Ha Ale Yehowa Nifeemɔ Lɛ
1 “Nyɛhaa alea enifeemɔi nii lɛ yɛ majimaji lɛ ateŋ, nyɛjajea akɛ awo egbɛi lɛ nɔ . . ., shi efee nii wuji” (Yes 12:4, 5) Te ohereɔ nɛkɛ ŋaawoo nɛɛ nɔ tɛŋŋ? Kɛ wɔsusu bɔ ni Yehowa kɛ wɔ oye eha akɛ kuu kɛ agbɛnɛ aŋkroaŋkroi lɛ, ani wɔtsuii tsirɛɛɛ wɔ ni wɔgba enɛ wɔtsɔɔ mɛi krokomɛi? Aaafee afii 73 nɛ, ni Yehowa ha ewebii ye amɛhe kɛjɛ Babilon nyɔŋyeli mli. Kɛjɛ 1919 ato anɔkwa jamɔ ama shi shiŋŋ ni amrɔ nɛɛ egbɛ eshwa kɛtee shikpɔŋ lɛ nɔ he fɛɛ he. He ni Yehowa efee enɛ kɛyashɛ lɛ fe bɔni wɔkpaa gbɛ. Akɛ mɔ aŋkro lɛ, te ohiɛsɔɔ kɛha Nyɔŋmɔ gbɛtsɔɔmɔ, ehebuu, kɛ jɔɔmɔ lɛ mli kwɔ ha tɛŋŋ? Ani obaanyɛ ofee babaoo ni oha ale enifeemɔ nii lɛ ni owo egbɛi lɛ nɔ gojoo?
2 Kaimɔ be lɛ haa wɔkaiɔ ŋwɛi nifeemɔ ko ni wɔbaada shi daa yɛ he. April nyɔŋ lɛ ji be krɛdɛɛ ni sa jogbaŋŋ ni wɔkɛaaha Yehowa ale wɔ shidaa kɛ hiɛsɔɔ kɛtsɔ gbɛgbalɔi awalɔi ni wɔɔtsɔmɔ lɛ nɔ. Agbɛnɛ hu kɛji akɛ ofee gbɛgbalɔi awalɔ yɛ kpokpaa nɔkwɛlɔ Iɛ saramɔ be lɛ mli lɛ, obaana eyelikɛbuamɔ kɛ hewalɛwoo ni ekɛaaha yɛ sɔɔmɔ lɛ mli lɛ he sɛɛ babaoo.
3 Bei babaoo lɛ, kɛ ato gbɛjianɔ ni shiɛlɔi akui kɛ amɛhe wo gbɛgbalɔi awamɔ sɔɔmɔ lɛ mli lɛ, ehiɔ jogbaŋŋ. Abaanyɛ ato be he gbɛjianɔ jogbaŋŋ koni mɔ fɛɛ mɔ ana mɔ ko ni ekɛ lɛ baatsu nii, ni nyɛmimɛi yei ni hiɛ bii baanyɛ ato gbɛjianɔ ni amɛye amɛbua amɛhe.Yɛ gbɛjianɔ kpakpa hewɔ lɛ, mɛi pii ena akɛ ewaaa tsɔ akɛ amɛaana taomɔ nii ni ji ŋmɛlɛtswaa 60 lɛ. Enɛ tsɔɔ akɛ kɛ aja mli lɛ, okɛ ŋmɛlɛtswaa 2 pɛ baatsu nii daa gbi loo ŋmɛlɛtswaa 15 daa otsi yɛ sɔɔmɔ lɛ mli. Gbɛgbalɔi awalɔi komɛi kɛ ŋmɛlɛtswaa kome loo enyɔ yeɔ odase dani amɛjeɔ heloo gbɛfaŋ nitsumɔ shishi loo beni amɛkpa nitsumɔ, ni amɛkɛ be babaoo woɔ amɛ otsi naagbee nitsumɔ lɛ mli.
4 Kɛ onyɛɛɛ ofee gbɛgbalɔi awalɔ po lɛ, obaanyɛ oha osɔɔmɔ nitsumɔ lɛ aya hiɛ. Agbɛnɛ hu, kɛ oye obua gbɛgbalɔi lɛ kɛ tsɔne loo okɛ gbɛgbalɔi lɛ tsu nii lɛ, obaawo amɛ hewalɛ. Nɔ fɛɛ nɔ ni wɔɔfee ni wɔha ale Yehowa gbɛi lɛ kɛ enifeemɔ nii lɛ efeŋ nɔ ni wɔ Nyɔŋmɔ ni hiɛ sɔɔ nii lɛ enaaa.—Mal.3:16.