Ani Oji Shiɛlɔ Ni Yaa Shiɛmɔ Daa?
1 Yɛ Yesu shikpɔŋ nɔ sɔɔmɔ nitsumɔ lɛ mli lɛ, be ko lɛ, “ekaselɔi asafo muu lɛ fɛɛ bɔi nyamɔ ni amɛkɛ gbee walɛ jie Nyɔŋmɔ yi, yɛ hewalɛ nitsumɔi fɛɛ ni amɛna lɛ hewɔ.” Shi, Farisifoi komɛi ni fata asafo lɛ he lɛ kɛɛ Yesu akɛ: “Tsɔɔlɔ, kã okaselɔi lɛ.” Hetoo ni Yesu ha amɛ lɛ sa kadimɔ waa: “Miikɛɛ nyɛ akɛ, kɛji mɛnɛɛmɛi aaabu amɛnaa lɛ, no lɛ tɛi aaabolɔ.”—Luka 19:37-40.
2 Hetoo ni Yesu ha lɛ jieɔ Yehowa faishitswaa akɛ ashiɛ egbɛi lɛ kɛ eyiŋtoo atsɔɔ lɛ kpo faŋŋ. Hɛɛ, kɛji gbɔmɛi fee dioo lɛ, “no lɛ tɛi aaabolɔ”! Shi ani kaselɔi lɛ aaafee dioo lɛlɛŋ yɛ Yehowa gbɛi lɛ kɛ eyiŋtoo lɛ shiɛmɔ mli? Beni akɛ naatsii ba bɔfoi lɛ anɔ akɛ amɛkawie dɔŋŋ, hɛɛ, beni nɔyelɔi lɛ wo amɛ kita akɛ “amɛkatsi ta ni amɛkatsɔɔ nii yɛ Yesu gbɛi amli kwraa dɔŋŋ” lɛ, bɔfoi lɛ ha amɛ hetoo ni shishashaomɔ ko kwraa bɛ mli akɛ: “Wɔ lɛ wɔnyɛŋ akɛ ja wɔwie nii ni wɔna kɛ nii ni wɔnu lɛ.”—Bɔfoi 4:18-20.
3 Ŋwɛibɔfoi krɔŋkrɔŋi lɛ naa sanekpakpa lɛ jajemɔ he miishɛɛ waa. Yɛ yiwaa ni naa wa waa lɛ fɛɛ sɛɛ lɛ, ŋwɛibɔfoi lɛ kɛ mlihilɛ wo bɔfoi lɛ ekaa ni amɛkafee dioo, yɛ wiemɔi ni nyiɛ sɛɛ nɛɛ amli: “Nyɛyaa . . . nyɛyajajea nɛkɛ wala nɛɛ wiemɔi lɛ fɛɛ nyɛtsɔa maŋ lɛ.” (Bɔfoi 5:20) Yɛ nɛkɛ ŋwɛi famɔ nɛɛ toiboo mli lɛ, bɔfoi lɛ tee nɔ amɛshiɛ daa, ni “amɛfɔɔɔ nitsɔɔmɔ kɛ Yesu Kristo shiɛmɔ yɛ sɔlemɔ we lɛ kɛ shiai be fɛɛ be.” (Bɔfoi 5:42) Ani bo hu oji shiɛlɔ ni yaa shiɛmɔ daa?
4 Shiɛlɔi aaashɛ 3,000 yɛ lolo ni amɛyaaa shiɛmɔ daa nyɔŋ nɔ. Ani ofata amɛhe? Bɔ fɛɛ bɔ ni onaagba lɛ ji lɛ, bo diɛŋtsɛ ole. Mɛni ofeɔ koni okɛjie shiɛmɔ mli folɔmɔ nɛɛ kɛjɛ ohe kwraa ni oha etsa nɔ nakai? Onukpai lɛ kɛ asafoŋ sɔɔlɔi lɛ kɛ agbɛnɛ nyɛmimɛi hii kɛ yei ni he esa lɛ fɛɛ efee klalo akɛ amɛaaye amɛbua bo. Mɛni hewɔ otsiii obɛŋkɛɛɛ amɛ kɛha yelikɛbuamɔ koni ‘owaje niji ni mli eje wui kɛ nakutsei ni egbɔjɔ lɛ.”—Heb. 12:12.
Bo Hu, Obaanyɛ Oya Shiɛmɔ Daa
5 Wɔle faŋŋ akɛ, mɛi komɛi elaaje Biblia kaselɔi fioo komɛi ejaakɛ mɛnɛɛmɛi yashe gbeyei yɛ naatsii lɛ hewɔ. Shi naagba lɛ eba shi kwraa yɛ hei babaoo, ni amrɔ nɛɛ mɛi ni wɔkɛ amɛ kaseɔ nii tsutsu lɛ ateŋ mɛi komɛi fɔɔ wɔ nine ni wɔbasara amɛ ekoŋŋ. Kɛji onikaselɔ lɛ efeee nakai po lɛ, mɛni hewɔ ni bo oŋɔɔɔ hegbɛ lɛ ni oya eŋɔɔ?
6 Jeee akɛ wɔmiitao ni wɔye wɔbua Biblia kaselɔi lɛ kɛkɛ, shi moŋ ni wɔkɛtao mɛi heei hu. Esa akɛ wɔtsɔ gbɛ fɛɛ gbɛ nɔ wɔŋɔ hegbɛi sɔrɔtoi ni wɔnaa lɛ ni wɔkɛye odase trukaa, ni wɔkadi be falɛ lɛ hu, kɛ bibioo po lɛ, koni wɔbua fɛɛ naa ni wɔbu he akɔntaa kɛha nyɔŋ lɛ. Kɛfata he lɛ, shia kɛ shia ni wɔɔtsu nii yɛ lɛ haa wɔnaa hegbɛi babaoo ni wɔkɛtaoɔ mɛi ni tamɔ gwantɛŋi lɛ. Kɛha ŋaawoo lɛ, ofainɛ tii saji ni nyiɛ sɛɛ nɛɛ mli ekoŋŋ: February 1990 Our Bulletin mli sane ni ji “Ha Ohiɛ Ahi Ohe nɔ Ni Okɛ Biblia Kasemɔ he Woji Aha”; June 1990 nɔ lɛ mli sane ni ji “Bo hu, Obaanyɛ Oye Omanye yɛ Trukaa Odaseyeli Mli”; Volume 33, No. 7 mli sane ni ji “Shiɛmɔ Wiemɔ lɛ Yɛ Shia kɛ Shia”; Volume 33. No. 9 mli sane ni ji “Sanekpakpa lɛ Kɛhamɔ—Kɛtsɔ Hegbɛ ni Oootao ni Okɛye Odase Trukaa Nɔ.” Taakɛ obaanyɛ ona lɛ, awie nibii babaoo yɛ nyɔji fioo ni eho nɛɛ amli yɛ shia-kɛ-shia kɛ trukaa odaseyeli fɛɛ he.
Yelikɛbuamɔ Ni Jɛ Hei Krokomɛi
7 Te ŋaawoi ni nyiɛ sɛɛ nɛɛ ateŋ nɔ ni kɛ okɛ tsu nii lɛ eeeye ebua bo ni ofee mɔ ni yaa shiɛmɔ daa nyɔŋ nɔ? Hekɛnɔfɔɔ ni wɔnaa yɛ nɔ ni wɔwieɔ yɛ shinaai anaa lɛ mli lɛ haa miishɛɛ ni wɔnaa yɛ shiɛmɔ mli lɛ yaa hiɛ. No hewɔ lɛ, be ni wɔɔhe ni wɔkɛsaa wɔhe jogbaŋŋ yɛ saneyitsei fioo komɛi amli kɛha shiɛmɔyaa lɛ he miihia waa diɛŋtsɛ. Abaanyɛ aha mɔ ko afee shiatsɛ koni akɛti Saneyitso Kɛha Sanegbaa hee ni akɛtsuɔ nii amrɔ nɛɛ lɛ mli. Woji tamɔ Topies for Discussion aloo Reasoning From the Scriptures lɛ ji yelikɛbuamɔ nibii ni he yɔɔ sɛɛnamɔ waa. Niiashikpamɔ tsɔɔ akɛ kɛji onukpai lɛ to gbɛjianɔ koni nyɛminuu loo nyɛmiyoo ko ni he esa aye abuɔ mɔ ni eyaaa shiɛmɔ daa nyɔŋ nɔ yɛ shiɛmɔ nitsumɔ lɛ mli lɛ, ewoɔ yibii kpakpai. Ni kɛ onukpai kɛ asafoŋ sɔɔlɔi kɛ amɛŋamɛi lɛ nyiɛ hiɛ kɛ ekaa yɛ shiɛmɔ nitsumɔ lɛ mli lɛ, enaa hewalɛ kpakpa hu yɛ asafo lɛ nɔ. Kɛji kui ahiɛnyiɛlɔi lɛ ha amɛhiɛ hi amɛhe nɔ ni amɛye amɛbua shiɛlɔ fɛɛ shiɛlɔ koni eya shiɛmɔ yɛ nyɔŋ lɛ nɔ lɛ, no lɛ amɛbaanyɛ amɛye amɛbua ni mɛi ni eyaaa shiɛmɔ daa nyɔŋ nɔ lɛ anɔ gbɔ kwraa aloo akana mɔ ko nakai kwraa po. Gbɛgbalɔi lɛ hu baanyɛ amɛye amɛbua ni amɛha mɛi ni eyaaa shiɛmɔ daa nyɔŋ nɔ lɛ anɔ agbɔ kɛtsɔ hegbɛ ni amɛaaŋɔ ni amɛkɛ mɛi sɔrɔtoi atsu nii yɛ shiɛmɔ mli lɛ nɔ. Esa akɛ sɔɔmɔ nɔkwɛlɔi lɛ hu hiɛ ahi amɛhe nɔ jogbaŋŋ koni amɛye amɛbua ni akɛye naagba nɛɛ nɔ kunim.
8 Akɛ ekaawoo wiemɔi ni haa mɔ tsui nyaa lɛ baa yɛ Lala 96:2 akɛ: “Nyɛlaa nyɛhaa Yehowa, nyɛjiea egbɛi lɛ yi! Nyɛgbaa eyiwalaheremɔ lɛ he sane gbi fɛɛ gbi!” Eba akɛ bɔ ni wɔhiɔ shi daa gbi lɛ aaajie sanekpakpa ni wɔshiɛɔ lɛ yi etsɔɔ mɛi krokomɛi. Kɛ hooo kwraa lɛ, bɔɔ mɔdɛŋ ni ojaje “eyiwalaheremɔ sane lɛ” daa nyɔŋ nɔ. No baaha onyɔmɔwoo afa babaoo, ejaakɛ “mɔ ni haa mɛi tɔrɔɔ lɛ, lɛ hu eeetɔ.”—Abɛi 11:25.