Sanebimɔ He

◼ Te esa akɛ atsu saji ahe nii aha tɛŋŋ kɛ shiatsɛ ko ma nɔ mi veveeve akɛ Yehowa Odasefoi akaba eshia dɔŋŋ lɛ?

Eyɛ mli akɛ efɔɔɔ kaa moŋ, shi kɛ wɔna okadi ko yɛ shinaa loo agbo ko hiɛ ni kɛ hiɛdɔɔ kpoɔ saramɔ ni kɔɔ jamɔŋ nifeemɔ he loo titri lɛ etsi̇̃ɔ Yehowa Odasefoi ata lɛ, no lɛ ebaafee nɔ ni hi akɛ wɔkɛ bulɛ aaaha shiatsɛ lɛ nibimɔ lɛ koni wɔkashi shinaa lɛ.

Bei komɛi lɛ wɔnaa okadi ko ni tsɔɔ akɛ nihɔɔlɔi akaba mli. Akɛni wɔ lɛ jamɔŋ ejurɔfeemɔ nii wɔtsuɔ hewɔ lɛ, no kɔɔɔ wɔhe. Ebaafee nɔ ni sa akɛ wɔɔshi shinaa lɛ. Kɛ shiatsɛ lɛ ekpɛlɛɛɛ lɛ, no lɛ wɔbaanyɛ wɔtsɔ ŋaa gbɛ nɔ wɔtsɔɔ nɔ hewɔ ni wɔnuɔ he akɛ okadi nii ni tamɔ enɛɛmɛi lɛ kɔɔɔ wɔhe lɛ mli wɔtsɔɔ. Kɛ shiatsɛ lɛ ha efee faŋŋ akɛ mɛi ni aguɔ yɛ nɛkɛ gbɛ nɔ lɛ kɔɔ Yehowa Odasefoi hu he lɛ, no lɛ wɔkɛ bulɛ baaha enibimɔi lɛ. Esa akɛ aŋma nɔ ko kɛ enɔ date ni akɛwo shikpɔŋ­kuku lɛ wolo kotoku lɛ mli bɔni afee ni shiɛlɔi ni baatsu nii yɛ shikpɔŋkuku lɛ mli wɔsɛɛ ko lɛ akabote nakai shia lɛ mli.

Shi kɛlɛ, esa akɛ wɔha ehi wɔjwɛŋmɔ mli akɛ esaaa akɛ akpoɔ nakai shia lɛ kwraa ni ayaaa jɛmɛ dɔŋŋ. Ekolɛ mɛi ni yɔɔ shia lɛ mli amrɔ nɛɛ baafã yɛ jɛi. Ekolɛ wɔbaana weku mlinyo kroko ni baabo toi kɛ miishɛɛ. Ekolɛ shiatsɛ ni wɔkɛ lɛ wie lɛ baatsake etsui ni ebaasumɔ babaoo akɛ wɔɔ­ba eŋɔɔ. No hewɔ lɛ, yɛ be ko sɛɛ lɛ, esa akɛ atsɔ ŋaa gbɛ nɔ atao nibii amli yɛ shiabii lɛ ahe koni ale bɔ ni amɛnuɔ he amɛhaa agbɛnɛ.

Esa akɛ aya nɔ akwɛ shikpɔŋkuku lɛ woji amli afi fɛɛ afi, koni akadi shiai ni akɛɛ wɔ akɛ wɔkabote mli lɛ ashwie shi. Abaanyɛ akɛ nitsumɔ awo shiɛlɔi ni he esa ni tsɔɔ ŋaa gbɛ nɔ amɛwieɔ lɛ adɛŋ koni amɛya shiai nɛɛ amli, yɛ sɔɔmɔ nɔkwɛlɔ lɛ gbɛtsɔɔmɔ shishi. Esa akɛ shiɛlɔi ale sane ni yɔɔ Reason­ing wolo lɛ baafai 15-24 ni hiɛ yitso akɛ “How You Might Respond to Potential Conversation Stoppers” lɛ. Kɛ ebo toi bɔ ni sa lɛ, no lɛ abaanyɛ aya eŋɔɔ be kroko taakɛ eji daa lɛ. Kɛ shiatsɛ lɛ ka he eete shi eewo lolo lɛ, no lɛ esaaa akɛ ayaa eŋɔɔ dɔŋŋ kɛyashi afi kroko ni baaba yɛ sɛɛ lɛ mli. Onukpai akuu ni yɔɔ akutso lɛ mli lɛ baanyɛ akpɛ amɛyiŋ amɛkwɛ kɛji shihilɛi ni kɔɔ sane ko he lɛ baaha efee nɔ ni hi akɛ aaatsu saji ahe nii yɛ gbɛ kroko nɔ lɛ.