Sanekpakpa Lɛ Kɛhamɔ—Kɛtsɔ Sɔlemɔ Nɔ
1 Bɔfo Paulo ŋma ekaawoo wiemɔi nɛɛ eha Filipibii lɛ akɛ. “Minyɛɔ nii fɛɛ mifeɔ yɛ mɔ ni wajeɔ mi ni ji Kristo lɛ mli.” (Fil. 4:13) Ehe miihia ni wɔ hu wɔkɛ wɔhe afɔ Yehowa nɔ kwraa kɛha hewalɛ koni wɔnyɛ wɔkɛ ekaa ajaje sanekpakpa lɛ. Mɛɛ gbɛ nɔ wɔɔtsɔ wɔfee enɛ yɛ.
2 Yesu ma bɔ ni ehe hiaa ni ‘wɔsɔle daa ni ekaje wɔtsine’ lɛ nɔ mi. (Luka 18:1) Paulo woɔ hewalɛ akɛ. “Nyɛsɔlea ni nyɛkafɔa.” (1 Tes. 5:17) Hɛɛ, hewalɛ jɛɔ sɔlemɔ mli baa. Ehe miihia ni wɔkɛ sanekpakpa lɛ aha kɛtsɔ sɔlemɔ nɔ. Wɔbaanyɛ wɔsɔle kɛha hegbɛi ni wɔkɛaaye mɛi krokomɛi odase, kɛha nilee kɛ niiasɛɛyoomɔ yɛ shia-kɛ-shia nitsumɔ lɛ mli, kɛ agbɛnɛ kɛha omanyeyeli yɛ wɔ-Biblia mli nikaselɔi lɛ atsuii amli ni wɔɔshɛ lɛ he. Akɛni ehe miihia waa ni wɔkɛ oyaiyeli ashiɛ Maŋtsɛyeli lɛ he sanekpakpa lɛ dani naagbee lɛ ashɛ hewɔ lɛ, ehe miihia hu ni wɔsɔle ni Maŋtsɛyeli lɛ he nibii lɛ aya hiɛ yɛ jeŋ fɛɛ. (Mat. 24:14) Esa akɛ ‘wɔhiɛ akamɔ’ yɛ sɔlemɔ mli bɔni afee ni wɔkwa mumɔŋ wɔdɔ̃iwɔɔ ni wɔha hiɛsɔɔ ni wɔyɔɔ kɛha hegbɛi ni wɔna akɛ wɔkɛ mɛi krokomɛi aaawie Yehowa yiŋtoi ahe lɛ aya hiɛ.—Kol. 4:2; w62 bf. 497.
Yɛ Biblia Kasemɔ Mli
3 Mɛni hewɔ ni sɔlemɔ he hiaa waa yɛ be mli ni afeɔ Biblia mli nikasemɔ lɛ? Sɔlemɔ ni akɛjeɔ nikasemɔ lɛ shishi lɛ haa wɔnaa jwɛŋmɔ kpakpa, ni eyeɔ ebuaa nikaselɔ lɛ ni enaa bɔ ni nɔ ni awieɔ lɛ he hiaa ha. Ekaseɔ bɔ ni eeefee ekwɛ Yehowa gbɛ kɛha gbɛtsɔɔmɔ. Nikaselɔ lɛ hu kaseɔ bɔ ni asɔleɔ kɛtsɔ wɔnɔkwɛmɔ nɔ lɛ nɔ.—Luka 11:1.
4 Mɛni ji nibii ni sa ni wɔbaanyɛ wɔkɛfata he yɛ wɔsɔlemɔ mli yɛ be mli ni wɔfeɔ shia Biblia mli nikasemɔ lɛ ekomɛi? Yesu sɔlemɔ he nɔkwɛmɔ nɔ lɛ kɛ sɔlemɔ ni Paulo sɔle yɛ Filipibii lɛ agbɛfaŋ lɛ ji nɔkwɛmɔnii ni hi jogbaŋŋ. (Mat. 6:9-13; Fil. 1:9-11) Ehe ehiaaa ni wɔsɔlemɔi lɛ akɛlɛ, shi esa akɛ ekɔ nibii pɔtɛɛ ahe. Ehe miihia waa akɛ wɔkɛ wiemɔi ni sa ni tsɔɔ Yehowa yijiemɔ yɛ enitsumɔi kpakpai babaoo lɛ ahewɔ lɛ afata he. Wɔbaanyɛ wɔtsɔɔ bɔ ni wɔyooɔ egbojee, enunyam, kɛ esui ni hi kɛwula shi lɛ hu. (Lala 145:3-5) Ni wɔɔtsi Biblia kaselɔ lɛ gbɛi ta, ni ekolɛ wɔwie eshihilɛ mli nibii komɛi ahe, kɛ agbɛnɛ ni wɔɔsɔle ni eya hiɛ yɛ mumɔŋ lɛ he baaba sɛɛnamɔ. Yɛ be mli ni eyaa ehiɛ lɛ, wɔbaanyɛ wɔbi Yehowa jɔɔmɔ yɛ emɔdɛŋbɔi akɛ eeeba kpeei ni ekɛ mɛi krokomɛi aja anɔkwalei ni ekaseɔ lɛ hu lɛ anɔ. Wɔkɛ faikpamɔi kɛha Yehowa jɔɔmɔ yɛ jeŋ muu fɛɛ shiɛmɔ nitsumɔ lɛ nɔ lɛ hu afata he.
Kɛha Wɔnyɛmimɛi Hii Kɛ Yei Lɛ
5 Yehowa webii lɛ fɛɛ ji nanemɛi nitsulɔi. (1 Kor. 3:9) No hewɔ lɛ, kɛ nɔyelɔi lɛ miibɔ mɔdɛŋ ni amɛtsi sanekpakpa shiɛmɔ lɛ naa lɛ, etsirɛɔ wɔ koni wɔsɔle yɛ “maŋtsɛmɛi kɛ mɛi fɛɛ ni yeɔ onukpai lɛ” agbɛfaŋ. Kɛ mɛɛ yiŋtoo? “Koni wɔhi shi kpoo yɛ hejɔlɛ mli, yɛ Nyɔŋmɔ jamɔ kɛ jeŋba ni hiɛ sɔɔ fɛɛ mli.” (1 Tim. 2:1, 2) Yɛ anɔkwale mli lɛ, nɛkɛ sɔlemɔi nɛɛ kɔɔ wɔnyɛmimɛi ni yɔɔ je lɛŋ fɛɛ lɛ ahe. Wɔsɔleɔ ni hegbɛi ni yeɔ nɔ lɛ ana jwɛŋmɔ kpakpa yɛ wɔnitsumɔ lɛ he.
6 Wɔbaanyɛ wɔtsɔ sɔlemɔ nɔ wɔbi ni wɔnyɛmimɛi ni shiɛɔ yɛ shihilɛi ni mli wawai amli, kɛ mɛi ni he yeɔ yɛ mumɔŋ hu lɛ ana hewalɛ, bɔni afee ni amɛna gbɛfaŋnɔ ni mɔɔ shi yɛ sɔɔmɔ nitsumɔ lɛ mli. (2 Tes. 3:1, 2) Ehi jogbaŋŋ hu akɛ wɔɔsɔle wɔha asafoŋ onukpai, nɔkwɛlɔi gbɛfalɔi, kɛ Nɔyeli Kuu lɛ—mɛi fɛɛ “ni tsuɔ nii yɛ nyɛteŋ” lɛ.—1 Tes. 5:12.
7 Ehe miihia ni wɔkɛ wɔ haomɔi lɛ ashwie Yehowa nɔ be fɛɛ be. (Lala 55:23; 1 Pet. 5:7) Wɔyɛ nɔmimaa akɛ nɔ fɛɛ nɔ ni wɔɔbi ni kɛ esuɔmɔnaa nii kpaa gbee lɛ, ebaabo wɔ toi. (1 Yoh. 5:14) No hewɔ lɛ, kɛji wɔsɔle kɛha Yehowa yelikɛbuamɔ koni wɔnyɛ wɔgbe wɔsɔɔmɔ lɛ naa kwraa lɛ, esa akɛ wɔna hekɛnɔfɔɔ akɛ ebaabo wɔ toi ni ebaaha wɔgbɛ lɛ aye omanye.—2 Tim. 4:5.