Jwɛŋmɔ Kpakpai kɛ Jalɛ ni Wɔkɛaahi Shi
1 Jeŋ ni naa mɔ nɔ hewalɛ waa koni wɔfee nibii ni Nyɔŋmɔ gbeyeishemɔ bɛ mli lɛ mli wɔyɔɔ nɛɛ. Tɛi ni afolɔ ashwie shi yɛ gbɛjianɔtoo nɛɛ mli lɛ miiya nɔ eefite daa nɛɛ. (2 Tim. 3:3) Akɛ Kristofoi lɛ, esa akɛ wɔdamɔ nii ni ja lɛ sɛɛ, ni wɔnu nɔ hewɔ ni esa akɛ wɔya nɔ wɔfee nakai lɛ shishi. Shi mɛɛ gbɛtsɔɔmɔ kɛ kudɔmɔ yɔɔ? Mɛɛ tɛi ni afolɔ ashwie shi esa akɛ wɔnyiɛ sɛɛ? “Jwɛŋmɔ Kpakpa kɛ Jalɛ ni Wɔkɛaahi Shi” ji saneyitso ni woɔ mɔ hewalɛ ni ahala aha wɔ gbi kome kpee krɛdɛɛ he gbɛjianɔtoo kɛha 1993 sɔɔmɔ afi lɛ.—Tito 2:12.
2 Abaatsɔ wiemɔi, nɔkwɛmɔ nii, kɛ niiashikpamɔi anɔ aha wɔkase bɔ ni wɔɔwaje wɔhe koni wɔte shi wɔwo nibii ni Nyɔŋmɔ gbeyeishemɔ bɛ mli lɛ ni wɔkpoo je lɛŋ akɔnɔi lɛ fɛɛ. Wɔbaanyɛ wɔna bɔ ni wɔɔnyɛ wɔkɛ jwɛŋmɔ kpakpa kɛ jalɛ ahi shi yɛ yiwalɛ gbɛjianɔtoo nɛɛ mli. Abaatsɔɔ gbɛjianɔtoo ni baaye abua wɔ ni wɔbu wɔjwɛŋmɔŋ nyɛmɔi ahe lɛ mli. (1 Pet. 4:7) Fɔlɔi kɛ obalaŋtai titri baasumɔ ni amɛbo shwane kpee lɛ mli wiemɔi kɛ sanebimɔi lɛ atoi jogbaŋŋ. Enɛɛmɛi baama bɔ ni ehe hiaa ni wɔna ŋwɛi nilee kɛ niiashikpamɔ nɔ mi, koni wɔtsu nii yɛ ekomefeemɔ mli ni wɔkɛtswa wɔsɛɛ be teokrase ni miishɛɛ yɔɔ mli wɔma shi.
3 Eyɛ mli akɛ jeŋ ni sheee Nyɔŋmɔ gbeyei ebɔle wɔhe kɛkpe moŋ, shi Nyɔŋmɔ Wiemɔ lɛ tsɔɔ gbɛ ni hi jogbaŋŋ ni esa akɛ wɔtsɔ nɔ. Abaama sɛɛnamɔi ni jɛɔ Biblia mli ŋaawoo toiboo mli baa lɛ anɔ mi yɛ wiemɔ, “Na Ojɔɔmɔi Ahe Miishɛɛ yɛ Je ni Miishɛɛ Bɛ Mli lɛ Mli.” Yɛ be mli ni wɔsaa wɔhe koni wɔya lɛ, wɔmiisumɔ ni wɔma nɔ mi akɛ wiemɔi ahe gbɛjianɔtoo lɛ toiboo jogbaŋŋ kɛ emli ŋaawoo lɛ kɛ nitsumɔ baaye abua wɔ ni wɔhe asa babaoo yɛ sɔɔmɔ ni wɔkɛhaa Yehowa lɛ mli.—Fil. 3:15, 16.