Yearbook Lɛ—Hewalɛwoo Nitoohe
1 Amaniɛbɔi kɛ niiashikpamɔi ni kɔɔ Yehowa naakpɛɛ nitsumɔi ahe lɛ yaa nɔ eshɛjeɔ Nyɔŋmɔ sɔɔlɔi amii. (Hiob 38:4, 7; Abɛi 25:25; Luka 7:22; Bɔf. 15:31) No hewɔ ni Yearbook of Jehovah’s Witnesses lɛ ji hewalɛwoo nitoohe lɛ.
2 Yearbook lɛ eko fɛɛ eko kɛ amaniɛbɔi ni jɛ je lɛŋ he fɛɛ he ni kɔɔ Yehowa Odasefoi anitsumɔi kɛ nɔ ni amɛtsu he nii ni tswaa mɔ emaa shi haa. Niiashikpamɔi ni kanyaa mɔ hemɔkɛyeli lɛ maa Yehowa gbɛtsɔɔmɔ, ehebuu, kɛ ejɔɔmɔ ni yɔɔ ewebii anɔ lɛ nɔ mi. Yearbook lɛ gbaa saji ni kɔɔ hii kɛ yei ni feɔ ekaa ni shi amɛwekui, nanemɛi kɛ amɛmaji amli ni amɛkɛ Biblia mli anɔkwalei ayaha mɛi ni yɔɔ shikpɔŋ lɛ nɔ he fɛɛ he kɛ ŋshɔkpɔi babaoo anɔ lɛ he.
3 Yearbook lɛ ekanya ekanelɔi babaoo koni amɛha amɛsɔɔmɔ ni amɛkɛhaa Nyɔŋmɔ lɛ aya hiɛ. Nikanelɔ ko ŋma akɛ: “Minyɛɛɛ mikɛ oyaiyeli tsɔ akane. Nɔ ni mitee nɔ mikane momo lɛ ewo mi hewalɛ waa. Ehaa minuɔ he akɛ manyɛ mikɛ mihe awo sanekpakpa lɛ shiɛmɔ mli babaoo kɛ mina nɔ ni mɛi krokomɛi nyɛɔ amɛtsuɔ yɛ nɔnyɛɛ shishi lɛ.”
4 Daa afi, kɛjɛ 1927 lɛ, Yearbook of Jehovah’s Witnesses lɛ efee nitoohe diɛŋtsɛ kɛha amaniɛbɔi kɛ niiashikpamɔi ni woɔ mɔ hewalɛ. Ani oona nɛkɛ hewalɛwoo jɛɛhe ni yɔɔ sɔrɔto nɛɛ he sɛɛ kɛmiimɔ shi? Kɛ ooonyɛ ofee nakai lɛ, no lɛ kwɛmɔ ni okane Yearbook lɛ kɛ onine shɛ nɔ klɛŋklɛŋ kwraa lɛ. Agbɛnɛ tii saji pɔtɛɛ komɛi ni he hiaa ni baanyɛ awo bo kɛ oweku lɛ hewalɛ lɛ mli, yɛ afi muu lɛ fɛɛ mli.