Wɔhiɛ ni Aaasa Wɔmaŋ Wiemɔi Amli Woji Tɛtrɛbii Lɛ
1 Mɛɛ miishɛɛ sane nɛ akɛ wɔɔna akɛ Buu-Mɔɔ lɛ ni akalaa lɛ eyashɛ ekomekomei akpekpei 15.5 yɛ wiemɔi 111 mli, ni Ewe,Twi kɛ Ga fata he, ni wɔna hu akɛ Awake! lɛ yifalɛ hu eyashɛ akpekpei 13.1 yɛ wiemɔi 68 mli ni Twi kɛ Ewe fata he!
2 Ani okaneɔ wɔmaŋ wiemɔi amli woji tɛtrɛbii lɛ ni okɛtsuɔ nii yɛ shiɛmɔ mli? Shiɛlɔi pii feɔ Biblia mli nikasemɔ kɛ wɔmaŋ nɛɛ mli wiemɔi etɛ ni wɔtsi ta yɛ yiteŋgbɛ nɛɛ ateŋ ekome. Kɛ eji anɔkwale akɛ ofeɔ nakai lɛ, belɛ mɛni hewɔ otaooo shiatsɛmɛi ni kaneɔ Twi, Ewe loo Ga lɛ koni oha amɛ woji tɛtrɛbii lɛ eko be fɛɛ be?
3 Amɛyeɔ Amɛbuaa yɛ Gbɛi Pii Anɔ: Fɔlɔi agbɛtsɔɔmɔ he miihia gbekɛbii. Aje gbɛ ato “Young People Ask. . . ” ni jeɔ kpo yɛ Awake! mli lɛ he gbɛjianɔ aha obalaŋtai ni yɔɔ je lɛŋ he fɛɛ he lɛ koni amɛnyɛ amɛdamɔ ŋmɛnɛ naagbai lɛ anaa. Fɔlɔi komɛi halaa enɛ mli saji komɛi ni amɛkɛ amɛwekui kaseɔ, ni anuɔ shishi ahaa amɛ. Kɛha mɛi ni kaneɔ Twi loo Ewe lɛ, weku nikasemɔ ni aaajɛ wolo tɛtrɛɛ lɛ mli afee lɛ hi ejaakɛ atsɔɔɔ wiemɔ ko shishi. No hewɔ lɛ nikasemɔ lɛ yaa yɔɔ ni gbekɛbii lɛ nuɔ shishi ejaakɛ amɛmaŋ wiemɔ mli afeɔ yɛ.
4 Woji tɛtrɛbii ni yɔɔ wɔmaŋ nɛɛ mli wiemɔi amli lɛ haa wɔleɔ wɔmaŋ nɛɛ mli wiemɔi lɛ ni wɔnyɛɔ wɔtsɔɔ nɔ wɔpɛiɔ saji amli. Kɛ owieɔ Ewe, Twi loo Ga lɛ ani ole gbɛi nɛɛ yɛ wɔmaŋ wiemɔi amli: agama lizard, potato, sweet potato, aloo endometrium? Abaanyɛ ana amɛshishinumɔ lɛ yɛ wɔmaŋ nɛɛ mli woji tɛtrɛbii lɛ ekomɛi amli.
5 Abaanyɛ akɛ woji tɛtrɛbii ni yɔɔ wɔmaŋ nɛɛ mli wiemɔi amli hu lɛ atsu nii yɛ kaka skul loo nikanemɔ kɛ niŋmaa kasemɔ skul lɛ mli aha mɛi ni miihe ale nikanemɔ kwraa lɛ. Yɛ be mli ni ebaaha amɛshishinumɔ ni kɔɔ ŋmalɛi lɛ ahe lɛ mli akwɔ ni eha amɛ nilee yɛ adesa shihilɛ mli nibii ahe lɛ mli alɛɛ lɛ, eeeha nikaselɔi lɛ ahe asa yɛ amɛ nikanemɔ mli hu.
6 Akɛni asafoi pii kaseɔ wiemɔi etɛ nɛɛ ateŋ ekome yɛ Buu-Mɔɔ Nikasemɔ lɛ shishi hewɔ lɛ, ani oheɔ Buu-mɔɔ lɛ eko ohaa bo diɛŋtsɛ ohe kɛ eweku lɛ mlibii lɛ? Mɛi ni le blɔfo lɛ po naa akɛ esa akɛ amɛfeɔ nakai kɛ aakase Buu-Mɔɔ lɛ yɛ wɔmaŋ nɛɛ mli wiemɔi amli lɛ. Nɔ hewɔ ji akɛ, aheɔ be ni ewa akɛ aaatsɔɔ blɔfo wiemɔi komɛi kɛ Biblia mli ŋmalɛi kɛ je lɛŋ woji amli wiemɔi komɛi ashishi jogbaŋŋ amrɔ nɔŋŋ kɛba Ga mli yɛ be mli ni ohaa hetoo lɛ. Anaa naagba nɛɛ naa tsabaa ahaa mɔ ni le blɔfo ni miikwɛ Ga Buu-Mɔɔ lɛ mli lɛ.
7 Kɛji akɛ oheko Ga Buu-Mɔɔ lɛ eko lɛ, mɛni hewɔ obiii mɛi ni kwɛɔ nɔ lɛ koni onine ashɛ eko nɔ? Obaanyɛ oshɛ eko hu oha ohe. Kɛ nɔ ni ashɛ lɛ ba lɛ, hemɔ eko ni emli saji ni eba yɛ amɛbe naa pɛpɛɛpɛ lɛ ahe aba sɛɛnamɔ aha omumɔŋ kɛ shihilɛ mli nɔyaa. Kɛ wɔkɛ ŋaawoi ni yɔɔ yiteŋgbɛ nɛɛ tsu nii lɛ belɛ wɔmiijie hiɛsɔɔ kpo wɔha woji tɛtrɛbii ni yɔɔ wɔmaŋ nɛɛ mli wiemɔi amli lɛ.