Aatao—Gbɛgbalɔi Awalɔi 5,000
Ani Obaanyɛ Ofee Gbɛgbalɔi Awalɔ yɛ March? April? May?
1 “Aatao Shiɛlɔi 1,000” ji sane ko ni aŋma yɛ April 1881 Watch Tower ni je kpo lɛ mli lɛ saneyitso. Ekɛ nibimɔ ko fɔ nine etsɛ hii kɛ yei fɛɛ ni ejɔɔ amɛhe nɔ, “ni Nuntsɔ lɛ etu E-nɔkwale lɛ he nilee ewo amɛdɛŋ lɛ,” koni amɛkɛ be fɛɛ ni amɛaana lɛ ana Biblia mli anɔkwale lɛ gbɛɛ-kɛ-shwamɔ mli gbɛfaŋnɔ. Awo mɛi ni baanyɛ amɛkɛ amɛbe fã loo nɔ̃ atsu Nuntsɔ lɛ nitsumɔ lɛ pɛ lɛ hewalɛ ni amɛkɛ amɛhe aha akɛ tsutsu gbɛgbalɔi sanekpakpa jajelɔi—mɛi ni tsɔ ŋmɛnɛŋmɛnɛ beaŋ gbɛgbalɔi lɛ ahiɛ.
2 Eyɛ mli akɛ bei etsake kɛjɛ 1800 afii lɛ amli kɛbaa nɛɛ moŋ, shi anɔkwa sane kome yɛ ni kã shi nakai nɔŋŋ lolo—Nyɔŋmɔ sɔɔlɔi ni amɛjɔɔ amɛhe nɔ lɛ miisumɔ ni amɛya nɔ amɛkɛ amɛbe ni amɛbaanyɛ amɛná lɛ atsu nii yɛ sanekpakpa lɛ gbɛɛ-kɛ-shwamɔ mli. Kɛ asafoŋ shiɛlɔi sɔmɔ akɛ gbɛgbalɔi awalɔi lɛ, ehaa amɛshiɛmɔ nitsumɔ lɛ mɔɔ shi, yɛ be mli ni amɛkɛ be babaoo tsuɔ nii yɛ Maŋtsɛyeli lɛ he shiɛmɔ nitsumɔ mli lɛ.—Kol. 4:17; 2 Tim. 4:5.
3 Kɛjɛ beni aje gbɛgbalɔi awalɔ nitsumɔ lɛ shishi kɛbaa nɛɛ, nyɛmimɛi hii kɛ nyɛmimɛi yei akpei ohai abɔ ni yɔɔ jeŋ fɛɛ lɛ ena mli ŋɔɔmɔ. Miishɛɛ ni ana kɛha gbɛgbamɔ sɔɔmɔ nitsumɔ lɛ fã nɛɛ tee hiɛ aahu akɛ aná gbɛgbalɔi awalɔi ayifalɛ ni fe fɛɛ ni fa fe 3,600 yɛ Ghana yɛ April 1989! Kɛjɛ no nɔ kɛbaa nɛɛ, shii etɛ sɔŋŋ nɛ ni shiɛlɔi ni fa fe 2,400 ena mli gbɛfaŋnɔ akɛ gbɛgbalɔi awalɔi yɛ April nyɔŋ lɛ mli—yɛ 1993, 1994, kɛ 1995. Yɛ faŋŋ mli lɛ, nɔ ni tsɔɔ akɛ abaanyɛ aya hiɛ yɛ 1997 Kaimɔ be lɛ mli fe bɔ ni abɔ mɔdɛŋ jogbaŋŋ aha nɛɛ yɛ lolo.
4 Wɔmiiwo nyɛ hewalɛ koni nyɛkɛ oti ama nyɛhiɛ akɛ nyɛaafee gbɛgbalɔi awalɔi yɛ March, April, kɛ May nyɔji lɛ ekome loo nɔ̃ mli. Mɛni hewɔ esa akɛ okɛ March afata he? Ejaakɛ, afi nɛɛ, abaaye Kristo gbele lɛ Kaimɔ lɛ yɛ Hɔgbaa, March 23. Gbɛ ko kwraa bɛ ni wɔɔtsɔ nɔ wɔkɛ otsii ni tsɔɔ Kaimɔ lɛ hiɛ lɛ atsu nii jogbaŋŋ fe akɛ wɔkɛ ekãa aaana Maŋtsɛyeli shiɛmɔ nitsumɔ ni wɔ Nuntsɔ kɛ Yiwalaherelɔ, Yesu Kristo to ema shi lɛ mli gbɛfaŋnɔ. Kɛ wɔye odase babaoo yɛ March mli lɛ, wɔbaanyɛ wɔfɔ nine wɔtsɛ mɛi babaoo ni yɔɔ wiemɔ lɛ he miishɛɛ lɛ koni amɛbafata wɔhe kɛkai Kristo gbele lɛ. March hu baafee be krɛdɛɛ ko kɛ shishinumɔ akɛ, enɛ ji klɛŋklɛŋ kwraa ni wɔkɛ wolo hee ni ji, Nɔ Diɛŋtsɛ ni Kɛ Weku Miishɛɛ Baa lɛ baatsu nii. Kɛfata he lɛ, Hɔɔ enumɔ kɛ Hɔgbaa enumɔ yɔɔ March nyɔŋ lɛ mli, ni baaha wɔtsu nii waa yɛ otsi lɛ naagbee yɛ shiɛmɔ nitsumɔ lɛ mli. Shi kɛlɛ, yɛ April kɛ May nyɔji lɛ amli lɛ, ni wɔɔya nɔ wɔkɛ ekãa abɔ mɔdɛŋ yɛ shiɛmɔ nitsumɔ lɛ mli lɛ, baaha wɔdi miishɛɛ ni ana lɛ sɛɛ koni wɔkɛ Mɛni Nyɔŋmɔ Taoɔ yɛ Wɔdɛŋ? wolo bibioo lɛ aje shia Biblia mli nikasemɔi heei ashishi. Wɔkɛ Buu-Mɔɔ kɛ Awake! heei ni eje kpo ni yɔɔ ebe naa pɛpɛɛpɛ lɛ baatsu wɔ shikpɔŋkuku lɛ mli nii kɛmɔ shi, titri lɛ, yɛ otsii lɛ anaagbee.
5 Namɛi Ahe Saa akɛ Amɛfeɔ Gbɛgbalɔi Awalɔi?: Organized to Accomplish Our Ministry wolo lɛ baafa 114 tsɔɔ mli akɛ: “Bɔ fɛɛ bɔ ni oshihilɛi ji ha lɛ, kɛ abaptisi bo, ni oyɛ jeŋba kpakpa, ni obaanyɛ oto gbɛjianɔ ni oshɛ taomɔ nii ni ji ŋmɛlɛtswai 60 ni okɛaatsu nii daa nyɔŋ nɔ lɛ he yɛ shiɛmɔ nitsumɔ lɛ mli, ni oheɔ oyeɔ akɛ obaanyɛ osɔmɔ nyɔŋ kome loo nɔ̃ akɛ gbɛgbalɔi awalɔ lɛ, no lɛ, asafoŋ onukpai lɛ baana he miishɛɛ akɛ amɛaasusu ogbɛbimɔ wolo kɛha sɔɔmɔ hegbɛ nɛɛ he.” Ani obaanyɛ oto gbɛjianɔ kɛha hegbɛ nɛɛ yɛ March? April? May?
6 Esa akɛ jwɛŋmɔ ni ja ni onukpai akui lɛ aaaná kɛ tsui muu fɛɛ mli ni shiɛlɔi ni eshwɛ lɛ aaajɛ amɛfi sɛɛ lɛ aha tsɛmɔ akɛ aatao gbɛgbalɔi awalɔi 5,000 lɛ nɔheremɔ lɛ afee omanyeyeli ni jijeɔ. (Heb. 13:7) Aawo weku yitsei fɛɛ hewalɛ koni amɛkwɛ ni amɛle amɛshiabii lɛ ateŋ mɛi abɔ ni baanyɛ afata gbɛgbalɔi awalɔi lɛ ahe yɛ nyɔji ni baa lɛ ekome loo nɔ̃ mli.—Lala 148:12, 13; okɛto Bɔfoi lɛ Asaji 21:8, 9 he.
7 Kaamu sane naa oya akɛ onyɛŋ okɛ ohe awo gbɛgbalɔi awalɔ nitsumɔ lɛ mli yɛ obe-fɛɛ heloonaa nitsumɔ, skul gbɛjianɔtoo, weku mli gbɛnaa nii, loo Ŋmalɛ naa gbɛnaa nii krokomɛi ahewɔ. Yɛ mɛi komɛi agbɛfaŋ lɛ, ekolɛ efeŋ mlɛo akɛ amɛaana mli gbɛfaŋnɔ; shi kɛlɛ, kɛ amɛto gbɛjianɔ kpakpa kɛ Yehowa jɔɔmɔ lɛ, amɛbaanyɛ amɛye omanye. (Lala 37:5; Abɛi 16:3) Ha suɔmɔ ni oyɔɔ akɛ oooná gbɛgbamɔ sɔɔmɔ lɛ mli gbɛfaŋnɔ lɛ akudɔ oshihilɛi; kaaha oshihilɛi kudɔ suɔmɔ ni oyɔɔ akɛ oootsu gbɛgbamɔ nitsumɔ lɛ. (Abɛi 13:19a) No hewɔ lɛ, mɛi babaoo náa suɔmɔ ni mli kwɔ amɛhaa Yehowa kɛ nanemɛi adesai, ni amɛnyɛɔ amɛtsakeɔ amɛ daa otsi shihilɛ lɛ gbɛjianɔtoo mli, bɔni afee ni amɛgbele amɛ shiɛmɔ nitsumɔ lɛ mli nyɔŋ kome, yɛ bei komɛi amli. (Luka 10:27, 28) Jɔɔmɔi babaoo yɛ kɛha mɛi ni kɛ ekãa miaa amɛhiɛ yɛ Maŋtsɛyeli shiɛmɔ nitsumɔ lɛ mli lɛ.—1 Tim. 4:10.
8 Nɔ ni Gbɛgbalɔi Awamɔ Tsuɔ: Susuma muu fɛɛ mli mɔdɛŋ ni Nyɔŋmɔ sɔɔlɔi akpei abɔ bɔɔ koni amɛtsu gbɛgbalɔi awalɔ nitsumɔ lɛ kɛ yijiemɔ ni jijeɔ waa haa Yehowa. Yɛ be mli ni nɛkɛ Maŋtsɛyeli jajelɔi nɛɛ miaa amɛhiɛ koni amɛjaje sanekpakpa lɛ amɛtsɔɔ mɛi babaoo lɛ, egbalaa amɛ kɛbɛŋkɛɔ Yehowa diɛŋtsɛ he ejaakɛ amɛkaseɔ bɔ ni amɛaafee amɛŋɔ amɛhe amɛfɔ emumɔ kɛ ejɔɔmɔ lɛ nɔ.
9 Kɛ wɔyɛ gbɛgbalɔi awalɔi, daa gbɛgbalɔi, kɛ gbɛgbalɔi krɛdɛɛi ni yɔɔ ekãa yɛ wɔteŋ lɛ, ehaa anáa ekãa mumɔ hee yɛ asafo lɛ mli. Miishɛɛ ni amɛyɔɔ lɛ náa mɔ nɔ hewalɛ yɛ be mli ni amɛwieɔ amɛ shiɛmɔ lɛ mli niiashikpamɔi ahe lɛ. Enɛ kanyaa mɛi krokomɛi koni amɛpɛi nibii ni amɛ diɛŋtsɛ amɛkɛyeɔ klɛŋklɛŋ gbɛhe lɛ mli ekoŋŋ, kɛ nyɛmɔ ni amɛyɔɔ akɛ amɛaana shiɛmɔ nitsumɔ ni he hiaa fe fɛɛ lɛ mli gbɛfaŋnɔ babaoo. Nyɛmi yoo ko ni abaptisi lɛ beni eye afii 70 lɛ bɔi gbɛgbalɔi awalɔ nitsumɔ lɛ amrɔ nɔŋŋ kɛtsara nɔ. Beni abi lɛ yɛ afii komɛi asɛɛ ni etsɔɔ nɔ hewɔ ni emiaa ehiɛ waa lolo yɛ gbɛgbalɔi awalɔ nitsumɔ lɛ mli daa nyɔŋ nɔ, yɛ afii ni eye nɛɛ fɛɛ sɛɛ lɛ, ekɛɛ akɛ enuɔ he tamɔ nɔ ni éha ewala shihilɛ mli klɛŋklɛŋ afii 70 lɛ efee yaka, ni esumɔɔɔ ni ehaa ewala shihilɛ mli afii ni eshwɛ lɛ eko kwraa feɔ yaka!
10 Mɔ fɛɛ mɔ ni kɛ ehe woɔ gbɛgbalɔi awalɔ nitsumɔ lɛ mli lɛ náa hesaa ni yaa hiɛ yɛ shiɛmɔ nitsumɔ lɛ mli. Odasefonyo ko ni edako kpɛlɛ nɔ akɛ: ‘Yɛ migbekɛbiiashi tɔ̃ɔ lɛ, no mli lɛ mifataa mifɔlɔi ahe yɛ shiɛmɔ nitsumɔ lɛ mli. No mli lɛ shiɛmɔ nitsumɔ lɛ ŋɔɔ waa diɛŋtsɛ. Shi kɛlɛ, beni shɛ be ko lɛ, minu shishi aahu akɛ mifee mɔ ni yɔɔ sɔrɔto kwraa yɛ skul, yɛ mɛi ni eshwɛ lɛ ateŋ. Kɛkɛ ni ebawa kɛha mi akɛ mikɛ minanemɛi nikaselɔi lɛ aaawie anɔkwale lɛ he. Beni mishiɛɔ yɛ shiai amli lɛ, mibɔi gbeyeishemɔ beni misusuɔ akɛ mikɛ mɔ ko ni mile ni yaa wɔ skul lɛ baakpe lɛ. Yɛ migbɛfaŋ lɛ, misusu akɛ naagba lɛ ji gbɔmɛi ahe gbeyeishemɔ. [Abɛi 29:25] Beni migbe skul naa lɛ, mikpɛ miyiŋ akɛ maka gbɛgbamɔ lɛ makwɛ yɛ bei komɛi amli. Nɔ ni jɛ mli ba ji akɛ, mibanya shiɛmɔ lɛ he waa fe be ko ni eho. Agbɛnɛ mibuuu lɛ nitsumɔ ko ni ŋɔɔ kɛkɛ dɔŋŋ, loo jatsu ni tsii. Be mli ni minaa ni mi-Biblia mli nikaselɔi lɛ yaa hiɛ yɛ anɔkwale lɛ mli lɛ, minu he akɛ mitsui enyɔ mimli waa yɛ odaseyeli ni tsɔɔ akɛ Yehowa Nyɔŋmɔ miifi mɔdɛŋ ni mibɔɔ lɛ asɛɛ lɛ hewɔ.’ Gbekɛ nɛɛ tee nɔ esɔmɔ akɛ daa gbɛgbalɔ.
11 Yɛ jwɛŋmɔ kpakpa naa lɛ, kɛ mɛi babaoo sɔmɔ akɛ gbɛgbalɔi awalɔi yɛ asafo lɛ mli lɛ, ehaa atsuɔ shikpɔŋkuku lɛ mli nii jogbaŋŋ kɛmɔɔ shi. Nyɛmi nuu ni kwɛɔ shikpɔŋkukuji ni akɛhaa lɛ nɔ lɛ baanyɛ abi ni gbɛgbalɔi awalɔi aye abua ni amɛtsu hei ni afɔɔɔ mli nitsumɔ lɛ fɛɛ mli nii. Shwane niyenii ni akɛaafata he kɛya ni ashiɛ gbi muu lɛ fɛɛ lɛ baaha anyɛ atsu shikpɔŋkuku lɛ mli hei ni yɔɔ shɔŋŋ lɛ po mli nii.
12 Esa akɛ Onukpai Ato Gbɛjianɔ Kɛtsɔ Hiɛ: Yɛ nyɔji etɛ ni baa nɛɛ fɛɛ mli lɛ, esa akɛ akwɛ ni ato odaseyeli nitsumɔi sɔrɔtoi lɛ ahe gbɛjianɔ yɛ otsi lɛ mli bei sɔrɔtoi amli, ni beni hulu enyɔ shi kɛ beni jeŋ ebɔi namɔ fata he, koni mɛi ni fa saŋŋ anyɛ ana mli gbɛfaŋnɔ. Akɛ bei kɛha gbɛjegbɛ nɔ odaseyeli, shikpɔŋkuku ni nitsumɔ hei yɔɔ mli lɛ mli nitsumɔ, kɛ mɛi ni bɛ shia lɛ aŋɔɔ ni ayaa lɛ afata daa shia-kɛ-shia nitsumɔ lɛ he. Kɛtsɔ nakai feemɔ nɔ lɛ, onukpai yeɔ buaa mɛi ni tsuɔ gbɛgbamɔ lɛ koni amɛkɛ asafo lɛ ana shiɛmɔ mli gbɛfaŋnɔ yɛ be ni baahi jogbaŋŋ ni sa kɛha gbɛgbalɔi lɛ mli. Esa akɛ aha asafo lɛ ale shiɛmɔyaa he gbɛjianɔ fɛɛ ni ato lɛ jogbaŋŋ. Esa akɛ ato kpeei kɛha shiɛmɔyaa he gbɛjianɔ jogbaŋŋ. Kɛfata he lɛ, esa akɛ akwɛ ni ana shikpɔŋkuku ni da saŋŋ koni ashɛ woji tɛtrɛbii kɛ woji krokomɛi ni fa saŋŋ amrɔ nɔŋŋ.
13 Too Oshiɛmɔyaa He Gbɛjianɔ: Nyɛmi nuu ko ni klɛŋklɛŋ lɛ esheɔ gbɛgbalɔi awalɔ nitsumɔ lɛ gbeyei lɛ, kɛɛ: “Eyɛ mlɛo kwraa fe bɔ ni misusu akɛ ebaafee. Gbɛjianɔtoo kpakpa kɛkɛ ebiɔ ni aná.” Ani oona gbɛgbalɔi awalɔ be he gbɛjianɔtoo he nɔkwɛmɔ nɔ ni hi jogbaŋŋ kɛha bo yɛ nɔ ni aŋma ahɔ mli nɛɛ sɛɛgbɛ baafa lɛ nɔ? Ŋmɛlɛtswai 15 ni akɛaatsu nii otsi fɛɛ otsi yɛ shiɛmɔ nitsumɔ lɛ mli lɛ ji be lɛ fɛɛ ni akpaa gbɛ kɛjɛɔ gbɛgbalɔi awalɔi adɛŋ.
14 Yeigbayei ni kwɛɔ shia kɛ mɛi ni tsuɔ nii kɛjɛɔ shwane kɛyashiɔ nyɔɔŋ teŋ lɛ baanyɛ ato leebi ni amɛnaa lɛ he gbɛjianɔ be fɛɛ be kɛha shiɛmɔyaa, bɔni afee ni amɛsɔmɔ akɛ gbɛgbalɔi awalɔi. Bei pii lɛ, skul gbekɛbii kɛ mɛi ni tsuɔ nii kɛjɛɔ nyɔɔŋ teŋ kɛyashiɔ leebi maŋkpa lɛ baanyɛ atu shwane mli amɛha shiɛmɔ nitsumɔ lɛ. Nitsulɔi ni kɛ be-fɛɛ tsuɔ heloonaa nitsumɔ lɛ ena akɛ amɛnyɛɔ amɛtoɔ gbi kome amɛmaa shi otsi fɛɛ otsi loo amɛtuɔ otsii lɛ anaagbee amɛwoɔ shiɛmɔ nitsumɔ lɛ mli, kɛfataa gbɛkɛnaashi odaseyeli he. Mɛi babaoo ni otsi lɛ naagbee titri pɛ amɛyaa shiɛmɔ lɛ halaa nyɔji ni otsii anaagbee enumɔ yɔɔ mli. Nakai eji afi nɛɛ yɛ March, kɛ agbɛnɛ August kɛ November he. Okɛ gbɛjianɔ ni ato yɛ baafa 6, ni aŋmako nɔ ko yɛ nɔ ni akɛha akɛ gbɛtsɔɔmɔ lɛ atsu nii, koni okɛ sɔlemɔ asusu nɔ ni baahi kɛha bo diɛŋtsɛ oshiɛmɔyaa he gbɛjianɔtoo ni hi kɛha oshihilɛ lɛ he.
15 Sɛɛnamɔ kome ni yɔɔ gbɛgbalɔi awalɔ nitsumɔ lɛ mli ji bɔ ni anyɛɔ atsakeɔ mli ahaa lɛ. Obaanyɛ ohala nyɔji ni obaanyɛ otsu gbɛgbamɔ lɛ, ni obaanyɛ osɔmɔ shii abɔ ni osumɔɔ. Kɛ ooosumɔ ni otsu nii akɛ gbɛgbalɔi awalɔ kɛtsara nɔ, ni onyɛɛɛ nakai ofee lɛ, ani osusu he akɛ okɛ ohe aaawo mli kɛfolɔ mli yɛ afi muu lɛ fɛɛ mli? Yɛ gbɛ kroko nɔ lɛ, mɛi komɛi nyɛɔ amɛkɛ be kakadaŋŋ sɔmɔɔ akɛ gbɛgbalɔi awalɔi kɛtsaraa nɔ.
16 Hesaamɔ Kɛha Be-Fɛɛ Gbɛgbamɔ: Mɛi babaoo ni yɔɔ gbɛgbamɔ mumɔ lɛ baasumɔ ni amɛsɔmɔ akɛ daa gbɛgbalɔi, shi amɛsusuɔ be, shihilɛi, loo nyɛmɔ kɛha efeemɔ lɛ he. Ŋwanejee ko bɛ he akɛ, mɛi ni tsuɔ daa gbɛgbamɔ amrɔ nɛɛ ateŋ mɛi babaoo kɛ gbɛgbalɔi awamɔ nitsumɔ lɛ tsu nii klɛŋklɛŋ kɛsaa amɛhe kɛha be-fɛɛ nitsumɔ lɛ. Kɛ mɔ ko ha egbɛgbalɔi awamɔ nitsumɔ gbɛjianɔtoo lɛ tee hiɛ ŋmɛlɛtswaa kome pɛ gbi fɛɛ gbi, loo gbi muu kome yɛ otsi fɛɛ otsi mli lɛ, ebaanyɛ eshɛ daa gbɛgbalɔ gbɛjianɔtoo lɛ he. Bɔni afee ni ole kɛji obaanyɛ otsu he nii lɛ, mɛni hewɔ obɔɔɔ mɔdɛŋ akɛ oootu ŋmɛlɛtswai 90 owo shiɛmɔ nitsumɔ lɛ mli nyɔŋ kome loo nɔ̃ beni ofeɔ gbɛgbalɔi awalɔ nitsumɔ lɛ? Yɛ nakai beaŋ nɔŋŋ lɛ, obaabɔi sɛɛsaramɔi kɛ Biblia mli nikasemɔi namɔ, ni ebaaha ona gbɛgbamɔ sɔɔmɔ lɛ mli ŋɔɔmɔ kɛmɔ shi.
17 Nyɛmi yoo ko na gbɛgbalɔi awalɔ nitsumɔ ni tsara nɔ lɛ mli ŋɔɔmɔ afii ekpaa. Be fɛɛ be lɛ, ekɛfeɔ oti ni ma ehiɛ akɛ ekɛ ehe aaawo daa gbɛgbamɔ sɔɔmɔ lɛ mli. Yɛ nakai yiŋtoo lɛ hewɔ lɛ, eka heloonaa nitsumɔi sɔrɔtoi ejwɛ ekwɛ, kɛ hiɛnɔkamɔ akɛ eeena shihilɛ ko ni baaha ena ŋmɛlɛtswai 90 ni akpaa gbɛ kɛjɛɔ daa gbɛgbalɔi lɛ adɛŋ lɛ lo. Daa nyɔŋ nɔ lɛ, etoɔ be he gbɛjianɔ kome loo enyɔ ewoɔ wolo nɔ, bɔni afee ni ekɛbu akɔntaa akɛ ebaanyɛ lo. Shi beni epɛiɔ mli ekwɛɔ lɛ, enu he akɛ enyɛŋ ekɛ ehe awo be-fɛɛ shiɛmɔ nitsumɔ lɛ mli. Ni kɛlɛ, etee nɔ ebi Yehowa dɛŋ gbɛtsɔɔmɔ. Kɛkɛ ni gbi ko beni esaa ehe yɛ Sɔɔmɔ Kpee lɛ mli lɛ, ekane sane ko yɛ October 1991 Wɔ Maŋtsɛyeli Sɔɔmɔ lɛ mli ni kɛɛ akɛ: “Yɛ nɔ najiaŋ ni oooma ŋmɛlɛtswai abɔ ni ataoɔ lɛ nɔ mi bɔ ni esaaa lɛ, mɛni hewɔ okɛ ojwɛŋmɔ emaaa hegbɛ babaoo ni ona akɛ ooona naabuamɔ nitsumɔ lɛ mli gbɛfaŋnɔ lɛ nɔ? (Yohane 4:35, 36)” Ekɛɛ akɛ: “mikane wiemɔ nɛɛ shii enumɔ loo ekpaa, ni miná nɔmimaa diɛŋtsɛ akɛ enɛ ji hetoo ni jɛ Yehowa ŋɔɔ. Yɛ nakai be lɛ mli lɛ, mikpɛ miyiŋ akɛ mikɛ mihe baawo daa gbɛgbamɔ shiɛmɔ nitsumɔ lɛ mli.” Eyɛ mli akɛ heloonaa nitsumɔ ni ekɛ ebe-fã tsuɔ lɛ he gbɛjianɔtoo lɛ ehiii tsɔ moŋ, shi ekɛ egbɛbimɔ wolo lɛ ha kɛha daa gbɛgbamɔ. Otsi kome sɛɛ lɛ, egbɛjianɔtoo lɛ tsake, ni aha ená ŋmɛlɛtswai komɛi yɛ heloonaa nitsumɔ lɛ mli ni hi kɛha lɛ jogbaŋŋ. Emu sane naa akɛ, “Ani enɛ jeee Yehowa nine ni yɔɔ mli, aloo jeee nakai?,” ni ekɛfata he akɛ: “Kɛ obi Yehowa dɛŋ gbɛtsɔɔmɔ ni onine shɛ nɔ lɛ, kaajo foi yɛ naa—kpɛlɛmɔ nɔ.” Kɛ oosumɔ waa akɛ otsɔ daa gbɛgbalɔ, ekolɛ beni okɛ nyɔji etɛ efee gbɛgbalɔi awalɔ yɛ March, April, kɛ May ogbe naa lɛ, obaanyɛ ona nɔmimaa akɛ bo hu obaanyɛ oye omanye yɛ be-fɛɛ sɔɔmɔ nitsumɔ lɛ mli.
18 Wɔyɛ nɔmimaa akɛ Yehowa baajɔɔ ekãafeemɔ lɛ nɔ, ni ebaafi ewebii lɛ amɔdɛŋbɔɔ sɛɛ, yɛ be mli ni amɛjajeɔ yiwalaheremɔ sanekpakpa lɛ amɛtsɔɔ yɛ nɛkɛ be krɛdɛɛ kɛha nitsumɔ nɛɛ mli lɛ. (Yes. 52:7; Rom. 10:15) Ani obaahere tsɛmɔ ni atsɛɔ akɛ aatao gbɛgbalɔi 5,000 lɛ nɔ, kɛtsɔ emli gbɛfaŋnɔ ni ooona lɛ nɔ, yɛ March? April? May?
Bɔ ni Ooofee Oye Omanye akɛ Gbɛgbalɔi Awalɔ
■ Ná jwɛŋmɔ ni ja yɛ ogbɛkpamɔi lɛ ahe
■ Sɔlemɔ oha Yehowa koni ejɔɔ omɔdɛŋbɔi lɛ anɔ
■ Fɔɔ nine otsɛ shiɛlɔ kroko ni ekɛ bo atsu gbɛgbamɔ lɛ
■ Too shiɛmɔyaa he gbɛjianɔ kpakpa
■ Shɛɛ woji tɛtrɛbii ni fa saŋŋ
■ Fi gbɛjianɔ ni asafo lɛ eto kɛha shiɛmɔyaa lɛ sɛɛ
■ Taomɔ hegbɛi ni okɛaaye odase trukaa