Ani Abaanyɛ Atsiɛ Miishɛɛ Iɛ Hiɛ Ekoŋŋ
1 “Miishɛɛ ji mɛi ni hiɛ yɔɔ amɛmumɔŋ hiamɔ nii anɔ lɛ.” (Mat. 5:3, NW) Shishinumɔ babaoo yɛ nɛkɛ wiemɔi nɛɛ ni Yesu wie yɛ Gɔŋ nɔ Shiɛmɔ lɛ mli lɛ he. Adesai ateŋ mɛi pii ji mɛi ni yooo akɛ mumɔŋ nibii ahe hiaa amɛ bɔni afee ni amɛha amɛshihilɛ afee miishɛɛ kɛ nɔ ni yiŋtoo hu yɔɔ he. Mɛi komɛi hu yɛ ni be ko lɛ amɛhiɛ ba amɛmumɔŋ hiamɔ nii anɔ, shi kɛkɛ ni amɛlaaje lɛ ekoŋŋ. Nɔ ko ha amɛhe jɔ kwraa yɛ mumɔŋ nibii agbɛfaŋ. Ni amɛtsi amɛhe kɛjɛ nii ni yɔɔ sɛɛnamɔ kɛha amɛ lɛ he. Sanebimɔ lɛ ji, Ani abaanyɛ atsiɛ nɛkɛ gbɔmɛi nɛɛ amiishɛɛ lɛ hiɛ ekoŋŋ? Miishɛɛ sane ji, yɛ mɛi komɛi agbɛfaŋ lɛ abaanyɛ.
2 Ekolɛ ole mɔ ko ni kɛ Yehowa Odasefoi kase Biblia lɛ afii babaoo nɛ, ekolɛ beni eji gbekɛ po, shi eyaaa nɔ ekɛ Nyɔŋmɔ webii lɛ ebɔɔɔ dɔŋŋ. Shi kɛlɛ, ekolɛ Biblia lɛ tsɔɔmɔi kɛ jalɛ Shishitoo mlai lɛ ekomɛi kɛ̃ eka nakai mɔ lɛ jwɛŋmɔ mli ni enyɛɔ ekaiɔ lolo. Beni je lɛŋ shihilɛ yaa nɔ efiteɔ babaoo ni shihilɛ hu tsakeɔ yɛ mɔ wala be mli nɛɛ, ehaa akaiɔ nibii ni akase tsutsu lɛ, ni ekolɛ mɔ lɛ baaku esɛɛ kɛba Nyɔŋmɔ ŋɔɔ ekoŋŋ ni eeefee klalo akɛ eeekase Biblia mli nilee babaoo efata he. Nɛkɛ gbɔmɛi nɛɛ aŋɔɔ ni wɔɔya kɛ yiŋtoo akɛ wɔkɛ amɛ baaje Biblia mli nikasemɔ shishi ekoŋŋ lɛ he baanyɛ aba sɛɛnamɔ babaoo diɛŋtsɛ.
3 Eka shi faŋŋ akɛ esa akɛ wɔbɔ mɔdɛŋ yɛ be kɛ bei amli ni wɔya mɛi ni ba Kaimɔ lɛ shishi lɛ aŋɔɔ. Ha amɛle akɛ okɛ miishɛɛ susuɔ amɛmumɔŋ shihilɛ he waa diɛŋtsɛ, koni oha amɛ hegbɛ akɛ okɛ amɛ baakase Biblia lɛ. Esa akɛ abɔ mɔdɛŋ waa hu ni akɛye abua mɛi ni ba “Mɛi ni Sumɔɔ Nyɔŋmɔ Heyeli” Kpokpaa Wulu nɔ Kpee lɛ kɛ gbii enyɔ kɛ gbi kome kpee ni afee nyɛsɛɛ nɛɛ yɛ kpokpaa lɛ nɔ lɛ shishi lɛ hu. Yɛ shihilɛ komɛi amli lɛ, ebaahi jogbaŋŋ akɛ shiɛlɔ kroko baaya mɔ ko ni enikasemɔ lɛ sɛɛ fo yɛ hiɛyaa ni eyabaaa hewɔ lɛ ŋɔɔ.
4 Eji anɔkwale akɛ, wɔkpaa gbɛ akɛ gbɔmɛi ni wɔkɛ amɛ kaseɔ nii lɛ kɛ hiɛdɔɔ baasusu Yehowa jamɔ he, ni amɛjie ekaa kpo yɛ amɛ Biblia lɛ kasemɔ hu mli. Shi yɛ wɔgbɛfaŋ lɛ, wɔmiitao wɔna nɔmimaa akɛ wɔbɔ mɔdɛŋ bɔ ni sa ni wɔkɛaaye wɔbua amɛ, ni ákɛ wɔbaanyɛ wɔnu he yɛ mɛi krokomɛi ahe tamɔ bɔ ni bɔfo Paulo nu he beni ewie akɛ, “miyeee nyɛteŋ mɔ ko mɔ ko la yi sɔ” lɛ.—Bɔf. 20:26.