Ni Wɔɔfee Weku Nikasemɔi Ni Woɔ Yibii
1 Bii ji nikeenii ni jɛ Yehowa ŋɔɔ. (Lala 127:3) February 1, 1985 Buu-Mɔɔ ni je kpo lɛ wie nɛkɛ wiemɔi ni sa hesusumɔ waa ni kɔɔ amɛhe akɔntaabuu he nɛɛ yɛ baafa 8 akɛ: “Eyɛ mɔbɔ kɛ ana akɛ shia ko esha wɛlɛŋŋ. Kwɛ awerɛho ni baamɔ bo, titri lɛ kɛ bo ji mɔ ni ma tsu lɛ! Ni ooona ni obe kɛ omɔdɛŋbɔɔ fɛɛ esha lɛ baafee piŋmɔ sane diɛŋtsɛ. Ni kɛlɛ, anyɛŋ akɛ nɛkɛ piŋmɔ nɛɛ ato bɔ ni Kristofonyo nuɔ he ehaa kɛ ebinuu loo ebiyoo shi anɔkwale lɛ kɛha je lɛŋ nibii asɛɛdii lɛ he. Nɔ ko bɛ ni abaanyɛ akɛto piŋmɔ ni baa beni mɔ ko naa bɔ ni ebi lɛ hiɛ kpataa yɛ mumɔŋ yɛ nɛkɛ gbɛ nɔ lɛ he.”
“Gbɛjianɔtoo Lɛ Yeko Omanye Da!”
2 Fɔlɔi ni ji Kristofoi lɛ le bɔ ni ehe hiaa ni amɛha Nyɔŋmɔ Wiemɔ lɛ abote amɛbii atsuii kɛ amɛjwɛŋmɔi amli lɛ jogbaŋŋ. Tsutsu ko lɛ, ato weku nikasemɔ he gbɛjianɔ, shi yɛ yiŋtoi komɛi ahewɔ lɛ, gbɛjianɔtoo lɛ hi shi be fioo ko pɛ. Yɛ sɛɛ mli lɛ aje shishi ekoŋŋ, shi no hu sɛɛ etsɛɛɛ tsɔ ko. Mɛni abaanyɛ afee amrɔ nɛɛ ni akɛje gbɛjianɔtoo lɛ shishi ekoŋŋ, ni etsa nɔ daa ni ewo yibii hu?
3 Akɛni shihilɛ mli nibii babaoo heɔ wɔjwɛŋmɔ daa gbi hewɔ lɛ, wɔɔfee jogbaŋŋ akɛ wɔkɛ “hiɛtɛjemɔ anyiɛ, . . . mɛi ni tsuɔ amɛdeka he nii” amɛ diɛŋtsɛ. (Efes. 5:15, 16) Niiashikpamɔ tsɔɔ akɛ ehi jogbaŋŋ ni sɛɛnamɔ babaoo hu yɛ he kɛha weku lɛ akɛ amɛaato otsi lɛ mli gbi kome kɛ be pɔtɛɛ kɛha weku nikasemɔ, yɛ tsɛ lɛ gbɛtsɔɔmɔ shishi, ni amɛnyiɛ sɛɛ pɛpɛɛpɛ hu. Kɛji ebiɔ ni nyɛtsake ŋaawoo nɛɛ mli fioo yɛ nyɛ gbɛfaŋ po lɛ, kɛlɛ esa akɛ nyɛbɔ mɔdɛŋ waa ni nyɛha nyɛweku nikasemɔ lɛ afee daa otsi nɔ. Kɛji nyɛkpa weku nikasemɔ lɛ feemɔ kwraa lɛ, mɛni hewɔ nyɛjeee shishi otsi nɛɛ ni nyɛha etsa nɔ?
4 Eyɛ mli akɛ yiŋtoo titri hewɔ ni wɔfeɔ weku nikasemɔ lɛ ji ni wɔha Nyɔŋmɔ Wiemɔ lɛ abote gbekɛbii lɛ atsuii kɛ amɛjwɛŋmɔi amli moŋ, shi kɛlɛ aakpa gbɛ akɛ ŋa lɛ hu kɛ ehe baawo mli kwraa kɛmɔ shi. Lɛ ele bɔ ni gbekɛbii lɛ asubaŋ ji daa gbi lɛ jogbaŋŋ, ni no hewɔ lɛ eyɛ nɔdaamɔ nɔ kpakpa ni eeedamɔ nɔ eye ebua koni no aha otii ni akaseɔ lɛ amɔ shi jogbaŋŋ taakɛ ataoɔ atsɔɔ lɛ. Ni eyɛ mli akɛ abaanyɛ akɛ weku nikasemɔ be lɛ ajaje jeŋba gbonyo loo subaŋ ni ehiii lɛ yɛ ŋaa kɛ nilee mli moŋ, shi nɛkɛ gbɛjianɔtoo nɛɛ jeee be ni akɛkãa gbekɛbii lɛ ahiɛ loo akɛwieɔ amɛhiɛ nyanyaanya. Akafee nikasemɔ lɛ ni kpaa ni akɛbaayi mɔ ka afa—akɛ aleee nɔ ehe baahia! Mɔ ko mɔ ko nyɛɛɛ nii akase kɛ eyɛ nɔnyɛɛ kpele shishi aloo aawo ehe gbeyei. Agbɛnɛ hu, ni aaaya nɔ akɛ wiemɔi tamɔ “Kɛ ofee ohe kuɛŋtilɔ lɛ, Yehowa baakpata ohiɛ yɛ Harmagedon” awo gbekɛbii lɛ ahe gbeyei be fɛɛ be lɛ wooo yibii kpakpai ko kwraa. Enɛ haa Yehowa bafeɔ Nyɔŋmɔ ni he yɔɔ gbeyei yɛ gbekɛ lɛ jwɛŋmɔ mli, ni jeee Nyɔŋmɔ ni yɔɔ suɔmɔ.
Nɔ Ni Abaakase
5 Mla ko bɛ yɛ enɛ gbɛfaŋ. Shishitoo mla ni yeɔ ebuaa ni fɔlɔi baanyɛ amɛkɛtsu nii yɛ enɛ gbɛfaŋ ji nɔ ni anaa yɛ Mateo 24:45 lɛ. Fɔlɔi lɛ baabɔ mɔdɛŋ jogbaŋŋ akɛ amɛaanyiɛ tsulɔ anɔkwafo kɛ nilelɔ lɛ nɔkwɛmɔ nɔ lɛ sɛɛ ni amɛha amɛwekui lɛ “niyenii yɛ be ni sa mli.” Abaanyɛ akɛ woji tamɔ My Book of Bible Stories aloo Tsɔɔlɔ Kpele woji lɛ atsu nii, yɛ afii abɔ ni gbekɛbii lɛ eye lɛ naa. Agbɛnɛ hu Youth kɛ Young people Ask woji lɛ hu yɛ, aloo abaanyɛ akane Biblia lɛ diɛŋtsɛ po. Abaanyɛ akɛ nitsumɔ awo weku lɛ mlibii ni edara fioo yɛ afi amli lɛ adɛŋ ni amɛtao saji otii komɛi amli ni amɛbagba weku lɛ aloo ni amɛkɛ weku lɛ fɛɛ asusu he. Wekui komɛi ena akɛ “Yesu Shihilɛ kɛ Esɔɔmɔ Nitsumɔ” ni jeɔ kpo yɛ Buu-Mɔɔ lɛ mli lɛ ni amɛaakane be fɛɛ be lɛ he yɛ sɛɛnamɔ babaoo kɛha amɛ. Wɔbaanyɛ wɔkase nibii babaoo kɛjɛ Yesu Kristo ŋɔɔ taakɛ atsɔɔ yɛ saji ni wieɔ bɔ ni ekɛ gbɔmɛi ye ha suɔmɔ ni eyɔɔ kɛha anɔkwale lɛ, ekaa ni eyɔɔ kɛha Yehowa, suɔmɔ ni eyɔɔ kɛha shiɛmɔ nitsumɔ lɛ, kɛ ekrokomɛi ahe lɛ. Kɛ wɔkase Yesu lɛ, no lɛ, yɛ anɔkwale mli lɛ wɔmiikase Yehowa diɛŋtsɛ ejaakɛ Yesu Kristo jie Yehowa su kpo etsɔɔ jogbaŋŋ.—Yoh. 14:9.
Shɛ Tsui Lɛ He
6 Kɛji wɔɔshɛ tsui lɛ he lɛ, belɛ ehe miihia ni wɔkase “nitsɔɔmɔ” jogbaŋŋ. (2 Tim. 4:2; Abɛi 3:1) Nɔ ni fata enɛ he hu ji ni wɔɔye wɔbua gbekɛbii lɛ ni amɛsusu nii ahe ni amɛjwɛŋ nɔ ni amɛkaseɔ lɛ nɔ. Awoɔ fɔlɔi lɛ hewalɛ ni amɛkɛ ŋaa atsu nii yɛ saji ni amɛbiɔ lɛ amli, yɛ Yesu Kristo kasemɔ mli. Sanebimɔi ni akɛtsuɔ nii kɛfata gbɛi krokomɛi ahe lɛ yeɔ ebuaa fɔlɔi lɛ ni amɛnyɛɔ amɛleɔ kɛji gbekɛbii lɛ miinu nɔ ni akaseɔ lɛ shishi jogbaŋŋ.
7 Tsɛ lɛ baanyɛ ekɛ Biblia mli shishitoo mla ko ato nii ahe aloo egbala mli jogbaŋŋ etsɔɔ kɛtsɔ daa gbi shihilɛ mli sane ko ni ekɛaafee he mfoniri lɛ nɔ, koni ebi gbekɛbii lɛ ajwɛŋmɔ kɛtsɔ sanebimɔi anɔ, tamɔ, “Shi kɛ otipɛŋfoi miiye ohe fɛo akɛ obɛ jɔle yoo loo nuu hu? Ani nilee yɛ Biblia lɛ jeŋba he mla ni yɔɔ 1 Korintobii 6:18 lɛ mli, ni anyɛɔ atsuɔ he nii hu? Mɛni hewɔ? Mɛɛ odaseyeli onaa ni ebɔle bo ni tsɔɔ faŋŋ akɛ wɔhe ni wɔkɛaakpɛtɛ Nyɔŋmɔ mlai ni kɔɔ jeŋba kpakpa he lɛ ji nilee gbɛ? Ani okpɛlɛɔ nɔ akɛ Nyɔŋmɔ mlai lɛ haaa nɔ kpakpa ko kwraa aŋmɛɛ wɔ lɛlɛŋ?”
8 Shi kɛji hetoo ni gbekɛ lɛ ha lɛ ha onaa kpɛ ohe aloo eha onijiaŋ je wui akɛ fɔlɔ lɛ hu? Esaaa akɛ omli fuɔ, ejaakɛ nakai feemɔ baaha amɛnijiaŋ aje wui kwraa ni amɛwieŋ nɔ ni yɔɔ amɛjwɛŋmɔ mli lɛ dɔŋŋ. Shi moŋ, esa akɛ ohiɛ asɔ akɛ ekɛ bɔ ni enuɔ nibii ahe ehaa kɛ bɔ ni ejwɛŋmɔ ji yɛ saji ahe lɛ eteee. Akɛni agbɛnɛ ona ole nɔ ni ejwɛŋmɔ ji yɛ sane lɛ he hewɔ lɛ, obi lɛ eye ebua bo ni ole hei pɔtɛɛ ni esa akɛ otsu he nii bɔni afee ni oye obua lɛ ni ekwɛ nii tamɔ bɔ ni Yehowa naa lɛ ehaa.—2 Kor. 10:4, 5.
9 Ni aaatsɔɔ yiŋtoi ni yɔɔ otii pɔtɛɛ komɛi asɛɛ lɛ ji gbɛ kroko ni mɔɔ shi jogbaŋŋ ni wɔɔtsɔ nɔ wɔtsɔɔ gbekɛbii anii. Akɛ nɔkwɛmɔ nɔ lɛ, ŋɔɔ lɛ akɛ nyɛna okadi ko ni aŋma yɛ agbo ko he akɛ “Kwɛmɔ Ohe Jogbaŋŋ!” Enɛ hɛleɔ bo shi akɛ oshara ko yɛ jɛmɛ. Shi ani okɛ wɔ kpaŋ gbee akɛ, eji atsɔɔ yiŋtoo hewɔ ni oŋma nakai lɛ mli, tamɔ akɛ. “Kwɛmɔ Ohe Jogbaŋŋ!—Gbeei ni Hiɛ Yɔɔ la yɛ Biɛ” kulɛ, ebaaha okwɛ ohe nɔ jogbaŋŋ yɛ be mli ni oyaa jɛmɛ lɛ? Enɛ etsɔɔɔ akɛ ehe hiaa ni atsɔɔ gbekɛbii lɛ yiŋtoo pɔtɛɛ ko hewɔ be fɛɛ be dani amɛfee toiboo amɛha Nyɔŋmɔ. No hewɔ lɛ, nɔ ni hi fe fɛɛ ji, esa akɛ aye abua amɛ ni amɛhiɛ asɔ nibii kpakpai ni Yehowa feɔ ehaa wɔ lɛ, kɛ anɔkwale ni eji akɛ egbɛi fɛɛ ja be fɛɛ be ni eyɛ kɛha wɔ amrɔ nɛɛ kɛ naanɔ hilɛ hu lɛ jogbaŋŋ.
10 Be mli ni nyɛkaseɔ nii kutuu lɛ, ha ehi ojwɛŋmɔ mli be fɛɛ be akɛ obaawa yɛ hei ni sa koni ogbala jwɛŋmɔ kɛya Yehowa sui ni mɔ ko kɛ lɛ yeee egbɔ lɛ anɔ. Akɛ nɔkwɛmɔ nɔ lɛ, kɛ nyɛmiisusu kpɔmɔ nɔ lɛ he lɛ, obaanyɛ obi akɛ: “Mɛɛ gbɛ nɔ kpɔmɔ nɔ ni akɛha lɛ tsɔɔ suɔmɔ ni Yehowa yɔɔ kɛha wɔ lɛ mlikwɔlɛ yɛ?” Kɛji toiboo ji sane ni nyɛsusuɔ he lɛ, obaanyɛ oye ebua gbekɛbii lɛ ni amɛna bɔ ni Yehowa ji mumɔŋ Gbɔmɔ ni enaa wɔhe miishɛɛ jogbaŋŋ akɛ aŋkroaŋkroi. Kɛji wɔfee nibii kpakpai lɛ, eyɛ mli akɛ ekolɛ gbɔmɛi adesai enaŋ moŋ, shi Yehowa naa ni wɔhaa etsui nyaa. (Abɛi 27:11) Kɛji wɔfee nibii ni ejaaa lɛ, wɔhaa ‘edɔɔ’ Yehowa.—Lala 78:40, 41.
11 Wɔkpɛlɛɔ nɔ akɛ, jeee be fɛɛ be efeɔ mlɛo kɛhaa fɔlɔi, (kɛ fɔlɔi komekomei kɛ mɛi ni yɔɔ shiai ni mli egbala mli lɛ) akɛ amɛaaha weku nikasemɔ he gbɛjianɔtoo lɛ atsa nɔ, ni afee daa otsi. Shi kɛlɛ, amɛbaanyɛ amɛye omanye kɛ Yehowa yelikɛbuamɔ. Shi esa akɛ fɔlɔi lɛ kɛ be ni hi jogbaŋŋ afee weku nikasemɔi lɛ kɛ miishɛɛ, ni amɛ hu amɛaana miishɛɛ ni amɛtsuii aaanyɔ amɛmli akɛ amɛaana amɛbii lɛ ni amɛmiidara akɛ mɛi ni kɛ hiɛdɔɔ kaseɔ Biblia lɛ akɛ Yehowa sɔɔlɔi anɔkwafoi ni ejɔɔ amɛhe nɔ kwraa amɛha lɛ.—Abɛi 22:6; 3 Yohane 4.