Kpalemɔ Gbɔmɛi Kɛjɛ Duŋ Mli Kɛba La He
1 Mumɔŋ duŋ ewo yɛ shikpɔŋ lɛ nɔ. (Yes. 60:2) Kɛjɛ be mli ni adesai gbee esha mli nɛɛ, Satan, “je nɛŋ nyɔŋmɔ lɛ,” eha gbɔmɛi etee nɔ amɛhi mumɔŋ duŋ mli, ni nɔ ni ejɛ mli eba ji jeŋba shara ni efa babaoo.—2 Kor. 4:4.
2 Amrɔ nɛɛ ni anɔkwale lɛ eha wɔna shishinumɔ ni yɔɔ faŋŋ nɛɛ, ani wɔnuɔ he wɔhaa gbɔmɛi lɛ taakɛ Yesu fee lɛ? (Mat. 9:36) Kɛji nakai lɛ, no lɛ wɔhiɛ baasɔ bɔ ni nitsumɔ ni ekɛha bɔfo Paulo akɛ ‘eyagbele gbɔmɛi ahiŋmɛii, koni amɛkpale kɛjɛ duŋ mli kɛba la he, kɛjɛ Abonsam hewalɛ mli kɛba Nyɔŋmɔ ŋɔɔ’ lɛ he hiaa ha.—Bɔfoi 26:16-18.
TƐJEMƆ JWƐŊMƆI KƐ TSUII AHIƐ
3 Akɛni Satan shwilaa mɛi ni enine shɛɔ amɛnɔ lɛ ajwɛŋmɔ ni ehaa amɛtsuii hu kpliŋɔ hewɔ lɛ, mɛni wɔbaanyɛ wɔfee ni wɔkɛye wɔbua amɛ? Ehe miihia ni wɔha Nyɔŋmɔ Wiemɔ lɛ ashɛ amɛjwɛŋmɔ kɛ amɛtsuii ahe. Paulo sɔle koni Efesobii lɛ atsui hiŋmɛii anɔ atse. (Efes. 1:17, 18) Nɔ ko bɛ ni yɔɔ hewalɛ ni anyɛɔ akɛshɛɔ tsui lɛ he fe Nyɔŋmɔ Wiemɔ lɛ. (Heb. 4:12) Esa akɛ enɛ ni wɔle lɛ akanya wɔ ni wɔhe asa yɛ Biblia lɛ kɛ nitsumɔ mli yɛ be mli ni wɔkɛ mɛi krokomɛi wieɔ lɛ.
4 Bɔ ni obaaha sanebimɔi ni nyiɛ sɛɛ ahetoo oha lɛ baanyɛ aye abua bo ni osɔɔmɔ nitsumɔ lɛ anyɛ amɔ shi jogbaŋŋ. Ani osaa ohe jogbaŋŋ kɛhaa shiɛmɔyaa? Ani otoɔ be ni okɛtiɔ nibii amli bɔni afee ni ole wiemɔi ni okɛaaje sanegbaa ni gbalaa shiatsɛmɛi lɛ ajwɛŋmɔ lɛ shishi? Ani otswaa ofai shi akɛ obaakase Saneyitso Kɛha Sanegbaa ni akɛtsuɔ nii lɛ ni obɔɔ mɔdɛŋ ni okɛtsu nii? Ani obɔɔ mɔdɛŋ akɛ ooosusu Ŋmalɛi lɛ ahe yɛ gbɛ ni tsɔɔ mɔ yiŋ nɔ yɛ shiɛmɔ mli?—Bɔfoi 17:2.
BUU-MƆƆ LƐ, YELIKƐBUAMƆ NƆ
5 Buu-Mɔɔ lɛ eye ebua gbɔmɛi akpekpei abɔ ni amɛkpale kɛjɛ duŋ mli kɛba la he. Etsɔɔ wɔ bɔ ni wɔɔfee wɔkɛ Biblia lɛ jeŋba he shishitoo mlai lɛ atsu nii, ni wɔnu egbalɛi ni kɔɔ wɔgbii nɛɛ ahe lɛ ashishi, ni wɔnyɛ wɔna sɔrɔto-feemɔ ni yɔɔ anɔkwa jamɔ kɛ apasa jamɔ mli bɔni afee ni wɔnyiɛ yɛ gbɛ ni Yehowa kpɛlɛɔ nɔ lɛ nɔ.
6 Mɛni ejɛ Biblia mli anɔkwalei ni Buu-Mɔɔ lɛ efi sɛɛ lɛ mli eba? Aaye aabua gbɔmɛi sɔrɔtoi fɛɛ koni amɛshɛ yiwalaheremɔ he kɛtsɔ Nyɔŋmɔ kɛ e-Bi lɛ he anɔkwa nilee ni amɛnaa lɛ nɔ. (Yoh. 17:3; 1 Tim. 2:4) Kanelɔ ko ŋma akɛ: ‘Mihiɛ sɔɔ Buu-Mɔɔ lɛ waa! Esa akɛ mɛi fɛɛ anyɛ ana be kɛ yinɔi ni wɔyɔɔ mli nɛɛ kɛtsɔ emli saji ni aŋmalaa lɛ anɔ. Miida nyɛ shi waa yɛ niiamlitaomɔ, nikasemɔ, kɛ nitsumɔ babaoo ni nyɛkɛwoɔ Buu-Mɔɔ lɛ, ni ji mumɔŋ niyenii lɛlɛŋ lɛ he nitsumɔ mli lɛ he.’
OKƐ SƐƐYOOMƆ ATSU NII
7 Yɛ Buu-Mɔɔ shɛɛ he tafaa nyɔŋ ni ji enyɔ nɛɛ mli lɛ, ehe miihia ni wɔtao hegbɛi koni wɔkɛkpale gbɔmɛi lɛ kɛjɛ duŋ mli kɛba la lɛ he. Biblia mli sanegbaa ni wɔkɛ mɛi ni wɔyaa amɛŋɔɔ yɛ shia kɛ shia lɛ aaana lɛ yeɔ ebuaa wɔ ni wɔfeɔ enɛ. Kɛ wɔkɛ gbɔmɛi ni yɔɔ Maŋtsɛyeli shɛɛ sane lɛ he miishɛɛ yɛ anɔkwale mli lɛ kpe lɛ, wɔbaanyɛ wɔma sɛɛnamɔi ni yɔɔ Buu-Mɔɔ lɛ ni amɛaakane daa lɛ he lɛ nɔ mi. Te wɔɔfee tɛŋŋ wɔle mɛi ni yɔɔ he miishɛɛ lɛlɛŋ lɛ? Bɔ ni mɔ lɛ kɛ mlihilɛ sumɔɔ akɛ ekɛ bo aaagba sane, ni eboɔ wiemɔ lɛ toi, ni ehaa saji ahetoo ni etsɔɔ ejwɛŋmɔ yɛ he lɛ ji nibii ni tsɔɔ. Nibii krokomɛi hu ji bɔ ni enyiɛɔ Biblia lɛ sɛɛ beni okaneɔ lɛ, ni ekpɛlɛɔ osɛɛkuu kɛ lɛ saramɔ nɔ, kɛ agbɛnɛ hemɔ ni eheɔ dɛhiɛmɔ wolo loo wolo kroko lɛ. Kɛji shiatsɛ lɛ le woji tɛtrɛbii lɛ jogbaŋŋ ni ehiɛ sɔɔ lɛ, no lɛ obaanyɛ obi lɛ kɛji ebaasumɔ ni eshɛ. Ekolɛ obaasumɔ ni mɔ hee ni kpaako eshɛɔ eko lɛ kɛ nyɔji ekpaa shɛɛ aje shishi kɛji no hi yɛ be nɛɛ mli. Beni oyaa nɔ oyasaraa mɔ lɛ ni ohaa emiishɛɛ lɛ yaa hiɛ lɛ, obaanyɛ ona kɛji esa akɛ esaa eshɛ ekoŋŋ kɛji klɛŋklɛŋ nɔ lɛ sɛɛ mli lo.
8 Yɛ be mli ni wɔyaa shia kɛ shia aloo wɔyeɔ wɔnanemɛi nitsulɔi, skulbii, kɛ wɔwekumɛi odase trukaa lɛ, wɔnaa anɔkwale ni baanyɛ aha gbɔmɛi aye amɛhe lɛ gbɛɛ-kɛ-shwamɔ lɛ mli gbɛfaŋnɔ. (Yoh. 8:32) Buu-Mɔɔ lɛ ji dɛŋdade krɛdɛɛ ko ni baanyɛ aye abua amɛ ni amɛna heyeli ni amɛna naanɔ wala he hiɛnɔkamɔ lɛ, koni amɛkpale kɛjɛ duŋ mli kɛba la he.