Nyɛhiɛa Ekomefeemɔ Mli Akɛ Kristofoi Ni Kɛ Amɛhe Woo Maŋ Saji Amli
1 “Nyɔŋmɔ jamɔ ni he tse ni ehe bɛ muji ko yɛ Nyɔŋmɔ kɛ Tsɛ lɛ hiɛ ji enɛ: akɛ . . . mɔ [a]to ehe kɛjɛ je nɛŋ koni ekawo ehe muji.” (Yak. 1:27) Te esa akɛ akɛ shishitoo mla nɛɛ atsu nii aha tɛŋŋ kɛ abɔi maŋkwramɔŋ nifeemɔi lɛ? Kristofoi jɛɛɛ je lɛ mli, taakɛ bɔ ni Yesu hu jɛɛɛ je lɛ mli lɛ;’ amɛkɛ amɛhe wooo maŋ saji amli.—Yoh. 17:16.
2 Reasoning wolo lɛ tsɔɔ maŋ saji ni akɛ he wooo mli lɛ shishi yɛ baafa 269 akɛ “shidaamɔ ni mɛi ni fiii kui enyɔ loo nɔ ni fa fe nakai ni kɛ amɛhe shiɔ mple lɛ ateŋ mɔ ko loo amɛ fɛɛ amɛsɛɛ lɛ kɔɔ. . . . Anɔkwa Kristofoi ebɔ mɔdɛŋ waa akɛ amɛaahiɛ amɛhe ni amɛkɛwooo maŋ saji amli lɛ mli kpɛŋŋ, yɛ je lɛŋ kui ni kɛ amɛhe beɔ lɛ agbɛfaŋ, yɛ maŋ fɛɛ maŋ mli, kɛ agbɛnɛ yɛ shihilɛi sɔrɔtoi hu fɛɛ shishi. Amɛtsiii nɔ ni mɛi krokomɛi feɔ, tamɔ nɔ ni kɔɔ . . . maŋkwramɔŋ kuu mlibotemɔ, maŋkwramɔŋ gbɛhe taomɔ, kɛ oshikifɔɔ he lɛ naa. Shi amɛ diɛŋtsɛ lɛ, amɛjaa Yehowa, Biblia mli Nyɔŋmɔ lɛ pɛ; amɛjɔɔ amɛwala nɔ kwraa amɛha lɛ ni amɛfiɔ e-Maŋtsɛyeli lɛ sɛɛ kwraa kɛmɔɔ shi.”
3 Nɔ ni enɛ tsɔɔ ji akɛ, Yehowa Odasefoi ni yɔɔ jeŋ fɛɛ lɛ kɛ amɛhe haaa ni afɔ oshiki aha amɛ ni akɛhala amɛ awo maŋkwramɔŋ gbɛhe ko mli, ni amɛfataaa maŋkwramɔŋ gbɛjianɔtoi ahe, ni amɛkɛ amɛhe wooo oshikifɔɔ ni akɛhalaa mɛi lɛ mli, yɛ Kristo, amɛhiɛnyiɛlɔ lɛ kasemɔ mli. (Yoh. 6 15; 18:36) Yiŋtoo ni yɔɔ shidaamɔ nɛɛ sɛɛ ji akɛ “jeŋ muu lɛ fɛɛ ka mɔ fɔŋ lɛ mli,” no hewɔ lɛ mɔ fɛɛ mɔ ni “sumɔɔ akɛ etsɔ je nɛɛ hedɔlɔ lɛ etsɔ Nyɔŋmɔ henyɛlɔ.”—1 Yoh. 5:19; Yak. 4:4; Okɛto Mateo 4:8-10 he.
4 Ani enɛ tsɔɔ akɛ, belɛ, akutsoŋ he ni amɛyɔɔ lɛ shihilɛ kpakpa hamɔ jeee Yehowa Odasefoi lɛ ahe sane ko? Dabi kwraa! Akɛ anɔkwa Kristofoi lɛ, amɛyaa nɔ amɛhiɔ shi akɛ maŋbii kpakpai kɛtsɔ amɛtoo ni amɛwoɔ kɛ amɛhe ni amɛkɛwoɔ nitsumɔi ni haa akutsoŋ shihilɛ yaa hiɛ lɛ mli lɛ nɔ. Amɛhiɛɔ jeŋba kpakpa hu mli yɛ shia, skul, kɛ amɛnitsumɔ hei hu. Akɛni amɛtsiɔ amɛhe kɛjɛɔ jeŋba shara, daatɔɔ, tsofai fɔji kɛ nitsumɔ, kɛ efɔji krokomɛi fɛɛ he hewɔ lɛ, anɔkwa Kristofoi kɛ amɛwekui lɛ kɛ jatsu ko efɔɔɔ akutsoŋ he ni amɛyɔɔ lɛ nɔ, shi moŋ amɛyeɔ amɛbuaa ni ehaa emli shihilɛ yaa hiɛ.
5 Anɔkwa Kristofoi le kɛjɛ Biblia lɛ mli akɛ tsabaa koome pɛ ni yɔɔ kɛha adesai anaagbai babaoo nɛɛ fɛɛ ji Nyɔŋmɔ Maŋtsɛyeli ni etsɛŋ ni ebaakpa enɔyeli lɛ mli kɛbashɛ shikpɔŋ nɛɛ nɔ lɛ. (Dan. 2:44; Kpoj. 21:3-5) No hewɔ lɛ, ni amɛkɛ amɛhe aaawo maŋkwramɔŋ naataomɔi amli moŋ lɛ, Yehowa Odasefoi kɛ ekaa yeɔ amɛbuaa amɛkuuŋbii koni amɛnyiɛ gbɛ ni kɛ mɔ yaa naanɔ wala mli lɛ nɔ.(1 Tim. 4:8; Yoh. 3:16) Akɛni amɛkɛ amɛjwɛŋmɔ maa Maŋtsɛyeli hiɛnɔkamɔ ni ma shi Shiŋŋ lɛ nɔ hewɔ lɛ, anɔkwa Kristofoi hiɛɔ amɛ ekomefeemɔ kɛ amɛhe ni amɛkɛwooo maŋ saji amli lɛ mli yɛ jeŋ ni mli egbala mli.—1 Kor. 1:10; 1 Pet. 4:8.