Mɛni Hewɔ Esa Akɛ Oha Aŋma Ogbalashihilɛ Awo Woji Amli?

¹ Awoɔ Kristofoi aŋaa yɛ Romabii 13:1 akɛ: “Mɔ fɛɛ mɔ aba ehe shi aha hegbɛi ni yeɔ nɔ lɛ.” Gbɛ kome ni Kristofonyo tsɔɔ nɔ ejieɔ nɛkɛ heshibaa nɛɛ kpo ji ni ebo maŋ ni eyɔɔ mli lɛ mlai atoi kɛji enɛɛmɛi eteee shi ewooo Nyɔŋmɔ mlai ni nɔ kwɔlɔ fe fɛɛ lɛ.

² Awo mla yɛ maŋ nɛɛ mli, yɛ gbalashihilɛ ni mla biɔ ni aŋma awo wolo mli lɛ he ni kɛɔ akɛ “kɛji ato gbalashihilɛ ko he gbɛjianɔ yɛ kusum mla naa lɛ, no lɛ gbalashihilɛ lɛ mli mɛi enyɔ lɛ ateŋ mɔ fɛɛ mɔ aloo mɛi enyɔ lɛ fɛɛ baanyɛ amɛŋma wolo amɛyaha Registrar of Marriages . . . ni yɔɔ Kpokpaa ni ato gbalashihilɛ lɛ he gbɛjianɔ yɛ mli lɛ ni amɛbi ni aŋma amɛgbalashihilɛ lɛ he wolo afɔ shi.”

³ Eji anɔkwale akɛ nɛkɛ ŋma ni aŋmaa nɛɛ haa akɛwoɔ woji amli pɛ kɛkɛ, ni jeee no ji nɔ ni woɔ gbalashihilɛ ni ato he gbɛjianɔ momo lɛ mli hewalɛ. Shi kɛlɛ, oti ni esa akɛ Kristofonyo akadi jogbaŋŋ ji akɛ, yɛ nɛkɛ mla ni afee ni ji Customary Marriage and Divorce (Registration) Law (PNDC Iaw 112) nɛɛ hewɔ lɛ, Kaisare efee lɛ sɔ̃ ni ka maŋbii fɛɛ, ni anɔkwa Kristofoi ni ebote gbalashihilɛ mli yɛ kusum naa lɛ hu fata he lɛ anɔ, akɛ amɛha akɛ amɛgbalashihilɛi lɛ awo woji amli. Mla lɛ faa akɛ “esa akɛ aŋma gbɛbimɔ wolo kɛha gbalashihilɛ lɛ kɛ woji amli woo lɛ dani nyɔji etɛ aho kɛjɛ be mli ni abote gbalashihilɛ lɛ mli lɛ.”

⁴ Nɔ ni sa kadimɔ jogbaŋŋ hu ji akɛ, kɛjɛ March 1978 mli tɔŋŋ, ni Wɔ Maŋtsɛyeli Sɔɔmɔ lɛ mli nɔ ni aŋma ahɔ mli lɛ wo ŋaa akɛ ‘onukpai lɛ awo mɛi ni kɛ amɛgbalashihilɛ woko woji amli lɛ hewalɛ ni amɛye nɔ ni Kaisare biɔ nɛɛ nɔ, bɔni afee ni amɛba amɛhe shi amɛha hegbɛi ni yeɔ nɔ lɛ.’ Enɛ hewɔ lɛ aawo mɛi fɛɛ ni ebote gbalashihilɛ mli lɛ hewalɛ ni amɛkadi be ni Mla lɛ etsɔɔ ni ji nyɔji etɛ ni esa akɛ akɛ kusum naa gbalashihilɛ lɛ awo mla shishi lɛ. Nyɛmimɛi yei ni yɔɔ wumɛi ni heee yeee lɛ baanyɛ amɛkɛ mlihilɛ aye abua amɛ ni amɛna bɔ ni ehe hiaa ni amɛye PNDC Mla 112 ni kɔɔ enɛ he lɛ nɔ. Nɛkɛ Mla nɛɛ kɛɔ po akɛ “mɔ fɛɛ mɔ ni . . . kɛ ekusum naa gbalashihilɛ eyawooo woji amli . . . ni jeee yɛ yiŋtoo kpakpa ko hu hewɔ lɛ, . . . baaye mla nɔtɔmɔ he fɔ, ni kɛji akwɛ sane lɛ ni abu lɛ fɔ lɛ, ebaawo shika toigbalamɔ ni faaa fe ¢10,000 aloo abaawo lɛ tsuŋ nɔ ni faaa fe afii etɛ, aloo toigbalamɔ enyɔ lɛ fɛɛ.”

⁵ Gbalashihilɛ mli hefatalɔi, ni bɛ yiŋtoo kpakpa ko hewɔ ni amɛkɛ amɛgbalashihilɛ lɛ eyawooo woji amli yɛ be ni atsɔɔ yɛ Mla lɛ mli lɛ efeŋ nɔkwɛmɔ nɔ kpakpa ni baaha amɛhe asa akɛ amɛsɔmɔ akɛ gbɛgbalɔi awalɔi, ni nakai nɔŋŋ hu ahaŋ amɛ hegbɛ yɛ be-fɛɛ sɔɔmɔ fãi sɔrɔtoi lɛ eko kwraa mli. Ni Kristofoi wumɛi, ni yɛ ŋaawoo kɛ yelikɛbuamɔ ni onukpai lɛ kɛaaha amɛ lɛ fɛɛ sɛɛ lɛ, amɛkɛ amɛgbalashihilɛ lɛ wooo woji amli lɛ baaŋmɛɛ amɛsɔɔmɔ hegbɛi akɛ onukpai aloo asafoŋ sɔɔlɔi lɛ ahe, kɛji amɛmiisɔmɔ momo yɛ nakai gbɛhei amli.

⁶ Ahaŋ gbalashihilɛ mli hefatalɔi ni kɛ amɛgbalashihilɛi woko woji amli lɛ Sɔɔmɔ Kpee mli nɔkwɛmɔ nii afeemɔ, aloo nifeemɔ diɛŋtsɛ yɛ Sɔɔmɔ Kpee lɛ mli. Amɛbaanyɛ amɛkɛ amɛhe awo Teokrase Sɔɔmɔ skul lɛ kɛ kpeei krokomɛi amli. Kɛji gbalashihilɛ mli hefatalɔi kɛ amɛgbalashihilɛ lɛ ewo woji amli jio, amɛfeko nakai jio, esa akɛ aŋmɛ amɛ gbɛ ni amɛkɛ amɛhe awo shiɛmɔ nitsumɔ lɛ mli ni amɛkɛ amɛ akɔntaabuu aha. Kɛji amɛhe esa lɛ, atsiŋ amɛbaptisimɔ hu naa.

⁷ Esa akɛ efee Kristofoi fɛɛ afaishitswaa akɛ ‘amɛaaba amɛjeŋ jogbaŋŋ yɛ jeŋmaji lɛ ateŋ’ ni nɔ ni fata enɛ he ji wɔgbalashihilɛi ni wɔkɛaawo woji amli, taakɛ Kaisare biɔ ni wɔfee lɛ.​—1 Pet. 2:⁠12.