Gbɛi ni Aŋmaa yɛ Teokrase Sɔɔmɔ Skul lɛ Mli
1 Teokrase Sɔɔmɔ Skul lɛ etsɔse Yehowa Odasefoi akpekpei abɔ, ni ji sanekpakpa lɛ he sɔɔlɔi. Wɔteŋ mɛi pii kaiɔ bɔ ni wɔshe gbeyei ni wɔnu he akɛ wɔshɛko beni wɔkɛ wɔhe wo skul lɛ mli klɛŋklɛŋ kwraa lɛ, ni bianɛ lɛ, wɔkɛ hiɛsɔɔ kpɛlɛɔ nɔ ni etsu yɛ wɔ mumɔŋ hiɛyaa mli ákɛ Nyɔŋmɔ Wiemɔ lɛ he wielɔi kɛ tsɔɔlɔi lɛ nɔ. (Okɛto Bɔfoi lɛ Asaji 4:13 he.) Ani okɛ ohe ewo skul ni sa kadimɔ waa nɛɛ mli?
2 Namɛi baanyɛ amɛkɛ amɛhe awo mli? Mɛi fɛɛ ni kɛ asafo lɛ bɔɔ be fɛɛ be lɛ baanyɛ amɛkɛ amɛhe awo mli, ni mɛi heei ni baa kpeei lɛ hu fata he, bei abɔ ni amɛkɛ amɛhe wooo shihilɛ ni kɛ Kristofoi ashishitoo mlai kpaaa gbee lɛ mli.—Our Ministry, baafãi 73, 98-9.
3 Skul lɛ He Gbɛjianɔtoo Kɛha 1997: Teokrase Sɔɔmɔ Skul lɛ he gbɛjianɔtoo kɛha 1997 lɛ kɛ Biblia mli tsɔɔmɔi sɔrɔtoi babaoo kɛ gbɔmɛi ahe saji, ní asafo lɛ gbɛjianɔtoo he yinɔsane hu fata he lɛ haa. Kɛfata wɔ hiɛyaa yɛ wɔnyɛmɔi yɛ wiemɔ kɛ nitsɔɔmɔ mli lɛ he lɛ, wɔkaseɔ nii kɛjɛɔ mumɔŋ jwetrii babaoo ni wɔnaa kɛjɛɔ emli nikasemɔi ni afeɔ yɛ otsi fɛɛ otsi mli lɛ amli. (Abɛi 9:9) Kɛ wɔsaa wɔhe kɛha skul lɛ, ni otsi lɛ mli Biblia kanemɔ lɛ hu fata he, ni wɔyaa kpee daa lɛ, no lɛ wɔbaanyɛ wɔna mumɔŋ sɛɛnamɔi babaoo kɛjɛ gbɛjianɔtoo lɛ mli.
4 Yɛ 1997 lɛ, Biblia kanemɔ kɛha Nifeemɔ ni ji 2 lɛ ateŋ babaoo yɛ kuku fe afii ni eho lɛ. Kɛji akɛ nikaselɔ lɛ miisaa ehe kɛmiiha nifeemɔ nɛɛ lɛ, esa akɛ ekɛ be ato enikanemɔ lɛ he jogbaŋŋ, ni agbɛnɛ ekwɛ akɛ minitii enumɔ ni akɛha enifeemɔ lɛ mli enyiɛ ebaanyɛ ekɛkpa sane lɛ hiɛ ni ekɛbaamu naa hu. Enɛ baaye abua nikaselɔ lɛ ni ekɛ ebe atsu nii kɛmɔ shi, ni eya ehiɛ yɛ enikanemɔ kɛ mɛi ahiɛ ni akwɛɔ awieɔ lɛ mli.—1 Tim. 4:13.
5 Akɛ trukaa odaseyeli efata he ákɛ nɔ ni abaanyɛ afee koni akɛsaa he kɛha Nifeemɔ ni ji 3 ni damɔ Nilee wolo lɛ nɔ lɛ. Enɛ gbɛfaŋ lɛ, nyɛmi yoo ko baanyɛ ahala sɛɛsaramɔ, shia Biblia mli nikasemɔ, loo trukaa odaseyeli ákɛ nɔ ni ebaafee kɛha nifeemɔ nɛɛ. Kɛlɛ, esa akɛ oti lɛ aya nɔ adamɔ nitsɔɔmɔ ni mɔɔ shi nɔ, ni jeee bɔ ni afeɔ lɛ ahaa lɛ nɔ.
6 Kɛ ona hegbɛ akɛ oha tsɔsemɔ wiemɔ, Biblia mli otii, loo nikaselɔ nifeemɔ lɛ eko jio lɛ, obaanyɛ otsɔɔ hiɛsɔɔ kɛha Teokrase Sɔɔmɔ Skul lɛ kɛtsɔ ohe ni ooosaa ni ofee ogbɛfaŋnɔ lɛ jogbaŋŋ, kɛtsɔ yiŋtsɔmɔ kɛ ekãa ni okɛaawie, kɛtsɔ be ni ofiteŋ, kɛtsɔ skul nɔkwɛlɔ lɛ toi ni ooobo ni okɛ ŋaawoo ni ekɛhaa bo lɛ atsu nii, kɛ agbɛnɛ kɛtsɔ mɔdɛŋ ni ooobɔ ni okɛtsu nɔ ni akɛwo odɛŋ lɛ he nii yɛ anɔkwale mli lɛ nɔ. Yɛ nɛkɛ gbɛ nɔ lɛ, ohe ni okɛaawo skul lɛ mli lɛ baatsɔ jɔɔmɔ kɛha bo kɛ mɛi fɛɛ ni eba kpee lɛ.