‘Gbalɛ Wiemɔi lɛ’ Jajemɔ
1 Wɔyɛ be ko ni Kpojiemɔ wolo lɛ mli gbalɛi lɛ miiba mli lɛ mli. Mɛi pii miitao ni amɛnu nibii ni gbaa mɔ naa ni yaa nɔ lɛ ashishi. Kpojiemɔ mli gbalɛ ‘wiemɔi ni amɛnuɔ’ lɛ ahe baanyɛ aba sɛɛnamɔ aha amɛ. (Kpoj. 1:3) Wɔbaana hegbɛ ni wɔye wɔbua amɛ kɛtsɔ Kpojiemɔ Naagbee wolo lɛ ni wɔkɛaaha yɛ March nyɔŋ nɔ lɛ nɔ. Kɛ wɔkɛmiiha lɛ esa akɛ wɔha ahi wɔjwɛŋmɔ mli akɛ agba naagbai ni adesai kɛkpeɔ ŋmɛnɛ lɛ ahe sane afɔ shi yɛ Kpojiemɔ wolo lɛ mli. Belɛ, mɛni wɔbaanyɛ wɔkɛɛ?
2 Gbɛ ni tamɔ nɛkɛ baanyɛ amɔ shi:
◼ “Ta, hɔmɔ, kɛ hela eba adesai anɔ yɛ afii ohai 20 nɛɛ mli. Mɛni hewɔ osusuɔ akɛ nakai eji, yɛ be mli ni gbɔmɔ etee hiɛ waa yɛ tsɔnei afeemɔ mli lɛ? [Ŋmɛɛ gbɛ ni ewie.] Mɛi pii anaa kpɛɔ amɛhe akɛ amɛaale akɛ agba shihilɛi nɛɛ ahe sane afɔ shi yɛ Biblia lɛ mli. Ekolɛ onu wiemɔ ni ji ‘Apokalips okpɔŋɔ nɔtaralɔi ejwɛ lɛ’ he sane pɛŋ. Nɔ ni Biblia lɛ kɛɔ yɛ okpɔŋɔ nɔtaralɔi nɛɛ ahe lɛ ji gbalɛ diɛŋtsɛ ni miiba mli yɛ je lɛŋ saji amli ŋmɛnɛ. [Gbelemɔ Kpojiemɔ Naagbee wolo lɛ yitso 16, ni otsɔɔ lɛ mfonirii ni yɔɔ baafai 91-7 lɛ.] Yɛ be mli ni gbalɛ nɛɛ gbaa fimɔ kpeteŋkpele be ko he sane efɔɔ shi lɛ, ekɛ hiɛnɔkamɔ hu haa. [Kanemɔ Kpojiemɔ 6:2 ni yɔɔ kuku 3 lɛ.] Okpɔŋɔ yɛŋ lɛ Nɔtalɔ ji Yesu Kristo. Ewo shi akɛ ebaaye efɔŋ feemɔ nɔ kunim ni ekɛ miishɛɛ kɛ toiŋjɔlɛ jeŋ ko aba kɛtsɔ Maŋtsɛyeli ni etsɔɔ wɔ ni wɔsɔle wɔbi lɛ nɔ.” Okɛ wolo lɛ aha kɛ miishɛɛ.
3 Ekolɛ sanebimɔ nɛɛ baatee sanegbaa ni shishinumɔ yɔɔ mli shi:
◼ “Mɛni osusuɔ akɛ ehe hiaa ni akɛjie shihilɛi gbohii ni yɔɔ je lɛ mli lɛ kɛya? [Ŋmɛɛ gbɛ ni ewie.] Mɛi pii baakpɛlɛ nɔ akɛ ehe miihia ni akɛ oyaiyeli afee tsakemɔi kɛji je nɛɛ baaya nɔ ahi shi. Biblia lɛ tsɔɔ akɛ Nyɔŋmɔ le bɔ ni eeefee ekɛ wɔnaagbai anaa tsabaa lɛ aba ni éwo shi akɛ ebaaye ebua wɔ.” Gbelemɔ Kpojiemɔ Naagbee wolo lɛ baafa 171, ni okane Kpojiemɔ 11:15 ni yɔɔ kuku 1 lɛ. Gbelemɔ kɛya mfonirii ni yɔɔ baafai 302 kɛ 308 lɛ anɔ, ni otsɔɔ jɔɔmɔi ni abaaná yɛ Maŋtsɛyeli ni Kristo baaye nɔ lɛ mli. No sɛɛ lɛ tsɔɔmɔ bɔ ni shiatsɛ lɛ diɛŋtsɛ baanyɛ ana he sɛɛ.
4 Ekolɛ nɔ ko tamɔ nɛkɛ ni obaakɛɛ lɛ baaha ohe ajɔ bo:
◼ “Ewa kɛha mɛi babaoo ni ekane Biblia mli Kpojiemɔ wolo lɛ akɛ amɛaanu shishi. Ewieɔ saji ni efɔɔɔ kaa ni sa kadimɔ hu lɛ sɔrɔtoi babaoo he. Wolo nɛɛ, Kpojiemɔ—Enaagbee Kwraa lɛ Ebɛŋkɛ! lɛ, kɛ Kpojiemɔ wolo muu lɛ kuku fɛɛ kuku sane hesusumɔ haa ni etsɔɔ bɔ ni emli gbalɛi lɛ amlibaa saa wɔ diɛŋtsɛ wɔhe ehaa.” Gbelemɔ wolo lɛ baafa 15 lɛ kuku 2, ni otsɔɔ lɛ Kpojiemɔ 1:1 ni aŋmala yɛ niŋmai wuji amli lɛ. Tsɔɔmɔ mli akɛ, akɛ sane mlitsɔɔmɔi pɔtɛɛ ni tamɔ nɛkɛ eha yɛ Kpojiemɔ wolo lɛ kuku kome fɛɛ kuku kome he, ni ákɛ, sane ni tamɔ nɛkɛ baaye abua lɛ koni enu gbalɛi ni sa kadimɔ nɛɛ ashishi. No sɛɛ lɛ yaa nɔ ni okɛ wolo lɛ aha.
5 Kɛ mɔ lɛ heee wolo lɛ, obaanyɛ oha lɛ wolo tɛtrɛɛ ko loo oshi dɛhiɛmɔ wolo ko oha lɛ. Too gbɛjianɔ ni oku osɛɛ oyatee miishɛɛ lɛ shi lolo.
6 Saji ni yɔɔ Kpojiemɔ lɛ saa adesai fɛɛ he. Ehe miihia ni mɔ fɛɛ mɔ anu gbalɛ wiemɔi lɛ. Eba akɛ wɔɔfee bɔ fɛɛ bɔ ni wɔɔnyɛ koni wɔjaje shɛɛ sane ni he hiaa nɛɛ wɔtsɔɔ.