Shiɛmɔ Nitsumɔ Lɛ—Wɔhegbɛ ni Sɛɛnamɔ Babaoo Yɔɔ He
1 Mɛɛ hegbɛ kpeteŋkpele wɔna nɛkɛ akɛ wɔɔdamɔ Yehowa. Nyɔŋmɔ ni Nɔ Kwɔ Fe Fɛɛ lɛ najiaŋ yɛ adesai ahiɛ ni wɔtsɔmɔ “Nyɔŋmɔ hefatalɔi nitsulɔi” hu! (1 Kor. 3:9; Yes. 43:10-12) Sanekpakpa ni wɔshiɛɔ lɛ “jɛɛɛ gbɔmɔ naa,” ni ŋwɛibɔfoi lɛ fiɔ sɛɛ hu. (Kpoj. 14:6, 7. Gal. 1:11) Ani ohiɛ sɔɔ hegbɛ ni ona akɛ ooofata Yehowa shikpɔŋ nɔ gbɛjianɔtoo lɛ he, ni okɛ eŋwɛi gbɛjianɔtoo lɛ afee ekome kɛtsu nɛkɛ yiwalaheremɔ nitsumɔ ni ji sanekpakpa lɛ shiɛmɔ nɛɛ?
2 Yehowa Nyɔŋmɔ ji klɛŋklɛŋ sanekpakpa shiɛlɔ, ni ejaje Seshi ni baatswa Abonsam yitso nɔ, koni esaa ekɛ toiŋjɔlɛ kɛ gbeekpamɔ aba jeŋ fɛɛ lɛ he sanekpakpa lɛ yɛ Eden. (1 Mose 3:15) Afii ohai abɔ sɛɛ lɛ, Yehowa “jaje sanekpakpa lɛ etsɔɔ Abraham eto akɛ: ‘Omli aaajɔɔ jeŋmaji lɛ fɛɛ yɛ.’” (Gal. 3:8) Yehowa Nyɔŋmɔ miiya nɔ eejaje sanekpakpa lɛ yɛ shiwoo ni ekɛha akɛ ebaafee “nibii fɛɛ ehee” yɛ paradeiso yɛ shikpɔŋ nɔ lɛ mli. (Kpoj. 21:5) Wɔkaseɔ wɔ-Nyɔŋmɔ lɛ yɛ ekaa ni wɔkɛjajeɔ sanekpakpa lɛ mli ni wɔkɛfɔɔ mɛi krokomɛi nine akɛɛ “Mɔ ni kumai yeɔ lɛ lɛ, ha ni eba, ni mɔ ni sumɔɔ lɛ, ha ni ebayɛ wala nu lɛ yaka.”—Kpoj. 22:17.
Wɔgbɛfaŋnɔ Lɛ Ni Wɔɔlɛɛ Mli
3 Beni akɛ naatsii ba wɔnitsumɔ lɛ nɔ nyɛsɛɛ afi lɛ, wɔ shiɛmɔ nitsumɔ lɛ ba shi yɛ efai sɔrɔtoi lɛ fɛɛ amli kɛ ŋmɛlɛtswai abɔ ni akɛtsuɔ nii lɛ hu. Shi eji miishɛɛ sane akɛ wɔɔna akɛ wɔnanemɛi lɛ miikanya amɛhe ni shiɛmɔ nitsumɔ lɛ fai sɔrɔtoi lɛ fɛɛ miiya hiɛ kɛmiitsara nɔ. Shiɛlɔi aŋmɛlɛtswaa mlijaa lɛ etee hiɛ kɛjɛ enumɔ yɛ be mli ni akɛ naatsii lɛ ba klɛŋklɛŋ kwraa lɛ, ni mlijaa lɛ eyashɛ 6. Eyɛ mli akɛ enɛ woɔ mɔ hewalɛ waa moŋ, shi eka shi faŋŋ akɛ hegbɛ babaoo yɛ kɛha hiɛyaa, ejaakɛ dani akɛ naatsii lɛ aaaba lɛ, no mli lɛ shiɛlɔi aŋmɛlɛtswaa mlijaa shɛɔ 12. Kɛ shiɛlɔ fɛɛ shiɛlɔ kɛ ŋmɛlɛtswai 2 baatsu nii yɛ otsi mli lɛ, kɛ hooo kwraa lɛ ebaana ŋmɛlɛtswai 8 yɛ nyɔŋ kome mli, ni kɛ ekɛ ŋmɛlɛtswai 3 tsuɔ nii yɛ otsi mli lɛ, no baaha ena ŋmɛlɛtswai 12 yɛ nyɔŋ kome mli. Ani oona nitsumɔ babaoo ni wɔɔnyɛ wɔtsu kɛji wɔmia wɔhiɛ fioo yɛ shiɛmɔ nitsumɔ lɛ mli daa otsi lɛ?
4 Mɛi pii yɛ maŋ nɛɛ mli lolo ni miishwe ni amɛnine ashɛ sanekpakpa lɛ nɔ. Gbɛ kome ni wɔɔtsɔ nɔ wɔtao nɛkɛ gbɔmɛi nɛɛ ji kɛtsɔ shia-kɛ-shia nitsumɔ lɛ nɔ. Shiɛlɔi pii miibɔ mɔdɛŋ waa yɛ shia kɛ shia odaseyeli lɛ mli ni eewo yibii kpakpai hu. Yɛ nɔkwɛmɔ nɔ kome mli lɛ. shiatsɛ lɛ jie hiɛsɔɔ babaoo kpo yɛ sanekpakpa lɛ he akɛ ekɛɛ shiɛlɔ lɛ akɛ ebaaya sɔlemɔ yɛ otsi kome mli, ni otsi ni baanyiɛ sɛɛ lɛ, ebaahi shia ni emɛ lɛ koni ekɛlɛ abakase Biblia lɛ. Klɛŋklɛŋ kwraa ni ekɛ lɛ kpe nɛ, ni kɛlɛ ekpɛlɛ nɔ akɛ ebaatse gbii ni ekɛyaa sɔlemɔ lɛ nɔ kɛba shii enyɔ yɛ nyɔŋ kome mli bɔni afee ni enyɛ ekɛ Yehowa Odasefoi akase Biblia lɛ. Na hekɛnɔfɔɔ akɛ Yehowa baatsɔ ebɔfoi lɛ anɔ etsɔɔ bo gbɛ kɛya gbɔmɛi ni tamɔ gwantɛŋi ni yɔɔ oshikpɔŋkuku lɛ mli lɛ aŋɔɔ. No hewɔ lɛ, kaaha oshiɛmɔ nitsumɔ lɛ miifee sɛɛsaramɔi kɛ shia Biblia mli nikasemɔi pɛ kɛkɛ. Too be he gbɛjianɔ kɛha shia-kɛ-shia odaseyeli hu.
5 Mɛi komɛi ekpa shiɛmɔ nitsumɔ lɛ kwraa kɛjɛ be mli ni akɛ naatsii lɛ ba nɛɛ, ni enɛ eha amɛgbɔjɔ. Mɛi krokomɛi hu eyaaa shiɛmɔ yɛ daa nyɔŋ nɔ. Wɔmiibi ni woloŋmalɔ lɛ aŋmala mɛi fɛɛ ni egbɔjɔ kɛ mɛi ni miihe agbɔjɔ lɛ hu fɛɛ agbɛi. Onukpai asɛinɔtalɔ lɛ baanyɛ akwɛ koni afee enɛ, koni eto gbɛjianɔ ni etsɛ onukpai akuu lɛ kpee ni amɛsusu yelikɛbuamɔ ni anyɛɔ atsuɔ he nii ni amɛbaanyɛ amɛkɛha nɛkɛ nyɛmimɛi ni egbɔjɔ yɛ mumɔŋ nɛɛ ateŋ mɔ fɛɛ mɔ lɛ he. Wɔmiiwo ŋaa akɛ onukpai akuu lɛ baanyɛ amɛhala nyɛmimɛi hii kɛ yei pɔtɛɛ komɛi ni he esa koni amɛyɛ amɛbua nɛkɛ gbɔmɛi nɛɛ ni amɛkanya amɛ. Ekolɛ amɛteŋ mɛi pii ekpa kpeeiyaa, no hewɔ lɛ klɛŋklɛŋ nifeemɔ ni esa akɛ atsɔ nɔ ji ni atee miishɛɛ ni amɛyɔɔ yɛ mumɔŋ niyenii ni Yehowa kɛhaa lɛ he lɛ shi ni aye abua amɛ ni amɛje shiɛmɔ nitsumɔ lɛ shishi ekoŋŋ.
Gbɛgbalɔi—Nyɛyaa Nɔ Nyɛtsua Nyɛgbɛfaŋnɔ
6 Wɔhiɛ sɔɔ wɔgbɛgbalɔi lɛ waa diɛŋtsɛ. Shiɛmɔ nitsumɔ lɛ kɛ kaa kpelei baa yɛ wɔ amrɔ nɛɛ shihilɛ lɛ hewɔ. No hewɔ lɛ, wɔhiɛ sɔɔ ŋmɛlɛtswai amlijaa 40 ni daa gbɛgbalɔi kɛhaa yɛ daa nyɔŋ nɔ, kɛ ŋmɛlɛtswai amlijaa 37 ni gbɛgbalɔi awalɔi lɛ hu kɛhaa yɛ daa nyɔŋ nɔ lɛ waa diɛŋtsɛ. Shi kɛlɛ, kɛji wɔsusu he akɛ ŋmɛlɛtswai ni kɛ hooo lɛ esa akɛ daa gbɛgbalɔi ana ji 90 ni gbɛgbalɔi awalɔi hu ana ŋmɛlɛtswai 60 yɛ daa nyɔŋ nɔ lɛ, wɔnaa amrɔ nɔŋŋ akɛ hegbɛ babaoo yɛ kɛha hiɛyaa. Akɛni wɔna niiashikpamɔ bɔ ni sa yɛ nyɔji nyɔŋma kɛ kpaanyɔ ni wɔkɛtsu nii yɛ naatsii lɛ shishi ni agbɛnɛ shihilɛ lɛ hu miiya nɔ eehi yɛ shikpɔŋkukuji pii amli hewɔ lɛ, ekɛ hegbɛi babaoo haa koni wɔkɛ bei babaoo atsu nii yɛ shiɛmɔ nitsumɔ lɛ mli. Ani okɛ wɔ kpaaa gbee?
7 Wolo ni aŋmaa daa gbɛgbalɔi daa afi lɛ wo amɛteŋ mɔ fɛɛ mɔ hewalɛ koni ena be he gbɛjianɔtoo kɛha shiɛmɔyaa yɛ daa otsi mli, ni aha amɛteŋ mɔ fɛɛ mɔ wolo kɛha enɛ feemɔ. Enɛ baaye ebua amɛ koni amɛna nitsumɔ ni amɛnyɛ amɛtsu yɛ otsi fɛɛ otsi mli, kɛ bɔ ni amɛbaanyɛ amɛtsu yɛ nyɔŋ lɛ mli. Kɛji enɛ eba shi kwraa lɛ, no baaha enyɛ ekpɛ eyiŋ yɛ tsakemɔi ni esa akɛ efee yɛ edaa gbi nitsumɔi amli lɛ he bɔni afee ni eya hiɛ ni enitsumɔ lɛ amɔ shi hu. Aawo gbɛgbalɔi awalɔi lɛ hu hewalɛ nakai nɔŋŋ koni amɛtsɔ hiɛ amɛto gbɛjianɔ kɛha shiɛmɔ nitsumɔ lɛ. “Nyɛmɔdɛŋbɔɔ lɛ naa akabaa shi; nyɛmumɔ lɛ he adɔa lɛ; nyɛsɔmɔa Nuŋtsɔ lɛ [Yehowa ].”—Rom. 12:11.
8 Wɔhe ni wɔkɛwoɔ shiɛmɔ nitsumɔ lɛ mli lɛ wieɔ suɔmɔ ni mli kwɔ ni wɔyɔɔ kɛha Yehowa kɛ wɔnaanyo gbɔmɔ lɛ he yɛ faŋŋ mli. Enɛ ji nitsɔɔmɔ nitsumɔ kpeteŋkpele fe fɛɛ ni atsu yɛ yinɔsane fɛɛ mli. Ani ohiɛ esɔɔɔ gbɛfaŋnɔ ni ona yɛ gbalɛ mlibaa nɛɛ mli lɛ? (Mat. 24:14; Lala 110:3) Belɛ yaa nɔ ni okɛ ekaa atsu nii yɛ shiɛmɔ nitsumɔ lɛ mli.—Heb. 6:10-12.
9 Etsɛŋ ni gbi ni Nyɔŋmɔ Maŋtsɛyeli lɛ baaye shikpɔŋ muu lɛ fɛɛ nɔ lɛ baashɛ. Mɛɛ miishɛɛ eeeji nɛkɛ akɛ wɔɔte shi gbi fɛɛ gbi kɛ gbɔmɔtsoŋ hewalɛ kpakpa koni wɔkɛye wɔbua ni akɛtsake shikpɔŋ lɛ ni afee lɛ jeŋ muu fɛɛ paradeiso, ni wɔye wɔbua yɛ tsɔsemɔ ni esa akɛ akɛha mɛi akpekpei abɔ ni abaatee amɛ shi lɛ mli ni amɛnyiɛ yɛ Yehowa gbɛlɛ nɔ! Eba akɛ miishɛɛ nibii ni jwere wɔhiɛ lɛ aaawo ofaishitswaa lɛ mli hewalɛ amrɔ nɛɛ koni oshiɛ anunyam sanekpakpa lɛ yɛ jaramɔ shihilɛ nɛɛ mli. (2 Tim. 4:2, 5) Eji hegbɛ ko ni hegbɛ kroko kɛlɛ yeee egbɔ!