Hiɛsɔɔ ni Wɔɔna Wɔha Kpɔmɔ Nɔ Lɛ
1 Suɔmɔ ni ayɔɔ akɛ aaajie hiɛsɔɔ kpo yɛ naanyo loo wekunyo ko ni egbo he lɛ jeɔ kpo yɛ hiŋmɛigbelemɔi fɛɛ mli. Nɛkɛ suɔmɔ nɛɛ mli baanyɛ awa waa titri lɛ kɛji suɔlɔ lɛ gbo yɛ mɛi krokomɛi ayiwalaheremɔ hewɔ. Mɛi fɛɛ ni yɔɔ naanɔ wala he hiɛnɔkamɔ lɛ yɛ yiŋtoi ni mli wa fe fɛɛ ni amɛkɛaajie hiɛsɔɔ kpo yɛ kpɔmɔ nɔ lɛ he kɛtsɔ Kristo gbele lɛ Kaimɔ ni amɛaaya yɛ April 6 lɛ nɔ.—2 Kor. 5:14; 1 Yoh. 2:2.
2 Ohiɛ Asɔ Yehowa Suɔmɔ Lɛ: Kwɛ bɔ ni esa jogbaŋŋ akɛ wɔɔjie wɔhiɛsɔɔ ni kwɔ fe fɛɛ kpo wɔtsɔɔ wɔ Ejurɔfeelɔ kpele fe fɛɛ, Yehowa Nyɔŋmɔ, mɔ ni kɛ kpɔmɔ nɔ lɛ ha lɛ! (1 Yoh. 4:9, 10) Bɔ ni Yehowa suɔmɔ lɛ mli kwɔ ha lɛ jeɔ kpo yɛ nikeenii ni yɔɔ sɔrɔto kwraa ni ekɛha akɛ wɔkpɔmɔ nɔ lɛ mli, jeee bɔfoi anɔkwafoi akpekpei abɔ lɛ ateŋ mɔ kome ko kɛkɛ, shi moŋ e-Bi koome ni esumɔɔ lɛ fe fɛɛ lɛ. (Abɛi 8:22, 30) Nɛkɛ Bi ni le Yehowa fe fɛɛ, Yesu Kristo nɛɛ kaiɔ wɔ akɛ: “Nɛkɛ Nyɔŋmɔ sumɔ je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.”—Yoh. 3:16.
3 Ohiɛ Asɔ Yesu Kristo Suɔmɔ Lɛ: Nakai nɔŋŋ hu esa jogbaŋŋ akɛ wɔɔjie hiɛsɔɔ ni mli kwɔ kpo wɔtsɔɔ Yesu Kristo, mɔ ni kɛ esusuma ha akɛ kpɔmɔ nɔ kɛha mɛi pii lɛ. (Mat. 20:28) Esuɔmɔ lɛ jeɔ kpo yɛ bɔ ni ejɛ esuɔmɔ mli eba ehe shi eha Yehowa suɔmɔnaa nii kɛha lɛ yɛ kpɔmɔ nɔ lɛ gbɛfaŋ lɛ mli. Susumɔ bɔ ni eŋmɛɛ shihilɛi kpakpai ni eyɔɔ mli lɛ he, beni efata e-Tsɛ kɛ bɔfoi anɔkwafoi akpekpei akpei abɔ lɛ ahe, koni ebatsɔ wɔkpɔlɔ lɛ he okwɛ. Kaa ni ji eshafeelɔi ateŋ shihilɛ kɛ ehe shi ni eeeba eha amɛ, aloo le ni ele akɛ kpɔmɔ nɔ ni ekɛaaha lɛ baabi ni egbo lɛ haaa enijiaŋ aje wui. Shi moŋ, “eŋɔ tsulɔ su efɔ enɔ, etsɔ tamɔ gbɔmɔ, ni eshihilɛ gbɛfaŋ hu . . . eba ehe shi ni ebo toi kɛtee gbele mli, kɛtee sɛŋmɔtso nɔ gbele mli tete.”—Filip. 2:5-8.
4 Yɛ Mɛɛ Gbɛ nɔ Wɔjieɔ Hiɛsɔɔ Kpo yɛ Kpɔmɔ Nɔ lɛ He?: Esa akɛ hiɛsɔɔ ni wɔjieɔ lɛ kpo yɛ kpɔmɔ nɔ lɛ he lɛ aya shɔŋŋ fe oyiwala dɔŋŋ folo kɛkɛ. Ehe miihia ni wɔkase gbɛjianɔ ni Nyɔŋmɔ eto kɛha yiwalaheremɔ kɛtsɔ Yesu Kristo nɔ lɛ he nii. (Yoh. 17:3) No sɛɛ lɛ esa akɛ wɔna kpɔmɔ nɔ lɛ mli hemɔkɛyeli. (Bɔf. 3:19) Esa akɛ ekanya wɔ koni wɔ hu wɔkɛ wɔhe aha Yehowa Nyɔŋmɔ yɛ henɔjɔɔmɔ mli koni abaptisi wɔ. (Mat. 16:24) Beni wɔhiɔ shi yɛ wɔhenɔjɔɔmɔ lɛ naa lɛ, esa akɛ wɔkɛ hegbɛ fɛɛ hegbɛ ni wɔnaa lɛ atsu nii ni wɔwie naakpɛɛ kpɔmɔ nɔ gbɛjianɔtoo kɛha yiwalaheremɔ lɛ he wɔtsɔɔ mɛi krokomɛi.—Rom 10:10.
5 Nɛkɛ taomɔ nii nɛɛ ahe ni wɔɔshɛ lɛ efeee wɔteŋ mɔ ko mɔ ko nyɛmɔi. Mika 6:8 maa nɔ mi ehaa wɔ akɛ: “Ajaje . . . nɔ ni Yehowa biɔ yɛ odɛŋ atsɔɔo: no ji akɛ ofee nɔ ni ja gbɛ, osumɔ ejurɔfeemɔ, ni okɛ O-Nyɔŋmɔ lɛ anyiɛ yɛ heshibaa mli.” Nakai nɔŋŋ hu David kɛɛ Yehowa akɛ: “Oŋɔɔ fɛɛ jɛ, ni odɛŋ wɔna kɛjɛ ni wɔŋɔhao nɛɛ.”—1 Kron. 29:14.
6 Bɔni afee ni wɔha hiɛsɔɔ ni wɔyɔɔ kɛha Yehowa gbɛjianɔtoo ni yɔɔ naakpɛɛ nɛɛ mli awa lɛ, mɛni hewɔ nyɛkaneee Gbɔmɔ ni Fe Fɛɛ wolo lɛ yitsei 112 kɛyashi 126 ni nyɛsusu he akɛ weku, dani eshɛ gbi ni afeɔ Kaimɔ lɛ? Yɛ nɛkɛ gbɛ nɔ lɛ, wɔ fɛɛ wɔbaanyɛ wɔsaa wɔhe jogbaŋŋ yɛ jwɛŋmɔ mli koni wɔna hiɛsɔɔ wɔha kpɔmɔ nɔ lɛ yɛ Kaimɔ gbijurɔyeli ni abaafee yɛ April 6, 1993 lɛ shishi.