Kwɛ Bɔ ni Sɛɛnamɔ Yɔɔ he Akɛ Wɔgba nɔ ni Yehowa Efee lɛ Wɔtsɔɔ!
1 Niŋmalɔ ni akɛ mumɔ tsirɛ lɛ ni eŋma Lala 48 lɛ wo mɛi ni yɔɔ Israel lɛ hewalɛ ni ‘amɛnyiɛ kɛbɔle Zion he, ni amɛkane emli mɔji lɛ, ni amɛtɛje amɛhiɛ amɛkwɛ egbogboi lɛ, koni amɛgba yinɔbii ni baa yɛ sɛɛ lɛ.’ Akɛni suɔmɔ ni amɛyɔɔ amɛha Yehowa lɛ tsirɛɔ amɛ hewɔ lɛ, amɛbaaná nakai teokrase nɔyeli shikwɛɛ he ni yɔɔ shikpɔŋ nɛɛ nɔ lɛ mli nɔ fɛɛ nɔ he miishɛɛ waa. Kwɛ bɔ ni nakai nibii lɛ ajara baawa aha, ejaakɛ maŋ nɛɛ ji maŋtiase ni Yehowa kɛ egbɛi efɔ nɔ! Amɛbaawie he, ni titri lɛ esa akɛ amɛkwɛ ni amɛha amɛshwiei anu nibii fɛɛ ni amɛkɛto amɛ diɛŋtsɛ amɛtsuii amli lɛ ahe saji.—Lala 48:13, 14.
2 Be ni wɔyɔɔ mli amrɔ nɛɛ ji be ni ato Yehowa Mesia teokrase nɔyeli ama shi, jeee yɛ shikpɔŋ nɔ Zion dɔŋŋ, shi yɛ ŋwɛi Yerusalem. (Heb. 12:22) Yehowa Maŋtsɛyeli ni yɔɔ Yesu Kristo dɛŋ lɛ eye nɔ aahu kɛjɛ 1914 kɛbaa. (Kpoj. 12:10) Wɔnaa nɔ ni etsuɔ lɛ he miishɛɛ waa fe nɔ fɛɛ nɔ. Wɔnaa miishɛɛ waa yɛ bɔ ni Yehowa enyiɛ etsuji ahiɛ yɛ shikpɔŋ nɛɛ nɔ koni amɛnyɛ amɛfee esuɔmɔnaa nii akɛ nakai Maŋtsɛyeli lɛ najiaŋdamɔlɔi ni anaa amɛ lɛ hu he. Awie otii ni yɔɔ miishɛɛ ni kɔɔ enɛ he lɛ ahe yɛ wɔwolo hee ni ji Jehovah’s Witnesses—Proclaimers of God’s Kingdom lɛ mli. Kwɛ bɔ ni wɔmli fili wɔ babaoo beni wɔnine shɛ nɔ yɛ “Ŋwɛi Nitsɔɔmɔ” Kpokpaa Wulu nɔ Kpee ni wɔfee nyɛsɛɛ nɛɛ shishi!
3 Beni shɛɔ September 1, 1993 lɛ, no mli lɛ ajie wolo lɛ kpo yɛ wiemɔi 20 mli momo, ni aatsu eshishitsɔɔmɔ kɛ efeemɔ he nii koni etsu mɛi ni wieɔ wiemɔi krokomɛi 13 ahiamɔ nii ahe nii. Ani oweku lɛ ehe eko? Ani nyɛmiikane? Ani owieɔ nibii ni okaseɔ yɛ mli lɛ ahe?
4 Kɛ amɛkwɛ mfonirii lɛ ni amɛkane amɛshishi niŋmaai lɛ amɛgbe naa, taakɛ awo he ŋaa yɛ kpee lɛ shishi lɛ, nyɛmimɛi hii kɛ yei lɛ ateŋ mɛi pii bɔiɔ wolo lɛ diɛŋtsɛ kanemɔ amrɔ nɔŋŋ. Mɛni amɛwie yɛ he? Naa emli fioo komɛi.
5 Nyɛmiyoo ko ŋma akɛ: “No pɛ ji wolo ni minine shɛ nɔ ni mihe miitswa shi waa ni makane magbe naa ni masaa makane ekoŋŋ. Mishɛ yitso 25 bianɛ. Babaoo ni mikaneɔ lɛ, babaoo ni yaafo nui hoɔ ni mitsui yiɔ obɔ kɛ suɔmɔ kɛha Yehowa ji no. Wolo lɛ woɔ mɔ hewalɛ ni ewajeɔ mɔ hemɔkɛyeli waa.”
6 Nyɛminuu ko ni kɛ nɔ ni fe afii 40 esɔmɔ Yehowa lɛ wie akɛ: “Kulɛ misusuuu kwraa akɛ wolo nɛɛ kanemɔ baaŋɔɔ waa. Mikaneɔ aahu kɛyashiɔ nyɔɔŋ teŋ ni miteɔ shi maŋkɛ mra ni mitsaa nɔ, ni mikane migbe naa yɛ otsii enyɔ mli. Yɛ anɔkwale mli lɛ, eji woji ni mikane ni kanyaa mɔ waa lɛ ateŋ ekome. Apɛi nibii amli waa ni akɛŋma, ni ewoɔ mɔ hewalɛ waa hu.”
7 Gbɛjianɔtoo Kɛha Ekanemɔ Daa: Mɛi ni kane wolo muu lɛ fɛɛ oya nɔŋŋ lɛ ekpɛ amɛyiŋ akɛ amɛbaakane ekoŋŋ, shi amɛbaaŋmɛ amɛtsui shi agbɛnɛ.
8 Kɛ jeee oweku lɛ mlibii lɛ ateŋ mɔ kome pɛ yɔɔ anɔkwale lɛ mli lɛ, no lɛ ekolɛ nyɛbaasumɔ ni nyɛkɛ wolo lɛ hei komɛi afee weku nikasemɔ. Wekui komɛi bɔi nakai feemɔ yɛ gbii fioo komɛi asɛɛ beni amɛnine shɛ eko nɔ yɛ kpee lɛ shishi lɛ. Enɛ etsɔɔɔ akɛ esa akɛ atsi nibii krokomɛi, tamɔ hesaamɔ kɛha Buu-Mɔɔ Nikasemɔ lɛ ato sɛɛ. Shi ekolɛ nyɛbaana akɛ ehe baaba sɛɛnamɔ waa kɛ nyɛkɛ minitii 15 loo 20 kroko fata he ni nyɛkɛkane Proclaimers wolo lɛ mli saji ni nyɛsusu he.
9 Wekui krokomɛi hu kaneɔ baafai enyɔ loo etɛ—ekolɛ yitso bibioo kome loo enyɔ—daa gbɛkɛ kɛ amɛye nii amɛgbe naa. Ekolɛ amɛkane wolo lɛ hei babaoo aŋkroaŋkro momo, shi amɛmiiná bɔ ni amɛŋmɛ amɛtsui shi amɛkaneɔ blɛoo kɛ hegbɛ ni amɛnaa amɛkɛsusuɔ emli saji ahe lɛ he sɛɛ waa. Mɛi ni feɔ nakai nɛɛ ateŋ mɛi pii kɛ afii babaoo esɔmɔ Yehowa. Beni amɛkaneɔ lɛ, ehaa amɛkaiɔ miishɛɛ bei komɛi ni eho. Ni amɛtsui nyaa beni amɛwieɔ gbɛfaŋnɔ ni amɛ diɛŋtsɛ amɛna yɛ nibii ni amɛkaneɔ he saji lɛ ahe kutuu lɛ.
10 Oshia mli shihilɛi komɛi ahewɔ lɛ, ekolɛ obaana akɛ okome pɛ okaneɔ onii. Nyɛmiyoo ko ni ŋma wolo ebaha Asafo lɛ wie akɛ: “Mikaneɔ wolo nɛɛ fiofio daa gbɛkɛ dani miyakãa shi miwɔɔ. Wolo nɛɛ miiha miina hiɛsɔɔ kɛ suɔmɔ ni mli kwɔ kɛha anɔkwale lɛ, ni minuɔ he akɛ mibɛŋkɛ Yehowa he kpaakpa, ni no hewɔ lɛ miida lɛ shi waa akɛ mifata egbɛjiantoo lɛ he. Yɛ anɔkwale mli lɛ, minaa baafa fɛɛ baafa ni mikaneɔ lɛ he miishɛɛ waa.”
11 Eyɛ mli akɛ wolo lɛ da moŋ, shi efai sɔrɔtoi lɛ daraaa. Shishijee fa lɛ tsɔɔ nibii ni ba kɛjɛ Habel beaŋ aahu kɛbashi afi 1992 mli, ni awie he kuku, shi ekanemɔ yɛ miishɛɛ hu—yɛ baafai 108 pɛ mli. Fãi krokomɛi lɛ afalɛ shɛɔ kɛjɛ baafai 13 kɛyashiɔ baafai 150. Ajara fãi nɛɛ eko fɛɛ eko mli awo yitsei babaoo shishi. No hewɔ lɛ, ní okɛ foi aaakane fɛɛ oya nɔŋŋ lɛ, ŋɔɔ fa kome, yitso kome, aloo yitso bibioo kome be fɛɛ be; na ekanemɔ he miishɛɛ; ni ona he sɛɛ.
12 Ŋɔɔ Be ni Okɛsusu nɔ ni Okaneɔ lɛ He: Mɛni baafee oti ni okɛma ohiɛ beni okaneɔ wolo lɛ? Esaaa ni baafai pii ni oookane—ni ogbe wolo lɛ naa oya—feɔ oti ni ma ohiɛ. Aŋmala mumɔŋ gboshinii ni ona lɛ ahe saji yɛ Proclaimers wolo lɛ mli. Esa akɛ ole saji lɛ jogbaŋŋ. Ŋɔɔ be ni okɛsusu nɔ ni nibii ni okaneɔ lɛ tsɔɔ lɛ he. Beni okaneɔ Yehowa blema odasefoi anitsumɔi ahe saji lɛ, susumɔ bɔ ni ooofee okase amɛhemɔkɛyeli lɛ he. (Heb. 12:1, 2) Kɛ okane hemɔkɛyeli kwamɔ kpele lɛ shishijee he saji lɛ, kadimɔ tɛmɔtɛi ni tsɔ mɛi ni ku amɛsɛɛ amɛtee lɛ tsɔne lɛ jogbaŋŋ, kɛ shishinumɔ akɛ no aaaha obu omumɔŋ shihilɛ he waa. Ni beni okaneɔ wɔ ŋmɛnɛŋmɛnɛ beaŋ yinɔsane hu lɛ, kadimɔ mumɔŋ sui ni mɛi ni Nyɔŋmɔ kɛ amɛ tsu nii lɛ yɔɔ, kɛ bɔ ni amɛha ana faŋŋ akɛ Nyɔŋmɔ suɔmɔnaa nifeemɔ ji nɔ ni he hiaa fe fɛɛ yɛ amɛshihilɛ mli, kɛ bɔ ni amɛfee amɛnii yɛ shihilɛi—ní ekomɛi amli wa waa—ní Nyɔŋmɔ ŋmɛ gbɛ lɛ amli lɛ.—Heb. 13:7.
13 Kɛ opɛi otii ni tsɔɔ bɔ ni Yehowa enyiɛ ewebii ahiɛ kɛtee Biblia anɔkwale ni wɔnaa mli ŋɔɔmɔ bianɛ lɛ he shishinumɔ ni yɔɔ faŋŋ mli lɛ amli lɛ, obaana akɛ ebaawaje ohemɔkɛyeli waa. Ni beni oleɔ bɔ ni gbɛjianɔtoo lɛ etee nɔ eha lɛ hu he saji jogbaŋŋ lɛ, hiɛsɔɔ ni oyɔɔ kɛha gbɛjianɔtoo ni anaa, ni Yehowa kɛtsuɔ nii lɛ hu baaya hiɛ. Ŋwanejee ko bɛ he akɛ obaana miishɛɛ waa hu beni okaneɔ bɔ ni sanekpakpa lɛ eshɛ shikpɔŋ lɛ naagbee hei tɔ̃ɔ, kɛwo gbalɛ obɔ lɛ. Anɔkwafoi ni yɔɔ je lɛŋ he fɛɛ he, ni kɛ ekaa etsu nii aahu ni amɛjaje Maŋtsɛyeli lɛ amɛtsɔɔ lɛ aniiashikpamɔi hu baaha otsui anya kɛ miishɛɛ. Ni ebaawaje bo koni onyɛ okpee kaai ni okɛkpeɔ lɛ anaa beni okaneɔ nɔ ni nyɛmimɛi hii kɛ yei anɔkwafoi enyɛ amɛdamɔ naa kɛho yɛ suɔmɔ ni amɛyɔɔ amɛha Yehowa lɛ hewɔ lɛ.
14 Kɛ nyɛkane wolo lɛ fã ko nyɛgbe naa lɛ, nyɛŋɔa be ni nyɛkɛsusua sɛɛnamɔ ni yɔɔ he lɛ he kutuu, ni nyɛtĩ emli otii lɛ amli. Kɛ nyɛyɛ bii bibii lɛ, nyɛhaa amɛ hu amɛwiea nɔ ni mfonirii lɛ tsɔɔ, ni amɛtsɔɔ nyɛ nɔ ni amɛle yɛ mɛi ni yɔɔ mli lɛ ahe. Kɛ okome okaneɔ po lɛ, bɔɔ mɔdɛŋ ni owie nɔ ni okaneɔ lɛ he otsɔɔ mɛi krokomɛi. Okɛ emli saji atsu nii yɛ sɛɛsaramɔ mli kɛ be mli ni ofeɔ shia Biblia mli nikasemɔ, yɛ be ni sa mli. Kɛ otĩ mli lɛ, ebaaha eka ojwɛŋmɔ kɛ otsui fɛɛ mli, ni mɛi krokomɛi hu baana he sɛɛ.
15 Na Emli Saji lɛ Ahe Miishɛɛ: Esa akɛ bei ni oto kɛha Proclaimers wolo lɛ kanemɔ lɛ afee nɔ ni yɔɔ miishɛɛ ni onaa he sɛɛ.
16 Ani bo kɛ oweku lɛ baasumɔ ni nyɛle Yehowa Odasefoi ajeŋ fɛɛ nitsumɔ he yitso lɛ jogbaŋŋ? Baafa 208-9 tsɔɔ tsui ni Asafo lɛ kɛtsu nii afii oha ni eho nɛ yɛ Pittsburgh. Baafa 216-7 haa oleɔ tsui ni akɛtsu nii yɛ sɛɛ mli yɛ Brooklyn. Mfonirii ni yɔɔ baafa 352-6 lɛ baanyɛ aye abua bo ni ona bɔ ni jeŋ muu fɛɛ nitsumɔ he yitso lɛ yɔɔ ŋmɛnɛ. Yitso 26 kɛ 27 wieɔ nitsumɔ ni atsuɔ yɛ Betel lɛ ahe, ni baafa 295-8 wieɔ Betel shihilɛ he saji babaoo efataa he.
17 Wɔteŋ mɛi pii nyɛɛɛ wɔyakwɛ Asafo lɛ nitsumɔ he niji lɛ pii. Proclaimers wolo lɛ baafa 357-401 kɛ wɔ yaa shishɛramɔ yɛ je lɛŋ fɛɛ. Ehe ehiaaa ni okɛ oyaiyeli akwɛ mli kɛkɛ. Hii shi be fioo ko yɛ shikpɔŋ fɛɛ shikpɔŋ he koni ona jɛmɛ he miishɛɛ. Kwɛmɔ je lɛ he mfoniri ni yɔɔ baafa 415-17 ni okɛtao hei nɛɛ fɛɛ. Kanemɔ nibii ni aŋmala yɛ nitsumɔ he niji sɔrɔtoi lɛ eko fɛɛ eko he lɛ. Obaanyɛ otsɔ emli saji ataomɔ he lɛ nɔ okɛna maŋ fɛɛ maŋ he saji krokomɛi hu ni yɔɔ miishɛɛ. Ŋɔɔ hegbɛ nɛɛ ni okɛle omumɔŋ weku lɛ mlibii krokomɛi ni yɔɔ maji krokomɛi anɔ.
18 Kɛ gbɔmɛi fee ekome yɛ shihilɛ mli lɛ, bei komɛi lɛ amɛshwɛɔ shwɛmɔi komɛi ni kɔɔ je lɛŋ nibii ahe nilee he. Ani ehe baŋ sɛɛnamɔ babaoo akɛ wɔɔle Yehowa webii ni yɔɔ ŋmɛnɛŋmɛnɛ beaŋ lɛ ayinɔsane mli gbii kɛ nibii komɛi ni ba ni sa kadimɔ jogbaŋŋ lɛ? Obaana anɔkwa saji nɛɛ babaoo ni ato naa yɛ Proclaimers wolo lɛ baafa 718-23. Nakai saji ni ato naa lɛ tsɔɔ bɔ ni afeɔ lɛ ahaa kɛkɛ; obaanyɛ okɛ wolo lɛ mli otii krokomɛi afata he. Okɛ enɛɛmɛi atsu nii akɛ nɔdaamɔ nɔ kɛha emlitii. Ekolɛ gbekɛbii ni yɔɔ weku lɛ mli lɛ baanyɛ akase awo amɛyitsoŋ oya. Ekolɛ wɔteŋ mɛi ni edara lɛ nyɛŋ wɔfee nakai. Shi teokrase yinɔsaji amli otii ni wɔ fɛɛ wɔɔna he sɛɛ kɛji wɔle lɛ ekomɛi nɛ. Kɛ okase gbii sɔrɔtoi lɛ kɛ anɔkwa saji ni kɔɔ he lɛ, agbɛnɛ tswaa oma nakai shishitoo lɛ nɔ. Kwɛmɔ akɛ mɛni okaiɔ yɛ saji sɔrɔtoi lɛ eko fɛɛ eko he. No sɛɛ lɛ wiemɔ gbɛfaŋnɔ ni nibii ni ba lɛ eko fɛɛ eko ná yɛ Nyɔŋmɔ suɔmɔnaa nifeemɔ mli lɛ he. Agbɛnɛ, nyɛsusua bɔ ni esaa nyɛ diɛŋtsɛ nyɛshihilɛ he ehaa kɛ bɔ ni nyɛbaa nɔ ni Yehowa feɔ lɛ mli nyɛhaa lɛ hu he.
19 Kwɛmɔ Hegbɛi ni Naa Egbele Eha Bo: Beni okaneɔ Jehovah’s Witnesses—Proclaimers of God’s Kingdom wolo lɛ ni osusuɔ he lɛ, obaana bɔ ni Yesaia 60:22 lɛ eba mli eha jogbaŋŋ diɛŋtsɛ. Wolo lɛ wieɔ yɛ baafa 519 akɛ: “Nakai shi ni awo akɛ ‘mɔ bibioo aaatsɔ mɛi akpe’ lɛ eba mli anɔkwale, ni eba mli kɛteke nɔ po! Yɛ maji ni fa fe 50, ni tsutsu ko lɛ ‘mɔ bibioo’ ko po bɛ mli—he ni afi 1919 mli lɛ, no mli lɛ Yehowa Odasefonyo ko kwraa bɛ—ni amɛtsuko shiɛmɔ nitsumɔ lɛ yɛ jɛmɛ kwraa lɛ ateŋ eko fɛɛ eko mli lɛ—ŋmɛnɛ, ayɛ Yehowa yijielɔi ni amɛyi fa fe akpe yɛ jɛmɛ. Yɛ maji nɛɛ ekomɛi amli lɛ, amrɔ nɛɛ ayɛ mɛi akpei nyɔŋmai abɔ, hɛɛ, Yehowa Odasefoi ni fa fe akpei oha, ni ji Nyɔŋmɔ Maŋtsɛyeli lɛ jajelɔi ni yɔɔ ekaa babaoo! Yehowa Odasefoi etsɔ ‘maŋ ni he wa’ yɛ jeŋ muu fɛɛ—kɛ hoo lɛ, amɛyi fa fe je lɛŋ maji ni yeɔ amɛ diɛŋtsɛ amɛhe nɔ lɛ amli 80 mli bii ayifalɛ aŋkroaŋkro, ni amɛji jeŋ muu fɛɛ asafo ni efee ekome.”
20 Nakai nitsumɔ ni ji Maŋtsɛyeli shweremɔ lɛ bako naagbee. Yɛ gbɛ kroko nɔ lɛ, Yehowa eha efee oya, bɔ ni anako nakai eko da. Nɛgbɛ obaana mli gbɛfaŋnɔ kɛyashɛ? Ani ole hegbɛi fɛɛ ni naa egbele eha bo lɛ lɛlɛŋ? Beni onaa oleɔ nɔ ni mɛi krokomɛi hu feɔ lɛ, eba akɛ eeetsirɛ bo diɛŋtsɛ otsui hu koni okɛ ohe aha ni ona nitsumɔ kpeteŋkpele ni wɔ-Nyɔŋmɔ ni yɔɔ suɔmɔ lɛ kudɔɔ kɛtsɔ Yesu Kristo nɔ yɛ wɔgbii nɛɛ amli lɛ mli gbɛfaŋnɔ kɛmɔ shi.