Gbele ni kɛ Naanɔ Wala he Hiɛnɔkamɔ Haa lɛ he Gbijurɔyeli
1 Yɛ hulushinyɔɔ sɛɛ yɛ April 6, 1993 lɛ, wɔbaaye Wala Lumɔ lɛ gbele lɛ he gbi Jurɔ. (Bɔf. 3:15) Lɛlɛŋ, esa jogbaŋŋ diɛŋtsɛ akɛ wɔkai Yesu Kristo shihilɛ kɛ egbele. Wɔ hiɛnɔkamɔ diɛŋtsɛ akɛ wɔɔhi shi kɛya naanɔ lɛ damɔ Yesu la ni afɔse ashwie shi lɛ nɔ.
2 Kaimɔ lɛ maa bɔ ni Kristo gbele lɛ he hiaa ha yɛ Yehowa yiŋtoo he nitsumɔ mli lɛ nɔ mi. Nɔ ni fata nakai yiŋtoo lɛ he ji adesa afɔleshaa ni eye emuu ni he hiaa kɛha Adam shwiei akpɔmɔ lɛ kɛhamɔ, koni ekɛ hegbɛ aha gbɔmɛi akpekpei toi akpei abɔ ni amɛna hemɔkɛyeli ni amɛhi shi kɛya naanɔ yɛ paradeiso shikpɔŋ nɔ.—Yoh. 3:16.
3 Mɛi fɛɛ ni sumɔɔ anɔkwale kɛ wala lɛ miikpa gbɛ akɛ amɛbaaye Nuŋtsɔ lɛ Gbɛkɛnaashi Niyenii lɛ ni amɛkɛfee toiboo amɛha Yesu famɔ lɛ. (Luka 22:19) Mɛni wɔbaanyɛ wɔfee aŋkroaŋkro ni wɔkɛtsɔɔ hiɛsɔɔ ni wɔyɔɔ kɛha Kristo kpɔmɔ afɔleshaa ni ekɛha lɛ? Akɛni wɔyooɔ bɔ ni nɛkɛ gbijurɔyeli nɛɛ he hiaa ha hewɔ lɛ, gbɛjianɔtoo kpakpa he miihia waa. Mɛɛ hesaamɔi ofeɔ kɛha nɛkɛ nifeemɔ krɛdɛɛ nɛɛ?
4 Hesaamɔ ni Tsɔɔ Hiɛ he Miihia: Yɛ anɔkwale mli lɛ, wɔbaakwɛ koni weku lɛ mli mɔ fɛɛ mɔ aya nifeemɔ lɛ shishi. Esa akɛ wɔsaa wɔhe yɛ jwɛŋmɔŋ hu kɛtsɔ Biblia ŋmalɛi kukuji ni atsɔɔ yɛ 1993 Calendar lɛ nɔ kɛha April 1-6 lɛ kanemɔ kɛ enɔ Jwɛŋmɔ nɔ. Ebaabi waa akɛ wɔkɛ saji ni tsɔɔ bɔ ni Kaimɔ lɛ he hiaa hu lɛ aaafata wɔ diɛŋtsɛ kɛ wɔweku nikasemɔ hu he yɛ gbii ni baatsɔ April 6 hiɛ lɛ amli. Too gbɛjianɔ ni oshɛ jɛmɛ mra, ni kɛ agbe Kaimɔ lɛ naa hu lɛ, hii shi fioo koni okɛhere mɛi heei ni ekolɛ no ji klɛŋklɛŋ kwraa ni amɛbaa nifeemɔ lɛ shishi lɛ ahiɛmɛɛ.
5 Yɛ otsi ni eshwɛ dani abaaye Kaimɔ nɛɛ mli fɛɛ lɛ,fɔɔ mɛi fɛɛ ni yɔɔ wiemɔ lɛ he miishɛɛ ni ole amɛ lɛ anine kɛba gbijurɔyeli lɛ shishi. Akɛ ninefɔɔ woji ni akala efata woji ni akɛmaje asafoi lɛ yɛ February mli lɛ he. Kɛji okɛmiiha lɛ, kaimɔ ni otsɔɔ mɛi ni yɔɔ he miishɛɛ lɛ hé ni abaaye gbijurɔ lɛ yɛ kɛ be mli ni abaafee yɛ he ni nyɛyɔɔ lɛ. Ŋmalamɔ mɛi fɛɛ ni osumɔɔ ni ofɔ amɛ nine lɛ agbɛi. Ani mɛi fɛɛ ni sumɔɔ ni amɛba lɛ yɛ tsɔne ni amɛkɛ baaba? Kɛ jeee nakai lɛ, mɛni obaanyɛ ofee ni okɛye obua amɛ? Kɛ gbe yɛ okar lɛ mli lɛ, mɛni hewɔ obiii onukpai lɛ kɛji mɔ ko yɛ ni tsɔne he baahia lɛ kɛba?
6 Akɛni enɛ ji gbijurɔyeli ni he hiaa fe fɛɛ yɛ afi lɛ mli, ni aakpa gbɛ akɛ mɛi babaoo baaba hewɔ lɛ, ehe baahia ni onukpai lɛ atsɔ hiɛ ato he gbɛjianɔ (1 Kor. 14:40) Kɛ eshwɛ otsi loo nɔ dani April 6 baashɛ lɛ, onukpai lɛ baato gbɛjianɔ kɛha amɛkɛ mɛi ni baaye abua kɛ gbijurɔyeli lɛ he nitsumɔ lɛ akpee krɛdɛɛ ko, koni amɛkwɛ akɛ-amɛnu bɔ ni amɛ baato shitaramɔ he gbɛjianɔ amɛha kɛ bɔ ni akɛ okadi nibii lɛ baaha mɛi lɛ hu lɛ shishi jogbaŋŋ. Kɛ akɛ nitsumɔ ewo odɛŋ akɛ oye obua yɛ gbijurɔyeli lɛ shishi akɛ mɔ ni haa mɛi asɛi aloo mɛi ni kɛ nibii lɛ baaha lɛ ateŋ mɔ ko lɛ, no lɛ kwɛmɔ ni okɛ gbɛtsɔɔmɔi ni onukpai lɛ kɛbaaha yɛ saji nɛɛ ahe lɛ atsu nii jogbaŋŋ kɛmɔ shi. Kɛji onukpai lɛ kwɛ kaimɔi ni yɔɔ akrabatsa lɛ mli yɛ baafa 7 lɛ, amɛbaanyɛ amɛna kɛji atsɔ hiɛ ato gbɛjianɔ fɛɛ ni he hiaa kɛha mɛi ni baaha mɛi asɛi, mɛi ni kɛ nibii lɛ baaha, nibii lɛ, kɛ wielɔ lɛ diɛŋtsɛ hu fɛɛ lo.
7 Kristo nyɛmimɛi lɛ fioo ko pɛ eshwɛ yɛ shikpɔŋ nɔ ŋmɛnɛ, ni yɛ wɔsɛɛ be ko ni etsɛŋ tsɔ mli lɛ. Nuŋtsɔ lɛ Gbɛkɛnaashi Niyenii lɛ yeli lɛ baaba enaagbee (1 Kor. 11:25, 26) Bei abɔ ni wɔyɔɔ hegbɛ lolo akɛ wɔkɛfee nakai nɛɛ, eba akɛ wɔɔya nɔ wɔye gbele ni haa wɔ naanɔ wala he hiɛnɔkamɔ nɛɛ he gbijurɔ yɛ gbɛ ni sa nɔ.