Ni Wɔɔye Wɔbua Mɛi Krokomɛi Beni Wɔnyiɛ Shiɛmɔ Nɔ
1 Kristofoi asafo lɛ etee nɔ akɛ sanekpakpa shiɛlɔi asafo, kɛjɛ eshishijee mli tɔɔ. Yesu diɛŋtsɛ tsɔse ekaselɔi lɛ yɛ shiɛmɔ nitsumɔ lɛ mli ni “ebɔi amɛ tsumɔ enyɔnyɔ.” (Marko 6:7; Luka 8:1) Bɔfo Paulo tsĩ “[e]nanemɛi nitsulɔi” ni yɔɔ Filipi asafo lɛ mli. ni ‘kɛ lɛ pele sanekpakpa lɛ he lɛ’ ata. (Fil. 4:3) Eyɛ mli akɛ jeee be fɛɛ be ehe hiaa ni mɔ ana hefatalɔ yɛ sɔɔmɔ nitsumɔ lɛ mli moŋ, shi wɔteŋ mɛi pii ahiɛ sɔɔ mɛi krokomɛi ni fataa wɔhe lɛ waa. (Jaj. 4:9) Belɛ, te wɔɔfee tɛŋŋ wɔwowoo wɔhe hewalɛ ni wɔye wɔbua wɔhe hu yɛ be mli ni wɔshiɛɔ lɛ?
2 Yiŋtoi ni yɔɔ wɔkpeei kɛha shiɛmɔyaa lɛ he lɛ ateŋ ekome ji ni wɔye wɔbua shiɛlɔi heei kɛ shiɛlɔi ni bɛ niiashikpamɔ tsɔ lɛ. (om bf. 77, 79) Anɔkwale ni eji akɛ wɔnyɛmimɛi lɛ ateŋ mɛi 3,000 eyaaa shiɛmɔ daa nyɔŋ nɔ yɛ naatsii nɛɛ mli lɛ maa bɔ ni enɛ he hiaa lɛ nɔ mi. Mɛi ni ji gbɛgbalɔi heei lɛ po baasumɔ ni amɛkɛ shiɛlɔi ni yɔɔ niiashikpamɔ lɛ aloo onukpa aloo asafoŋ sɔɔlɔ ko atsu nii. Mɛɛ hegbɛ fɛfɛo ehaa wɔnaa nɛkɛ koni “wɔwowoo wɔhe hewalɛ”!—Rom. 1:12, NW.
3 Yɛ shweshweeshwe-feemɔ yiŋtoi ahewɔ lɛ, ekolɛ nilee yɛ mli akɛ shiɛlɔi aaatsu nii kutuu yɛ hei komɛi. Aloo bei komɛi lɛ ehe baahia ni atsake gbɛjianɔ ni atsɔ hiɛ ato momo akɛ akɛ mɔ ko baatsu nii lɛ mli doo bɔni afee ni anyɛ aye abua shiɛlɔi ni bɛ niiashikpamɔ tsɔ ni amɛba kpeei kɛha shiɛmɔyaa lɛ. Kɛji abi ni wɔfee nakai lɛ, yɛ anɔkwale mli Iɛ ebaafee suɔmɔ gbɛ ni wɔɔkɔ akɛ wɔɔfee tsakemɔi ni he hiaa lɛ koni ‘wɔye wɔbua mɛi ni bɛ hewalɛ’ lɛ, eyɛ amli akɛ ekolɛ wɔyɛ hefatalɔ pɔtɛɛ ko ni wɔkɛ lɛ fɔɔ nitsumɔ.—Bɔfoi 20:35.
NYƐTSUA NII YƐ GBEEKPAMƆ MLI
4 Be fɛɛ be ni wɔɔfata mɛi krokomɛi ahe yɛ shiɛmɔ mli lɛ, wɔbaasumɔ ni wɔtsu nii yɛ gbeekpamɔ mli akɛ kuu. (Okɛto 1 Korintobii 3:6, 9 he.) Mɛi enyɔ lɛ fɛɛ baanyɛ ana gbɛfaŋnɔ yɛ odaseyeli lɛ mli, ekolɛ kɛtsɔ bɔ ni amɛaato amɛsanegbaa yɛ shinaai anaa lɛ he gbɛjianɔ, ni kɛ mɔ kome wie lɛ, mɔ kroko lɛ hu awie yɛ shia ni tsa nɔ lɛ nɔ. Su kpakpa kpojiemɔ baabi ni kɛ wɔhefatalɔ lɛ miiwie lɛ wɔkɛ bulɛ abo ewiemɔ lɛ toi jogbaŋŋ.
5 Eyɛ mli akɛ eshɛɔ be ni esa akɛ okɛ ohe awo sanegbaa lɛ mli beni ohefatalɔ lɛ wieɔ lɛ moŋ, shi enɛ biɔ hiɛshikamɔ. Wɔsumɔŋ ni wɔfolɔ niiahesusumɔ wiemɔi ni miina shiatsɛ lɛ nɔ hewalɛ kpakpa lɛ mli. Eji anɔkwale akɛ, kɛji shiɛlɔ ni bɛ niiashikpamɔ tsɔ lɛ kɛ naagbai miikpe yɛ bɔ ni eeefee etsu shitee-kɛ-woo he nii lɛ mli lɛ, no lɛ ŋwanejee ko bɛ he akɛ ehiɛ baasɔ yelikɛbuamɔ kpakpa ni akɛaaha lɛ lɛ waa.—Jaj. 4:12.
6 Wɔbaanyɛ wɔkɛ be ni wɔkɛnyiɛɔ kɛjɛɔ shia kome kɛyaa ekroko mli lɛ atsu nii ni wɔkɛsusu gbɛi ni wɔɔtsɔ nɔ wɔha wɔwiemɔ lɛ aya hiɛ lɛ ahe. Ekolɛ hiɛkpamɔ wiemɔi ni yɔɔ Reasoning wolo lɛ mli aloo ŋaawoo ko ni akɛha yɛ Our Bulletin lɛ mli ni wɔkɛaatsu nii lɛ baaha wɔwiemɔ lɛ amɔ shi jogbaŋŋ. Ni wɔɔtsu nii kutuu hu lɛ haa wɔnaa hegbɛ ni wɔkɛleɔ wɔhe jogbaŋŋ, ni ehaa wɔ Kristofoi anyɛmi-feemɔ lɛ mli tsakpaa lɛ mli waa.
7 Lɛlɛŋ, wɔsɔɔmɔ nitsumɔ lɛ ji jwetri ko ni jara wa waa diɛŋtsɛ. (2 Kor. 4:1, 7) Yɛ be mli ni wɔnaa hegbɛ wɔkɛ mɛi krokomɛi tsuɔ nii yɛ shiɛmɔ mli lɛ, wɔbaanyɛ wɔwowoo wɔhe hewalɛ ni hiɛsɔɔ ni wɔyɔɔ kɛha nitsumɔ krɔŋŋ nɛɛ mli awa. Yɛ nakai beaŋ nɔŋŋ lɛ, wɔbaana ekaawoo ni wɔɔkase nii kɛjɛ mɛi krokomɛi aŋɔɔ. Nɔ ni baajɛ mli aba ji miishɛɛ, wɔ odaseyeli lɛ ni baamɔ shi jogbaŋŋ, kɛ ekomefeemɔ ni wɔkɛ wɔnyɛmimɛi hii kɛ yei lɛ yɔɔ lɛ he henumɔi ni haa wɔtsuii nyɔɔ wɔmli.—Lala 133:1.