Okɛ Ekaa Afɔ Nine Atsɛ Akɛ “Ba!”
1 Nibii ni yaa nɔ oyayaayai yɛ je lɛŋ fɛɛ lɛ kadiɔ nɛkɛ bei nɛɛ akɛ “naagbee gbii.” (2 Tim. 3:1-5) Awuiyeli ni etee hiɛ, kɛ shika gbɛfaŋ saji bɛ shiŋŋ, kɛ helai ni woɔ wala he gbeyei lɛ kɛ amɛnɔnyɛɛ ebafata he. Shi miishɛɛ sane ji akɛ, yɛ nɛkɛ amanehului nɛɛ fɛɛ sɛɛ lɛ, aakpa ninefɔɔ ko ni baanyɛ asa gbɔmɛi ahe kɛya naanɔ lɛ mli aaha mɛi fɛɛ. Mumɔ lɛ kɛ ayemforo lɛ yaa nɔ amɛkɛɔ akɛ: “Ba!” Ni amrɔ nɛɛ “asafo babaoo” lɛ ebafata amɛhe ni amɛkɛ ninefɔɔ ni yɔɔ kɛha mɔ fɛɛ mɔ nɛɛ miiha mɛi fɛɛ yɛ he fɛɛ he koni amɛbanu wala nu lɛ yaka.—Kpoj. 7:9: 22:17.
2 Ŋmɛnɛ, mɛi ni jalɛ he kumai yeɔ amɛ lɛ miihere nɛkɛ ninefɔɔ nɛɛ nɔ babaoo. Nyɛsɛɛ afi lɛ, mɛi akpekpei abɔ tee kpokpai wuji anɔ kpeei ni afee yɛ je lɛŋ hei sɔrɔtoi lɛ fɛɛ, ni mɛi aaashɛ akpekpei nyɔŋma ba Kaimɔ lɛ. Mɛi akpekpei abɔ krokomɛi hu miijie hiɛsɔɔ kpo yɛ nibii ni Nyɔŋmɔ kɛha lɛ ahe kɛtsɔ Maŋtsɛyeli lɛ he shɛɛ sane lɛ toiboo nɔ. Belɛ, kwɛ bɔ ni ehe hiaa waa akɛ wɔkɛ wɔbe aaatsu nii yɛ nilee mli koni wɔkɛkpa ninefɔɔ nɛɛ mli wɔha yɛ faŋŋ kɛ shia kɛ shia!—Bɔfoi 5:42; Efes. 5:15, 16.
Okɛ Ohe Awo Mli Kɛ Ekaa
3 Awa mra be mli Kristofoi lɛ ayi yɛ ekaa ni amɛkɛshiɛ lɛ hewɔ. (Bɔfoi 16:19-21; 17:2-8) Shi kɛlɛ amɛnijiaŋ ejeee wui yɛ ekaa ni amɛkɛbɔ mɔdɛŋ ni amɛkɛtswa sanekpakpa lɛ he adafi lɛ mli. Esa akɛ wɔ hu wɔna ekaa nakai nɔŋŋ ni wɔtswa wɔfai shi yɛ wɔ mɔdɛŋbɔɔ lɛ mli akɛ wɔbaashiɛ sanekpakpa lɛ.
4 Nyɛmimɛi ni yɔɔ maji ni agu nitsumɔ lɛ amli lɛ po kɛ amɛhe miiwo shiɛmɔ nitsumɔ lɛ mli kɛ amɛtsui muu fɛɛ yɛ yiwaa ni naa wa waa ni baa amɛnɔ, tamɔ amɛnitsumɔi, amɛshia kɛ amɛheyeli po ni nyɛɔ ejeɔ amɛdɛŋ lɛ fɛɛ sɛɛ. Amɛ nɔkwɛmɔ nɔ kpakpa lɛ woɔ wɔ hewalɛ koni wɔya nɔ wɔfɔ mɛi krokomɛi anine akɛ “Ba!”—2 Tes. 3:9.
5 Nyɛmiyoo ko tee nɔ ekɛ nɔ ni fe afii 35 sɔŋŋ hi gbɛgbamɔ sɔɔmɔ ni etsui sumɔɔ lɛ mli yɛ beni ebakase anɔkwale lɛ sɛɛ. Beni eye afi 70 lɛ, eshihilɛ batsake, ni ebatsɔ daa gbɛgbalɔ. Eyɛ mli akɛ mɛi fioo ko pɛ ni eye afii ni falɛ tamɔ nakai lɛ baaje nitsumɔ hee ko shishi moŋ, shi efee nakai. Ni yɛ be mli ni ekɛ afii babaoo ena be-fɛɛ sɔɔmɔ nɛɛ mli ŋɔɔmɔ sɛɛ lɛ, nyɛmiyoo nɛɛ kɛɛ, “Ehiɔ daa gbi.” Ekɛ mumɔŋ hejɔɔmɔ ebaha mɛi krokomɛi yɛ ekaa ni ekɛkpɛlɛ ninefɔɔ ni Yehowa kɛha lɛ koni eya ehiɛ ni ekɛ ehe awo Maŋtsɛyeli sɔɔmɔ lɛ mli kɛmɔ shi lɛ nɔ lɛ hewɔ.
6 Taakɛ eji yɛ klɛŋklɛŋ afi oha lɛ mli lɛ, ŋmɛnɛ hu gbɔmɛi miihere ninefɔɔ nɛɛ nɔ, amɛmiitsake amɛ niiahesusumɔ, amɛmiikpɛ amɛyiŋ, ni amɛmiikpa amɛnifeemɔi ni wooo Nyɔŋmɔ hiɛ nyam lɛ fɛɛ. Amɛbatsɔmɔɔ Odasefoi lɛ amajimaji ateŋ nyɛmifeemɔ lɛ mlibii ni amɛfataa mumɔ lɛ kɛ ayemforo lɛ he ni amɛkɛkɛɔ mɛi krokomɛi ni yɔɔ tsui krɔŋŋ lɛ hu akɛ “Ba!”
7 Nɔyaa kpele ni baa yɛ Maŋtsɛyeli nitsumɔ lɛ gbɛfaŋ kɛ nitsumɔ he niji ni alɛɔ mli yɛ maji babaoo mli lɛ kɛ Yehowa jɔɔmɔ he odaseyeli haa. Shi be ni yɔɔ kɛha nibii agbɛjianɔtoo nɛɛ miita kwraa. Amrɔ nɛɛ ji be ni sa ni wɔkɛaajie ekaa kɛ mɔdɛŋbɔɔ kpo yɛ ninefɔɔ ni wɔkɛhaa akɛ “Ba!” nɛɛ mli bɔni afee ni mɛikrokomɛi ahere ninefɔɔ lɛ nɔ oya ni amɛtsu nɔ ni amɛnu lɛ he nii.—Bɔfoi 20:26, 27; Rom. 12:11.