Bɔ Ni Kaimɔ Lɛ He Hiaa Ha
1 Ayeɔ bɔ ni Kaimɔ lɛ he hiaa ha lɛ he odase yɛ nɔ ni Petro wie yɛ Nuŋtsɔ Yesu Kristo he lɛ mli, akɛ: “Yiwalaheremɔ ko bɛ mɔ ko mli; ni asaŋ gbɛi kroko hu bɛ ŋwɛi shishi ni aŋɔha gbɔmɛi ni sa akɛ atsɔ nɔ ahere wɔyiwala.”—Bɔf. 4:12.
2 Hɛɛ, wɔyiwalaheremɔ damɔ wɔ-Nuŋtsɔ kɛ Kpɔlɔ, Yesu Kristo gbele lɛ nɔ. Kwɛ bɔ ni esa jogbaŋŋ akɛ Yesu diɛŋtsɛ kɛ famɔ ha yɛ egbele lɛ kaimɔ he, akɛ: “Nyɛfea enɛ ni nyɛŋɔkai mi.” (Luka 22:19) No hewɔ lɛ, ebɛ naakpɛɛ akɛ mɛi ayifalɛ ni fe fɛɛ ji mɛi ni yakpeɔ daa afi kɛha Kaimɔ lɛ, ni yibɔ ni fa fe fɛɛ ni ana ji mɛi 139,351 ni ba nyɛsɛɛ afi lɛ yɛ Ghana, kɛ yibɔ ni fe fɛɛ hu, ni ji 11,431,171 ni tee yɛ jeŋ fɛɛ.
3 Nɔ Ni Ba Yesu Nɔ Yɛ Wɔ Hewɔ: Beni esusuɔ piŋmɔ shihilɛi ni baaba enɔ yɛ eshikpɔŋ nɔ sɔɔmɔ lɛ naagbee gbɛ lɛ he lɛ, ena nɔ, ni “ewerɛ bɔi ehe hoo ni ehao.” (Mat. 26:37) Ni ekɛ nɛkɛ kpojiemɔ nɛɛ ha Petro, Yohane kɛ Yakobo yɛ Getsemane abɔɔ lɛ mli, ni ekɛɛ: “Misusuma miihao kɛyashi gbele mli po.” (Mat. 26:38) Beni ekpaa Yehowa fai lɛ, “ehe latsaa tsɔ tamɔ la kulibii ni tsereɔ shwieɔ shi” (Luka 22:44) Lɛlɛŋ, ekɛ “bolɔmɔi ni naa wa kɛ yaafonui” sɔle waa kɛ ekaa eha Yehowa ni “abo lɛ toi hu, ejaakɛ ebuɔ Nyɔŋmɔ.”—Heb. 5:7.
4 Kɛkɛ ni ekojomɔ ni batsɔ jalɛsaneyeli hiɛtsɔmɔ-kɛ-shibumɔ kpele fe fɛɛ ni eba yɛ yinɔsane mli da lɛ tsa nɔ kɛba. Kojolɔi ni hiɛ ehe jwɛŋmɔ fɔŋ momo lɛ ekpɛ amɛyiŋ yɛ kojomɔ lɛ he po dani abɔi lɛ kojomɔ lɛ. (Mat. 26:3, 4) Akɛni amɛnifeemɔi lɛ ejaaa hewɔ lɛ, amɛmɛ aahu kɛyashi je na ni duŋ wo dani amɛyamɔ Yesu, ni no sɛɛ lɛ amɛyakojo lɛ yɛ duŋ mli! (Luka 22:52-54) Kwɛ bɔ ni eeefee dɔlɛ waa kɛha Yesu Kristo akɛ aaafolɔ enaa akɛ ebɔ musu eshi eŋwɛi Tsɛ lɛ. Agbala lɛ mai, akala lɛ atswɛrɛ, atsɛrɛ lajɔ ashwie ehe, akɛ kplebi yi lɛ, ni naagbee lɛ, akɛ lɛ wo piŋmɔ shihilɛ ni naa wa, ni ji sɛŋmɔ ni asɛŋ lɛ yɛ tso nɔ lɛ mli. Eyɛ mli akɛ jeee nibii ni ba Yesu nɔ yɛ wɔ hewɔ lɛ fɛɛ nɛɛ moŋ, shi ani etsirɛɛɛ wɔ ni wɔna hiɛsɔɔ kpele wɔha Yesu suɔmɔ ni nɔ kwɔ fe fɛɛ lɛ?
5 Nii Ni Wɔkaseɔ Kɛjɛɔ Yesu Ŋɔɔ: Eyɛ faŋŋ akɛ, Yesu etswa efai shi akɛ ebaafee Nyɔŋmɔ suɔmɔnaa nii, ni eŋmɛŋ gbɛ ni nɔ ko kwraa agbala ekɛ Nyɔŋmɔ suɔmɔ lɛ teŋ. Esa akɛ enɛ afee anɔkwale yɛ wɔ hu wɔgbɛfaŋ, ni jaramɔ shihilɛ ni wɔkɛkpeɔ yɛ je nɛŋ, yɛ anɔkwale lɛ loo yɛ nɔ kroko hewɔ lɛ kɔɔɔ he eko. (Rom. 8:35-39) Yesu hemɔkɛyeli lɛ ye je lɛ nɔ kunim. Esa akɛ enɛ afee anɔkwale yɛ wɔhemɔkɛyeli lɛ he. (1 Yoh. 5:4) Beni oyaa Yesu gbele lɛ Kaimɔ lɛ shishi yɛ Jufɔ, April 6 gbɛkɛnaashi lɛ, eba akɛ ooosusu bɔ ni nɛkɛ be nɛɛ he hiaa ha lɛ he kɛtsɔ Yesu nanemaa hei lɛ asɛɛnyiɛmɔ kpaakpa nɔ, yɛ sɔɔmɔ krɔŋŋ lɛ fãi sɔrɔtoi fɛɛ amli. Ni no lɛ, wɔbaanyɛ wɔkpa naanɔ wala nikeenii, ni kɛ jeee Yesu kpɔmɔ nɔ lɛ kulɛ, wɔnine nyɛŋ ashɛ nɔ lɛ gbɛ.—1 Pet. 2:21.