Sanebimɔ He

● Shii enyiɛ esa akɛ aha nikaselɔi nifeemɔ yɛ Teokrase Sɔɔmɔ Skul lɛ mli yɛ be ko mli?

Yiŋtoi titrii ni yɔɔ Teokrase Sɔɔmɔ Skul lɛ he lɛ ekome ji ni etsɔse mɛi kɛha maŋshiɛmɔ. Yɛ yiŋtoo nɛɛ hewɔ lɛ, ato Theocartic Ministry School Schedule lɛ he gbɛjianɔ koni akɛ emli wiemɔi lɛ pii aha nyɛmimɛi hii.

Shi kɛlɛ, yiŋtoo kroko ni he hiaa ni yɔɔ skul lɛ he ji ni etsɔse Yehowa webii fɛɛ ni amɛfee shiɛlɔi kɛ nitsɔɔlɔi ni amɛnitsumɔ mɔɔ shi yɛ Kristofoi asɔɔmɔ nitsumɔ lɛ mli. Yɛ yiŋtoo nɛɛ hewɔ lɛ, esa akɛ nyɛmimɛi yei lɛ hu aŋmala amɛgbɛi yɛ mli.

Esa akɛ mɛi ni eŋmala amɛgbɛi lɛ ana skul lɛ mli nifeemɔi yɛ be kɛ bei amli, bɔni afee ni amɛna skul lɛ hesɛɛ kɛmɔ shi. Kɛji ajie naatsii lɛ, wɔmiiwo ŋaa akɛ, kɛ hoo kwraa lɛ esa akɛ nikaselɔ fɛɛ nikaselɔ ana nifeemɔ shikome yɛ nyɔji etɛ mli, kɛji nyɛ asafo lɛ mlibii ayi fa. Kɛji nyɛ asafo lɛ mli shihilɛ baaŋmɛ gbɛ lɛ, abaanyɛ akɛ nifeemɔi krokomɛi afata he aha nyɛmimɛi hii lɛ. Ehe ehiaaa ni akɛ nikaselɔi awiemɔi aha onukpai ni fɔɔ tsɔsemɔ wiemɔ hamɔ kɛ Biblia kanemɔ lɛ mli saji otii ahe nitsumɔ lɛ.

Aaafee afii nyɔŋmai enumɔ nɛ, ni Teokrase Sɔɔmɔ Skul lɛ eye ebua mɛi akpekpei abɔ ni amɛtee amɛhiɛ yɛ mumɔŋ ni amɛkase bɔ ni amɛaawie jogbaŋŋ amɛha yɛ be mli ni amɛkɛ Maŋtsɛyeli shɛɛ sane lɛ haa lɛ. Aawo mɛi fɛɛ hewalɛ ni amɛkɛ nɛkɛ gbɛjianɔtoo ni yɔɔ naakpɛɛ ni jɛ Yehowa Nyɔŋmɔ ŋɔɔ nɛɛ atsu nii kɛmɔ shi. Esa akɛ oti ni ma wɔhiɛ lɛ afee akɛ wɔkɛ wɔhe aaaha akɛ mɛi ni Nyɔŋmɔ kpɛlɛɔ amɛnɔ nitsulɔi “ni hiɛ gbooo, ni jaa anɔkwale wiemɔ lɛ mli pɛpɛɛpɛ.”​—2 Tim. 2:⁠15.