Okɛ Osusuma Fɛɛ Atsu Nii yɛ Shiɛmɔ Nitsumɔ Iɛ Mli
Fa 5—Sɛɛnamɔi Wuji ni Jɛɔ Susuma Fɛɛ kɛ Nitsumɔ Mli Baa
1 Yehowa kɛ sɛɛnamɔi wuji babaoo haa etsuji ni kɛ susuma muu fɛɛ tsuɔ nii lɛ. (Lala 116:12) Te wɔɔfee tɛŋŋ wɔna jɔɔmɔi ni fa kɛjɛ Yehowa ŋɔɔ yɛ wɔsɔɔmɔ lɛ mli? Mɛɛ sɛɛnamɔi yɔɔ kɛha wɔ? Mɛni esa akɛ wɔfee koni wɔna enɔkpɛlɛmɔ kɛ duromɔ?
2 Mɔ Diɛŋtsɛ mɔdɛŋbɔɔ He Miihia: Heni onaa sɛɛnamɔi ni Nyɔŋmɔ kɛhaa lɛ mli ŋɔɔmɔ kɛyashɛɔ lɛ damɔ bo diɛŋtsɛ omɔdɛŋbɔɔ yɛ Nyɔŋmɔ suɔmɔnaa nifeemɔ mli lɛ nɔ. Paulo ŋma yɛ sɔɔmɔ lɛ he akɛ: “Mɔ fɛɛ mɔ aaana lɛ diɛŋtsɛ enyɔmɔwoo yɛ lɛ diɛŋtsɛ enitsumɔ naa.” (1 Kor. 3:8) Belɛ nyɛhaa wɔnaa sɔɔmɔ nitsumɔ lɛ mli gbɛfaŋnɔ babaoo bɔ ni wɔɔnyɛ. Bɔfo Paulo diɛŋtsɛ na nyɔmɔwoo ko ni ji gbɔmɛi pii ni eye ebua amɛ, kɛ asafoi muji po, koni amɛbale Nyɔŋmɔ. Kwɛ miishɛɛ ni ena beni ena bɔ ni amɛdamɔɔ shi shiŋŋ yɛ hemɔkɛyeli lɛ mli lɛ! (1 Tes. 2:19, 20) Ekolɛ shihilɛ mli ni oyɔɔ lɛ eŋmɛŋ bo gbɛ ni okɛ ohe awo sɔɔmɔ lɛ mli kɛmɔ shi taakɛ Paulo fee lɛ. Ni kɛlɛ, ani efeŋ jɔɔmɔ babaoo akɛ oooye obua mɔ ko aloo weku ko ni tamɔ gwantɛŋi ni amɛfi shi yɛ gbɛ ni kɛ mɔ yaa wala mli lɛ nɔ? Mɛɛ ekaawoo enɛ ji nɛkɛ akɛ oootsu nii waa yɛ shia kɛ shia sɔɔmɔ lɛ mli ni odi sɛɛsaramɔi kɛ shia Biblia mli nikasemɔi asɛɛ!
3 Sɛɛnamɔi Krokomɛi: Sɛɛnamɔ babaoo ni yɔɔ susuma fɛɛ ni akɛtsuɔ nii lɛ mli ji, akɛ hefatalɔ nitsulɔ lɛ, enɛ gbalaa bo kɛbɛŋkɛɔ Yehowa kɛ Yesu Kristo he kpaakpa. (Mat. 11:29. 30; 1 Kor. 3:9) Mɛɛ miishɛɛ eji akɛ ooonu he akɛ Nyɔŋmɔ mumɔ lɛ miiye kɛmiibua bo yɛ sɔɔmɔ lɛ mli! (Mat. 10:20; Yoh. 14:26) Agbɛnɛ hu, mɛi krokomɛi ni yɔɔ asafo lɛ mli ni wɔkɛ amɛ aaatsu nii yɛ hiɛdɔɔ mli lɛ wajeɔ wɔ suɔmɔ kɛ ekomefeemɔ kpaa lɛ.
4 Wɔnyɛŋ wɔna sɛɛnamɔi babaoo mli ŋɔɔmɔ kɛjɛ Yehowa ŋɔɔ ja wɔfi gbɛjianɔtoo ni ekɛtsuɔ nii koni ekɛha esuɔmɔnaa nii aba mli yɛ naagbee gbii nɛɛ amli lɛ sɛɛ da. (Okɛto 2 Maŋtsɛmɛi 10:15 he.) Kɛ wɔkɛ wɔtsui fɛɛ nyiɛ gbɛtsɔɔmɔ ni wɔnine shɛɔ nɔ kɛtsɔɔ Nyɔŋmɔ gbɛjianɔtoo lɛ nɔ lɛ sɛɛ kpaakpa ni wɔkɛ wɔhe woɔ asafo lɛ nitsumɔi amli vii lɛ, abuɔ wɔhe yɛ mumɔŋ kɛjɛɔ Satan ŋaa nitsumɔi lɛ ahe. Ehaa wɔnyɛɔ wɔnaa sɔɔmɔ lɛ mli gbɛfaŋ nɔ babaoo yɛ gbɛ ni woɔ yibii nɔ.
5 Nɛkɛ fai enumɔ ni kɔɔ susuma muu fɛɛ mli ni wɔɔjɛ wɔtsu nii yɛ sɔɔmɔ lɛ he lɛ ema nibii sɔrɔtoi ni kɔɔ he lɛ anɔ mi. Ani okaiɔ oti ni tswaa hiɛsɔɔ kɛha Yehowa emaa shi, ni kanyaa mɔ ko koni ejɛ susuma muu fɛɛ mli etsu nii lɛ? (W: Bulletin, No. 8) Mɛni hewɔ hesaamɔ he hiaa kɛha miishɛɛ ni aaana yɛ sɔɔmɔ nitsumɔ lɛ mli lɛ? Mɛɛ gbɛ nɔ wɔɔtsɔ wɔsaa wɔhe yɛ? (No. 9) Mɛɛ gbɛ nɔ shiɛlɔ ni he esa lɛ aaatsɔ ni amɛye amɛbua mɛi krokomɛi ni amɛkɛ susuma fɛɛ atsu nii lɛ. (No 10) Mɛɛ gbɛ nɔ wɔ diɛŋtsɛ wɔ gbɛjianɔtoo kpakpa baaye abua wɔ ni wɔkɛ wɔsusuma fɛɛ atsu nii yɛ sɔɔmɔ lɛ mli. (No. 11) Ani okɛ nɛkɛ ŋaawoi nɛɛ miitsu nii?
6 Yehowa miisumɔ ni nibii he aba sɛɛnamɔ aha wɔ kɛtsɔ etoiboo nɔ. (Yes 48:17) Kɛfata he lɛ, sɛɛnamɔi ni jɛɔ susuma muu fɛɛ nitsumɔ mli baa lɛ saa mɛi ni boɔ bo toi lɛ ahe. (1 Tim. 4:15, 16) Obaanyɛ ona nɔmimaa akɛ, yɛ be mli ni okɛ ohe woɔ nitsumɔ ni ka ohiɛ lɛ mli yɛ hiɛdɔɔ mli lɛ Yehowa baayoo enɛ, ni “nyɛnine baashɛ gboshinii lɛ anɔ . . . . akɛ nyɛnyɔmɔwoo,” ni ji naanɔ wala lɛ.—Kol 3:23, 24.