Bo hu, Obaanyɛ Oye Omanye Yɛ Trukaa Odaseyeli Mli
1 Jeŋ shihilɛi miiya nɔ eefite, taakɛ Biblia gbalɛ tsɔɔ lɛ pɛpɛɛpɛ. (Luka 21:10, 11; 2 Tim. 3:1, 13) Mɛi pii efee yeyeeye yɛ wɔsɛɛ be he, ni mɛi ni yɔɔ tsui krɔŋŋ lɛ “dɔmɔɔ ŋtsɔi ni amɛyeɔ ŋkɔmɔ yɛ nihiinii fɛɛ” ni yaa nɔ yɛ he fɛɛ he lɛ hewɔ. (Ezek. 9:4) Wɔ yelikɛbuamɔ he miihia nɛkɛ aŋkroaŋkroi nɛɛ fɛɛ bɔni afee ni amɛle Nyɔŋmɔ yiŋtoo. Yɛ amanehulu kpeteŋkpele ni ebɛŋkɛ nɛɛ hewɔ lɛ, ekɛ gbɛnaa nii ko bafɔɔ wɔ nɔ koni wɔkɛ gbɛi fɛɛ ni wɔɔnyɛ lɛ atsu nii, kɛ trukaa odaseyeli hu, ni wɔshiɛ Nyɔŋmɔ Wiemɔ Iɛ ni wɔfee kaselɔi.
2 Kɛ ohiɛ yɛ ohe nɔ yɛ trukaa odaseyeli he lɛ, obaana akɛ hegbɛi pii gbeleɔ kɛhaa wɔ yɛ be mli ni wɔnanemɛi basaraa wɔ yɛ wɔshia aloo yɛ be mli ni osaraa amɛ, aloo yɛ be mli ni okɛ onanemɛi gbaa sane yɛ be mli ni nyɛkpa ni nyɛyeɔ nii, dani nitsumɔ be aaaje shishi aloo yɛ be mli ni akpa, yɛ jaranɔ, yɛ skul, kɛ hei krokomɛi lɛ. Tsɔɔlɔ kpeteŋkpele lɛ, Yesu Kristo ye omanye waa yɛ trukaa odaseyeli mli. Nyɛhaa wɔsusua gbɛi ni ekɛtsu nii yɛ be mli ni eyeɔ odase trukaa etsɔɔ Samariayoo lɛ yɛ nu bu ko he taakɛ aŋma yɛ Yohane 4:7-26 lɛ he.
Sanegbaa Lɛ Shishijee
3 Kuku 7: Kadimɔ akɛ Yesu ŋɔ hegbɛ lɛ ni eje sanegbaa lɛ shishi kɛtsɔ nii ni ebi Samariayoo lɛ akɛ: “Ha mi nu lɛ eko manu” lɛ nɔ. Esa kadimɔ hu akɛ Yesu ejeee sanegbaa lɛ shishi kɛ Ŋmalɛ mli saneyitso pɔtɛɛ ko. Ŋɔɔ hegbɛ lɛ yɛ nakai gbɛ nɔ nɔŋŋ. Obaanyɛ oje trukaa sanegbaa lɛ shishi kɛ sane hee ko ni ale jogbaŋŋ yɛ nyɛ akutso lɛ mli loo yɛ maŋ lɛ mli aloo yɛ je lɛŋ fɛɛ po, ni jeee yɛ Ŋmalɛ mli saneyitso ko nɔ doo. Shi bɔɔ mɔdɛŋ ni maŋkwramɔŋ saji akaba nyɛ sanegbaa lɛ mli.
4 Kuku 8: Yesu miijɔɔ ehe yɛ biɛ yɛ egbɛfaa kakadaŋŋ kɛjɛ Yudea lɛ sɛɛ. (Kuku 6) Yɛ nakai gbɛ nɔ nɔŋŋ lɛ, bo bu obaanyɛ okɛ shihilɛi sɔrɔtoi lɛ atsu nii ni okɛye odase taakɛ atsi ta yɛ kuku 2 ni tsɔ hiɛ lɛ mli lɛ.
Ŋaa Kɛ Tsuishitoo
5 Kuku 9: Otoibolɔ lɛ baanyɛ ewie wiemɔi ni ekolɛ ejaaa loo ekolɛ eeefee tamɔ mɔ ko ni teɔ shi ewoɔ wɔ. Kuu ohiɛ ofɔ ewiemɔi ni ejaaa lɛ anɔ bɔ fɛɛ bɔ ni ooonyɛ, ni odamɔ eshitee-kɛ-woo lɛ naa. Kɛ aaahi lɛ, bɔɔ mɔdɛŋ ni nyɛkpa gbee yɛ nɔ ko he. Yaa nɔ kɛ naanyobɔɔ su, taakɛ Kristo fee yɛ kuku 10 lɛ. Taakɛ Yesu fee he nɔkwɛmɔ nɔ yɛ kuku nɛɛ mli lɛ, ha ojwɛŋmɔ ahi wiemɔi ni baaha otoibolɔ lɛ aná nɔ ko ni baaha esusu he lɛ nɔ. Obaanyɛ okɛ sanebimɔi ni mɔɔ mɔ jwɛŋmɔ ni baanyɛ atee miishɛɛ shi yɛ emli akɛ ele hetooi lɛ kɛjɛ oŋɔɔ lɛ hu atsu nii. Sanebimɔi ni baaha etsɔɔ ejwɛŋmɔ kɛ mfonirifeemɔi ni yɔɔ mlɛo hu hi. Agbɛnɛ, kadimɔ bɔ ni Yesu gbala “Nyɔŋmɔ” ewo sanegbaa lɛ mli ni etsi “wala nu” ta, ni ekɛsaa gbɛ koni sanegbaa lɛ aya nɔ yɛ Ŋmalɛ mli lɛ hu. Kɛji okɛ Ŋmalɛ naa susumɔi miiwo mli lɛ, yɛ be babaoo mli lɛ ehi akɛ ooowie wiemɔi kukuji kɛkɛ koni okwɛ bɔ ni toibolɔ lɛ baafee Eyɛ he koni onyɛ okpɛ oyiŋ yɛ bɔ ni oooya nɔ lɛ he.
6 Kuku 11, 12: Yɛ be mli ni obɔɔ mɔdɛŋ ni okɛ Ŋmalɛ naa susumɔi awo mli lɛ, ekolɛ mɛi komɛi nuŋ shishi kɛmɔŋ shi aloo ekolɛ amɛkɛ bo kpaŋ gbee. Na tsui oha amɛ, taakɛ Kristo fee yɛ Samariayoo lɛ he lɛ.
7 Kuku 13, 14: Yesu fee bɔ ni ehe hiaa ni obo mɔ kroko lɛ sanebimɔi atoi jogbaŋŋ bɔni afee ni eye ebua bo ni okudɔ sanegbaa lɛ jogbaŋŋ lɛ he nɔkwɛmɔ nɔ. Yɛ enɛ mli hu lɛ, kɛ etoibolɔ lɛ kɛ bo kpaaa gbee (kɛ yɛ gbɛ doo po nɔ aloo kwraa) po lɛ, kɛ ebaahi lɛ bɔɔ mɔdɛŋ ni nyɛkpa gbee yɛ nɔ ko he. Yɛ enɛ mli lɛ, yoo lɛ efee klalo akɛ ekɛ Yesu baakpa gbee akɛ “mɔ fɛɛ mɔ ni nuɔ nu nɛɛ eko lɛ, kumai baaye lɛ ekoŋŋ.” Kwɛ gbɛ nɔ ni Yesu tsɔ ekɛ Ŋmalɛ naa susumɔi wo mli eha ni etee yoo lɛ miishɛɛ shi akɛ eeele anɔkwale lɛ babaoo.
Nyɔmɔwoo Kpakpa Baanyɛ Ajɛ Mli Aba
8 Kuku 15-18: Hɛɛ, trukaa odaseyeli baanyɛ afee shishijee gbɛ ni oootsɔ nɔ oye obua mɔ ko kɛba wala gbɛ lɛ nɔ. Yoo nɛɛ bi ni Yesu aha lɛ wala nu ni ebaanyɛ eha lɛ lɛ eko enu. Ni titri lɛ, yɛ Kukuji 16-18 lɛ, Yesu miitao ni eye ebua yoo lɛ ni ele mɔ ni eji—Mesia kɛ gbalɔ lɛ. Wɔ hu wɔbaanyɛ wɔye wɔbua toibolɔ lɛ ni ena hegbɛ ni wɔdamɔɔ nɔ wɔwieɔ lɛ mli hekɛnɔfɔɔ, ni ji Biblia lɛ. Nɔ kroko hu nɛ: Beni yoo lɛ kpɛlɛ nɔ, ni ekɛɛ Yesu akɛ “Mibɛ wu” lɛ, Yesu kɛɛ lɛ akɛ: ‘Owie jogbaŋŋ.’ Yɛ sɛɛ mli beni sanegbaa lɛ yaa nɔ lɛ, Yesu kɛfata he akɛ: “No lɛ okɛɛ anɔkwa.” No hewɔ lɛ, kɛ toibolɔ lɛ wie wiemɔi komɛi ni eji anɔkwale lɛ, tsɔɔmɔ akɛ okɛ lɛ kpaa gbee ni ofee klalo akɛ ooojie eyi bɔ ni sa. Mɛni hewɔ osusuɔ akɛ nilee yɛ mli akɛ ooofee enɛ lɛ?
9 Kuku 19-26: Taakɛ bɔ ni onaa lɛ, jeee Yesu kometoo pɛ wieɔ, shi yɛ bei babaoo mli lɛ eŋmɛɔ Samariayoo lɛ gbɛ koni lɛ hu ewie eko. No hewɔ lɛ, okometoo okawie. Taakɛ Yesu fee he nɔkwɛmɔ nɔ lɛ, ha owiemɔi lɛ amamɔ otii pɔtɛɛ anɔ mi, ni kaaha owiemɔ lɛ tee nɔ ni anuuu shishi. Kɛji trukaa odaseyeli lɛ sɛɛ kɛ jio, eyɛ kuku jio, esa akɛ otoibolɔ lɛ anu he akɛ ekase nɔ ko. Mɛɛ anɔkwalei komɛi Samariayoo lɛ kase kɛjɛ Yesu ŋɔɔ yɛ nɛkɛ sane nɛɛ mli?
10 Saji ni eshwɛ ni fata he yɛ Yohane yitso 4 lɛ tsɔɔ akɛ nɛkɛ yoo nɛɛ kɛ Samariabii lɛ ateŋ mɛi pii na hemɔkɛyeli yɛ Yesu Kristo mli akɛ “je lɛ walaherelɔ.” (Kuku 42) Eba akɛ wɔ fɛɛ wɔhiɛ aaahi wɔhe nɔ yɛ trukaa odaseyeli he ni wɔkɛtsu nii daa, ni wɔkɛ gbɛi ni Yesu kɛtsu nii lɛ atsu nii. Gbɛi ni atsɔɔ yɛ yiteŋgbɛ nɛɛ baŋ lɛ nakai pɛpɛɛpɛ yɛ daa gbi shihilɛ mli tamɔ bɔ ni ato naa lɛ. Yɛ be mli ni okɛ mɛi sharaa lɛ, bi ohe akɛ: “Mɛɛ gbɛ nɔ matsɔ maye mabua mɔ nɛɛ ni ebale anɔkwale lɛ?” Enɛ baaye ebua bo ni okai shishitoo tɛi ni sa shihilɛ lɛ ni okɛtsu nii. (Yohane 13:17: Jaj. 11:6) Yɛ be mli ni wɔtsuɔ wɔ gbɛfaŋnɔ yɛ trukaa odaseyeli mli lɛ, Yehowa kɛ jɔɔmɔi babaoo baashwie nɔ.