Kpojiemɔ—Teemɔŋ Saji Lɛ Eje Kpo
1 Kpojiemɔ wolo lɛ efee teemɔŋ sane yɛ be kakadaŋŋ mli. Mɛi ni le Biblia mli saji kɛ afii ohai abɔ etao akɛ amɛaanu eteemɔŋ saji lɛ ashishi, shi amɛyeee omanye. Shi atooo akɛ saji ni jɛ Nyɔŋmɔ mumɔŋ ni yɔɔ Kpojiemɔ lɛ ahi shi akɛ teemɔŋ sane kɛya naanɔ. Eji Nyɔŋmɔ Wiemɔ ni esa akɛ wɔnu shishi lɛ fa. (2 Tim. 3:16, 17) Yɛ miishɛɛ mli lɛ, Nyɔŋmɔ miije Kpojiemɔ kpo yɛ be mli ni egbalɛi ni yɔɔ miishɛɛ lɛ baa mli yɛ wɔgbii nɛɛ amli lɛ. Taakɛ Yehowa tsɔ Yohane nɔ ekɛ ninaai nɛɛ ha enanemɛi Kristofoi lɛ, ŋmɛnɛ E-kɛ ‘tsulɔ anɔkwafo’ lɛ miitsu nii koni ejie gbalɛ ni yɔɔ miishɛɛ nɛɛ shishinumɔ lɛ kpo.—Mat. 24:45-47; Kpoj 1:1-3.
2 Wolo ni Akɛbaaha yɛ April: Kpojiemɔ—Enaagbee Kwraa lɛ Ebɛŋkɛ! wolo lɛ eha Nyɔŋmɔ webii enu nibii ashishi ni ewo amɛ hewalɛ babaoo. Shi mɛni hewɔ esa akɛ gbɔmɛi ni yɔɔ oshikpɔŋkuku lɛ mli lɛ anya he? Ejaakɛ nɛkɛ wolo ni kanyaa mɔ nɛɛ wieɔ naagbee nibii ni baaba ni atsɔɔ mli yɛ Biblia mli wolo ni ji Kpojiemɔ lɛ mli ni baa mli yɛ naagbee gbii nɛɛ amli lɛ ahe. Ani gbɔmɛi ni susuɔ saji ahe lɛ bɛ wɔsɛɛ be ni nyɔŋmɔ ejie lɛ kpo lɛ he miishɛɛ? Yɛ be mli ni Kpojiemɔ wolo lɛ jeɔ Nyɔŋmɔ jalɛ kojomɔi akpo lɛ, ekɛ wɔsɛɛ be mli jɔɔmɔi ni yɔɔ naakpɛɛ he shiwoo hu haa (Kpoj 21:1-5) Eshɛɛ saji ni jɛ mumɔŋ lɛ ashishinumɔ yeɔ ebuaa wɔ ni wɔnaa he ni wɔshɛ yɛ be naa ni ehaa wɔnaa bɔ ni hehiamɔ yɔɔ Nyɔŋmɔ suɔmɔnaa nii ni wɔɔfee lɛ he.
3 Ani Kpojiemɔ wolo lɛ mli wa tsɔ fe bɔ ni maŋbii lɛ aaanyɛ anu shishi? Eka shi faŋŋ akɛ mɛi pii enaaa akɛ emli wa tsɔ. Kadimɔ saji pii ni mɛi ni kaneɔ wolo lɛ ewie yɛ he nɛɛ ateŋ fioo ko. Nuu ko kɛɛ: “Saji nɛɛ amli wa waa. Shi eyɛ miishɛɛ. Misumɔɔ waa.” Sɔɔlɔ ko kɛɛ: “Mileko ni mikaneko nɔ ko ni yɔɔ miishɛɛ ni eji anɔkwale hu fe nɛkɛ wolo nɛɛ!” Mɔ kroko hu ni kɛ nɔ ni shɛɛɛ otsi gbe wolo lɛ kanemɔ naa kɛɛ: “Agbɛnɛ mihiŋmɛii egbele kɛmiina anɔkwale lɛ. Miisumɔ ni matsake mishihilɛ gbɛ fɛɛ.” Eyɛ faŋŋ akɛ, mɛi pii miina miishɛɛ yɛ be mli ni amɛkɛ shishinumɔ kaneɔ Biblia mli wolo ni ji Kpojiemɔ lɛ yɛ klɛŋklɛŋ be mli kwraa yɛ amɛshihilɛ mli ni amɛyeɔ ewiemɔi anɔ lɛ.
4 Okɛ Anɔkwayeli Ajie Kpojiemɔ Wolo lɛ Yi Otsɔɔ Mɛi Krokomɛi: Kɛfata shia kɛ shia sɔɔmɔ lɛ he lɛ mɛi pii eye omanye yɛ Kpojiemɔ wolo lɛ ni amɛkɛhaa wekumɛi, nanemɛi kɛ mɛi ni amɛkɛkpeɔ yɛ nitsumɔi amli trukaa lɛ mli. Tsɔɔmɔ bɔ ni bodiɛŋtsɛ lɛ ona hesɛɛ oha ni owo mɛi krokomɛi ahewalɛ ni amɛkwɛ Kpojiemɔ wolo lɛ mli, eyɛ mli akɛ ekolɛ amɛnuɔ he akɛ ewa waa dani anuɔ shishi.
5 Kwɛ hegbɛ ni wɔna akɛ wɔɔna nibii ni baaba yɛ wɔsɛɛ be mli ni ajie lɛ kpo yɛ Kpojiemɔ wolo lɛ mli ni atsɔɔ mli kɛtsɔ Nyɔŋmɔ adafitswaa gbɛ ŋmɛnɛ lɛ nɔ lɛ he nilee! Ekaba kɔkɔɔkɔ akɛ wɔnaaa mɛi ni sumɔɔ ni amɛbo Nyɔŋmɔ Wiemɔ lɛ mli shishinumɔ lɛ toi lɛ anu loo wɔjieee lɛ kpo wɔtsɔɔɔ amɛ. (Okɛto Luka 11:52 he.) Yɛ be mli ni wɔfeɔ nakai lɛ, hiɛnɔkamɔ ji, mɛi pii baamɔ naanɔ wala yɛ Nyɔŋmɔ jeŋ hee lɛ mli he hiɛnɔkamɔ lɛ mli ni amɛbafata wɔhe yɛ wɔ Bɔlɔ lɛ suɔmɔnaa nifeemɔ mli.—Kpoj 4:11.