Sanebimɔ He

● Mɛni hewɔ ni awoɔ ŋaa akɛ shiɛlɔi ahi asafoi ni tsuɔ nii yɛ shikpɔŋkuku ni amɛyɔɔ mli lɛ mli lɛ?

Ehe miihia ni wɔfee wɔnii yɛ gbɛjianɔtoo kpakpa naa yɛ teokrase gbɛ nɔ. Bɔfo Paulo ŋma akɛ: “Ejaakɛ Nyɔŋmɔ lɛ, ejeee sakasaka-feemɔ Nyɔŋmɔ, shi moŋ hejɔlɛ Nyɔŋmɔ ni; . . . Afee nii fɛɛ bɔ ni yɔɔ fɛo kɛ gbɛnaa gbɛnaa.”​—1 Kor. 14:​33, 40.

Eyɛ mli akɛ yɛ tsɔne namɔ he naagbai, heloonaa nitsumɔ gbɛjianɔtoo, aloo yelikɛbuamɔ he hiamɔ ni yɔɔ yɛ nɔkwɛlɔi agbɛfaŋ lɛ hewɔ lɛ enɛ ehiŋ haŋ wɔteŋ mɛi komɛi moŋ, shi kɛlɛ ehi jogbaŋŋ akɛ wɔkɛ asafo ni wɔyɔɔ amɛshikpɔŋkuku mli lɛ aaatsu nii. Enɛ haa shiɛmɔyaa feɔ mlɛo kwraa, ni ehe ehiaaa ni wɔya shɔŋŋ dani wɔyafata kuu ko he kɛtsu nii yɛ he ni kɛ wɔ akutso lɛ jɛkɛ. Ehaa wɔnaa hegbɛi kpakpai ni wɔkɛ mɛi krokomɛi ni yɔɔ wɔ asafo lɛ mli lɛ tsuɔ nii ni wɔtsɔɔ mɛi heei ni yɔɔ wiemɔ lɛ he miishɛɛ lɛ agbɛ kɛyaa asafoi ni afeɔ kpeei yɛ bei ni hi kɛha amɛ lɛ mli. Ni ehaa wɔnyɛɔ wɔbɛŋkɛɔ nyɛmimɛi hii kɛ yei krokomɛi ni yɔɔ wɔ akutso lɛ mli ni amɛbaanyɛ amɛye amɛbua wɔ yɛ hiamɔ be mli lɛ kpaakpa.

Esa akɛ wɔtsi wɔhe kɛjɛ heyeli mumɔ ni wɔɔna lɛ he ni wɔha Maŋtsɛyeli lɛ he nibii aye klɛŋklɛŋ gbɛhe, ni wɔkɛ gbɛjianɔ ni ato lɛ atsu nii. (Luka 16:10) Kɛji ato asafo hee ko shishi aloo ato Asafo Woloŋ Nikasemɔ he gbɛjianɔ lɛ, ekolɛ wɔbaasumɔ ni wɔkɛ wɔnanemɛi komɛi ahi he kome. Shi kɛji wɔkpɛlɛ gbɛjianɔtoo hee lɛ nɔ lɛ, wɔbaanyɛ wɔna nanemɛi heei ni wɔlɛɛ wɔ teokrase naanyobɔɔ lɛ mli. Agbɛnɛ hu, kɛji onukpai kɛ shiɛlɔi lɛ fɛɛ yɛ amɛ asafo lɛ shikpɔŋkuku lɛ mli nɔŋŋ lɛ, ehaa efeɔ mlɛo kɛhaa onukpai lɛ akɛ amɛaakwɛ tooku lɛ nɔ ni amɛha asafo lɛ mumɔŋ shihilɛ aya hiɛ.