esoro mɔ fɛɛ mɔ, ni no hewɔ lɛ esa akɛ amɛkɛ sɛɛyoomɔ atsu nii kɛkwɛ kɛ́ mɔ lɛ sa kɛha baptisimɔ. Amɛbaakpa gbɛ akɛ mɔ lɛ baaná shwelɛ diɛŋtsɛ akɛ ebaatsɔ Yehowa Odasefoi lɛ ateŋ mɔ kome, ni etsɔɔ akɛ ehiɛ sɔɔ hegbɛ ni ená akɛ ekɛ Yehowa gbɛjianɔtoo lɛ aaabɔ ni ená gbɛfaŋnɔ yɛ shiɛmɔ nitsumɔ lɛ mli. Onukpai lɛ le akɛ mɔ lɛ edako yɛ mumɔŋ ni ehe esako tamɔ shiɛlɔi ni abaptisi amɛ ni yɔɔ niiashikpamɔ lɛ. Kɛ́ onukpai lɛ na akɛ mɔ lɛ he esako kɛha baptisimɔ lɛ, esa akɛ amɛjɛ mlihilɛ mli amɛtsɔɔ lɛ Ŋmalɛ naa yiŋtoi ahewɔ ni amɛkpɛ nakai yiŋ lɛ, ní amɛye amɛbua lɛ ni eya ehiɛ yɛ mumɔŋ.